Yi chijatxol quib Abram tu Lot
13
1 Itzun bantz yi teleꞌn tzaj Abram Egipto tu txkel, tu cyakil yi meꞌbiꞌl, nintzun eꞌ opontz junt tir le amaꞌl Néguev. Nchaꞌtz Lot yi titzꞌun xomnin teꞌj. 2 Ma yi Abram chin ric nin iꞌ. At or tuchꞌ. At sakal tuchꞌ. Ej nin wiꞌnin tawun iꞌ. 3 Ma yi teleꞌn tiemp nintzun cyaj cyen tilol yi amaꞌl Néguev. Ej nin chebcun tuꞌ toponeꞌnt le tnum Betel. Itzun yi teleꞌntz le tnum Betel nintzun opontz junt tir le amaꞌl xoꞌl Betel tu Hai, kale atit tzaj iꞌ yi ntaxk ben Egipto. 4 Yi jun amaꞌlaꞌtz yaꞌstzun yi amaꞌl kale mbnixnakit yi jun patbil xtxꞌixwatzaꞌtz taꞌn. Yi toponeꞌn, nintzun oc iꞌ tan naꞌwseꞌn biꞌ Kataj Ryos.5 Ej nin nchaꞌtz Lot, chin ric nin iꞌ. Niꞌcuꞌn riquil iꞌ tu wutzileꞌn Abram yi xonl iꞌ.a At wiꞌnin cneruꞌ, wiꞌnin wacẍ. Ej nin nchaꞌtz wiꞌnin mos xomcheꞌ teꞌj. 6 Poro yi luwar kale najlcheꞌt tu Abram qui nin xcyeꞌ tan takꞌleꞌn chiwaꞌ cyakil cyawun. 7 Chaꞌstzun te quiꞌt jal puntil tan chinajeweꞌn junit, na yi eꞌ pstor Abram tu yi eꞌ pstor wacẍ Lot chilab quib. Wech te yi jun tiempaꞌtz najlcheꞌt nin yi eꞌ aj Canaán scyuchꞌ yi eꞌ ferezeo yi eꞌ chicontr Abram tu Lot. 8 Beneꞌn tzun talol Abram tetz Lot: “I bin jaluꞌ Lot, kaxonl cunin kib tzawuchꞌ, chaꞌstzun te qui na yub ko at oyintziꞌ skaxoꞌl, nin ẍchixoꞌl ara pstor scyuchꞌ yi eꞌ wetz. 9 Jeꞌj, ilnin cyakil yi amaꞌleꞌj. Banaj pawor, txaꞌaj yi awajbil tan kajatxol kib tzawuchꞌ. Ko na awaj cẍben toqueꞌn tziꞌn, baꞌn tzun naꞌj wetz teleꞌn tziꞌn. Ko na awaj cẍben teleꞌn tziꞌn, naꞌj wetz toqueꞌn tziꞌn,” stzun Abram bantz.
10 Beneꞌn tzun xmayil Lot yi ẍkꞌajlaj kale na icyꞌak cuꞌnt yi aꞌ Jordán. Yi jun ẍkꞌajlajaꞌtz wiꞌnin aꞌ tul, nin chin yubeꞌn nin.b Ej nin cyakil yi luwaraꞌtz jalen le tnum Zoar niꞌcuꞌntz chi i cunink cojbil Ryos. Niꞌcuꞌn yi jun amaꞌlaꞌtz chi taneꞌn yi balaj amaꞌl Egipto. Yaꞌstzun taneꞌn yi jun luwaraꞌtz te yi ntaxk cu xitul Ryos yi amaꞌl Sodoma tu Gomorra. 11 Jeꞌn tzun xtxaꞌol Lot yi jun ẍkꞌajlajaꞌtz kale na icyꞌak cuꞌnt yi aꞌ Jordán. Choꞌn tzun tajeꞌn tetz Lot jalen lilen. Ma yi Abram, choꞌn tzun cyajeꞌn cyentz Canaán nicyꞌ yi cweꞌn chijatxol quib tu Lot. 12 Ma tetz Lot, choꞌn tzun tajeꞌntz tan najweꞌn nakajil Sodoma, ẍchixoꞌl yi eꞌ aldey yi ateꞌ wi ẍkꞌajlajaꞌtz. 13 Poro yi eꞌ wunak yi najlcheꞌ wi jun ẍkꞌajlajaꞌtz, chin mal nin eꞌ. Chin wiꞌtz juchul il nin eꞌ swutz Ryos.
14 Itzun bantz, te yi nsken wiꞌt aj Lot, nintzun jilon Kataj Ryos tetz Abram. Itzun taltz: “I bin jaluꞌ Abram, xmaynin jeꞌn tziꞌn, nin cweꞌn tziꞌn. Ej nin xmaynin teleꞌn tziꞌn nin toqueꞌn tziꞌn. 15 Cyakil yi amaꞌleꞌj yi na axmaynin, swakꞌeꞌ tzatz nin scyetz eꞌ ara axonl tetz ben kꞌej ben sak.c 16 Jepon tajlal ara axonl waꞌn chi taneꞌn yi tajlal yi samlicyꞌ yi at wuxtxꞌotxꞌ. Cyaꞌl nin jun na xcyeꞌ tan tajleꞌn yi samlicyꞌaꞌtz. Nchaꞌtz cunin ẍchibneꞌ ara xonl, cyaꞌl nin jun nink xcyeꞌ tan cyajleꞌn. 17 Ma jaluꞌ quiloꞌk tan xoꞌn stziꞌak yi luwareꞌj, yi ja inchaj tzatz, na swoyeꞌ tzatz,” stzun Kataj bantz tetz Abram.
18 Toqueꞌn tzun Abram tan wekleꞌn yi beꞌch tetz, nin bentz tan najeweꞌn nakajil yi tnum Hebrón. Choꞌn cyajeꞌn iꞌ tul jun amaꞌl tetz jun yaj yi na biꞌaj Mamre, kale atit wiꞌnin wiꞌ bakch. Choꞌn tzun toqueꞌn iꞌ tan nucꞌleꞌn junt patbil xtxꞌixwatz tan tkꞌol iꞌ yi kꞌajsbil tetz Kataj.