Yi chixonl yi eꞌ cyꞌajl Noé
10
1 I bin jaluꞌ katxumeꞌ chixonl yi eꞌ cyꞌajl Noé. Yi nsken icyꞌpon yi jun chin wutzileꞌn aꞌbalaꞌtz, jaleꞌn nintzun ban chinitxajil yi eꞌ cyꞌajl Noé, yi Sem, Cam tu Jafet.2 Itzun yi eꞌ cyꞌajl Jafet, ja chibiꞌaj: Gomer, Magog, Madai, Javán, Tubal, Mesec tu Tiras. 3 Ma yi eꞌ cyꞌajl Gomer, yi bajx cyꞌajl Jafet, ja chibiꞌaj: Askenas, Rifat tu Togarma. 4 Ma yi eꞌ cyꞌajl Javán, yi cyajeꞌn cyꞌajl Jafet, ja chibiꞌaj Elisa, Tarsis, Quitim tu Rodanim. 5 Cyakil yi eꞌ biꞌajaꞌtz, eꞌ cuꞌn xonl Jafet banakeꞌ. Choꞌn najlcheꞌ cweꞌn tziꞌn tziꞌak mar. Ej nin at len chitnumil, nin apartchk len chiyol jujun txꞌakaj.
6 Ma yi eꞌ cyꞌajl Cam ja chibiꞌaj, Cus, Mizraim, Fut tu Canaán. 7 Ma yi eꞌ cyꞌajl Cus ja chibiꞌaj, Seba, Havila, Sabta, Raꞌama tu Sabteca. Ma yi eꞌ cyꞌajl Raꞌama yi cyajeꞌn cyꞌajl Cus ja chibiꞌaj, Seba tu Dedán. 8 Inti Cus, nchaꞌtz iꞌ taj Nimrod, yi bajx yaj yi moꞌc tetz ajcaw squibaj wunak. 9 Ej nin iꞌ jun chin wiꞌtz aj txuquinl tantuꞌ porer Kataj Ryos. Chaꞌstzun te na cyal wunak yi jun xtxolbileꞌj: “Takꞌ tzaj Kataj awajtzaꞌkl tan awoqueꞌn tetz jun wiꞌtz aj txuquinl chi banak kataj Nimrod,” cheꞌch tzun. 10 Bajx toqueꞌn iꞌ tan chicaweꞌn yi eꞌchk tnum yi na chibiꞌaj Babel, Erec, Acad tu Calne. Cyakil eꞌchk tnumaꞌtz choꞌn at le amaꞌl yi na biꞌaj Sinar. 11 Yi xoneꞌn tiemp ja cyaj cyen tilol Nimrod yi jun amaꞌlaꞌtz nin ja opon le luwar yi na biꞌaj Asiria kale ocnak iꞌ tan nucꞌleꞌn yi eꞌchk tnum yi na biꞌaj Nínive, Rehobot-Ir tu Cala. 12 Nchaꞌtz ocnak iꞌ tan nucꞌleꞌn yi chumam tnum yi na biꞌaj Resén, yi choꞌn at nicyꞌal yi tnum Nínive tu Cala.
13 Ma Mizraim, yi caꞌp cyꞌajl Cam, iꞌ chitaj yi eꞌ ludeo, yi eꞌ anameo, yi eꞌ lehabita, tu yi eꞌ naftuhita. 14 Nchaꞌtz yi Mizraimaꞌtz iꞌ chitaj yi eꞌ patruseo tu eꞌ casluhita, tu yi eꞌ caftorita, yi chimam chiteꞌ yi eꞌ filistey.
15 Ma Canaán, Sidón biꞌ yi bajx cyꞌajl iꞌ. Ma yi caꞌp cyꞌajl, Het biꞌ. 16 Nchaꞌtz yi eꞌ jebuseo, eꞌ amorreo, tu yi eꞌ gergeseo, 17 eꞌ heveo, eꞌ araceo, eꞌ sineo, 18 eꞌ arvadeo, eꞌ zemareo, scyuchꞌ eꞌ hamateo, eꞌ cuꞌn xonl Canaán. Ma yi xoneꞌn tiemp nintzun eꞌ ben loꞌon beneꞌn tziꞌn. 19 Yi chiluwar yi eꞌ xonl Canaánaꞌtz ja opon joylaj jalen yi amaꞌl cwent Gera. Ja xeꞌtij stziꞌ chitxꞌotxꞌ le tnum yi na biꞌaj Sidón, ej nin ja opon tampuj te yi tnum yi na biꞌaj Gaza. Ej nin yi ja icyꞌak mojomil chitxꞌotxꞌ nakajil yi eꞌchk tnum yi na biꞌaj Sodoma, Gomorra, Adma tu chitanum yi eꞌ aj Zebo, jalen yi mpon tampuj te yi tnum Lasa. 20 Cyakil yi eꞌ wunakaꞌtz yi ja kil chibiꞌ, eꞌ cuꞌn xonl Cam. At len chitnumil nin apart chak len chiyol jujun txꞌakaj.
21 Ma Sem, yi stzicy Jafet, nchaꞌtz jal nitxajil iꞌ. Na cyakil yi eꞌ xonl Heber eꞌ cuꞌn xonl Sem. 22 Ma chibiꞌ yi eꞌ cyꞌajl Sem iꞌtz Elam, Asur, Arfaxad, Lud tu Aram. 23 Ma yi eꞌ cyꞌajl Aram iꞌtz Uz, Hul, Geter tu Mas. 24 Ma Arfaxad, jun scyeri yi eꞌ cyꞌajl Sem, iꞌ taj yi yaj yi na biꞌaj Sala. Ma Sala iꞌ taj Heber. 25 Ma Heber ja chijal cob tetz nitxajil. Yi jun na biꞌaj Peleg.a Ej nin ja oc yi jun biꞌajaꞌtz, yi titzꞌeꞌn, na yaꞌs tzun tiemp yi cweꞌn chijatxol quib eꞌ wunak wi munt. Ma yi junt cyꞌajl Heber na biꞌaj Joctán. 26 Ej nin yi Joctánaꞌtz, iꞌ chitaj yi eꞌ wunakeꞌj: Almodad, Selef, Hazar, Mavet, Jera, 27 Adoram, Uzal, Dicla, 28 Obal, Abimael, Seba, 29 Ofir, Havila tu Jobab. Cyakil cuꞌn yi eꞌ wunakaꞌtz eꞌ cuꞌn nitxajil Joctán. 30 Choꞌn chinajeweꞌn le amaꞌl yi na icyꞌpon nin cwent Mesa, jalen le amaꞌl cwent Sefar. Yi jun amaꞌlaꞌtz choꞌn at jalen lilen tziꞌn, nin wiꞌwtz cunin cyakil luwar. 31 Cyakil yi eꞌ wunakaꞌtz yi ja kil chibiꞌ eꞌ cuꞌn xonl Sem. At len chitnumil. Ej nin apart chak len chiyol.
32 Cyakil yi eꞌ najalaꞌtz yi ja wiꞌt kil, eꞌ cuꞌn xonl yi eꞌ cyꞌajl Noé. Nin yi eꞌchk luwaraꞌtz yi ja wiꞌt kil yaꞌstzun cyetz chitnumil kale najlcheꞌt. Na yi nsken wiꞌt cu yi jun chin wutzileꞌn aꞌbalaꞌtz tan Ryos ja chiben loꞌon yi eꞌ chixonl yi eꞌ cyꞌajl Noé beneꞌn tziꞌn. Tan tuꞌ eꞌ, ja jal cyakil jilwutz wunak yi ateꞌ wi munt jaluꞌ.