36
1 ”Chaꞌstzun te tajweꞌn tan chibnol yi Bezaleel tu Aholiab yi akꞌuneꞌj. Nchaꞌtz yi eꞌ mas yi ja akꞌlij yi cyajtzaꞌkl tan banleꞌn eꞌchk balaj akꞌun, tajweꞌn tan chibnol cyakil yi eꞌchk takleꞌn yi xconk xe yi mantial, kale tzꞌoqueꞌt naꞌwseꞌn Kataj Ryos. Nin tajweꞌn tan bnixeꞌn chi yi ntal iꞌ,” stzun Moisés bantz scyetz yi eꞌ xonl Israel.Yi cyoyil yi xonl Israel wiꞌnin oy tetz Ryos
2 Itzun bantz nintzun eꞌ chakxij cyetz Bezaleel tu Aholiab scyuchꞌ yi eꞌ mas yaj yi akꞌlijlen cyajtzaꞌkl tan banleꞌn eꞌchk balaj akꞌun. Na Ryos akꞌon yi cyajtzaꞌkl yi eꞌ yajaꞌtz tan cyoqueꞌn tan banleꞌn yi eꞌchk akꞌunaꞌtz. Nin tetz cuꞌn cyalmaꞌ cyakꞌujeꞌn tan banleꞌn, quib yi tal Ryos. 3 Nintzun takꞌ Moisés cyakil yi eꞌchk oy scyetz yi baj opon cyakꞌun chitanum, bantz chixeꞌteꞌn tan banleꞌn yi eꞌchk takleꞌn yi xconk xe yi mantial. Poro itzun bantz, wiꞌnin tzun oy baj opon cyakꞌun yi eꞌ xonl Israel. Na cyakil kꞌej wiꞌnin cyoponeꞌn tan takꞌleꞌn mas oy, nin tetz cuꞌn cyalmaꞌ cyakꞌol.
4 Ma yi quilol yi eꞌ yi na chitzan tan banleꞌn yi akꞌun yi wiꞌnin oy tzan toponeꞌn, cyajeꞌn cyen tzun quilol yi cyakꞌun yi na chitzan tan banleꞌn. 5 Nintzun eꞌ bentz tan yol tetz Moisés. Itzun cyaltz: “Taꞌ, nimix cunin oy ul cyakꞌun wunak, nin sowrink. Na ja ul mas cyakꞌun swutz yi xconk te yi akꞌun,” cheꞌch bantz.
6 Teleꞌn tzun stziblal tan Moisés ẍchiwiꞌ cyakil yi eꞌ xonl Israel yi qui tajweꞌn tan tuleꞌn jun xnaꞌn nka jun yaj tan takꞌleꞌn mas oy tetz yi takꞌun Kataj. Chaꞌstzun te makxeꞌn yi oyaꞌtz yi baj opon cyakꞌun yi eꞌ xonl Israel. 7 Makxij yi oyaꞌtz, na nkꞌeꞌtz ntin molxij cyakil yi tajweꞌn ma na nim cunin sowrink.
Yi toqueꞌn banleꞌn yi mantial
8 Cyoqueꞌn tzun yi eꞌ yaj yi at mas cyetz cyajtzaꞌkl ẍchiwutz yi eꞌ mas akꞌunwil tan banleꞌn yi mantial. Eꞌ oc tzuntz tan ẍchemleꞌn lajuj xbuꞌk tan balaj lino yi bakꞌun wutz. Ja xcon lino cyakꞌun yi txib yubil tu xkꞌaykꞌuj tu cyak, nin ja bnix cob teblal swutzak jujun xbuꞌkaꞌtz. 9 Coblaj metr tu niꞌcy mban yi tkan yi jujun xbuꞌkaꞌtz. Ma yi wutz iꞌtz cob metr ban. Junit maꞌlbil ban tircuꞌn. 10 Oꞌ tzun xbuꞌk eꞌ tzꞌis. Junit ban yi oꞌ xbuꞌkaꞌtz. Nchaꞌtz ban yi oꞌt, junit ban. 11 Nchaꞌtz eꞌ oc cobox xmalkꞌab tziꞌak jalaj xlaj yi cob lmak xbuꞌkaꞌtz. Txib yubil yi eꞌchk xmalkꞌabilaꞌtz. 12 Niꞌcy cient cꞌalbil tetz oc cyaꞌn stziꞌ jalajchak xlaj yi cob xbuꞌkaꞌtz. Nicyꞌ nintuꞌ xoꞌlak ban tan tokꞌbeꞌn cuꞌn. 13 Nchaꞌtz bnix niꞌcy cient ganch yi oro cuꞌn kale tzꞌicyꞌeꞌt yi cꞌalbil tetz tan ẍchupleꞌn yi cob xbuꞌkaꞌtz. Ja tzun bnix yi bajx xbuꞌk tetz wiꞌ yi mantial.
14 Nchaꞌtz bnix junlajt xbuꞌk tan Bezaleel tan xiꞌil chiw. Yi junlaj xbuꞌkaꞌtz xcon tan banleꞌn jun paꞌtbil yi njeꞌ tibaj yi mantial. 15 Oxlaj metr tu niꞌcy ban yi tkan yi jujun xbuꞌk nin cob metr ban yi wutz. Junit maꞌlbil xcon te tircuꞌn. 16 Oꞌ tzun te yi junlaj xbuꞌkaꞌtz eꞌ tzꞌis nin junit ban yi oꞌaꞌs. Nin nchaꞌtz ban yi kakt. 17 Nin bnix niꞌcy cient xmalkꞌabil stziꞌ yi jalajchak xlaj yi cob xbuꞌkaꞌtz. Nicyꞌ nin tuꞌ xoꞌlak ban tan tokꞌbeꞌn cuꞌn. 18 Nchaꞌtz bnix niꞌcy cient ganchil yi brons cuꞌn kalel tzꞌicyꞌeꞌt yi cꞌalbil tetz tan ẍchupleꞌn cuꞌn yi cob xbuꞌkaꞌtz. Yaꞌstzun yi cob xbuꞌk tetz wiꞌ yi mantial.
19 Nchaꞌtz bnix junt paꞌtbil yi mantial tan Bezaleel yi stzꞌuml cneꞌr cuꞌn yi cyak stzꞌacl ocnak. Ej nin tetz yi mero tibaj, ja bnix junt paꞌtbil te junt jilwutz tzꞌuꞌm yi na biꞌaj tejón.a 20 Nchaꞌtz oc iꞌ tan banleꞌn yi balaj tablón te yi tzeꞌ acacia. Chin jicyuch nin tulej iꞌ. 21 Cyaj metr tu niꞌcy ban yi tkan yi jujun tablónaꞌtz, nin oxcꞌal tu oꞌ centimetr ban yi wutz. 22 Nin stziꞌak yi eꞌchk tablónaꞌtz bnix cob tzꞌambil tetz, itzun yi na oc yi junt tablón xlaj nintzun na cyokꞌp cuꞌn quibtz. Yaꞌstzun cyulej tircuꞌn yi tablón yi nxcon tan banleꞌn yi cajonil yi mantial. 23 Junak tablón bnix tetz yi jalaj xlaj yi na xmayinin cweꞌn tziꞌn. 24 Nin caꞌwunak simientil bnix cyen tzakꞌ yi junak tablónaꞌtz nin sakal cuꞌn ban. Cob simientil cyaj xeꞌak yi jujun tablón. 25 Nchaꞌtz ban yi jalajt xlaj yi na xmayinin jeꞌn tziꞌn, bnix junakt tablón. 26 Caꞌwunak simientil ban nin sakal cuꞌn xcon tan banleꞌn, na cob simientil te jujun tablón. 27 Ma le jalajt yi na xmayin nin toqueꞌn tziꞌn, kak tzun tablón bnix tan xconeꞌn te jalajaꞌtz. 28 Nin cobt tablón bnix tan toqueꞌn te yi cob xtxꞌuꞌc. 29 Yi eꞌchk tablónaꞌtz junit mban te yi cob yi at nin xtxꞌuꞌc, na ja chicꞌalxij swiꞌ nin xeꞌ tan chꞌichꞌ. Yaꞌstzun cyulej yi cob xtxꞌuꞌcaꞌtz. 30 Wajxak tzun tablón xcon te yi jalajt xlajaꞌtz yi na xmayinin toqueꞌn tziꞌn, tuml waklaj simientil na ja xcon cob te yi jujun tablón.
Yi eꞌchk kꞌaꞌj
31 Nchaꞌtz bnix oꞌ kꞌaꞌj tan Bezaleel. Ja bnix yi eꞌchk kꞌaꞌjaꞌtz tan yi tzeꞌ acacia. Nin yi oꞌ kꞌaꞌjaꞌtz yaꞌstzun xcon tan stzꞌamleꞌn jalaj xlaj yi mantial. 32 Nin nchaꞌtz bnix oꞌt tetz yi jalajt xlaj, nin oꞌt tetz yi jalajt xlaj wutz coc yi na xmayinin toqueꞌn tziꞌn. 33 Te yi oꞌ kꞌaꞌjaꞌtz yi xcon te yi jalajchak xlaj at jun yi icyꞌ nicyꞌal yi eꞌchk tablón yi at le jalajchak xlaj. Choꞌn ticyꞌeꞌn tul yi bajx tablón jalen te yi wiꞌtzbil tablón.
34 Nintzun oc tkꞌol oro te yi eꞌchk tablónaꞌtz nin bnix cobox ganch yi oro cuꞌn kale icyꞌeꞌt yi eꞌchk kꞌaꞌj yi bnix. Nchaꞌtz yi eꞌchk kꞌaꞌjaꞌtz oc oro teꞌj chi yi mban yi eꞌchk tablónaꞌtz.
Yi xbuꞌk yi nxcon tan jopleꞌn yi amaꞌl yi wiꞌnin xanil
35 Nin nchaꞌtz oc Bezaleel tan banleꞌn yi xbuꞌk yi xcon tan jopleꞌn yi amaꞌl yi wiꞌnin xanil. Oc iꞌ tan banleꞌn tan nokꞌ yi txib tu xkꞌaykꞌuj yubil, nchaꞌtz xcon balaj lino yi bakꞌuꞌn wutz. Nin oc iꞌ tan ẍchemleꞌn teblal eꞌ querubim swutz. Chin cꞌotij cuꞌn tulej. 36 Yi bnixeꞌn yi xbuꞌkaꞌtz nintzun oc tkꞌol cobox ganch, kalenaꞌtz tzun jeꞌn ẍchꞌimbaltz te yi cyaj tkan yi bnix taꞌn. Yi cyaj tkanaꞌtz bnix tan yi tzeꞌ acacia, nin oc oro teꞌjak. Bnix simientil tan sakal. 37 Nin tetz yi puertil yi mantialaꞌtz bnix jun balaj xbuꞌk te yi eꞌchk nokꞌ yi txib yubil tu xkꞌaykꞌuj yubil tu cyak. Nchaꞌtz xcon yi balaj lino taꞌn yi bakꞌuꞌn wutz, nin ja oc yubel teꞌj yi chin yubeꞌn nin. 38 Nchaꞌtz bnix oꞌ tkan caꞌl tuml yi ganchil, nin oꞌ simientil yi brons cuꞌn. Nintzun oc oro teꞌjak yi oꞌ tkan caꞌlaꞌtz tuml yi eꞌchk xmalkꞌabil.