Yi cweꞌn sotzal Kataj yi tnum Sodoma tu Gomorra
19
1 Itzun bantz yi nsken oc yupcan yi cyocomponeꞌn yi cob ángelaꞌtz le tnum Sodoma. Choꞌn tzun cꞌolchij Lot tzi sawanil yi tnum kale na chimolwit quib cyakil yi eꞌ wunak. Jalt cuntunin yi chibeneꞌn tilol yi cob ángelaꞌtza nintzun je txicloktz tan chicꞌulcheꞌn. Nin cu jokloktz ẍchiwutz. 2 Nintzun taltz scyetz:—Eꞌuꞌ wajcaw, max chicꞌuꞌluꞌ swibaj. Yi in wetz, in chixconsbeꞌtzuꞌ. Ej nin na cuꞌ inwutz scyeruꞌ tan chicyajeꞌn cyenuꞌ xeꞌ incaꞌl te akꞌbaleꞌj. Choktzajuꞌ swuchꞌ, na at aꞌ tan xtxꞌajleꞌn quikanuꞌ. Nin eklen jalchan chicyꞌajtuꞌ chibeꞌuꞌ, stzun iꞌ bantz scyetz.
Sajeꞌn tzun chitzaꞌweltz, itzun cyaltz.
—Quiꞌ loꞌ taꞌ, ntyoẍtuꞌ teruꞌ. Baꞌn tcuꞌn kawitok cyen ketz tbeꞌ te jun akꞌbaleꞌj.
3 Poro quinin tzun taneꞌ Lot tan chimoxeꞌn jalen cuꞌn chicujij tan chicyajeꞌn cyen xe caꞌl iꞌ. Ej itzun yi cyocoponeꞌn xeꞌ caꞌl nintzun cawunin Lot tan banleꞌn chiwaꞌ-tz. Bnix pam yi quiꞌc xtxꞌamil. Ej nin yi bnixeꞌn, nintzun eꞌ wan yi cob aj xajsanlaꞌtz.
4 Ej itzun te yi ntaxk chinucꞌ quib tan watl cyoponeꞌn tzun nil cyakil eꞌ yaj cwent Sodoma swutz yi caꞌl Lot. Cyakil yi eꞌ xicy scyuchꞌ yi eꞌ biẍuꞌ eꞌ baj opontz. 5 Chixeꞌteꞌn tzuntz tan sichꞌ tetz Lot. Itzun cyaltz:
—Lot, ¿laꞌkbeꞌ cob yaj yi nchixom quen tzaweꞌj xe acaꞌl te jun akꞌbaleꞌj? ¡Cyꞌajweꞌltzaj! na na kaj kawitbej kib scyuchꞌ.
6 Telemuleꞌn tzun Lot tan yol scyetz, poro te yi teleꞌn tzaj cyꞌaꞌnt nin jopleꞌn yi puert taꞌn, nin cyaj cunin lajpultz. 7 Beneꞌn tzun tloltz scyetz:
—Eꞌuꞌ jun cꞌoloj wamiw quil chibanuꞌ yi eꞌchk takleꞌnaꞌtz scyeꞌj cob intxocumaꞌtz, na qui na yub cyajtzaꞌkluꞌ. 8 Ateꞌ bin cob wetz inmeꞌl yi txeꞌn cunin chipoꞌtzaj quib te jun yaj. ¿Qui peꞌ na cyajuꞌ yi nink cheꞌ incyꞌajeꞌl tzaj tan chibnoluꞌ yi cyajbiluꞌ scyeꞌj? Na qui na waj yi nink chibanuꞌ jun eꞌchk takleꞌn yi chin juntlenin scyeꞌj yi cob intxocum.
9 Sajeꞌn tzun chitzaꞌwel cyakil yi eꞌ wunakaꞌtz. Itzun cyaltz:
—¡Cawleꞌn tzaj! Cajeꞌn tzi beꞌ, na kocopon. ¿Nka kocopon ptzun ketz jak acaꞌwl? Aẍ tuꞌ awer nak. ¿Nka na tzun awaj yi aẍ cẍben tcꞌuꞌl yi mbi na kaj tan kabnol scyeꞌj atxocumaꞌtz?
Xeꞌteꞌn nintzun eꞌ ban tan jisleꞌn Lot nin eꞌ octz tan pokꞌleꞌn quen puert. 10 Ma yi cob txocumaꞌtz, lajkeꞌl nintzun jeꞌn chijakol yi puert nin oc chikinol Lot xe caꞌl, nin lajkeꞌl nin teleꞌn chilajpul. 11 Ej nin cyakil yi eꞌ wunakaꞌtz yi ateꞌ solteꞌj puert eꞌ cyaj cyen moyiꞌẍ cyaꞌn, chicyakil yi eꞌ xicy scyuchꞌ eꞌ biẍuꞌ. Kꞌeꞌxeꞌn nintzun eꞌ bantz tan joyleꞌn yi puertil yi caꞌl. 12 Ma yi eꞌ xtxocumaꞌtz, nintzun ben chijakol tetz Lot:
—¿Ateꞌ peꞌ mas axonl tzoneꞌj? Ko at acyꞌajl nka ameꞌl, eꞌ ajiꞌ nka alchok axonl le tnumeꞌj, molweꞌ len nin quiloꞌk scyuchꞌ joylaj. 13 Na copon kaxitul cyakil yi amaꞌleꞌj. Nimix cunin xochoꞌn opon swutz Ryos scyeꞌj eꞌ aj Sodomajeꞌj.
14 Beneꞌn tzun Lot tan quilweꞌn yi eꞌ jiꞌ-tz poro ntaxk cyokꞌbej quib tu meꞌl, ntin nsken bnix chitrat. Itzun ben tlol scyetz:
—¡Yaj caleꞌnwok tzaj! Nucꞌwok itib, nin quiteleꞌnk. Ilwok quen yi amaꞌleꞌj, na copon xitul Kataj Ryos.
Poro qui nintzun cyajlajtz yi yol Lot yi tal scyetz.
15 Itzun te yi txant tan tuleꞌn skil, nintzun eꞌ jilon yi eꞌ ángelaꞌtz tetz Lot, itzun cyaltz:
—Or awetz Lot, nucꞌaj awib nin cyꞌajweꞌ len yi awuxkel scyuchꞌ yi cob ameꞌl tan qui iquimeꞌn tzoneꞌj na copon kasotzal cyakil yi tnumeꞌj.
16 Poro tantuꞌ yi quinin nucꞌx chan tib Lot, chibeneꞌn tzun yi eꞌ ángel tan ẍchꞌineꞌn eꞌltzaj yi kꞌab, na nin el kꞌajab Kataj Ryos teꞌj. Ej nin nchaꞌtz ban yi txkel scyuchꞌ yi eꞌ meꞌl. Ej nintzun eꞌ el quicyꞌaltz solteꞌj len yi tnum tan cyeleꞌn liwr.b 17 Te yi nsken wit cheꞌl tzaj joylajeꞌl tzaj yi tnum, at tzun jun scyeri yi eꞌ ángel tal scyetz:
—¡Quiloꞌk lajkeꞌl tan iclaxeꞌn! Nin quil cxmayin tzajwok wutz icoc. Nin quil xtaqueꞌ cuꞌnwok siquier jun tal tkuj le amaꞌleꞌj, ma na cyenin cxbenwok xoꞌl wutz. Ojkeꞌl ninwok tan itoponeꞌn wiꞌwtz tan iclaxeꞌn.
18 —¡Eꞌuꞌ jun cꞌoloj wajcaw, max chicꞌuꞌluꞌ swibaj! 19 Bintzij nin nimix pawor nchibanuꞌ swetz. Nin chumbalaj nin banl cyalmaꞌuꞌ swibaj tan inclaxeꞌn. Poro chicuyuꞌ impaj. Qui na waj yil chimben xoꞌl wutz. Na ko tzun quil kopon chan, nin skatxꞌamxok takꞌun yi caws yi cupon cyakꞌunuꞌ. 20 Poro je jun tal juy tnum at nakaꞌj choneꞌj. Nink cyakꞌuꞌ amaꞌl sketz tan koponeꞌn tul, bantz kaclaxeꞌn, na iꞌtz jun tal juy tnum, stzun Lot scyetz eꞌ ángel.
21 Beneꞌn tzun tlol jun scyeri eꞌ ángelaꞌtz:
—Ja wit yi mbiꞌ majak swetz. Swakꞌeꞌ bin amaꞌl tzitetz tan ibeneꞌn tcꞌuꞌl, na quil sotz yi jun tnumaꞌtz waꞌn. 22 Poro or itkan, na quiꞌc rmeril tan imbnol jun takleꞌn te ntaxk cxopon wok le jun tnumaꞌtz.
Chaꞌstzun te toqueꞌn biꞌ yi jun tnumaꞌtz tetz Zoar.c
23 Itzun yi tuleꞌn skil sken tzun opon Lot le tnum Zoar. 24 Sajeꞌn tzun kojol Kataj jun chin kꞌakꞌ tcyaꞌj yi asufre cuꞌn. Choꞌn tzun cweꞌn squibaj yi tnum Sodoma tu Gomorra. 25 Cyakil cunin tzun chisotzeꞌn yi eꞌ wunak yi ateꞌ-tz.d Nin cyakil eꞌchk takleꞌn yi at tcꞌuꞌl yi jun amaꞌlaꞌtz, sotz teraꞌtz. 26 Itzun yi txkel Lot yi xomij teꞌj, yi cyeleꞌn tzaj ojkuj, nintzun xmayinin iꞌ wutz coc.e Ej nin yi xmayineꞌn nin, ntaꞌtz teꞌn nin oc cyen tetz jun tunuj cꞌub atzꞌum.
27 Ma le junt eklok, jalchan cunin tzun beneꞌn Abraham kale eꞌ jiloneꞌt tu Kataj Ryos. 28 Nintzun ben xmayil iꞌ yi tnum Sodoma tu Gomorra tu cyakil yi ẍkꞌajlaj yi at-tz, nin tibaj cyakil amaꞌlaꞌtz ja til yi jalt cuntuꞌ sib na juquin. I cunin taneꞌn jun chin patbil txun. 29 Yaꞌstzun tulej Kataj yi cweꞌn sotzal iꞌ eꞌchk tnumaꞌtz kale najleꞌt Lot. Poro nin ul txꞌakxuj yi yol Abraham tcꞌuꞌl Kataj. Chaꞌstzun te nin el tzaj tcyꞌal iꞌ yi Lot le jun amaꞌlaꞌtz yi ntaxk sotz taꞌn.
30 Itzun bantz te yi toponeꞌn Lot jalen Zoar nin xob iꞌ-tz tan najeweꞌn le jun tnumaꞌtz. Chaꞌstzun te ticyꞌeꞌn iꞌ junt tir tan najeweꞌn xoꞌl wutz scyuchꞌ yi cob meꞌl. Choꞌn tzun chinajeweꞌn tzakꞌ jun picy.
31 Ej itzun yi bajx meꞌl Lot nin jilonin tetz yi titzꞌun itzun taltz: “Ma jaluꞌ witzꞌun, ja biꞌẍin kataj, nin le amaꞌleꞌj quiꞌc nin jun yaj at tan toqueꞌn tetz kuchmil. 32 ¿Qui peꞌ na awajaꞌtz yil tzꞌoc aꞌ kaꞌn twiꞌ taꞌ? Ej nin yil tzꞌoc aꞌ twiꞌ baꞌn tzun kawitbej kib tuchꞌ tan jaleꞌn jujun kal.”
33 Ma yi toqueꞌn akꞌbal nintzun ben cyakꞌol win tetz chitaj. Ej itzun yi bajxnak yaꞌstzun coyeꞌ cuꞌntz teꞌj, nin quinin tzun tzꞌicyꞌ tetz Lot yi cweꞌn coylok. Nin nchaꞌtz qui nin nachon iꞌ teꞌj yi teleꞌn watl. 34 Ma le junt eklok itzun tal yi bajxnak tetz yi titzꞌun: “Bit tzaj, choꞌn nchinwit wetz teꞌj kataj ewt. Ej ma te akꞌbaleꞌj, aẍ. Kakꞌeꞌ nin junt tir win tetz taꞌ tan awiteꞌn atz teꞌj, bantz jaleꞌn awal.”
35 Ej i nintzun cyulejaꞌtz quib yi tal yi bajxnak tetz yi caꞌp. I teꞌn nin akꞌbalaꞌtz toqueꞌn aꞌ cyaꞌn twiꞌ chitaj tan witeꞌn yi caꞌp meꞌl iꞌ teꞌj, poro qui nin nachon iꞌ teꞌj yi teleꞌn watl. 36 Tan tuꞌ yi cweꞌn chitxumul yi cob meꞌl Lot yi jun ajtzaꞌklaꞌtz, ja tzun oc lacꞌpuj jujun niꞌ scyeꞌj. 37 Ej itzun yi bajxnak yi jaleꞌn yi tetz tal nintzun oc biꞌ taꞌn tetz Moab. Yaꞌstzun chimam chiteꞌ yi eꞌ moabita. 38 Ma yi caꞌp, yi titzꞌeꞌn yi tetz tal nintzun oc biꞌ-tz taꞌn tetz Benami. Yaꞌstzun chimam chiteꞌ yi eꞌ amonita jaluꞌ.