Yi muyc kale cweꞌt sukꞌij chiyol wunak
11
1 Itzun bantz le xeꞌtzbil tzaj, junit chiyol cyakil wunak. 2 Ej nin yi cyeleꞌn tzaj lilen tziꞌn, jal jun chin ẍkꞌajlaj cyaꞌn le amaꞌl cwent Sinar. Yaꞌstzun eꞌ aꞌteꞌtz.3 Itzun bantz nintzun cyal cobox squibil quib: “Kabneꞌ lagris nin baꞌn kapat.” Ej nin yi bnixeꞌn cyaꞌn ja xcon tetz xel cꞌub tan banleꞌn chicaꞌl. Nchaꞌtz ja xcon jun jilwutz ẍpupuꞌ cyaꞌn tetz ẍchib lagris. 4 Yi xoneꞌn tiemp at eꞌ cyal: “Or itetz kabneꞌ jun chin tnum nin jun chin wutzileꞌn muyc tzoneꞌj, yil jepon jalen tziꞌn tcyaꞌj. Sjalok wiꞌnin kakꞌej taꞌn. Ej nin qui tajweꞌn tan keleꞌn xit beneꞌn tziꞌn wi munt.”
5 Inti Ryos nin cuꞌul tan xmayeꞌn yi jun tnumaꞌtz tu yi jun chin muyc yi na chitzan wunak tan banleꞌn. 6 Toqueꞌn tzun iꞌ-tz tan xtxumleꞌn, nintzun taltz: “Tampaj yi junit eꞌ, nin junit chiyol, ja choꞌc tan banleꞌn yi akꞌuneꞌj. Nin cyaꞌl jun yi nink xcyeꞌ tan xiteꞌn chitxumuꞌn. 7 Baꞌn tcuꞌn kacuk ẍchixoꞌl tan sukꞌleꞌn cuꞌn chiyol, bantz quiꞌt tzꞌel chitxum squibil quib.”
8 I nintzun tulejtz. Ej nin cyaj cyen quilol yi akꞌun tan banleꞌn yi jun muycaꞌtz, na quiꞌt na el chitxum tetz chiyol squibil quib. Ej nin eꞌ el xit beneꞌn tziꞌn wiꞌ munt tan Kataj Ryos. 9 Yaꞌstzun cweꞌn sukꞌul Kataj chiyol cyakil wunak. Ej nin yaꞌstzun yi cyeleꞌn xit beneꞌn tziꞌn wi munt. Chaꞌstzun te ja oc biꞌ yi jun tnumaꞌtz tetz Babel.a
Yi eꞌ xonl Sem
10 Je tzun yi eꞌ xonl Sem banakeꞌ. Te yi nsken el cobix yob yi ticyꞌleꞌnix yi jun chin wutzileꞌn aꞌbalaꞌtz, at tzun Sem tul jun cient yob. Ej nin yaꞌstzun yi titzꞌeꞌn yi cyꞌajl yi na biꞌaj Arfaxad. 11 Aꞌtij Sem oꞌ-t cient yob yi nsken itzꞌij Arfaxad. Ej nin tul yi jun tiempaꞌtz eꞌ jal mas nitxajil iꞌ.
12 At Arfaxad tul junak oꞌlaj yob yi titzꞌeꞌn Sala yi cyꞌajl iꞌ. 13 Nin aꞌtij cyaj cient tu oxt yob, nin tul yi tiempaꞌtz eꞌ jal mas nitxajil iꞌ.
14 At Sala tul junaklaj yob yi titzꞌeꞌn Heber yi cyꞌajl. 15 Nin aꞌtij cyaj cient tu oxt yob, nin tul yi tiempaꞌtz eꞌ jal mas nitxajil iꞌ.
16 At Heber tul junak cyajlaj yob yi titzꞌeꞌn Peleg yi cyꞌajl iꞌ. 17 Nin aꞌtij cyaj cient tu junaklajt yob, nin tul yi tiempaꞌtz eꞌ jal mas nitxajil iꞌ.
18 At Peleg tul junaklaj yob yi titzꞌeꞌn Reu yi cyꞌajl iꞌ. 19 Nin aꞌtij cob cient tu belujt yob, nin te yi tiempaꞌtz eꞌ jal mas nitxajil iꞌ.
20 At Reu tul junak coblaj yob yi titzꞌeꞌn Serug yi cyꞌajl iꞌ. 21 Nin aꞌtij cob cient tu jukt yob, nin tul yi tiempaꞌtz eꞌ jal mas nitxajil iꞌ.
22 At Serug tul junaklaj yob yi titzꞌeꞌn Nacor yi cyꞌajl iꞌ. 23 Nin aꞌtij cobt cient yob, nin tul yi tiempaꞌtz eꞌ jal mas nitxajil iꞌ.
24 At Nacor tul junak beluj yob yi titzꞌeꞌn Taré yi cyꞌajl iꞌ. 25 Nin aꞌtij jun cient tu belujt yob, nin tul yi tiempaꞌtz eꞌ jal mas nitxajil iꞌ.
26 At Taré tul oxcꞌal tu lajuj yob yi quitzꞌeꞌn yi eꞌ nitxajil yi na chibiꞌaj: Abram, Nacor, tu Harán.
Yi eꞌ xonl Taré
27 I bin jaluꞌ je chibiꞌ eꞌ xonl Taré yi chitaj Abram, Nacor tu Harán, yi taj Lot. 28 Yi Haránaꞌtz bajx quimeꞌn iꞌ swutz yi taj, na choꞌn quimeꞌn iꞌ le amaꞌl Ur, cwent eꞌ caldeo, kale itzꞌeꞌt iꞌ.
29 Ma Abram umeweꞌn nin eꞌ bantz tu Sarai. Nin nchaꞌtz Nacor umeweꞌn nin eꞌ bantz tu Milca, yi meꞌl Harán, yi stzicy Isca. 30 Ma yi Sarai, yi txkel Abram, qui nin jal tal, na quiꞌc talbil iꞌ.
31 Inti yi Taré nin cyaj tilol yi tnum Ur, cwent eꞌ caldeo, tan beneꞌn le amaꞌl yi na biꞌaj Canaán. Ej nin el tcyꞌal yi cyꞌajl yi Abram, tu Lot yi mam iꞌ, nin nchaꞌtz Sarai yi tlib. Poro yi cyoponeꞌn le tnum Harán, taneweꞌn nintzun eꞌ bantz te chipyaj. Ej nin yaꞌstzun eꞌ najeweꞌtz. 32 Choꞌn tzun quimeꞌn Taré-tz le amaꞌlaꞌtz. At iꞌ tul cob cient tu oꞌ yob yi quimeꞌn.