Yi bixeweꞌn yi circuncisión tetz quiwel chitrat Ryos tu Abram
17
1 Itzun te yi at tzaj Abram tul jun mutxꞌ tu belujlaj yob, nintzun ẍchaj tib yi Kataj Jehová junt tir swutz iꞌ. Itzun taltz tetz:—I inaꞌtz yi Ryos yi cyaꞌl jun na xcyeꞌ sweꞌj. Ej nin yi wajbil iꞌtz yil cẍoꞌc tetz jun yaj yi chin tzꞌaknak cuꞌn, yi quiꞌc muꞌẍ tal paltil. 2 Ej nin ko yaꞌtz tzaban, bixek cunin jun contrat skaxoꞌl tzawuchꞌ. Je xtxolbileꞌj: chijepon impucꞌsal wiꞌnin axonl, stzun Ryos bantz tetz.
3 Te yi na tzan Ryos tan yol cweꞌn tzun joklok Abram jalen cuꞌn yi cweꞌn poneꞌn yi wutz plaj wuxtxꞌotxꞌ. Ej nin nchaꞌtz tal Ryos:
4 —Ẍocopon waꞌn tetz chitaj wiꞌnin jilwutz wunak. 5 Ej nin yi abiꞌ nkꞌeꞌtz Abram sbneꞌ ma na Abrahama, na cẍocopon tetz chitaj wiꞌnin jilwutz wunak.b 6 Ẍchipucꞌunk cyakil yi araxonl waꞌn. Qui nin ajlbeꞌn cyetz sbneꞌ. Ej nin tan aẍ ẍchijaleꞌt wiꞌnin wiꞌtz ajcaw nin wiꞌnin lmak tnum. 7 Ej nin yi contrateꞌj yi bixek cuꞌn skaxoꞌl stzawuchꞌ nin scyuchꞌ eꞌ araxonl tzantzaj,c iꞌtz, yi in teꞌnin iRyosil sbneꞌ, scyuchꞌ araxonl tetz ben kꞌej ben sak. 8 Swakꞌeꞌ tzatz cyakil yi luwareꞌj cwent Canaán kale najlquixeꞌt jaluꞌ. Nchaꞌtz swakꞌeꞌ scyetz eꞌ araxonl tetz ben kꞌej ben sak.d Ej nin yi in wetz in iRyosil sbneꞌ-tz.
9 —Ej nin na waj yil tzaban taneꞌn yi xtxolbileꞌj yi swaleꞌ cyen tzatz. Ej nin nchaꞌtz yi eꞌ axonl tajweꞌn yil chixom teꞌj sbneꞌ opon tunintz. 10 Je yi xtxolbileꞌj yi na waj tzibanwok taneꞌn scyuchꞌ yi eꞌ axonl: Tajweꞌn tan chibajeꞌn circuncidare cyakil yi eꞌ yaj tzixoꞌlwok. 11 Baꞌn bin tzicꞌaplen muꞌẍ tal te yi stzꞌuml iwankil, na yi techlaꞌtz xconk tan ẍchajleꞌn yi ja bixeꞌ yi katrateꞌj skaxoꞌl tzituchꞌ. 12 Sbneꞌ opon tunintz tajweꞌn tan chibajeꞌn circuncidar cyakil yi eꞌ xicy yi na chitzꞌij tzixoꞌlwok. Mpe chicyꞌajl yi eꞌ imos yi lokꞌij cheꞌt itaꞌn scyetz awer nak. Tajweꞌn tan chibajeꞌn len circuncidar. Banwok yi xtxolbileꞌj le waxakiꞌn kꞌej yi titzꞌleꞌnix jun niꞌ. 13 Tajweꞌn tan chibajeꞌn circuncidar yi eꞌ anitxaꞌ scyuchꞌ eꞌ chinitxaꞌ yi eꞌ amos yi lokꞌijt cheꞌ awaꞌn. Ej nin yi jun techlaꞌtz yi tzꞌocopon te iwankil yaꞌstzun xeꞌ incontrat yi ja bixeꞌ waꞌn tzituchꞌ tetz ben kꞌej ben sak. 14 Poro ko at jun tzixoꞌlwok yi quil sban taneꞌn incaꞌwleꞌj chin tajweꞌn cunin tan teleꞌn lajuꞌn tzixoꞌl wok, na iꞌ pajol caꞌwl.
15 Nchaꞌtz tal Ryos tetz Abraham:
—Inti Sarai yi awuxkel quiꞌt lbiꞌaj Sarai, ma na sbiꞌajk Sara.f 16 Swakꞌeꞌ imbanl tibaj, na choꞌn stzꞌitzꞌok acyꞌajl teꞌj. Jun cuꞌn yol swakꞌeꞌ imbanl tibaj, na tzꞌocopon iꞌ tetz chitxuꞌ jun cꞌoloj jilwutz wunak. Ej nin ẍchixoꞌl yi xonl iꞌ ẍchijaloꞌk wiꞌnin wiꞌtz ajcaw, nin wiꞌnin lmak tnum, stzun Ryos bantz.
17 Cweꞌn tzun joklok Abraham swutz Ryos jalen cuꞌn cweꞌn poneꞌn lajpuj yi plaj wuxtxꞌotxꞌ. Ej nin te yi joklij, nintzun saj jun chin tzeꞌeꞌn teꞌj, tcꞌuꞌl cuntuꞌ: “Iẍkaj at tzunk rmeril tan jaleꞌn innitxaꞌ na na chinxon tul jun cient yob. Nchaꞌtz Sara, iẍkaj atk rmeril tan talal jun tal, na na xon iꞌ tul jun mutxꞌ tu lajuj yob,” stzun Abraham. Wiꞌnin tzun stzeꞌeneꞌn iꞌ-tz tcꞌuꞌl cuntuꞌ. 18 Jiloneꞌn tzun Abraham tetz Ryos, itzun taltz:
—Chumbalaj nin kloꞌ Taꞌ yi choꞌnk ltakꞌuꞌ banluꞌ tibaj Ismael.
19 Stzaꞌwel tzun Ryos yol Abraham:
—Jun cuꞌn yol na walnin tzatz, stzꞌitzꞌok jun acyꞌajl teꞌj Sara, yi mero atz awuxkel. Nin baꞌn tzawakꞌ quen biꞌ tetz Isaac. Na teꞌj iꞌ, nin scyeꞌj xonl iꞌ, lbixeweꞌt yi trateꞌj tetz ben kꞌej ben sak.
20 ”Inti tetz Ismael, swakꞌeꞌ imbanl tibaj. Sjalok wiꞌnin nitxajil iꞌ waꞌn. Tzꞌocopon iꞌ tetz chitaj coblaj wiꞌtz ajcaw. Nin tan iꞌ ljaleꞌt jun chin wutzileꞌn tnum. 21 Poro yi wetz intrat choꞌn sbixek waꞌn tu Isaac yi acyꞌajl, yi choꞌn tzꞌitzꞌok teꞌj Sara chwaꞌnin le junt yob, stzun Ryos bantz tetz.
22 Yi stzajeꞌn wiꞌ yol Ryos tu Abraham ajeꞌn nintzun bantz.
23 Itzun te iteꞌn nin kꞌejaꞌtz toqueꞌn Abraham tan banleꞌn circuncidar Ismael scyuchꞌ cyakil yi eꞌ mos yi nchitzꞌij tuchꞌ, cyuml yi eꞌ yi lokꞌij cheꞌ taꞌn. Tircuꞌn tzun eꞌ yajaꞌtz eꞌ bajij circuncidar taꞌn, quib yi tal Ryos tetz. 24 At tzaj tzun Abraham tul jun mutxꞌ tu belujlaj yob yi banol circuncidar tib. 25 Ma Ismael at tul oxlaj yob yi bajeꞌn circuncidar. 26 Iteꞌn nintzun kꞌejaꞌtz yi chibnol taneꞌn Abraham tu Ismael yi circuncisión. 27 Ej nin nchaꞌtz cyakil yi eꞌ yaj yi najlcheꞌ tu Abraham, eꞌ bajij circuncidar, tuml yi eꞌ mos yi eꞌ itzꞌij tuchꞌ, scyuchꞌ cyakil yi eꞌ mos yi lokꞌij cheꞌ taꞌn, tircuꞌn tzun eꞌ bajij circuncidar te yi jun kꞌejaꞌtz.