Yi toqueꞌn Abram tan colpeneꞌl tzaj Lot
14
1 Itzun bantz te yi tiempaꞌtz yi chijatxol quib Abram tu Lot, at tzaj Amrafel tetz rey yi tnum Sinar. Nin nchaꞌtz at tzaj Arioc tetz rey yi tnum yi na biꞌaj Elasar. Nchaꞌtz at tzaj Quedorlaomer tetz rey yi tnum yi na biꞌaj Elam, nin at tzaj Tidal tetz rey yi tnum yi na biꞌaj Goim. 2 Yi cyaj reyaꞌtz eꞌ oc tan oyintziꞌ tu Bera, rey tetz yi tnum Sodoma, nin te Birsa, rey tetz yi tnum Gomorra, ej nin te Sinab rey tetz yi tnum Adma. Nchaꞌtz eꞌ oc tan oyintziꞌ te Semeber, rey tetz yi tnum Zeboim, nin te yi rey tetz yi tnum Bela, yi nchaꞌtz na biꞌaj Zoar. 3 Yi oꞌ reyaꞌtz choꞌn tzun chichamol quib scyuchꞌ chisanlar wi jun ẍkꞌajlaj yi na biꞌaj Sidim, kale atit yi jun mar yi na biꞌaj “Yi mar yi chin cꞌaꞌ nin tan atzꞌum”.a 4 Nsken wiꞌt el coblajix yob yi cyocleꞌnix jak cawl yi rey Quedorlaomer. Poro itzun bantz tul yi oxlajiꞌn yob nintzun eꞌ txum yi oꞌ reyaꞌtz tan cyoqueꞌn tan oyintziꞌ tu Quedorlaomer tan cyeleꞌn kloꞌ liwr jak cawl iꞌ.5 Itzun bantz, le cyajlajiꞌn yob nintzun ben Quedorlaomer scyuchꞌ yi eꞌ rey yi xomij chiwiꞌ teꞌj, tan oyintziꞌ le jun amaꞌl yi na biꞌaj Astarot Karnaim. Choꞌn tzun xcyeweꞌn iꞌ scyeꞌj yi eꞌ aj Refa le jun amaꞌlaꞌtz. Nchaꞌtz xcyeꞌ iꞌ scyeꞌj yi eꞌ Zuzitas le amaꞌl yi na biꞌaj Ham. Ej nin xcyeꞌ scyeꞌj yi eꞌ aj Emit le amaꞌl yi na biꞌaj Save-quiriataim. 6 Nchaꞌtz xcyeꞌ iꞌ scyeꞌj yi eꞌ aj Hor le wiꞌwtz Seir, nin eꞌ xom nin tan chibiyleꞌn cuꞌn jalen wi ẍkꞌajlaj Parán, yi choꞌn at nakajil yi luwar yi tzꞌinunin tuꞌ. 7 Yi chipakxeꞌn tzaj yi rey Quedorlaomer scyuchꞌ yi eꞌ yi xomcheꞌ teꞌj, choꞌn tzun cyoponeꞌntz le amaꞌl yi na biꞌaj En-mis-pat, yi nchaꞌtz na biꞌaj Cades. Ma yi quicyꞌakeꞌn le amaꞌl cwent yi eꞌ xonl kꞌajtzun Amalec, cyaj cyen chixitul cyakil eꞌchk takleꞌn yi nojquen ẍchiwutz. Nchaꞌtz iteꞌn nin eꞌ bantz scyeꞌj yi eꞌ amorreo yi najlcheꞌ le amaꞌl Hazezon-tamar.
8-9 Ma yi eꞌ rey tetz Sodoma, Gomorra, Adma, Zeboim tu Bela, choꞌn tzun chichamwit quib le jun ẍkꞌajlaj yi na biꞌaj Sidim. Choꞌn tzun cyoqueꞌntz yi oꞌ reyaꞌtz tan oyintziꞌ tu Quedorlaomer scyuchꞌ yi eꞌ mas rey, yi na chibiꞌaj Tidal, Amrafel tu Arioc. Yaꞌstzun yi eꞌ rey tetz tnum Elam, Goim, Sinar tu Elasar.
10 Ej itzun le jun amaꞌlaꞌtz kale mbajeꞌt yi jun oyintziꞌaꞌtz at wiꞌnin eꞌchk jul yi nojnak tan ẍpupuꞌ. Ej nin yi cyeleꞌn kloꞌ ojkuj yi eꞌ rey tetz Sodoma tu Gomorra, choꞌn chibeneꞌn mulkꞌuj tul eꞌchk julaꞌtz yi nojnak tan ẍpupuꞌ. Ma yi oxt rey, eꞌ el ojk xoꞌlak xtzeꞌ tan colon ib.
11 Ma yi eꞌ rey yi sken chitxꞌacon nintzun eꞌ oc tan telseꞌn tzaj cyakil yi ixiꞌn triw, tu eꞌchk takleꞌn yi wiꞌnin jamel yi at le tnum Sodoma tu Gomorra. 12 Nchaꞌtz nin ben quicyꞌal Lot, yi titzꞌun Abram yi choꞌn najlij Sodoma. Nin chaꞌtz el quicyꞌal cyakil yi meꞌbiꞌl Lot.
13 At tzun cobox aj Sodoma yi eꞌ clax cyen chikꞌab eꞌ contraꞌtz. Ej nin jun scyeri eꞌaꞌtz opon swutz Abram yi hebrey, tan talcheꞌn tetz yi mbi cuꞌn bajij Sodom tu Gomorra. Choꞌn nin najlij Abram xoꞌl yi jun cꞌoloj wiꞌ bakch yi at tuchꞌ yaj yi na biꞌaj Mamre, yi amorreo. Quitzꞌun quitzicy quib iꞌ tu Escol tu Aner. Yi ox yajaꞌtz xomij chiwiꞌ te Abram.
14 Ma yi tbital Abram yi sken ben yi titzꞌun pres, nintzun octz tan chichamleꞌn nin tan chiwekleꞌn yi eꞌ tetz mos yi choꞌn quitzꞌeꞌn tuchꞌ, yi chusijcheꞌt tan oyintziꞌ. Ox cient tu waxaklaj chixoneꞌn eꞌ mosaꞌtz. Ej nin yi wiꞌt bnixeꞌn taꞌn, nintzun xomnin Abram scyuchꞌ yi eꞌ mosaꞌtz tan chitzꞌamleꞌn yi eꞌ contraꞌtz. Choꞌn chitxꞌamxeꞌn cyaꞌn jalen tziꞌn le amaꞌl yi na biꞌaj Dan. Yaꞌstzun chitxꞌamxeꞌt cyaꞌn. 15 Lakꞌbalineꞌn tzun cyoqueꞌn Abram tan oyintziꞌ scyuchꞌ yi eꞌ reyaꞌtz. Qui cunin tzun tzꞌicyꞌ scyetz yi cyocomponeꞌn Abram tan chibiyleꞌn cuꞌn. Ej nin yi cyeleꞌn ojkuj nintzun eꞌ xom nin Abram tan chibiyleꞌn jalen le tnum Hoba, yi at swutzeꞌn Damasco. 16 Yi xcyeweꞌn Abram scyeꞌj, nintzun el tzaj majol cyakil yi eꞌchk takleꞌn yi nsken el tzaj cyalkꞌal. Nchaꞌtz, xcyeꞌ iꞌ tan colpeꞌn Lot tu yi najal iꞌ. Ej nin nchaꞌtz yi eꞌ mas pres yi ateꞌ ẍchikꞌab, eꞌ el tzaj liwr takꞌun Abram.
Yi tkꞌol Melquisedec banl tibaj Abram
17 Itzun bantz, yi pakxeꞌn tzaj Abram te yi nsken wiꞌt xcyeꞌ scyeꞌj yi rey Quedorlaomer scyuchꞌ eꞌ mas rey yi xomcheꞌ teꞌj, nintzun el tzaj chireyil yi eꞌ aj Sodoma tan cꞌulcheꞌn wi jun ẍkꞌajlaj yi na biꞌaj Save, nka “wi chiẍkajlaj yi eꞌ rey.” 18 Nchaꞌtz opon Melquisedec,b yi rey tetz yi tnum Salem, iꞌ jun wiꞌtz paleꞌc swutz yi Wiꞌtz Ryos, yi bnol tetz yi wuxtxꞌotxꞌ tu yi tcyaꞌj. Yi jun paleꞌaꞌtz opontz tan cꞌulcheꞌn Abram. Nintzun el tzaj tcyꞌal pam tu win tan toyeꞌn tetz Abram. 19 Ej nin takꞌ iꞌ banltz tib Abram tan yi yoleꞌj:
“I bin jaluꞌ, takꞌ tzaj yi wiꞌtz Ryos,
yi jun yi bnon tetz yi tcyaꞌj tu wuxtxꞌotxꞌ, yi banl tzawibaj.
20 Kakꞌeꞌ kakꞌajsbil tetz,
na tan tuꞌ yi porer yi wiꞌtz Ryosaꞌtz nxcyeweꞌt scyeꞌj eꞌ acontr.”
Beneꞌn tzun tkꞌol Abram muꞌẍ oy tetz Melquisedec. Ja toy lajuj te jujun cient te cyakil eꞌchk takleꞌn yi ncambaj scyeꞌj eꞌ contr. 21 Ma yi rey tetz Sodoma nintzun ben tloltz tetz Abram:
—I bin jaluꞌ taꞌ Abram, qui na waj yi eꞌchk takleꞌn yi ncambajuꞌ scyeꞌj eꞌ contr. Teruꞌ sbneꞌ cyakil. Ntin na waj yi eꞌ wunak yi nchiclax tanuꞌ, stzun yi rey tetz Sodoma bantz tetz Abram.
22 Sajeꞌn tzun stzaꞌwel Abram:
—Quiꞌ taꞌ. Sak swutz yi Intaj Jehová, yi Wiꞌtz Ryos, yi ja wiꞌt wal tetz: “Cyakil yi eꞌ wunak tuml yi eꞌchk takleꞌn yi mincambaj teꞌj, tetz chireyil yi eꞌ aj Sodoma sbneꞌ.” 23 Qui na waj siquierk jun tal piẍ nokꞌ nka jun tal tzꞌuꞌm tan cꞌalcheꞌn wutz inxajab. Na qui na waj yil tzꞌocuꞌ tan talcheꞌn: “In nchinjalsan riquil nocx Abram.” 24 Qui na waj nink tzintzꞌameꞌn jun eꞌchk takleꞌn te yi mincambaj, ma na ntin yi muꞌẍ ixiꞌn yi ja wiꞌt xcon tetz chigast eꞌ inmos. Poro yi ox yajeꞌj yi ja chichꞌeyan sweꞌj, yi na chibiꞌaj Aner, Escol tu Mamre, tajweꞌn jatxlij cyetz te yi eꞌchk takleꞌn yi ja kaxcyeꞌ tan majleꞌn scyetz eꞌ kacontr, stzun Abram bantz.