Abraham tu Abimelec
20
1 Itzun yi teleꞌn tiemp, nintzun icyꞌ Abraham swutz yi amaꞌl kale najleꞌt iꞌ. Choꞌn tzun toponeꞌn le amaꞌl cwent Néguev. Ej nin yi toponeꞌn, choꞌn tzun najeweꞌntz le tnum yi na biꞌaj Gerar, nicyꞌal Cades tu Shur. 2 Ej itzun bantz yi chinajeweꞌn tul yi jun amaꞌlaꞌtz nintzun tal Abraham scyetz yi eꞌ wunak yi najlcheꞌ yi quitzꞌun quitzicy quib tu Sara yi txkel.a Ma yi tbital Abimelec, yi rey tetz Gerar yi jun xtxolbilaꞌtz, nintzun ben mantartz tan ticyꞌleꞌn tzaj Sara tan toqueꞌn kloꞌ tetz caꞌp txkel. 3 Poro nintzun ẍchaj tib Ryos swutz iꞌ le wutzicyꞌ, ej nin taltz tetz: “Abimelec, ẍquimok, na mbi xac nsaj awucyꞌal yi jun xnaꞌnaꞌtz tzawuchꞌ, na at tetz chmilaꞌtz.” 4 Poro ntaxk chiwitbej quib Abimelec tu Sara. Chaꞌstzun te talol iꞌ-tz tetz Ryos: “Iluꞌ Wajcaw, poro ẍchinquimok poloꞌ tanuꞌ, na quiꞌc jun takleꞌn cachiꞌ mimban teꞌj. 5 Na wutzileꞌn cunin Abraham mmaꞌlon swetz yi tanub tuꞌ iꞌ. Nchaꞌtz yi xnaꞌn ja tal swetz yi quitzꞌun quitzicy quib tu Abraham. Chaꞌstzun te mmuꞌl swuchꞌ. Quiꞌc cunin tzun wetz wil teꞌj.”6 Sajeꞌn tzun tlol Ryos tetz tul wutzicyꞌ, itzun taltz: “Na el intxum tetz yi quiꞌc cunin awil teꞌj yi mmuꞌl tzawuchꞌ. 7 Ma jaluꞌ, cun akꞌ te yi chmil, na iꞌ jun elsanl intziꞌ, nin copon wutz tan jakleꞌn abanl. Poro ko quil tzꞌoc te awiꞌ, ẍquimok, scyuchꞌ cyakil yi eꞌ yi ateꞌ jak acaꞌwl.”
8 Itzun le junt eklok, chin jalchan cunin tzun cꞌaseꞌn Abimelec nin ben mantartz scyeꞌj yi eꞌ ẍchakum. Ma bajeꞌn chimolol quib, nintzun baj xtxolil scyetz yi mbi cuꞌn aꞌlchij tetz le wutzicyꞌ. Yi quibital yi eꞌ ẍchakum nintzun eꞌ baj xob lentz. 9 Ẍchakol tzun Abimelec yi Abraham. Yi tuleꞌn iꞌ, itzun taltz:
10 —¡Yaj! Mbi nintzun jun chin il yi bnix awaꞌn skeꞌj. ¿Mbi wil tzatz yi ncuꞌ atxumul, tan tulseꞌn jun chin ilaꞌtz swibaj, nin squibaj cyakil intanum? ¡Qui na yub yi moꞌc tzaj anucꞌul sweꞌj yaj! ¿Mbi na cẍtzan tan xtxumleꞌn yi ncuꞌ anucꞌul yi jun ilaꞌtz sweꞌj? stzun Abimelec ban tetz Abraham.
11 —Max cꞌuꞌluꞌ taꞌ, poro taneꞌn tzinwutz wetz, cyaꞌl jun najk tek ẍchiꞌ Ryos tzoneꞌj. Na nin inxob ko tzun choꞌc wunak tan imbiyleꞌn cuꞌn tan cyetzal wuxkel. 12 Poro yi mero bintzi wanub iꞌ, na junit kataj tuchꞌ. Ntin katxuꞌ apart. Ej nin jaluꞌ kokꞌbeꞌnt kib tuchꞌ. 13 Nin yi talol Ryos swetz tan weleꞌntzaj le tanum intaj, ja tzun bixeꞌ kaꞌn tu wuxkel tan kalol scyetz cyakil wunak tul alchok amaꞌlil kalel kaꞌtcuꞌnt yi kitzꞌun kutzicy kib skibil kib, stzun Abraham bantz tetz Abimelec.
14 Tajeꞌn tzun tkꞌol Abimelec Sara tetz Abraham. Nchaꞌtz toy iꞌ jun cꞌoloj cneꞌr tu wacẍ, tu jun cꞌoloj yaj tu xnaꞌn tetz mos Abraham. 15 Ej nin taltz tetz:
—Xmaynin cyakil yi weri inluwareꞌj. Nin baꞌn tzatxaꞌeꞌn jalaj atz, yi mas baꞌn tzawutz tan anajeweꞌn swutz.
16 Nchaꞌtz tal Abimelec tetz Sara:
—Yi walor cyakil yi nwakꞌ tetz axibin, iꞌtz jun mil piẍ sakal. Xconk tan ẍchajleꞌn scyetz cyakil wunak yi aẍ jun balaj xnaꞌn, nin cyaꞌl jun jalsan yolbil atz, stzun Abimelec bantz.