Yi makxeꞌn yi jun chun wutzileꞌn aꞌbal nin yi tajeꞌn cuꞌn yi aꞌ
8
1 Poro Noé scyuchꞌ yi eꞌ txuc yi ateꞌ tcꞌuꞌl yi barc, quinin eꞌ el te cꞌuꞌl Ryos. Chaꞌstzun te xtxumul iꞌ tan sajeꞌn jun cyekꞌekꞌ tan tajseꞌn cuꞌn yi aꞌ. 2 Nchaꞌtz yi aꞌbal, makxeꞌn nintzun bantz. Nin nchaꞌtz quiꞌct aꞌ jeꞌul mulkꞌuj xe mar. 3 Yi makxeꞌn eꞌch ẍchun aꞌ nsken el xkancaꞌp cient kꞌej cyakꞌun Noé tul barc, nintzun xeꞌtij yi aꞌ tan tajeꞌn cuꞌn. 4 Juklaj tajlal yi jukiꞌn xaw yaꞌstzun yi cweꞌn poneꞌn lajpuj yi barc tibaj jun scyeri eꞌchk wutz cwent luwar yi na biꞌaj Ararat. 5 Jun tzunin tajeꞌn cuꞌn yi aꞌ. Ej nin yi tucumuleꞌn yi bajx kꞌej te yi lajujiꞌn xaw sken tzun lajluchax wiꞌak wutz.6 Ẍchꞌiwal tzun Noé caꞌwunakt kꞌej. Kalenaꞌs tzun jeꞌn jakol yi wentanuꞌil yi barc. 7 Yi jakxeꞌn yi wentanuꞌ nintzun eltzaj stzakpul jun joj. Poro tunin na xicyꞌin cuntunin iꞌ-tz tcyaꞌj, tan ẍchꞌiweꞌn jalen yi skejeꞌn wuxtxꞌotxꞌ. 8 Yi sken eltzaj yi joj, nchaꞌtz nin eltzaj stzakpul Noé jun sluꞌk tan teleꞌn xtxum iꞌ tetz yi ko sken skej yi wuxtxꞌotxꞌ. 9 Poro tan paj yi iẍnin piꞌlij yi aꞌ wuxtxꞌotxꞌ, cyaꞌl nin jaleꞌt amaꞌl tan yi sluꞌk tan tujeweꞌn. Chaꞌstzun te nin opont junt tir kale eltzit tzakpuꞌn. Ej nin list Noé tan xtxobleꞌn quen junt tir tul barc.
10 Nintzun ẍchꞌiw Noé jukt kꞌej, kalenaꞌs tzun teleꞌnt stzakpul junt tir yi tal sluꞌkaꞌtz. 11 Yi teleꞌnt stzakpul sken nintzun cu kꞌej yi pakxeꞌnt junt tir. Cyꞌaꞌn jun tal xak oliw taꞌn yi tocomponeꞌn. Nin tan tuꞌ yi cyꞌaꞌn yi xak tzeꞌaꞌtz taꞌn, nin el xtxum Noé tetz yi tzan skejeꞌn wuxtxꞌotxꞌ. 12 Itzun te yi nsken ocopon junt tir yi tal sluꞌk, nintzun ẍchꞌiw Noé jukt kꞌej, kalenaꞌtz tzun teleꞌnt tzakpultz, poro quiꞌt pakxij yi tal sluꞌkaꞌtz.
13 Itzun bantz yi na xon tzaj Noé tul kak cient tu jun yob, yi bajx kꞌej te acꞌaj yob, teleꞌn tzun tcyꞌal iꞌ muꞌẍ wiꞌ yi barc. Yi teleꞌn taꞌn nintzun tiltz yi sken skej yi wuxtxꞌotxꞌ.
14 Itzun le junak juk tajlal te yi caꞌp xaw teri yobaꞌtz, nternin chin skejt ban yi wuxtxꞌotxꞌ. 15 Nintzun tal Kataj Ryos tetz Noé: 16 “Baꞌn cxeꞌlwok le barc jaluꞌ. Baꞌn tzꞌel awuxkel nin eꞌ anitxaꞌ scyuchꞌ eꞌ awulib. 17 Nchaꞌtz baꞌn cheꞌl yi eꞌ txuc yi ateꞌ tzaweꞌj le barc. Baꞌn cheꞌl chicyakil yi eꞌ yi baꞌn chixiquin, scyuchꞌ yi eꞌ yi baꞌn tetz awunaꞌn, nin baꞌn cheꞌl yi eꞌ yi tu na chijut nin quib wuxtxꞌotxꞌ. Tajweꞌn tan cyeleꞌn chicyakil bantz chibeneꞌn beneꞌn tziꞌn wuxtxꞌotxꞌ, na yi wajbil iꞌtz tan chipucꞌuneꞌn,” stzun Ryos bantz tetz Noé.
18 Cyeleꞌn tzaj tzun Noé le barc. Xomeꞌl tzaj yi txkel, cyuml yi eꞌ cyꞌajl scyuchꞌ eꞌ tlib. 19 Nchaꞌtz yi eꞌ txuc yi baꞌn tetz awunaꞌn, eꞌ baj eltzaj. Nchaꞌtz eꞌ smaron txuc eꞌ baj eltzaj. Ej nin eꞌ baj eltzaj yi eꞌ txuc yi tu na chijut nin quib, scyuchꞌ yi eꞌ txuc yi na chixicyꞌin. Chicyakil cuꞌn eꞌ baj eltzaj.
20 Toqueꞌn tzun Noé tan wekleꞌn cobox cꞌub tetz patbil chitxꞌixwatz. Yi bnixeꞌn nintzun eꞌ baj saj stzꞌamol Noé jujun scyeri eꞌ txuc yi baꞌn tetz chitxꞌixwatz. Ej nin pat Noé yi eꞌ txucaꞌtz tetz toy tetz Ryos. 21 Itzun yi toponeꞌn yi cꞌoꞌcal yi toy iꞌ swutz Kataj, nintzun tal Kataj tetz: “Quiꞌt noꞌc tan sotzajeꞌn cyakil eꞌchk takleꞌn yi at wuxtxꞌotxꞌ tan aꞌ tan chipaj eꞌ wunak, na yi eꞌ wunak, eꞌ cuꞌn juchul il yi chijuyil tzaj. Quiꞌt sotz junt tir yi eꞌchk takleꞌnaꞌtz waꞌn tan aꞌ tan chipaj. Nchaꞌtz eꞌ txuc, quiꞌt chisotz junt tir waꞌn, chi mimban te jun tireꞌj.
22 ”Jalen peꞌk atiteꞌt yi wuxtxꞌotxꞌ,
tzꞌocopon ujul nin sjalok cosech.
Sjalok jujun tiemp tzꞌaꞌ,
nin jujun tiemp cheꞌw.
Sjalok jujun tiemp aꞌbal,
nin jujun tiemp cresum.
Nchaꞌtz yi skꞌejl tu lakꞌbal,
iteꞌn nin sbneꞌ chi taneꞌn nin,”
chij Ryos bantz tetz Noé.