Yi toqueꞌn banleꞌn yi patbil txꞌixwatz
38
1 Itzun bantz nintzun oc Bezaleel tan banleꞌn yi patbil txꞌixwatz te balaj tzeꞌ acacia. Yi toqueꞌn iꞌ tan banleꞌn cyaj xtxꞌuꞌcnakiꞌn tulej. Cob metr tu junak oꞌ centimetr ban yi xlajak. Ma yi wutz tkan, iꞌtz jun metr tu junak oꞌ centimetr ban. 2 Nchaꞌtz bnix cyaj tucꞌ, jun tzun le jujun xtxꞌuꞌc. Junit tzun ban yi cyaj tucꞌaꞌtz tu cyakil yi patbil txꞌixwatz. Ej nin oc brons te yi jun patbil txꞌixwatz tan jopleꞌn yi tzeꞌ. 3 Nin cyakil yi eꞌchk maꞌcl yi xcon te yi jun patbil txꞌixwatzaꞌtz brons cuꞌn ntulej iꞌ. Yi eꞌchk maꞌclaꞌtz chi taneꞌn yi cuꞌlbil tzaꞌj, tu yi eꞌchk paleꞌt, tu yi eꞌchk lmak lak, tu yi eꞌchk lmak pacꞌ, tu eꞌchk cuꞌlbil xtxakꞌakꞌ, brons cuꞌn ban tircuꞌn. 4 Bnix jun pariy yi brons cuꞌn. Choꞌn cweꞌn tul yi patbil txꞌixwatz, nicyꞌan cuntuꞌ tan jeꞌn kꞌakꞌ tibaj. 5 Nchaꞌtz bnix cyaj argoy, jujun le jujun xtxꞌuꞌc yi pariy. Yi xac yi argoyaꞌtz iꞌtz tan ticyꞌeꞌn yi kꞌaꞌj tul. 6 Nintzun oc Bezaleel tan banleꞌn yi kꞌaꞌjil. Ej nin bnix taꞌn te yi tzeꞌ acacia. Nchaꞌtz oc brons teꞌj yi kꞌaꞌjaꞌtz yi xcon te yi patbil txꞌixwatz. 7 Yi bnixeꞌn yi eꞌchk kꞌaꞌjaꞌtz nintzun icyꞌ taꞌn tul yi eꞌchk argoy yi at te yi patbil txꞌixwatz, na yi xac iꞌtz tan palcheꞌn, nin tan ticyꞌleꞌn nin yi patbil txꞌixwatzaꞌtz. Yi jun patbil txꞌixwatzaꞌtz jul sbneꞌ tul chi taneꞌn jun cajón. Poro oc brons teꞌj cyakil tan jopleꞌn yi tzeꞌ.Yi bnixeꞌn yi jun chin wutzileꞌn plancan
8 Toqueꞌn tzun Bezaleel tan molcheꞌn yi chispeja yi eꞌ xnaꞌn yi ateꞌ-tz stziꞌ yi puertil yi pach yi mantial tuꞌ. Yi molxeꞌn nintzun oc iꞌ tan banleꞌn jun chin wutzileꞌn plancan yi brons cuꞌn ban. Nchaꞌtz ban yi cꞌolchbil, brons cuꞌn.
Yi solteꞌj yi mantial
9 Nchaꞌtz bnix yi peꞌm solteꞌj yi mantial tan Bezaleel. Bajx bnixeꞌn yi jalaj xlaj yi na xmayin nin cweꞌn tziꞌn. Oc caꞌwunak oꞌ metr balaj xbuꞌk yi lino cuꞌn te yi jalaj xlajaꞌtz. 10 Bnix yi junak tkan tu yi junak simientil yi jalaj peꞌmaꞌtz. Brons cuꞌn ban. Ma yi eꞌchk ganchil tu yi eꞌchk tzꞌamol tetz iꞌtz sakal cuꞌn ban tircuꞌn. 11 Nchaꞌtz yi jalajt yi na xmayin nin jeꞌn tziꞌn, caꞌwunak oꞌ metr balaj xbuꞌk oc teꞌj. Ma yi junak tkan tuml yi junak simientil, iꞌtz brons cuꞌn ban tircuꞌn. Ma yi eꞌchk ganchil tuml yi eꞌchk xmalkꞌabil sakal cuꞌn ban. 12 Ma te yi jalajt yi na xmayin nin toqueꞌn tziꞌn oc junak cob metr tu niꞌcy balaj xbuꞌk teꞌj. Nchaꞌtz bnix yi lajuj tkan tu lajuj simientil tuml yi eꞌchk argoy tu eꞌchk ganch, sakal cuꞌn ban. 13 Nchaꞌtz ban yi jalajt xlaj yi na xmayin nin teleꞌn tziꞌn junak cob metr tu niꞌcy balaj xbuꞌk oc teꞌj. 14 Ma xlaj yi puert at juk metr balaj xbuꞌk tu ox tkan tuml eꞌchk simientil. 15 Nchaꞌtz ban le jalajt xlaj yi puert, oc juk metr balaj xbuꞌk teꞌj tu ox tkan tuml eꞌchk simientil. 16 Cyakil yi xbuꞌk yi oc te peꞌmil yi mantial iꞌtz xbuꞌk lino cuꞌn yi bakꞌuꞌn. 17 Cyakil eꞌchk simientil yi tkan peꞌm iꞌtz brons cuꞌn, ma yi eꞌchk ganch yi na xcon te yi tkan tu yi eꞌchk argoy iꞌtz sakal cuꞌn. Ma twiꞌeꞌn yi tkan ateꞌn jujun yubil yi sakal. Ej nin cyakil eꞌchk tkan atlen argoy teꞌjak.
18 Ma yi xbuꞌk yi oc tetz yi puertil yi peꞌm, chemij ban tan yi balaj nokꞌ yi txib yubil tu xkꞌaykꞌuj tu cyak, nin yi balaj lino yi bakꞌun wutz. Beluj tzun metr ban yi tkan. Ma yi wutz tkan iꞌtz cob metr tu junak oꞌ centimetr, chi taneꞌn yi mas xbuꞌk. 19 At cyaj tkan nin cyaj simientil yi brons cuꞌn, ma yi eꞌchk ganch tu yi eꞌchk argoy sakal cuꞌn ban. Ej nin yi twiꞌ yi eꞌchk tkanaꞌtz ateꞌn jujun yubil yi sakal cuꞌn. 20 Cyakil yi eꞌchk staqui yi xcon tetz yi mantial tuml yi xcon te yi peꞌm yi at solteꞌj, brons cuꞌn ban tircuꞌn.
Yi eꞌ akꞌunwil tu eꞌchk maꞌcl yi xcon te yi mantial
21 Tan caꞌwl Moisés oc Itamar yi cyꞌajl yi wiꞌtz paleꞌ Aarón tan ticyꞌleꞌn nin juꞌ yi akꞌun. Ej nin iꞌ aꞌlon scyetz yi eꞌ levita tan ticyꞌleꞌn nin yi tajlal cyakil yi chꞌichꞌ yi xcon tan banleꞌn yi mantial kale atit yi caẍaꞌ tetz yi trat.
22 Ma tetz Bezaleel bnix cyakil yi akꞌun taꞌn chi yi tal Ryos tetz Moisés. Yi jun Bezaleelaꞌtz iꞌ yi cyꞌajl taꞌ Uri nin mamaj wutzileꞌn taꞌ Hur jun scyeri xonl Judá. 23 Nchaꞌtz oc Aholiab tan ẍchꞌeyeꞌn Bezaleel, na iꞌ jun wiꞌtz txakꞌol chꞌichꞌ, nchaꞌtz iꞌ jun balaj chemol, na baꞌn na bnix balaj xbuꞌk taꞌn te yi nokꞌ yi txib yubil tu xkꞌaykꞌuj nin cyak tu yi balaj lino. Yi yaj Aholiab iꞌ cyꞌajl Ahisamac jun scyeri xonl Dan.
24 Cyakil yi oro yi xcon tan banleꞌn yi eꞌchk takleꞌn tetz mantial iꞌtz cyoy yi eꞌ xonl Israel yi opon cyaꞌn tetz Ryos. Nin yi tajlal yi oro yi opon iꞌtz junak cob loꞌ quintal chi yi maꞌlbil yi xcon xe yi mantial.
25 Ma yi sakal yi molxij yi jeꞌn yi sens ẍchixoꞌl yi xonl Israel iꞌtz oxcꞌal tu oꞌlaj quintal tu cob arow chi yi maꞌlbil yi na xcon xe yi mantial. 26 Cyakil yi eꞌ yi eꞌ oc tajlal yi toqueꞌn cyajleꞌn, iꞌtz yi eꞌ yi nsken tzꞌak junak yob cyaꞌn le jeꞌnak. Nin yi cyajlal, iꞌtz kak cient tu ox mil tu oꞌ cient tu niꞌcy chixoneꞌn. Nin yi eꞌaꞌtz cyakꞌ len chicutxuj, yi iꞌtz oꞌ el yi jun ons sakal chi yi maꞌlbil yi xcon tetz yi mantial. 27 Molxij tzun ox cꞌal tu oꞌlaj quintal sakal. Yaꞌstzun xcon tan banleꞌn yi eꞌch simientil te yi tkan yi mantial tuml eꞌchk simientil yi tkan yi xbuꞌk yi at tul yi mantial. Ja tzun bnix jun cient simientil. Ej nin xcon ox ox arow sakal te jujun. 28 Nchaꞌtz te yi sakalaꞌtz yi baj opon cyakꞌun yi eꞌ xonl Israel oc Bezaleel tan banleꞌn cyakil yi eꞌchk ganch tu argoy yi xcon te eꞌchk tkan yi mantial. Ej nin ja xcon tan banleꞌn yubil yi jeꞌ tibaj yi eꞌchk tkanaꞌtz. 29 Ma yi brons yi opon cyakꞌun yi eꞌ xonl Israel tan toyeꞌn tetz Ryos iꞌtz nicyꞌ cient tu ox quintal tu lajuj liwr. 30 Ej nin te cyakil yi bronsaꞌtz yi molxij, bnix cyakil yi simientil yi tkan, yi puertil yi amaꞌl kale na chicꞌulwit quib tu Ryos. Nchaꞌtz bnix yi patbil txꞌixwatz yi brons cuꞌn tuml yi pariyil, tu cyakil yi eꞌchk mas maꞌcl yi xcon te yi patbil txꞌixwatz, brons cuꞌn ban. 31 Nchaꞌtz cyakil yi simientil yi xcon tetz yi eꞌchk tkan yi peꞌm yi at solteꞌj yi mantial, tu yi simientil yi eꞌchk tkan yi puertil yi peꞌm, tu cyakil yi eꞌchk staqui yi xcon tan stzꞌamleꞌn yi mantial tu yi peꞌm yi at solteꞌj, brons cuꞌn ban.