Yi jeꞌn xtxaꞌol Ryos Abram
12
1 Itzun bantz yi teleꞌn tiemp nintzun jilon Ryos tetz Abram.a Itzun taltz: “Il cyen yi atanum. Nchaꞌtz il cyen yi najbil ataj. Ilweꞌ cyen yi axonl. Ej nin tzinchajeꞌ junt amaꞌl tzatz kale cẍaꞌt cuꞌnt. 2 Tan ara axonl, tzimbneꞌ jun chumam tnum.b Swakꞌeꞌ imbanl tzawibaj nin sjalok akꞌej. Ej nin tan aẍ tu jun ara axonlc sjalok chibanl cyakil jilwutz wunak wi munt. 3 Swakꞌeꞌ imbanl squibaj yi eꞌ yil cyakꞌ akꞌej, nin swakꞌeꞌ imbanl squibaj yi eꞌ yil cyakꞌ keꞌj axonl. Cheꞌ incawseꞌ chicyakil yi eꞌ yil choꞌc tan telseꞌn akꞌej scyuchꞌ yi eꞌ axonl. Ej nin tan aẍ lwakꞌwit imbanl squibaj cyakil jilwutz wunak beneꞌn tziꞌn wi munt.” 4 I nintzun tulej Abram quib yi tal Ryos tetz. Nin cyaj cyen tilol yi luwar. At iꞌ tul nicyꞌ cient tu junak oꞌ yob yi cyajeꞌn cyen tilol yi jun luwaraꞌtz, tan toponeꞌn Canaán. Xomij Sarai yi txkel teꞌj tu Lot yi cyꞌajl yi stzicy. 5 Nchaꞌtz el tzaj tcyꞌal cyakil meꞌbiꞌl scyuchꞌ cyakil yi eꞌ mos yi ateꞌ tuchꞌ, yi eꞌ mosaꞌtz yi eꞌ oc jakꞌ caꞌwl iꞌ te yi at tzaj iꞌ le tnum Harán.
6 Yi cyoponeꞌn Canaán eꞌ icyꞌak tcꞌuꞌl wiꞌnin amaꞌl, jalen yi cyoponeꞌn nakajil yi tnum yi na biꞌaj Siquem. Choꞌn tzun cyaꞌteꞌn xe jun wiꞌ bakch yi at wi jun ẍkꞌajlaj yi na biꞌaj More. Yi jun wiꞌ tzeꞌaꞌtz chin xan nin. Te yi jun tiempaꞌtz najlcheꞌ yi eꞌ aj Canaán tul cyakil yi amaꞌlaꞌtz. 7 Ej nin yaꞌstzun yi amaꞌl kale ẍchaj wit tib Ryos swutz Abram. Itzun taltz: “Cyakil yi amaꞌleꞌj swakꞌeꞌ scyetz eꞌ axonl,”d stzun Ryos bantz tetz. Tantuꞌ yi ẍchajol tib Ryos swutz Abram nintzun oc iꞌ tan nucꞌleꞌn jun patbil xtxꞌixwatz tan tkꞌol kꞌajsbil tetz Ryos.
8 Itzun bantz yi xoneꞌn tiemp nin cyaj cyen tilol Abram yi jun amaꞌlaꞌtz. Choꞌn tzun toponeꞌntz wiꞌwtz, swutzlen yi tnum Betel. Yaꞌstzun jeꞌt nucꞌult yi tetz mantial. Choꞌn tzun cyajeꞌn cyen yi tnum Hai swutzlen yi jun luwaraꞌtz. Ej nin yaꞌstzun eꞌ cweꞌt tetz cobox kꞌej. Nin oc Abram tan nucꞌleꞌn junt patbil xtxꞌixwatz tetz Kataj Ryos. Ej nin octz tan naꞌwseꞌn biꞌ iꞌ. 9 Chebeleꞌn cuntuꞌ tzun quicyꞌeꞌn Abram jalen cyoponeꞌn le amaꞌl yi na biꞌaj Néguev.
Yi toponeꞌn Abram Egipto
10 Itzun bantz te yi jun tiempaꞌtz, nintzun cuꞌ jun chin wutzileꞌn weꞌj. Quiꞌc muꞌẍ tal chiwaꞌ yi wunak jal. Chaꞌstzun te eꞌ ben Abram jalen Egipto tan najeweꞌn tetz cobox tiemp. 11 Te yi txant tan cyocomponeꞌn jalen Egipto, nintzun tal Abram tetz Sarai yi txkel: “Sarai, na el intxum tetz yi aẍ jun xnaꞌn yi chin yubeꞌn nin. 12 Ej nin yil quil yi eꞌ aj Egipto ayubil scyaleꞌ: ‘I jun chin xnaꞌneꞌj, yaꞌstzun txkel nocxeꞌj,’ cheꞌch sbneꞌ. Ej nin chocopon tzun tan imbiyleꞌn cuꞌn bantz acyajeꞌn cyentz chikꞌab. 13 Ma jaluꞌ tan qui inquimeꞌn cyaꞌn, banaj pawor tan talcheꞌn scyetz yi kitzꞌun kutzicy kib tzawuchꞌ,”e stzun Abram bantz. 14 Yi cyoponeꞌn Abram Egipto, nintzun quil yi eꞌ aj Egipto yi chin yubeꞌn nin Sarai. 15 Nchaꞌtz quil yi eꞌ mas ajcaw xlaj yi faraón, yi chireyil yi eꞌ aj Egipto, yi chin yubeꞌn nin Sarai. Chibeneꞌn tzuntz tan talcheꞌn tetz yi chin yubeꞌn nin yi jun xnaꞌn yi xomij te Abram. Nintzun ben quicyꞌaltz xe caꞌl rey.
16 Tantuꞌ yi toqueꞌn kloꞌ Sarai tetz txkel yi rey nintzun toy iꞌ wiꞌnin eꞌchk takleꞌn tetz Abram, wiꞌnin cneruꞌ, wiꞌnin wacẍ, nin wiꞌnin buruꞌ scyuchꞌ camey. Nchaꞌtz toy iꞌ wiꞌnin yaj tu xnaꞌn tetz mos Abram. 17 Poro nchaꞌtz tan paj yi toqueꞌn kloꞌ Sarai tetz txkel yi rey ja takꞌ Ryos jun chin wutzileꞌn yaꞌbil tetz, tuml najal iꞌ. 18 Chaꞌstzun te nin ben mantar rey tan ẍchakleꞌn Abram. Itzun taltz: “¿Nxac ncuꞌ atxumul yi jun awajtzaꞌkleꞌj? ¿Nxac qui mawal yi mero bintzi swetz yi ko awuxkel yi jun chin xnaꞌneꞌj? 19 Na je bin awaleꞌj: ‘Wanub tuꞌ iꞌ.’ Chaꞌstzun te mmoꞌc kloꞌ iꞌ tetz wuxkel. Ma jaluꞌ je awuxkeleꞌj. Cyꞌaj nin. Quiteleꞌnk wok.” 20 Cawuneꞌn tzun yi rey scyetz eꞌ ẍchakum tan cyeleꞌn chilajul Abram tu txkel tuml cyakil yi at tuchꞌ le tnum Egipto.