Yi eꞌ xonl Adán
5
1 Cyakil yi eꞌchk biꞌajeꞌj yi kocopon tan xtxumleꞌn, eꞌ cuꞌn xonl Adán.Itzun yi bnixeꞌn cuꞌn yi bajx wunak tan Ryos, niꞌcuꞌn tulej chi taneꞌn iꞌ. 2 Yaj tu xnaꞌn eꞌ bnix taꞌn. Nin yi chibnixeꞌn, toqueꞌn tzun chibiꞌ takꞌun tetz Adán.a Nin takꞌ iꞌ banl squibaj.
3 Ma Adán, aꞌtij jun cient tu junaklaj yob yi ntaxk itzꞌij junt cyꞌajl iꞌ. I cunin yubil Adán cyꞌaꞌn taꞌn yi titzꞌeꞌn. Toqueꞌn tzun biꞌ yi jun niꞌaꞌtz taꞌn tetz Set. 4 Wajxakt cient yob aꞌtijt Adán yi nsken itzꞌij Set. Ej nin te yi tiempaꞌtz jaleꞌn nin ban mas nitxajil iꞌ. 5 Quimeꞌn nintzun ban Adán yi stzꞌakeꞌn beluj cient tu junaklaj yob taꞌn.
6 Ma Set, aꞌtij jun cient tu oꞌ yob yi ntaxk itzꞌij yi cyꞌajl yi na biꞌaj Enós. 7 Wajxakt cient tu juk yob aꞌtijt Set yi nsken itzꞌij yi cyꞌajlaꞌtz. Ej nin te yi jun tiempaꞌtz jaleꞌn nin ban mas nitxajil iꞌ. 8 Quimeꞌn nintzun ban Set yi stzꞌakeꞌn beluj cient tu coblaj yob taꞌn.
9 Ma Enós, aꞌtij jun mutxꞌ tu lajuj yob te yi ntaxk itzꞌij yi cyꞌajl yi na biꞌaj Cainán. 10 Wajxakt cient tu oꞌlaj yob aꞌtijt Enós te yi nsken itzꞌij Cainán. Ej nin te yi tiempaꞌtz jaleꞌn nin ban mas nitxajil iꞌ. 11 Quimeꞌn nintzun ban Enós yi stzꞌakeꞌn beluj cient yob taꞌn.
12 Ma Cainán nsken tzꞌak oxcꞌal tu lajuj yob yi titzꞌeꞌn yi cyꞌajl iꞌ yi na biꞌaj Mahalaleel. 13 Wajxakt cient tu caꞌwunak yob aꞌtijt Cainán yi nsken itzꞌij Mahalaleel. Ej nin te yi waxak cient tu caꞌwunak yobaꞌtz, jaleꞌn nin ban mas nitxajil iꞌ-tz. 14 Quimeꞌn nintzun ban Cainán yi stzꞌakeꞌn beluj cient tu lajuj yob taꞌn.
15 Ma Mahalaleel, aꞌtij oxcꞌal tu oꞌ yob yi ntaxk itzꞌijt yi cyꞌajl iꞌ yi na biꞌaj Jared. 16 Wajxakt cient tu junaklaj yob aꞌtij Mahalaleel yi nsken itzꞌij Jared nin te yi tiempaꞌtz jaleꞌn nin ban mas nitxajil iꞌ-tz. 17 Quimeꞌn nintzun ban Mahalaleel yi stzꞌakeꞌn waxak cient tu jun mutxꞌ tu oꞌlaj yob taꞌn.
18 Ma Jared, nsken tzꞌak jun cient tu oxcꞌal tu cob yob taꞌn yi titzꞌeꞌn yi cyꞌajl iꞌ yi na biꞌaj Enoc. 19 Wajxakt cient yob aꞌtijt Jared yi nsken itzꞌij Enoc, nin te yi tiempaꞌtz, jaleꞌn nin ban mas nitxajil iꞌ. 20 Quimeꞌn nintzun ban Jared yi stzꞌakeꞌn beluj cient tu oxcꞌal tu cob yob taꞌn.
21 Ma Enoc, aꞌtij oxcꞌal tu oꞌ yob te yi ntaxk itzꞌij yi cyꞌajl iꞌ yi na biꞌaj Matusalén. 22 Oxt cient yob aꞌtijt Enoc yi nsken itzꞌij Matusalén. Nin te yi tiempaꞌtz jaleꞌn nin ban mas nitxajil iꞌ. Ej nin te yi tiemp yi aꞌtij Enoc wuxtxꞌotxꞌ, xom iꞌ te tajbil Ryos. 23 Ox cient tu oxcꞌal tu oꞌ yob aꞌtij Enoc wuxtxꞌotxꞌ. 24 Poro qui nin quim, na tan tuꞌ yi xom iꞌ te tajbil Ryos ntxꞌakx cuntuꞌ, na Ryos icyꞌan nin iꞌ.b
25 Ma Matusalén, sken tzꞌak jun cient tu jun mutxꞌ tu juk yob taꞌn yi titzꞌeꞌn yi cyꞌajl iꞌ yi na biꞌaj Lamec. 26 Jukt cient tu jun mutxꞌ tu cob yob aꞌtijt Matusalén te yi sken itzꞌij Lamec. Nin te jun tiempaꞌtz jaleꞌn nin ban mas nitxajil iꞌ. 27 Quimeꞌn nintzun ban Matusalén yi stzꞌakeꞌn beluj cient tu oxcꞌal tu beluj yob taꞌn.
28 Ma Lamec, sken tzꞌak jun cient tu jun mutxꞌ tu cob yob taꞌn yi titzꞌeꞌn jun cyꞌajl. 29 Noéc tzun ban biꞌ takꞌun, na talnak Lamec: “Poꞌtnakt yi txꞌotxꞌ tan Kataj Ryos, chaꞌstzun te tajweꞌn tan kakꞌujeꞌn swutz tan kacꞌaꞌchal kib, poro tan yi jun niꞌeꞌj skujek taꞌn,” stzun Lamec bantz. 30 Oꞌt cient tu jun mutxꞌ tu oꞌlaj yob aꞌtijt Lamec yi nsken itzꞌij Noé. Nin tul yi jun tiempaꞌtz jaleꞌn nin ban mas nitxajil iꞌ. 31 Quimeꞌn nintzun ban Lamec yi stzꞌakeꞌn juk cient tu oxcꞌal tu juklaj yob taꞌn.
32 Ma Noé, yi stzꞌakeꞌn oꞌ cient yob taꞌn, kalenaꞌs tzun jaleꞌn ox cyꞌajl iꞌ yi na chibiꞌaj Sem, Cam nin Jafet.