Yi contrat yi bnix tan Ryos tu Abram
15
1 Itzun bantz yi nsken bajij cyakil eꞌchk takleꞌnaꞌseꞌj, nintzun jilon Kataj tetz Abram le wutzicyꞌ. Itzun taltz:—Abram, quil cxob te yi mbi sbajok tzaweꞌj, na in colol awetz. Ej nin swakꞌeꞌ jun balaj oya tzatz.
2-3 Talol tzun Abram tetz Jehová, yi Cawl tetz:
—Iluꞌ Kataj, iluꞌ Cawl wetz, chumbalaj nin yi jun oyaꞌtz yi na tzanuꞌ tan sukiꞌn swetz, poro quiꞌc ltakꞌ swetz na na tiluꞌ yi quiꞌc jun tal ẍutuj incyꞌajl. Yi nink ltakꞌuꞌ jun tal incyꞌajl, tetz kloꞌ iꞌ sbneꞌ cyakil yi inmeꞌbiꞌl. Ma na yi jun yil scambok teꞌj iꞌtz Eliezer, yi martomaꞌ squibaj eꞌ inmos, iꞌ awer nak tuꞌ, na iꞌ jun aj Damasco. Nin iꞌ jun esclaw tuꞌ, stzun Abram tetz Ryos.
4 —Quiꞌ, nkꞌeꞌtz jun awer nak scambank yi ameꞌbiꞌl na yi jun yil tetzaj cyakil ameꞌbiꞌl iꞌtz jun mero acyꞌajl, stzun Ryos.
5 Teleꞌn tzaj tzun tcyꞌal Kataj yi Abram xe tal pach, yi mantial tuꞌ, itzun taltz:
—Il nin eꞌchk txꞌuml yi ateꞌ tcyaꞌj. Cyaꞌl jun yi nink xcyeꞌ tan tajleꞌn, na jun cꞌoloj cunin eꞌ. Chaꞌtz cunin ẍchibneꞌ tajlal araxonl. Cyaꞌl jun xcyeꞌk tan cyajleꞌn, stzun Ryos bantz.
6 Tocsal tzun Abram cyakil yi mbi cuꞌn tal Ryos tetz. Ej nin tantuꞌ yi tocsal, wiꞌnin tzun stzatzineꞌn Ryos teꞌj. Chaꞌstzun te jaleꞌn yi balajil iꞌ swutz Ryos. 7 Beneꞌn tzun tlol Ryos tetz Abram:
—I inaꞌtz in Jehová. Ej nin i inaꞌtz yi jun yi ncẍeꞌlsan tzaj le amaꞌl Ur, chicwent eꞌ caldeo, tan wukꞌol yi amaꞌleꞌj tzatz.
8 —Taꞌ, iluꞌ Cawl wetz, iluꞌ Kataj Jehová. Poro cuyuꞌ impaj, ¿ẍeꞌn tzꞌel intxum tetz yi kol swetzajeꞌ cyakil yi amaꞌleꞌj?
9 Stzaꞌwel tzun Ryos tetz:
—Cyꞌajweꞌtzaj jun tal neꞌẍ wacẍ, nin jun chiw, nin jun tal neꞌẍ cneꞌr tan ox yob yi jujun. Ej nin cyꞌaj tzaj jun tal sluꞌk tu jun tal neꞌẍ plomẍ.
10 Sajeꞌn tzun tcyꞌal Abram yi eꞌ txucaꞌtz swutz Kataj Ryos. Ej nintzun eꞌ cuꞌ cabsal, nin cu tkꞌol jalajchak wuxtxꞌotxꞌ. Ej nin swutz yi jalajaꞌtz, cu tkꞌol jalajtz. Ma yi sluꞌk tu tal neꞌẍ plomẍ, qui eꞌ cuꞌ cabsaltz.
11 Itzun yi eꞌ kuꞌs nintzun eꞌ baj cuꞌultz tan bajseꞌn kloꞌ chiwankil eꞌ txucaꞌtz. Poro nin oc Abram tan chilajeꞌn len. 12 Ma yi cweꞌn yup, nsken tzun kꞌeꞌxij iꞌ, nin saj jun chin watl teꞌj. Nin chin tzꞌoꞌtz nin tunin tzun bantz xlaj. Nintzun saj jun chin xoꞌw teꞌj. 13 Beneꞌn tzun tlol Kataj tetz:
—Tajweꞌn yil tzꞌel atxum tetz yi xtxolbileꞌj. Ẍchinajank araxonl ẍchixoꞌl jun txꞌakaj awer nak tetz cyaj cient yob. Chocopon araxonl tetz chimos yi eꞌ awer nakaꞌtz nin ẍchibuchlok cyaꞌn. 14 Poro swakꞌeꞌ chicaws yi eꞌ awer nakaꞌtz tan paj yi chocopon yi eꞌ araxonl tetz chimos. Poro yil tzꞌak yi cyaj cient yobaꞌtz cyaꞌn, chelepon liwr, nin chin ric nin ẍchibneꞌ. 15 Ma aẍ awetz Abram, yil cẍtijin cuꞌn, tzatzin cuꞌn lẍquim nin cẍaꞌj scyeꞌj kꞌajtzun ataj, tu kꞌajtzun atxuꞌ. 16 Yi sken wiꞌt icyꞌ cyajix wekl araxonl ẍchipakxok junt tir le amaꞌleꞌj. Quil chuꞌl chan, na txeꞌn opon kꞌejlal yil jepon tamp yi ẍchꞌonal yi quil yi eꞌ wunak yi najlcheꞌ tzoneꞌj, yi eꞌ amorreo, stzun Ryos bantz.
17 Itzun yi toqueꞌn akꞌbal, chin tzꞌoꞌtz nin tu nin bantz. Nintzun ẍchaj tib jun ẍwokꞌ yi wiꞌnin na juquin sib tul, tu jun kꞌakꞌ. Ja chixon nicyꞌal yi chiwankil yi eꞌ txucaꞌtz yi cabsaꞌncheꞌ tan Abram. 18 Yaꞌstzun yi bixeweꞌt yi trat Ryos teꞌj Abram. Ej nin je yol Ryoseꞌj:
—Cyakil yi luwareꞌj swakꞌeꞌ scyetz yi eꞌ araxonl. Xeꞌtok tzaj stziꞌ aꞌ cwent Egipto, nin tzꞌelepon jalen lilen tziꞌn, stziꞌ yi nim aꞌ yi na biꞌaj Eufrates.b 19 Iꞌtz chiluwar yi eꞌ ceneo tu eꞌ cenezeo nin scyuchꞌ eꞌ cadmoneo, 20 nin chiluwar eꞌ hitita nin eꞌ ferezeo scyuchꞌ eꞌ rafaíta, 21 eꞌ amorreo tu eꞌ cananeo nin eꞌ gergeseo, scyuchꞌ yi eꞌ jebuseo. Tircuꞌn yi eꞌchk amaꞌlaꞌtz swakꞌeꞌ scyetz araxonl, stzun Ryos bantz.