Yi acꞌaj xtxolbil yi tal Ryos tetz Noé
9
1 Ej nin nchaꞌtz takꞌ Ryos banl tib Noé scyuchꞌ eꞌ nitxajil tan yi yoleꞌj: “Sjalok wiꞌnin initxaꞌ bantz jaleꞌn wiꞌnin wunak beneꞌn tziꞌn wuxtxꞌotxꞌ.a 2 Cyakil jilwutz txuc yi at beneꞌn tziꞌn wi munt chocopon jak icaꞌwl. Ẍchixobok tzitetz. Yi eꞌ yi ateꞌ xe mar scyuchꞌ yi eꞌ yi na chixicyꞌin tcyaꞌj, chicyakil cuꞌn ẍchixobok tzitetz. 3 Swakꞌeꞌ amaꞌl tzitetz tan chibajseꞌn alchok scyetz scyeri eꞌ txucaꞌtz nin alchok jilwutz itzaj yi na el italmaꞌ teꞌj. 4 Ntinaꞌtz jun takleꞌn yi quiꞌc rmeril tan bajeꞌn itaꞌn, iꞌtz yi chichiꞌbel yi eꞌ txuc yi qui na el chiẍchꞌel yi na chiquim. Na yi stzꞌajbil jun txuc nka jun yaj choꞌn at le ẍchꞌel.b 5 Ej nin cyakil wunak, nin cyakil txuc yi na choꞌc tan biyleꞌn cuꞌn jun cyuchꞌ, banij cyetz chicawsaꞌtz waꞌn. Na alchok scyetz jun yil sbiy cuꞌn jun tuchꞌ, stakꞌeꞌ cwent tzinwutz nin banij tetz cawsaꞌtz waꞌn. 6 Alchok scyetz yil sbiy cuꞌn junt wunakc tajweꞌn yil cu biyij tetz, na axwok cuꞌn welblal. 7 Nchaꞌtz axwok itetz, baꞌn chijal wiꞌnin initxajil bantz chibeneꞌn loꞌon wunak beneꞌn tziꞌn wi munt,”d stzun Ryos bantz. 8 Nchaꞌtz tal Ryos tetz Noé scyuchꞌ eꞌ cyꞌajl: 9 “Bitwok tzaj. Ja bixeꞌ jun acꞌaj xtxolbil waꞌn tetz itetz. Poro nkꞌeꞌtz ntin tetz itetz ma na nchaꞌtz scyetz cyakil ixonl yi ẍchijalok tzantzaj. 10 Yi jun acꞌaj xtxolbilaꞌtz iꞌtz tetz itetz nin scyetz cyakil yi eꞌ txuc yi xomcheꞌ tziteꞌj yi ncxeꞌlwok tzaj le barc. Quiꞌc na ban mpe ik eꞌ txuc yi na chixicyꞌin, nka eꞌ txuc yi baꞌn tetz awunaꞌn. Quiꞌc na ban ko eꞌ smaron txuc nka quiꞌ, na yi jun acꞌaj xtxolbilaꞌtz yi ja bixeꞌ waꞌn iꞌtz tetz cyakil jilwutz txuc. 11 Ej nin quiꞌc rmeril tan xiteꞌn yi jun acꞌaj xtxolbilaꞌtz. Je xtxolbileꞌj: Ja wiꞌt bixeꞌ waꞌn yi quiꞌt noꞌc tan chisotzajeꞌn cyakil wunak tan aꞌ. Quiꞌt saj aꞌbal waꞌn tan sotzajeꞌn yi eꞌchk takleꞌn yi at wuxtxꞌotxꞌ. 12 Nin je jun techleꞌj tan ẍchajleꞌn tzitetz scyuchꞌ cyakil txuc yi neꞌlk cuꞌn te inyol. 13 Ja wiꞌt jeꞌ yi arco irise waꞌn tcyaꞌj, yaꞌstzun yi techl yi ja wiꞌt bixeꞌ jun xtxolbilaꞌtz waꞌn skaxoꞌl tzituchꞌ. 14 Ej nin sbneꞌ opon tunintz, yil smoltzaj tib sbakꞌ waꞌn, ilenin ẍchajeꞌ tib yi jun arco irisaꞌtz. 15 Ej nin cyakil tir yil ẍchaj tib, swileꞌ, nin tzꞌul txꞌakx tincꞌuꞌl yi xtxolbil yi ja wiꞌt bixeꞌ waꞌn skaxoꞌl tzituchꞌ, nin scyuchꞌ cyakil txuc. Quiꞌt tzun saj junt tir aꞌbal waꞌn tan isotzajeꞌn. 16 Yil ẍchaj tib yi arco iris tul sbakꞌ, tzꞌul tzun txꞌakxuj tincꞌuꞌl yi xtxolbil yi ja bixeꞌ waꞌn skaxoꞌl tzituchꞌ nin skaxoꞌl scyuchꞌ cyakil txuc yi ateꞌ beneꞌn tziꞌn wi munt. 17 Yi arco irisaꞌtz yaꞌstzun quiwel yi xtxolbil yi ja bixeꞌ waꞌn tzituchꞌ nin scyuchꞌ cyakil txuc yi ateꞌ wuxtxꞌotxꞌ,” stzun Ryos bantz.
Yi chibiꞌ eꞌ cyꞌajl Noé
18 Je chibiꞌ yi eꞌ cyꞌajl Noé yi eꞌ eltzaj teꞌj le barc: Sem, Cam, nin Jafet. Yi Camaꞌtz, yaꞌstzun taj Canaán. 19 Nin tan chixonl yi ox cyꞌajl Noé-aꞌtz, ja noj junt tir yi wuxtxꞌotxꞌ cyaꞌn wunak.
20 Itzun bantz yi xoneꞌn tiemp nintzun xeꞌtij Noé tan akꞌun wi cojbil, nin cu tawal jalaj uva. 21 Ej nin yi jaleꞌn wutz yi uva nintzun je tcꞌajal yi win yi bnix taꞌn te yi wutz uvajaꞌtz, nin oc aꞌ twiꞌ. Yi toqueꞌn aꞌ twiꞌ nintzun cyaj cutxlok nicyꞌal tal pach yi mantial tuꞌ. Quiꞌc beꞌch tetz at. 22 Ma Cam, yi taj Canaán, nintzun ben tilol yi cutxlij yi taj, nin quiꞌc yi beꞌch tetz. Teleꞌn tzaj tzun tan talcheꞌn scyetz Sem tu Jafet. 23 Yi quibital nintzun ben quicyꞌal jun xbuꞌk. Nin je nin chikꞌol wi chixulchub. Nin wutzcoquenleꞌn eꞌ beneꞌntz tuchꞌ tan jopleꞌn yi wankil prow chitaj. Yaꞌstzun eꞌ bantz tan qui quilol wankil iꞌ.
24 Itzun yi tuleꞌn yos tu Noé, nin yi tbital yi mbi cuꞌn ban yi ẍchꞌiꞌp, nintzun taltz:
25 “I bin jaluꞌ cawsok Canaán. Tzꞌocopon tetz chimos yi eꞌ mos yi eꞌ stzicy.”
26 Ej nin nchaꞌtz tal Noé: “Takꞌ tzaj Kataj Ryos yi banl tibaj Sem. Ma tetz Canaán, baꞌn tzꞌoc tetz mos iꞌ.
27 Ej nin nchaꞌtz nink takꞌ Ryos amaꞌl tetz Jafet tan beneꞌn loꞌon yi tetz xtxꞌotxꞌ. Ej nin snajank iꞌ ẍchixoꞌl yi eꞌ xonl Sem. Ma Canaán, mos tuꞌ Jafet sbneꞌ.”