Yi sukil Ryos tetz Abraham yi sjalok jun cyꞌajl iꞌ
18
1 Itzun bantz te yi at tzaj Abraham wiꞌwtz xoꞌl bakch cwent Mamre. Choꞌn tzun ẍchajol tib Ryos swutz Abraham. Choꞌn tzun cꞌolchij swutz tal pach yi mantial tuꞌ. Eꞌchk chajcuꞌn kꞌej nin loꞌ.2 Te yi cꞌolchij iꞌ, nintzun ben xmayil ox yaj yi txiclcheꞌ nakajil. Lajkeꞌl nintzun beneꞌntz tan chicꞌulcheꞌn,a nin cuꞌ jokloktz ẍchiwutz. 3 Itzun taltz:
—Wajcaw, max cꞌuꞌluꞌ, in ẍchakumuꞌ, na cuꞌ inwutz teruꞌ, yi quiꞌk tzꞌicyꞌ chanuꞌ, nink cyajuꞌ jun rat swuchꞌ. 4 ¿Qui peꞌ na cyajuꞌ yi nink ben qꞌuil tetz muꞌẍ aꞌ tan xtxꞌajleꞌn quikanuꞌ nin lchujeꞌuꞌ jun tkuj tmujil jun wiꞌ tzeꞌeꞌj? 5 ¿Qui peꞌ na cyajuꞌ yi nink chimben tan ticyꞌleꞌn tzaj cobox chiwaꞌuꞌ? Na ja loꞌ chikꞌeꞌxijuꞌ nin na loꞌ chiquimuꞌ tan weꞌj. Baꞌn tcuꞌn chiwank ninuꞌ, na ja bin chuꞌluꞌ swuchꞌ, stzun Abraham scyetz.
—Baꞌn bin, cheꞌch eꞌ bantz.
6 Lajkeꞌl nintzun beneꞌn Abraham xe chipach nintzun taltz tetz Sara:
—Or cyꞌajtzaj cob arow arin, nin or tzawoqueꞌn tan xyulkꞌeꞌn. Ej nin banaj cobox kapam, nin tzaskꞌajsaj tan yi xew kꞌakꞌ yi at cyentz.
7 Ntin nin xtalol tzaj Abraham tetz Sara, lajkeꞌl nintzun beneꞌntz kale ateꞌt yi wacẍ iꞌ, nin jeꞌ xtxaꞌol jun tal neꞌẍ wacẍ, nin takꞌtz tetz jun scyeri mos tan toqueꞌn tan banleꞌn baꞌn tetz. 8 Ma yi bnixeꞌn chiwaꞌ, nintzun bentz tan takꞌleꞌn scyetz yi eꞌ yaj. Poro nkꞌeꞌtz ntin chiꞌbaj tu pam takꞌ scyetz ma na nchaꞌtz takꞌ iꞌ ques tu lech. Ej nin te yi na chiwan yi ox yajaꞌtz tmujil tzeꞌ, list cuntunin taneꞌn Abraham ẍchiwutz na ko takꞌleꞌn biꞌ chijak tzaj tetz. 9 Ej, itzun yi chiwiꞌt waneꞌn nintzun eꞌ octz tan jakleꞌn tetz Abraham. Itzun cyaltz:
—¿Naꞌ atiteꞌt Sara yi awuxkel?
—At iꞌ tziꞌn xe kapach.
10 Beneꞌn tzun tlol jun scyeri ox yajaꞌtz.
—I bin jaluꞌ Abraham, chwaꞌnin le junt yob nuꞌlt jun tir tan axajseꞌn. Ej nin yil nuꞌltzaj, nsken wiꞌt jal jun tal Sara,b stzun yaj bantz.
Ma yi Sara choꞌn tzun na xkꞌukeneꞌl tzaj wutz coc yi puertil chipach tan tbiteꞌn chiyol yi ox yajaꞌtz. 11 Poro te yi tiempaꞌtz nsken wiꞌt chitijin cunin Abraham tu Sara. Sken wiꞌt tzaj wiꞌ yi yablil Sara. 12 Yi tbital Sara yi yolaꞌtz quib yi tal yaj tetz Abraham, nintzun saj jun chin tzeꞌeꞌn tcꞌuꞌl cuntuꞌ. Ej nin chaꞌtz nin xtxum iꞌ-tz: “¿Mbi rmeril jal jun wal? Na ja wiꞌt chimbiꞌẍin cunin,c nin nchaꞌtz taneꞌn wutzileꞌn wajcaw Abraham,” stzun iꞌ bantz tcꞌuꞌl cuntuꞌ. 13 Beneꞌn tzun jakol Kataj tetz Abraham:
—¿Mbi xac na tzeꞌen Sara te inyol? Na ja tal iꞌ tcꞌuꞌl cuntuꞌ: “¿Mbi rmeril tan jaleꞌn jun wal? na ja wiꞌt chimbiꞌẍin cunin.” 14 Poro swaleꞌ tzatz: ¿At peloꞌ jun eꞌchk takleꞌn yi quil xcyeꞌ Ryos teꞌj? Ma jaluꞌ Abraham, chwaꞌnin le junt yob nuꞌlt junt tir tan axajseꞌn. Ej nin yil nuꞌlt, nsken wiꞌt jal jun tal Sara,d stzun Ryos bantz tetz.
15 Yi tbital Sara yi yol Ryos nintzun xob iꞌ-tz nin taltz:
—Quiꞌ Taꞌ, qui na chintzeꞌen wetz.
—Nkꞌeꞌtz bintzij na awaltzaj. Cẍchij tuꞌ, na jun cuꞌn ja cẍtzeꞌen, stzun Ryos bantz.
Yi jakol Abraham cuybil chipaj yi eꞌ aj Sodoma tetz Ryos
16 Itzun yi stzajeꞌn wiꞌ chiyol, chijeꞌn tzun txiclok yi ox yajaꞌtz nin eꞌ icyꞌtz tan cyoponeꞌn Sodoma. Xom nin jun tkuj Abrahamtz scyeꞌj. 17 Nintzun oc Ryos tan xtxumleꞌn: “Baꞌn tcuꞌn swaleꞌ tetz Abraham clar cunin yi mbiꞌtz tzimbneꞌ. 18 Na tan iꞌ ljaleꞌt chibanl cyakil wunak beneꞌn tziꞌn wi munt. 19 Ej nin chaꞌtz txaꞌijt iꞌ waꞌn tan toqueꞌn tan chicaweꞌn yi eꞌ tetz nitxajil scyuchꞌ yi eꞌ xonl, tan cyoqueꞌn jak incaꞌwl nin tan chibnol cyakil eꞌchk takleꞌn balaj, bantz weleꞌn cuꞌn teꞌj cyakil yi ja wiꞌt insuk tetz,” stzun Ryos tcꞌuꞌl cuntuꞌ. 20 Sajeꞌn tzun tlol Ryos tetz:
—Ma jaluꞌ Abraham ja wit jun xtxolbil yi cyakil yi eꞌ wunak yi najlcheꞌ Sodoma tu Gomorra, chin juntlen nin eꞌ tu cyajtzaꞌkl. 21 Choꞌn tzun nchimbentz tan quilweꞌn yi ko bintzij nin yi chin cachiꞌ nin eꞌ, nin yi ko chin juntlen nin cyajtzaꞌkl quib yi mmaꞌlchij swetz, stzun Ryos bantz tetz Abraham.
22 Choꞌn tzun chibeneꞌn cob scyeri yi eꞌ yajaꞌtz jalen Sodoma. Ma tetz Abraham nintzun cyaj cyen tan yol tetz Kataj Ryos. 23 Toqueꞌn tzun ẍkansal tib muꞌẍt swutz Ryos nintzun oc tan jakleꞌn:
—Taꞌ yil tzꞌocuꞌ tan chibiyleꞌn yi eꞌ juchul il ¿ẍchitzajk cunin poloꞌ yi eꞌ yi quiꞌc quil? 24 Na qui cunin batz at nicyꞌ cient wunak Sodoma yi quiꞌc cyetz quil. ¿Stzajk cunin poloꞌ cyakil yi tnumaꞌtz tanuꞌ? ¿Qui poloꞌ scuyuꞌ chipaj tan tuꞌ yi ko at nicyꞌ cient balaj ẍchixoꞌl? 25 Quiꞌ loꞌ Taꞌ, na el intxum teruꞌ yi quil sbanuꞌ yi junaꞌtz yi tul chitzꞌaben nin tuꞌ eꞌ balaj wunak scyeꞌj yi eꞌ juchul il, na nkꞌeꞌtz nicyꞌ nin tuꞌ eꞌ juchul il. ¡Quil sbanuꞌ junaꞌtz Taꞌ! Na yi iluꞌ teruꞌ iluꞌ jun balaj juez yi chin tzꞌaknak cuꞌn. Nin yi iluꞌ teruꞌ quil xubsijuꞌ tan chibanleꞌn taneꞌn cyakil wunak beneꞌn tziꞌn wi munt. Ej nin ko yaꞌtz, nink cheꞌ jatxcyenuꞌ eꞌ balaj. Ntink eꞌ juchul il cheꞌ cawsajuꞌ, stzun Abraham tetz Ryos.
26 Stzaꞌwel tzun Ryos yi yol Abraham itzun taltz:
—Yi nink chijal nicyꞌ cient wunak waꞌn yi nkꞌeꞌtz eꞌ juchul il, tan tuꞌ yi nicyꞌ cientaꞌtz tzincuyeꞌ chipaj cyakil eꞌ aj Sodoma, stzun Ryos tetz Abraham.
27 Jiloneꞌnt tzun junt tir Abraham tetz Ryos. Itzun taltz:
—Cuyuꞌ impaj Taꞌ, quiꞌc nin intxꞌix yi na chinjilon quen teruꞌ, nin yi na injak quen yi eꞌchk takleꞌnaꞌtz teruꞌ. Na yi iluꞌ teruꞌ, iluꞌ Ryos, yi caꞌwl wetz, ma yi in weꞌtz in tuꞌ wunak, in tuꞌ txꞌotxꞌ, quiꞌc ekaꞌn waꞌn. 28 Poro Taꞌ yi ko caꞌwunak oꞌ-teꞌn yi qui tzꞌaknak yi nicyꞌ cientaꞌtz, ¿ẍchitzajk cunin poloꞌ cyakil yi eꞌ wunakaꞌtz tanuꞌ tan tuꞌ yi caꞌwunak oꞌ-taꞌtz yi quiꞌct?
Stzaꞌwel tzun Kataj yi yol Abraham:
—Yi nink chijal caꞌwunak oꞌ waꞌn yi nkꞌeꞌtz eꞌ juchul il, quil chisotz wakꞌun.
29 Jakol tzun Abraham junt tir:
—¿Ma tzun yi ko at caꞌwunak ntziꞌ yi nkꞌeꞌtz eꞌ juchul il?
—Quil cheꞌ insotzaj tantuꞌ yi caꞌwunakaꞌtz, stzun Kataj bantz tetz.
30 Beneꞌn tzun jakol junt tir Abraham tetz Ryos itzun taltz:
—Cuyuꞌ impaj Taꞌ na cu inwutz teruꞌ yi quiꞌk ljeꞌ swutzuꞌ yi chin chꞌinchꞌuj nin tuꞌ nin in tan jakleꞌn quen iteꞌn nin xtxolbilaꞌtz teruꞌ. Poro ¿mbi tzun sbanuꞌ-tz yi ntink junaklaj ntziꞌ balaj lchijal tanuꞌ?
Stzaꞌwel tzun Katajtz, itzun taltz:
—Yi nink chijal junaklaj balaj waꞌn, tan tu junaklajaꞌtz tzincuyeꞌ chipaj yi eꞌ mal nak nin quil chisotz waꞌn.
31 Toqueꞌn tzun jakol Abraham junt tir tetz Ryos itzun taltz:
—Iluꞌ Wajcaw, quiꞌc nin intxꞌix yi na injakquen yi eꞌchk takleꞌneꞌj teruꞌ. Poro ¿mbiꞌ sbanuꞌ yi ntink junak ntziꞌ balaj lchijal tanuꞌ?
Sajeꞌn tzun tzaꞌwel Ryos tetz:
—Yi nink chijal junak ntziꞌ balaj waꞌn quil chisotz yi eꞌ wunakaꞌtz wakꞌun. Tzincuyeꞌ chipaj.
32 Chin chꞌinchꞌuj nintzun ban Abraham tan yol tetz Ryos i tzun taltz:
—Iluꞌ Wajcaw cuyuꞌ impaj quiꞌk tzꞌoyintzin cꞌuꞌluꞌ sweꞌj yi na chin jilonquen teruꞌ, poro jaltaꞌtz wiꞌtzbil tir yi tzinjakeꞌ teruꞌ, nin quiꞌt tzinxuxuꞌ mas. ¿Mbil sbanuꞌ yi ko ntin lchijal lajuj ntziꞌ balaj tanuꞌ?
Sajeꞌn tzun stzaꞌwel, i tzun taltz:
—Yi ateꞌ nink yi lajuj balajaꞌtz ẍchixoꞌl, quil chisotz waꞌn. Tzincuyeꞌ chipaj, stzun Ryos bantz.
33 Yi wiꞌt chijiloneꞌn Ryos tu Abraham ajeꞌn nintzun ban iꞌ-tz. Ma Abraham nin pakxijtz xe pach yi mantial tuꞌ.