Yi cweꞌn muleꞌn jun chin wutzileꞌn aꞌbal
7
1 Itzun bantz yi teleꞌn tiemp nintzun tal Ryos tetz Noé: “Ma jaluꞌ Noé, ẍchixoꞌl cyakil wunak yi ateꞌ wuxtxꞌotxꞌ, ntin cuꞌn aẍ, aẍ balaj.a Nqueꞌn bin le barc cyuml eꞌ anitxaꞌ tu awuxkel nin eꞌ awulib. 2 Ma yi eꞌ txuc yi nkꞌeꞌtz xan, yi at cuj tan bajeꞌn itaꞌn, tajweꞌn tan cyoqueꞌn le barc tziteꞌj, juk chak lmuj te jujun jilwutz txucaꞌtz, ma yi eꞌ txuc yi xan tan bajeꞌn itaꞌn, choꞌken jun ntziꞌ lmuj awaꞌn te jujun jilwutz. 3 Nchaꞌtz yi eꞌ txuc yi na chixicyꞌin tcyaꞌj tajweꞌn choꞌc, juk chak lmuj te jujun jilwutz bantz chiclaxeꞌn. 4 Na le jukt kꞌej xeꞌtok aꞌbal waꞌn. Caꞌwunak kꞌej nin caꞌwunak akꞌbal sbneꞌ yi aꞌbalaꞌtz. Na yi wetz wajbil iꞌtz tan chisotzajeꞌn cyakil wunak nin cyakil txuc yi bnixnak waꞌn,” stzun Kataj Ryos bantz tetz Noé. 5 Ej nin quib yi talnak Ryos tetz, i nin tzun tulejtz.6 At Noé tul wukak cient yob yi cweꞌn yi jun chin aꞌbal tan nojseꞌn yi wuxtxꞌotxꞌ. 7 Toqueꞌn tzun iꞌ le barc tan colol tib tkꞌab yi aꞌbal, nin xomquen yi txkel teꞌj, scyuchꞌ eꞌ cyꞌajl tu quixkel.b 8 Nchaꞌtz eꞌ baj oc cyakil jilwutz txuc. Eꞌ oc yi eꞌ txuc yi at cuj tan chibajeꞌn cyaꞌn. Ej nin eꞌ oc yi eꞌ txuc yi quiꞌc cu tan chibajsal. Nchaꞌtz eꞌ oc yi eꞌ yi na chixicyꞌin tcyaꞌj nin yi eꞌ yi na chijut nin quib wuxtxꞌotxꞌ. 9 Quicobenleꞌn baj cyoqueꞌn takꞌun. Jun mam nin jun tij eꞌ baj octz taꞌn, i nintzun tulej iꞌ-tz, quib yi tal Ryos tetz. 10 Yi jeꞌmponeꞌn yi jukiꞌn keꞌj yi cyocomponeꞌn tul barc nintzun xeꞌtij yi aꞌbal wuxtxꞌotxꞌ.
11 Ja xeꞌtij yi jun aꞌbalaꞌtz te yi na xon Noé tul wukak cient yob, le juklaj tajlal yi caꞌp xaw te yi jun yobaꞌtz. Nintzun saj kojxuj wiꞌnin aꞌbal tcyaꞌj.c Nin nchaꞌtz jeꞌul mulkꞌuj wiꞌnin aꞌ xe mar. 12 Caꞌwunak kꞌej nin caꞌwunak akꞌbal ban yi aꞌbal. 13 Poro te iteꞌn nin kꞌejaꞌtz yi xeꞌteꞌn aꞌbal yaꞌstzun cyoqueꞌn Noé tu txkel le barc tu yi ox cyꞌajl yi na chibiꞌaj Sem, Cam nin Jafet. Nchaꞌtz eꞌ oc xomok yi quixkel yi eꞌ cyꞌajolaꞌtz. 14 Oqueꞌn nin eꞌ bantz scyuchꞌ cyakil eꞌ smaron txuc, nin cyakil txuc yi baꞌn tetz awunaꞌn. Nchaꞌtz eꞌ oc cyakil jilwutz txuc yi na chixicyꞌin tcyaꞌj, scyuchꞌ yi eꞌ txuc yi tu na chijut nin tu quib wuxtxꞌotxꞌ. 15 Quicobenleꞌn baj cyoqueꞌn cyakil jilwutz txucaꞌtz teꞌj Noé le barc. 16 Quib yi tal Kataj tetz Noé i nintzun tulej. Yi wiꞌt cyoqueꞌn cyakil, nintzun cuꞌ lamol Kataj yi puertil yi barc.
17 Caꞌwunak kꞌej nin caꞌwunak akꞌbal ban yi aꞌbal. Yi ẍchꞌuyeꞌn yi aꞌ wuxtxꞌotxꞌ nin jeꞌ palol yi barc. 18 Chꞌuyeꞌn nin ban yi aꞌ nin palij yi barc taꞌn. 19 Yi ẍchꞌuyeꞌn yi aꞌ ja xcyeꞌ tan jopleꞌn yi eꞌchk wutz yi chin wutz tkan nin. 20 Juk metr icyꞌ yi aꞌ tibaj yi eꞌchk wutzaꞌtz.
21 Yi bajeꞌn yi xtxolbilaꞌseꞌj, yaꞌstzun chiquimeꞌn cyakil wunak yi ateꞌ wuxtxꞌotxꞌ, nin yaꞌstzun chiquimeꞌn cyakil jilwutz smaron txuc, nin yaꞌstzun chiquimeꞌn cyakil txuc yi baꞌn tetz awunaꞌn scyuchꞌ yi eꞌ yi na chijut nin quib wuxtxꞌotxꞌ. 22 Cyakil yi wunakaꞌtz nin cyakil txucaꞌtz eꞌ baj quim len. 23 Ntinaꞌtz eꞌ, eꞌ clax yi eꞌ yi eꞌ oc tej Noé le barc. Ma yi eꞌ mas wunak eꞌ baj quim. Nchaꞌtz yi eꞌ mas smaron txuc, nin eꞌ mas txuc yi baꞌn tetz awunaꞌn eꞌ baj quim. Eꞌ baj quim yi eꞌ txuc yi na chixicyꞌin, scyuchꞌ yi eꞌ yi na chijut nin quib wuxtxꞌotxꞌ. 24 Xkancaꞌp tzun cient kꞌej aꞌtij aꞌ wi txꞌotxꞌ.