Caín tu Abel
4
1 Itzun bantz yi chiwitbel quib Adán tu txkel, tekal tzun Eva pwokil jun niꞌ. Yi titzꞌeꞌn yi jun niꞌaꞌtz nin oc biꞌ tetz Caín. Nintzun tal Eva: “Tan tuꞌ banl talmaꞌ Ryos ja jal jun tal wal yi xicy,” stzun iꞌ bantz. 2 Ej nin yi teleꞌn tiemp nin jal junt tal Eva, yi na biꞌaj Abel.Itzun yi chichꞌuyeꞌn yi cob tal Eva, pstor cneꞌr tzun ban tetz Abel, ma tetz Caín akꞌunwil ban wi cojbil. 3 Ma yi teleꞌn tiemp, nin ben tcyꞌal Caín jun oy swutz Kataj. Yi toy iꞌ iꞌtz wutz tetz tujul. 4 Nchaꞌtz Abel nin ben tcyꞌal jun oy swutz Kataj.a Yi tetz toy yi ben tcyꞌal iꞌtz cobox scyeri eꞌ bajx cyal eꞌ cneꞌr, poro yi eꞌ yi mas balaj. Ej wiꞌnin tzun stzatzineꞌn Kataj ban te Abel nin te yi tetz toy. 5 Ma tetz Caín quinin tzatzin Ryos teꞌj, pyor te yi toy. Nintzun jeꞌ swutz Caín, nin wiꞌnin ẍchiꞌcheꞌn cꞌuꞌl bantz. 6 Beneꞌn tzun jakol Kataj tetz “¡Caín! ¿Mbi na chiꞌch acꞌuꞌl teꞌj? ¿Mbiꞌtz na chukin awutz teꞌj? 7 Yi nink cxom te balaj xtxolbil, cẍtzatzink tzun. Poro tan paj yi qui na cxom teꞌj, list yi ayaꞌbl tan toqueꞌn tetz ajcaw tzaweꞌj. Poro nkꞌeꞌtz tajweꞌn tan xcyeweꞌn tzaweꞌj. Tin tuꞌ quiꞌt tzawakꞌ amaꞌl tetz,” stzun Ryos bantz tetz Caín.
8 Itzun bantz nin ben moxol Caín yi Abel tan chibeneꞌn tan xoꞌn xoꞌl wutz. Te yi na chixon, nintzun oc Caín tan biyleꞌn cuꞌn Abel yi titzꞌun.b
9 Itzun te yi nsken quim Abel tan Caín, nintzun jak Kataj tetz:
—¡Caín! ¿Naꞌ tzun atiteꞌt Abel yi awitzꞌun?
—Cuquen Taꞌ, qui na wil wetz. ¿Iẍkaj in tzunk qꞌuicyꞌlom te yi witzꞌun?
10 —¡Yaj! chin juntlen nin yi awajtzaꞌkl yi ncuꞌ anucꞌul. Na yi ẍchꞌel yi awitzꞌun yi mmeꞌl kojxuj wuxtxꞌotxꞌ, na tzan tan aẍochleꞌn tzinwutz.c 11 Chaꞌstzun te swakꞌeꞌ acaws. Tajweꞌn cẍeꞌl swutz yi txꞌotxꞌeꞌj yi ntzꞌubun yi ẍchꞌel awitzꞌun. 12 Ej nin mpe lok cẍoꞌc tan cojleꞌn wutz txꞌotxꞌ quiꞌt ltakꞌ balaj cosech tzatz. Jalt xoꞌn tzabneꞌ beneꞌn tziꞌn wi munt, nin quil cẍujeꞌ, stzun Ryos tetz Caín.
13 Stzaꞌwel tzun Caín yol Kataj:
—¿Ẍeꞌn lwulej Taꞌ? Quil chinxcyeꞌ tan mucꞌleꞌn yi incaws yi ntakꞌuꞌ swetz, na tajweꞌn tan weleꞌn tul yi amaꞌleꞌj, nin quiꞌc rmeril tan wilolt wutzuꞌ. 14 Jalt xoꞌn tzimbneꞌ beneꞌn tziꞌn. Quil naꞌtij tul junt amaꞌl, nin awer nak tzimbneꞌ kale naꞌt cuꞌnt. Alchok scyetz yil chinnoj quen swutz chinquimok taꞌn, stzun Caín bantz tetz Ryos.
15 Sajeꞌn tzun stzaꞌwel Kataj:
—Alchok scyetz yil tzꞌoc tan abiyleꞌn cuꞌn swakꞌeꞌ juk tir mas yi caws tzawutz, stzun Kataj bantz.
Toqueꞌn tzun jun techl Caín tan Kataj, bantz cyaꞌl jun tzꞌoc tan biyleꞌn cuꞌn. 16 Teleꞌn tzun Caín tul yi amaꞌl kale eꞌ jiloneꞌt tu Kataj. Choꞌn tzun toponeꞌn tan najeweꞌn tul yi amaꞌl yi na biꞌaj Nod. Yi jun amaꞌlaꞌtz choꞌn at swutzlen Edén.
Yi eꞌ xonl Caín
17 Itzun bantz, nintzun chiwitbej quib Caín tu txkel. Tekal tzun yi txkel pwokil jun niꞌ. Yi teleꞌn tiemp nin itzꞌij yi jun niꞌaꞌtz, nin oc biꞌ tetz Enoc. Yi pucꞌuneꞌn chiwutz yi eꞌ xonl Caín nin bnix jun tnum taꞌn. Enoc ban yi biꞌ yi tnumaꞌtz. I teꞌn biꞌ yi cyꞌajl Caín ja oc tkꞌol tetz biꞌ yi tnum. 18 Enoc yaꞌstzun taj Irad, Irad yaꞌstzun taj Mehujael, Mehujael yaꞌstzun taj Metusael, nin Metusael yaꞌstzun taj Lamec. 19 Cob txkel Lamec banak, Ada biꞌ jun, ma junt Zila biꞌ. 20 Yi Ada yaꞌstzun xtxuꞌ Jabal, ma yi jun Jabalaꞌtz yaꞌstzun chimam chiteꞌ yi eꞌ wunak yi mantial tuꞌ chicaꞌl, nin yi awunaꞌn wacẍ cyaꞌn. 21 Jal jun titzꞌun Jabal yi Jubal biꞌ. Yi Jubalaꞌtz yaꞌstzun yi ntxumun tetz yi bajx kbetz. Chaꞌstzun te yi oc iꞌ tetz chimam chiteꞌ taneꞌn cyakil yi eꞌ aj kbetzum, chi taneꞌn yi eꞌ yi na xconsan arpa tu eꞌchk jilwutz chirimiy. 22 Nchaꞌtz Zila yi caꞌp txkel Lamec, jal jun tal yi na biꞌaj Tubal-caín. Yi Tubal-caínaꞌtz iꞌ jun txakꞌol chꞌichꞌ banak. Ja xcon hierro taꞌn tu jun jilwutz chꞌichꞌ yi kꞌan yubil, yi na biꞌaj brons. Ej nin nchaꞌtz jal jun tanub Tubal-caín yi na biꞌaj Naama.
23 Inti Lamec nintzun ben tlol scyetz eꞌ txkel: “I bin jaluꞌ, na waj chinjilon tzitetz. At jun yaj yi ja quim waꞌn tan tuꞌ yi nchinqꞌuixpij taꞌn. Xicyeꞌt iꞌ, poro ja quim waꞌn tan tuꞌ yi nchinloꞌon muꞌẍ tal niꞌ taꞌn. 24 Talnak Ryos yi tzꞌakꞌlok juk tir chicaws yi eꞌ yil biyon cuꞌn Caín. Poro pyor cuꞌn yi eꞌ yil choꞌc tan imbiyleꞌn wetz, na yi in wetz swakꞌeꞌ oxcꞌal tu juklaj tir chicaws,” stzun Lamec bantz.
Yi titzꞌeꞌn yi toxiꞌn chinitxaꞌ Adán tu Eva
25 Itzun bantz nin chiwitbej quib Adán tu Eva. Tekal tzun pwokil Eva junt niꞌ. Yi titzꞌeꞌn yi niꞌ nin oc biꞌ iꞌ tetz Set. Itzun tal yi xnaꞌntz, “Ryos mmakꞌon junt waleꞌj, tetz xel Abel yi quimnak tan Caín.”
26 Itzun bantz, yi yajineꞌn Set nin jal jun cyꞌajl yi na biꞌaj Enós. Te yi at tzaj Enós wuxtxꞌotxꞌ, yaꞌstzun cyoqueꞌn tan xconseꞌn yi biꞌ “Jehová” tan naꞌwseꞌn Kataj Ryos.