Caꞌwl tetz ujleꞌn
35
1 Eꞌ cweꞌn tzun molol Moisés cyakil yi eꞌ xonl Israel, nintzun tal iꞌ scyetz: “Je yi caꞌwl yi ntal Ryos tan kabnol taneꞌn. 2 Baꞌn kakꞌuj kak kꞌej, poro le jukiꞌn kꞌej cyaꞌl tzꞌakꞌuj na iꞌtz jun kꞌej ujleꞌn yi xansaꞌnt tan Ryos. Nin yi jun kꞌejaꞌtz iꞌtz tan takꞌleꞌn kꞌej Ryos yi kajcaw. Nin ko at jun yil tzꞌakꞌuj te yi jun kꞌejaꞌtz tajweꞌn yil cuꞌ biyij. 3 Quiꞌc cuj tan kabnol muꞌẍ kꞌakꞌ te yi jun kꞌejaꞌtz, nin alchok kaꞌt cuꞌnt tajweꞌn tan kabnol taneꞌn yi caꞌwleꞌj, na iꞌtz jun kꞌej tetz ujleꞌn yi tajweꞌn tan kabnol taneꞌn.”Yi eꞌchk oy yi xcon tan banleꞌn yi mantial
4 Nchaꞌtz tal Moisés scyetz cyakil yi eꞌ xonl Israel: “Je yi caꞌwl yi ntal Ryos, yi tajweꞌn tan kabnol taneꞌn yi oꞌ yi oꞌ xonl Israel. 5 Kamoleꞌ jun oy tetz Ryos. Poro ntin na taj yil cyakꞌ yi eꞌ yi tetz cuꞌn cyalmaꞌ yil cyakꞌ, qui na taj yi puers tuꞌ na tetz kajcaw yi oyaꞌtz. Nin yi eꞌ yi tetz cuꞌn cyalmaꞌ na cyaj cyakꞌ yi oyaꞌtz baꞌn tzꞌul oro tu sakal nin brons cyaꞌn. 6 Nchaꞌtz baꞌn tzꞌul yi balaj xbuꞌk itaꞌn yi txib yubil tu xkꞌaykꞌuj nin yi cyak yubil. Nchaꞌtz baꞌn tzꞌul yi xbuꞌk yi banij tan balaj lino tu eꞌchk xbuꞌk yi banij tan xiꞌil chiw. 7 Baꞌn tzꞌul yi stzꞌuꞌmil cneꞌr yi ocnak stzꞌacl yi cyak, tu junt jilwutz balaj txuca tu yi balaj tzeꞌ yi acacia biꞌ. 8 Nin nchaꞌtz cyꞌaj wok tzaj aceit, na xconk tetz yi jun chin wutzileꞌn cantil. Nchaꞌtz cyꞌaj wok tzaj eꞌchk balaj perfum yi xconk tan xanseꞌn jun takleꞌn nka jun yaj, nin tan cꞌoꞌcaxeꞌn yi insens. 9 Nchaꞌtz baꞌn tzitcyꞌaj tzaj cobox jilwutz balaj neꞌẍ cꞌub chi taneꞌn cornalina, na xconk tan toqueꞌn te yi lantar nin te yi neꞌẍ xbuꞌk yi tzꞌocopon wutz cꞌuꞌl yi paleꞌ.
Yi eꞌchk maꞌcl yi xcon xe yi mantial
10 ”Cyakil yi eꞌ yaj yi chin list nin eꞌ tan banleꞌn eꞌchk balaj akꞌun, baꞌn choꞌc tan banleꞌn yi eꞌchk akꞌun yi ntal Kataj Ryos tan kabnol, 11 chi taneꞌn yi mantial, yi amaꞌl yi xan tuml yi eꞌchk xbuꞌk yi jepon tibaj, yi eꞌchk argoy, tu eꞌchk ptzoꞌm, tuml eꞌchk kꞌaꞌj yi xconk teꞌj, tu yi eꞌchk tzꞌlum yi xconk tetz yi kꞌaꞌj, tu yi eꞌchk tkan mantial tuml eꞌchk xeꞌ yi scyajk tzakꞌak. 12 Nchaꞌtz na taj banleꞌn yi caẍaꞌ tuml eꞌchk kꞌaꞌjil tuml yi jopsel tu yi jun xbuꞌk yi xconk tan jatxleꞌn yi amaꞌl yi wiꞌnin xanil tu yi amaꞌl yi xan. 13 Nchaꞌtz yi mes tu tetz kꞌaꞌjil nin tircuꞌn yi eꞌchk maꞌcl yi xconk teꞌj, tu yi pam yi xansok tan takꞌleꞌn swutz Ryos. 14 Nchaꞌtz yi jun chin wutzileꞌn cantil yi xconk tan xtxekeꞌn yi xeꞌ yi mantial tu cyakil yi eꞌchk neꞌẍ lampr yi at teꞌj tu yi eꞌchk mas maꞌcl yi xconk teꞌj, tu yi aceit yi xconk te yi jun cantilaꞌtz. 15 Nchaꞌtz yi patbil insens tu tetz kꞌaꞌjil tu yi aceit yi xconk tan xanseꞌn jun yaj nka jun takleꞌn, tu yi insens yi wiꞌnin cꞌoꞌcal. Nchaꞌtz yi xbuꞌk yi xconk tetz puertil yi mantial. 16 Nchaꞌtz na taj banleꞌn yi patbil txꞌixwatz tu yi eꞌchk chꞌichꞌ yi scyajk tul, yi brons cuꞌn sbneꞌ. Nchaꞌtz yi kꞌaꞌjil tu cyakil yi eꞌchk maꞌcl yi xconk teꞌj tu yi jun chin wutzileꞌn plancan tuml yi xeꞌ. 17 Nchaꞌtz na taj banleꞌn yi xbuꞌk tu eꞌchk tkan nin yi eꞌchk xeꞌ, na xconk tetz yi peꞌm yi tzꞌocopon solteꞌjeꞌl tzaj. Nchaꞌtz yi xbuꞌk yi xconk tetz puertil yi peꞌm. 18 Ej nin nchaꞌtz na taj banleꞌn yi eꞌchk staqui tu eꞌchk cyꞌajaj yi xconk tan stzꞌamleꞌn yi juꞌak yi mantial tu yi tzꞌambil tetz yi peꞌm. 19 Nchaꞌtz na taj banleꞌn yi beꞌch tetz yi wiꞌtz paleꞌ yi xconk tetz yil tzꞌoc tan banleꞌn yi munl swutz Ryos xe yi mantialaꞌtz, tu yi beꞌch cyetz yi eꞌ cyꞌajl.”
Yi toponeꞌn cyakil yi eꞌchk oy cyakꞌun yi eꞌ xonl Israel
20 Itzun bantz yi quibital yi eꞌ xonl Israel yi xtxolbilaꞌtz nintzun eꞌ jatx quibtz. 21 Wiꞌnin tzun eꞌ-tz eꞌ oc tan xtxumleꞌn tan cyakꞌol eꞌchk balaj oy tetz Ryos. Cyoponeꞌn tzun niltz tan toyeꞌn eꞌchk balaj oy tetz Kajcaw tan banleꞌn yi mantial kalel chicꞌulwit quib tu Ryos. Cyakil nintzun yi tajweꞌn ultz cyaꞌn tu eꞌchk xbuꞌk yi xconk tetz yi beꞌch cyetz paleꞌ. 22 Tircuꞌn tzun yi eꞌ xonl Israel eꞌ opontz tan toyeꞌn balaj oy. At eꞌ yaj eꞌ baj opontz, nin at xnaꞌn eꞌ opontz. Ej nin tetz cuꞌn cyalmaꞌ cyoponeꞌn tan toyeꞌn eꞌchk balaj xmalkꞌab tu eꞌchk balaj uwaj yi oro cuꞌn nin eꞌchk balaj argoy. Nchaꞌtz at eꞌ cyꞌaꞌn eꞌchk balaj caren cyaꞌn yi oro cuꞌn, nin wiꞌnin eꞌchk takleꞌn yi oro cuꞌn opontz cyaꞌn. Na nsken chijatx yi eꞌchk oyaꞌtz tetz Ryos. Tircuꞌn tzun yi eꞌchk takleꞌnaꞌtz yi tajweꞌn, baj opontz cyaꞌn. 23 Cyakil yi eꞌ yi colij balaj xbuꞌk cyaꞌn chi taneꞌn yi xbuꞌk yi txib yubil, tu cyak nka yi xkꞌaykꞌuj, tu yi eꞌ yi cyꞌaꞌn balaj xbuꞌk yi lino, tircuꞌn tzun yi eꞌaꞌtz cyuleꞌn tan toyeꞌn. Nchaꞌtz eꞌ ban yi eꞌ yi colij xiꞌil chiw cyaꞌn tu yi eꞌ yi colij stzꞌuml cneꞌr yi ocnak stzꞌacl yi cyak yubil, tuml yi eꞌ yi colij yi junt jilwutz balaj tzꞌuꞌm cyaꞌn. Tircuꞌn tzun baj opontz cyaꞌn. 24 Cyakil yi eꞌ yi colij sakal nka brons cyaꞌn, ul quicyꞌal tetz Ryos. Nchaꞌtz yi eꞌ yi at balaj tzꞌlum acacia scyuchꞌ, eꞌ baj opontz tan toyeꞌn tetz Ryos, tan bnixeꞌn cyakil yi tajweꞌn te yi mantial. 25 Nchaꞌtz yi eꞌ xnaꞌn yi balaj chemol, ul balaj nokꞌ cyaꞌn. At eꞌ ul nokꞌ txib cyaꞌn nin at eꞌ ul nokꞌ cyak cyaꞌn, nin at eꞌ ul balaj nokꞌ lino cyaꞌn. 26 Nchaꞌtz yi eꞌ xnaꞌn yi at cyajtzaꞌkl tan bakꞌeꞌn nokꞌ nin yi saj buꞌk te cyalmaꞌ tan banleꞌn, nintzun eꞌ octz tan bakꞌeꞌn yi xiꞌil chiw. 27 Ma yi eꞌ wiꞌtz ajcaw cyoponeꞌn tan toyeꞌn eꞌchk balaj neꞌẍ cꞌub chi taneꞌn cornalina tu cobox jilwutz cꞌub tan xconeꞌn te yi lantar nin te yi xbuꞌk yi tzꞌocopon wutz cꞌuꞌl yi wiꞌtz paleꞌ. 28 Nchaꞌtz ul quicyꞌal eꞌchk perfum tu aceit tan xconeꞌn tan xtxekeꞌn xe yi mantial, nin tan banleꞌn yi balaj aceit tu sturaqui yi xconk tan xanseꞌn jun takleꞌn nka jun yaj. 29 Cyakil yi eꞌ yaj nin yi eꞌ xnaꞌn ẍchixoꞌl yi eꞌ xonl Israel, yi tetz cuꞌn cyalmaꞌ yi eꞌ oc tan xtxumleꞌn tan chichꞌeyaneꞌn tan banleꞌn cyakil yi xtxolbil yi tal Ryos tetz Moisés, tircuꞌn eꞌaꞌtz eꞌ ultz tan takꞌleꞌn yi cyoy tetz Ryos.
Yi eꞌ akꞌunwil yi tzꞌaknakeꞌ cuꞌn yi eꞌ oc tan banleꞌn yi najbil Ryos
30 Nchaꞌtz tal Moisés scyetz cyakil yi eꞌ xonl Israel: “Quibit tzajuꞌ eꞌuꞌ intanum. Ja wiꞌt je xtxaꞌol Ryos jun scyeri eꞌ xonl Judá nin iꞌtz yi yaj Bezaleel, cyꞌajl taꞌ Uri yi mamaj kawutzileꞌn taꞌ Hur. 31 Nkꞌeꞌtz ntin ja jeꞌ xtxaꞌol ma na ja takꞌ yi tetz espíritu tetz iꞌ, nin ja takꞌ balaj xtxumuꞌn tu tajtzaꞌkl nin ẍcꞌatnakil iꞌ, bantz xcyeweꞌn tan banleꞌn alchok jilwutz balaj akꞌun. 32 Xcyek tzun iꞌ tan xtxumleꞌn balaj akꞌun yi txeꞌn cuꞌn bnix. Nchaꞌtz xcyeꞌk iꞌ tan xtxakꞌleꞌn oro tu sakal nin brons. 33 Nchaꞌtz yi jun yajaꞌtz xcyek tan seꞌleꞌn nin nucꞌleꞌn eꞌchk balaj neꞌẍ cꞌub yi chin yubeꞌn nin. Nin xcyek tan banleꞌn eꞌchk akꞌun te yi balaj tzeꞌ nka alchok scyetz akꞌunil yi chin tajweꞌn cunin tan bnixeꞌn, nin tan yubeꞌn. 34 Nchaꞌtz xcyek iꞌ tan chichusleꞌn yi eꞌ mas, na akꞌijt yi jun ajtzaꞌklaꞌtz tetz tan Ryos. Nin nchaꞌtz yaj Aholiab yi cyꞌajl Ahisamac, jun xonl Dan. 35 At cyajtzaꞌkl tan banleꞌn eꞌchk balaj akꞌun yi wiꞌnin na yub. Na chixcyek tan banleꞌn nin tan xtxumleꞌn yi eꞌchk balaj akꞌun yi tzꞌaknak cuꞌn. Nin nchaꞌtz chixcyek tan ẍchemleꞌn eꞌchk xbuꞌk yi cyak yubil tu yi txib yubil nin xkꞌaykꞌuj tu yi eꞌchk xbuꞌk yi lino, nka alchok clasil xbuꞌk yi na yub, nin chin cꞌotij cunin sbneꞌ.