Agar tu Ismael
16
1 Itzun bantz yi teleꞌn tiemp quinin tzun jal tal Sarai yi txkel Abram na quiꞌc talbil iꞌ. Poro at tzun jun mos iꞌ yi najlij scyuchꞌ, yi aj Egipto iꞌ, nin yi biꞌ iꞌ iꞌtz Agar. 2 Beneꞌn tzun tlol Sarai tetz Abram:—Qui nin ntakꞌ Ryos amaꞌl swetz tan chijaleꞌn wal, chaꞌstzun te na cuꞌ inwutz teruꞌ taꞌ tan cyokꞌbel quibuꞌ tu inmos Agar, nin yil jal chinitxajiluꞌ tuchꞌ baꞌn tzun tzꞌoctz chi kꞌajbil wal.
Nintzun cuꞌ-tz swutz Abram yi xtxumuꞌn Sarai. 3 Ej nintzun saj tcyꞌal Sarai yi mosaꞌtz tetz Abram. Yi bajeꞌn yi xtxolbilaꞌs yaꞌstzun yi nsken el lajujix yob yi chinajleꞌnix Canaán.
4 Itzun yi chiwitbej quib Abram tu Agar nintzun tekaj pwokil jun niꞌ. Poro yi teleꞌn xtxum Agar tetz yi ẍeꞌn taneꞌn iꞌ, nintzun oc tan xbajtzijeꞌn Sarai yi patrón. 5 Ma Sarai nintzun taltz tetz Abram:
—Aẍ aj paj yi na tzan Agar tan telseꞌn inkꞌej wech na in teꞌnin nnakꞌon tzatz tan toqueꞌn tetz awuxkel, ma jaluꞌ tantuꞌ yi sjalok tal, na tocsaj tib nim tzinwutz. Nin quiꞌc wetz inxac swutz iꞌ. Ma jaluꞌ choꞌn sak swutz Ryos naꞌj scyetz aj paj skaxoꞌl tzawuchꞌ, aẍ peloꞌ atz nka in tzun wetz, stzun Sarai tetz Abram.
6 —Yi amos choꞌn at jak acaꞌwl, banaj bin awajbil teꞌj, stzun Abram bantz.
Yi tbital Sarai yi yol Abram nintzun xeꞌtijtz tan jisleꞌn nin tan buchleꞌn Agar, jalen cuꞌn yi teleꞌn ojkujtz.
7 Itzun te yi teleꞌn ojkuj Agar, choꞌn tzun nojeꞌn quen iꞌ swutz jun ángel tetz Ryos le jun amaꞌl yi tzꞌinunin tuꞌ, xlaj jun tal boꞌm, cyꞌanl tetz yi beꞌ yi na opon jalen Shur. 8 Nintzun ben jakol yi ángel tetz:
—¡Agar! Aẍ jun cꞌoloj mos Sarai, ¿Na ncẍsajeꞌt, nin naꞌ ncẍbeneꞌt? stzun ángel Ryos tetz Agar.
—Ojkeꞌn bin mimbaneꞌltzaj wetz swutz wutzileꞌn naꞌ Sarai yi impatrón.
9 Beneꞌn tzun tlol yi ángel tetz Ryos tetz:
—Quiloꞌk, baꞌn ẍpakxijt tuchꞌ yi apatrón nin nqueꞌn cꞌulutxum jakꞌ caꞌwl iꞌ. Nin baꞌn tzaban cyakil yi mbil tal iꞌ tzatz.
10 Ej nchaꞌtz tal yi ángel tetz Ryos tetz:
“Ẍchipucꞌunk cyakil yi eꞌ axonl waꞌn,
nin cyaꞌl nin jun nink xcyeꞌ tan cyajleꞌn.
11 Bintzij nin, ekaꞌn pwokil jun niꞌ awaꞌn.
Ej nin xicy sbneꞌ yi awal.
Nin yil tzꞌul itzꞌok baꞌn tzꞌoc biꞌ awaꞌn tetz Ismael.a
Yaꞌstzun biꞌ sbneꞌ-tz na ja opon toꞌk yi atziꞌ yi akul swutz Ryos.
12 Chin macleꞌn nin sbneꞌ yi awal.
Niꞌcuꞌn sbneꞌ tu jun txuc yi chin smaron nin.
Stzꞌoyintzink scyeꞌj cyakil wunak.
Ej nin cyakil wunak ẍchoyintzink teꞌj iꞌ.
Yi eꞌ xonl iꞌ ẍchijunajeꞌ quib scyuchꞌ eꞌ titzꞌun.
Ej nin choꞌn ẍchaꞌtok jalen lilen tziꞌn,” stzun ángel bantz.
13 Ej nin tantuꞌ yi ja chijilon Agar tu Kataj nin jalt junt biꞌ Ryos taꞌn. Ej nin iꞌtz: “Yi Ryos yi na koꞌ til.” Na nin tal iꞌ-tz “Ja chin til Ryos, poro qui nin nchinquim taꞌn, na itzꞌineꞌt.” 14 Chaꞌstzun te toqueꞌn biꞌ yi jun aꞌaꞌtz taꞌn tetz: “Aꞌ tetz yi jun yi itzꞌ,b nin yi na koꞌ til.” Yi jun aꞌaꞌtz choꞌn at xoꞌl Cades tu Bered. 15 Ej itzun bantz yi tuleꞌn yos tu Agar, nintzun oc tkꞌol Abram yi biꞌ yi niꞌ tetz Ismael.c 16 At tzun Abram tul jun mutxꞌ tu kak yob yi titzꞌeꞌn Ismael.