Yi bnixeꞌn yi caẍaꞌ kale atit yi caꞌwl Ryos
37
1 Nchaꞌtz oc Bezaleel tan banleꞌn yi caẍaꞌ kale atit yi caꞌwl Ryos. Oc iꞌ tan banleꞌn te yi balaj tzeꞌ yi acacia. Jun metr tu lajuj centimetr ban yi tkan. Ma yi wutz iꞌtz oxcꞌal tu oꞌ centimetr ban, nin oxcꞌal tu oꞌ centimetr ban yi wutz tkan. 2 Nintzun oc oro teꞌj tircuꞌn. Oc solteꞌj nin oc tcꞌuꞌl. Nin nchaꞌtz bnix jun yubil stziꞌak chi taneꞌn cornis yi oro cuꞌn. 3 Nin nchaꞌtz bnix cyaj argoy yi oro cuꞌn. Choꞌn tzun toqueꞌn tkꞌol cob le jalaj xlaj nin cobt le jalajt. 4 Nchaꞌtz bnix cob kꞌaꞌjil yi caẍaꞌ te yi tzeꞌ acacia. Nintzun oc oro teꞌjak yi eꞌchk kꞌaꞌjaꞌtz. 5 Yi bnixeꞌn yi eꞌchk kꞌaꞌjaꞌtz nintzun icyꞌ cyaꞌn tul yi eꞌchk orgoy yi at te yi caẍaꞌaꞌtz. Na yi xac iꞌtz tan palcheꞌn nin, nin tan ticyꞌleꞌn nin yi jun caẍaꞌaꞌtz.6 Nin nchaꞌtz bnix jun jopsela tan Bezaleel te yi balaj oro. Jun tzun metr tu lajuj centimetr ban yi tkan, nin oxcꞌal tu oꞌ centimetr ban yi wutz yi jun jopselaꞌtz yi bnix. 7 Nin tibaj yi jun jopselaꞌtz bnix teblal cob querubim. Txakꞌij tzun bantz tan chꞌichꞌ nin oro cuꞌn ban. Choꞌn tzun cyajeꞌn cyen jun le jalaj stziꞌ yi jopsel nin yi junt le jalajt stziꞌ. 8 Junit tzun ban yi jopselaꞌtz tu yi cob teblalaꞌtz. Na choꞌn at yi jun teblal le jalaj stziꞌ ma yi junt choꞌn at le jalajt. 9 Nintzun na tokꞌbej cuꞌn tib yi chiwutz yi cob teblalaꞌtz. Poro yi chiwutz choꞌn ajnak cuꞌn tibaj yi jun jopselaꞌtz. Ma yi chixicyꞌ, elnak xit, nin na xcyeꞌ tan jopleꞌn tircuꞌn yi jun jopselaꞌtz.
Yi bnixeꞌn yi mes kale jeꞌt yi pam
10 Nchaꞌtz oc Bezaleel tan banleꞌn yi mes tan yi balaj tzeꞌ acacia. Jun tzun mutxꞌ tu lajuj centimetr ban yi tkan, nin caꞌwunak oꞌ centimetr ban yi wutz, nin oxcꞌal tu oꞌ centimetr ban yi wutz tkan yi jun mesaꞌtz. 11 Nintzun oc oro teꞌjak yi mes, nin bnix jun yubil stziꞌak, yi oro cuꞌn ban. 12 Nchaꞌtz bnix junt yubil yi oro cuꞌn chi taneꞌn cornis yi lox cunin ban. Juk centimetr ban yi wutz yi jun yubilaꞌtz. 13 Nin chaꞌtz ban Bezaleel cyaj argoy yi oro cuꞌn. Nintzun oc tkꞌol te yi cyaj xtxꞌuꞌc kale atit yi cyaj tkan yi mes. 14 Choꞌn tzun toqueꞌn tzakꞌ yi yubel yi at stziꞌak yi mes, nin xcon tan ticyꞌeꞌn yi eꞌchk kꞌaꞌj tul tan palcheꞌn yi mes.
15 Yi eꞌchk kꞌaꞌjaꞌtz ja bnix tan yi tzeꞌ acacia. Nin yi bnixeꞌn nintzun oc oro teꞌjak. 16 Nchaꞌtz cyakil yi eꞌchk maꞌcl yi xcon te yi jun mesaꞌtz oro cuꞌn ban, chi taneꞌn yi eꞌchk platuꞌ tu yi eꞌchk lmak cuchar, tu eꞌchk xaruꞌ, tu eꞌchk lak yi na xcon tan kojleꞌn yi eꞌchk oy, oro cuꞌn ban tircuꞌn.
Yi toqueꞌn banleꞌn yi jun chin wutzileꞌn cantil
17 Nchaꞌtz oc Bezaleel tan banleꞌn yi jun chin wutzileꞌn cantil tan oro. Txakꞌij tzun tulej tan martiy. Oro cuꞌn ban yi xeꞌ tu yi tkan tu yi eꞌchk copa yi at teꞌj, tu yi eꞌchk yubel yi at teꞌj. Yi eꞌchk yubelaꞌtz icunin wutz almendro taneꞌn te yi ntaxk jeꞌ chitp. Nin junit ban yi bambil tetz cyakil yi weklil yi jun cantilaꞌtz. 18 Ej nin yi jun cantilaꞌtz ox ox kꞌab na el xlajak yi tkan. Juk cuꞌn tzun wiꞌ na bantz. 19 Te cyakil yi kak kꞌab yi na el tzaj te yi jun chin wutzileꞌn cantilaꞌtz, at len ox tal neꞌẍ yubil chi taneꞌn yi buchil yi almendro yi ntaxk je chitpuj. 20 Ma te tkan, nchaꞌtz at cyaj tal neꞌẍ buch chi taneꞌn yi buchil almendro yi ntaxk je chitp. 21 Ma jakꞌ yi amaꞌl kale na eleꞌt yi eꞌchk kꞌab yi jun cantilaꞌtz ja bnix jun yubil chi taneꞌn sopil buch. Jujun tal yubil oc tzakꞌ kale na eleꞌt jun lmuj kꞌab. 22 Cyakil yi eꞌchk weklilaꞌtz, chi taneꞌn yi eꞌchk tal neꞌẍ buch, junit ban. Oro cuꞌn ban cyakil yi jun cantilaꞌtz. Nin txakꞌij mulij tan martiy. 23 Nchaꞌtz oro cuꞌn ban yi juk tal neꞌẍ txekbil yi at twiꞌ, tu yi eꞌchk maꞌcl chi taneꞌn yi elsbil mechaꞌ tu yi eꞌchk neꞌẍ lak yi xcon teꞌj. Oro cuꞌn ban tircuꞌn. 24 Tan banleꞌn yi jun wutzileꞌn cantilaꞌtz tu yi cyakil yi eꞌchk weklil tu yi eꞌchk maꞌcl yi xconk teꞌj, ja xcon ox loꞌ arow balaj oro tan banleꞌn.
Yi bnixeꞌn yi patbil insens
25 Nchaꞌtz bnix yi patbil insens tan Bezaleel. Ej nin xcon yi balaj tzeꞌ acacia tan iꞌ tan banleꞌn. Cyaj tzun xtxꞌuꞌcnakiꞌn ban yi jun patbil insensaꞌtz. Caꞌwunak oꞌ centimetr ban yi tkan nin caꞌwunak oꞌ centimetr ban yi wutz, nin jun mutxꞌ tu lajuj centimetr ban yi wutz tkan. Nchaꞌtz ja bnix yi eꞌchk tal neꞌẍ tucꞌ. Tircuꞌn bnix tan junit topoj tzeꞌ. 26 Yi wiꞌt bnixeꞌn yi patbil insens toqueꞌn tzun oro teꞌjak, chi taneꞌn yi tibaj, tuml yi cyaj xlaj tu yi eꞌchk tal neꞌẍ yubil tziꞌak yi patbil insensaꞌtz nin oro cuꞌn ban. 27 Nin tzakꞌ yi jun yubilaꞌtz oc cyaj argoy yi oro cuꞌn. Cob tzun oc quen le jalaj xlaj nin cobt le jalajt. Yi eꞌchk argoyaꞌtz xcon tan palcheꞌn yi patbil insens, na choꞌn ticyꞌeꞌn yi kꞌaꞌj tul. 28 Ma yi eꞌchk kꞌaꞌj xcon yi balaj tzeꞌ acacia tan banleꞌn, nin oc oro teꞌjak tan jopleꞌn yi tzeꞌ.
Yi bnixeꞌn yi aceit tu yi insens
29 Nin oc Bezaleel tan banleꞌn yi aceit tu yi insens yi chin xan nin yi na xcon tan xanseꞌn jun takleꞌn nka jun yaj. Choꞌn cunin tzun ntulej iꞌ-tz chi yi na quilej yi eꞌ wiꞌtz bnol perfum.