Yi ẍeꞌn cuꞌn eꞌ ban wunak yi chipucꞌuneꞌn
6
1 Itzun bantz yi chipucꞌuneꞌn wunak wuxtxꞌotxꞌ, nintzun jal wiꞌnin chinitxaꞌ, nin wiꞌnin balaj xun ban ẍchixoꞌl. 2 Ej nin yi quilol yi eꞌ nitxajil Ryosa yi chumbalaj nin eꞌ xunaꞌtz, cyoqueꞌn tzuntz tan joyleꞌn yi cyajbil chixoꞌl tan cyokꞌbel quib scyuchꞌ. 3 Poro yi tilol Kataj Ryos, itzun taltz: “Ja wiꞌt icyꞌ impaj scyeꞌj cyakil wunak. Quiꞌt noꞌc il tan makleꞌn chiwutz na qui na choꞌc jakꞌ incaꞌwl. Ntin na cyakꞌ amaꞌl tetz cyajtzaꞌkl cachiꞌ. Iẍnin cuntunin ateꞌ jakꞌ caꞌwl yi tajbil chiwankil. Chaꞌstzun te, junt cuntuꞌ cient tu junak yob swakꞌeꞌ scyetz tan cyaꞌteꞌn wuxtxꞌotxꞌ.”4 Itzun bantz yi cyokꞌbel quib yi eꞌ nitxajil Ryosaꞌtz scyuchꞌ yi eꞌ xunaꞌtz, nintzun jal chinitxajil scyuchꞌ. Yi chinitxajilaꞌtz yi jal, chin wutz quikan nin eꞌ ban. Ej nin yi eꞌ nitxaꞌaꞌtz yi eꞌ jal, ilenin na kanaꞌwsaj, tantuꞌ yi mbi cuꞌn banakeꞌ tentz.
5 Itzun bantz yi tilol Ryos yi chin juntlen nin cyajtzaꞌkl cyakil wunak, yi ntin eꞌchk ajtzaꞌkl cachiꞌ na chitxum, 6 nintzun saj jun chin bis te talmaꞌ. Itzun taltz: “Quiꞌk eꞌ mbnix yi eꞌ wunakeꞌj waꞌn. 7 Baꞌn tcuꞌn chisotzok chicyakil cuꞌn waꞌn. Nin nchaꞌtz chicopon insotzal cyakil eꞌ jilwutz txuc. Chisotzok tircuꞌn waꞌn, na baꞌn tcuꞌn quiꞌck eꞌ cuꞌ imbnol.”
8 Ntin jun tal wunak yi tzatzin Kataj Ryos teꞌj, iꞌtz Noé.b
Yi mbi cuꞌn banak Noé
9 I bin jaluꞌ je xtxolbileꞌj te yi mbi cuꞌn banak Noé. Chumbalaj nin iꞌ banak, na nin xom iꞌ te caꞌwl Ryos. Ntin cuꞌn iꞌ jal cꞌulutxumil swutz Ryos.c
10 Ej nin eꞌ jal ox cyꞌajl. At jun na biꞌaj Sem, nin at junt na biꞌaj Cam, nin at junt yi Jafet biꞌ. 11-12 Chum balaj nintzun banak Noé swutz Ryos, ma yi eꞌ mas wunak chin juntlen nin cyetz cyajtzaꞌkl. Eꞌ len cuꞌn mal nak.
Itzun yi tilol Ryos yi mbi cunin na chitzan wunak tan banleꞌn, 13 nintzun ben tlol tetz Noé: “Ja wiꞌt bixeꞌ waꞌn tan chisotzajeꞌn cyakil wunak, na ntin na chibiy quib squibil quib. Chaꞌstzun te chicopon insotzal tuml cyakil jilwutz txuc tu cyakil eꞌchk takleꞌn yi at wuxtxꞌotxꞌ. 14 Ma aẍaꞌtz Noé, banaj jun xoꞌmbil wi aꞌ. Baꞌn xcon jun jilwutz tzeꞌ awaꞌn yi at kꞌolil. Nin banaj eꞌchk cuart tul yi jun xoꞌmbilaꞌtz. Ma yil bnix, tajweꞌn tzanojsaj yi ẍchubil tzeꞌ tan jun jilwutz kꞌol yi na biꞌaj brea, bantz quil tzꞌoc aꞌ tul. Okquen yi kꞌol awaꞌn tcꞌuꞌl, nin nchaꞌtz solteꞌj tan qui toqueꞌn aꞌ tul.
15 ”Ej nin je tzawulejeꞌj: Yi ẍkineweꞌn, jun cient tu junak oꞌlaj metr tzawulej. Ma yi wutz, junak cob metr tu niꞌc tzawulej. Ej nin oxlaj metr tu niꞌc tzawulej yi wutz tkan. 16 Ej nin ox chup tzawulej tcꞌuꞌl yi jun barcaꞌtz. Nin baꞌn tzaban jun wentanuꞌ tzakꞌ yi tzꞌujbil, takꞌun meꞌ war. Ej nin baꞌn tzaban jun puert xlaj.
17 ”Tajweꞌn tzaban yi jun xoꞌmbilaꞌtz na tzꞌul aꞌbal waꞌn wi munt tan chisotzajeꞌn cyakil wunak, nin cyakil txuc. Chicyakil cuꞌn ẍchiquimok yil noj beneꞌn tziꞌn wuxtxꞌotxꞌ tan aꞌ.
18 ”Ma aẍaꞌtz Noé, swaleꞌ jun xtxolbil tzatz. Ja wiꞌt imbixbaj yi xtxolbileꞌj tzawuchꞌ. Ẍclaxok waꞌn tuml anajal, na cẍocopon tul yi barc scyuchꞌ eꞌ acyꞌajl, tu awuxkel, scyuchꞌ eꞌ awulib. 19 Nchaꞌtz na waj yil choꞌc jujun lmuj txuc tziteꞌj le barc, jun mam nin jun tij. Na na waj yil chiclax, chi sbajok tziteꞌj itetz. 20 Tajweꞌn tan cyoqueꞌn jujun lmuj txuc tziteꞌj te cyakil jilwutz txuc yi at beneꞌn tziꞌn wi munt. Jujun lmuj scyeri eꞌ yi tetz awunaꞌn, nin jujun lmuj scyeri eꞌ yi tu na chijut nin quib wuxtxꞌotxꞌ. Yaꞌstzun wajbil, bantz quil chisotz yi txucaꞌtz. 21 Poro tajweꞌn cxoꞌc tan ẍchamleꞌn iwaꞌ, nin chiwaꞌ yi eꞌ txuc. Ej nin tajweꞌn tan acolol tul barc bantz quil xquimwok tan weꞌj,” stzun Ryos bantz tetz Noé.
22 Bnix cyakil eꞌchk takleꞌnaꞌtz tan Noé, quib yi talnak Kataj tetz.d