Yi tkꞌol Ryos junt tir yi caꞌwl
34
1 Itzun bantz nintzun tal Ryos tetz Moisés:—Banaj cob lepaj cꞌub chi yi cob bajx. Banaj bantz toqueꞌn intzꞌibal yi incaꞌwl swutz chi ban yi cob yi cuꞌ apuchꞌul. 2 Banaj list awib tan abeneꞌn jalen tibaj yi wiꞌwtz Sinaí. Na kloꞌ waj yi jalchan cunin kloꞌ cẍjepon ek tan yol swetz. 3 Cyaꞌl jun xom nin tzaweꞌj nin cyaꞌl jun yi nink xon solteꞌj yi wiꞌwtz. Nin nchaꞌtz quiꞌc cuj yi nink wan jun wacẍ nka cneꞌr solteꞌj yi wiꞌwtzaꞌtz.
4 Toqueꞌn tzun Moisés tan banleꞌn cob lepaj cꞌub chi yi cob yi ntakꞌ Ryos tetz. Ma le junt eklok jalchan cunin tzun beneꞌn Moisés, nin ben tcyꞌal iꞌ yi cob lepaj cꞌubaꞌtz. Choꞌn tzun beneꞌn iꞌ-tz wiꞌwtz Sinaí chi yi ntal Ryos tetz. 5 Choꞌn tzun cweꞌn muleꞌn Kataj Ryos tul jun bocꞌoj sbakꞌ nintzun jilon tetz Moisés, nin tal iꞌ yi mero tetz biꞌ. 6 Ticyꞌeꞌn tzun iꞌ-tz swutz Moisés, nin chin wiꞌ nin bantz tan yol. Itzun taltz:
—In Jehová, in Ajcaw, chin cham nin in, nin na el inkꞌajab scyeꞌj wunak. At wiꞌnin impasens, nin wiꞌnin banl walmaꞌ. Ilenin na wal yi bintzi. 7 Sajleꞌn tunintz, nin sbneꞌ opon tunintz, ilenin at imbanl squibaj cyakil wunak, nin na incuy chipaj yi eꞌ yi chin cachiꞌ nin cyajtzaꞌkl scyuchꞌ yi eꞌ pajol caꞌwl, nin cyakil yi eꞌ juchul il. Poro qui na jeꞌ inkꞌab ẍchiwiꞌ eꞌ malnak. Nin na wakꞌ chicaws yi eꞌ malnakaꞌtz tuml chinitxaꞌ nin chimamaj tu chinitxajil yi chimamaj.
8 Yi tbital Moisés yi xtxolbileꞌj nintzun cuꞌ jokloktz jalen yi cweꞌn poneꞌn yi wutz wuxtxꞌotxꞌ. Nintzun oc iꞌtz tan cꞌuꞌlajeꞌn Ryos, nin taltz:
9 —Ma jaluꞌ Taꞌ, iluꞌ Wajcaw, ko bintzij nin at banluꞌ swibaj, xomok binuꞌ skeꞌj. Cuyuꞌ kapaj, na jun cuꞌn yol yi eꞌ wunakeꞌj chin tzeꞌtzuj nin cyalmaꞌ. Poro cuyuꞌ kapaj, katxꞌokꞌbeꞌn Taꞌ. Nink koꞌc tanuꞌ tetz tanumuꞌ.
10 Nintzun tal Ryos tetz Moisés: “Baꞌn bin. Bixek bin jun trat skaxoꞌl tzituchꞌ. Nin tzimbneꞌ wiꞌnin eꞌchk milawr yi chin xoꞌwbil nin yi qui otojt na bajij tul junt nación beneꞌn tziꞌn wi munt, nin squileꞌ cyakil yi eꞌ mas wunak kale xicyꞌeꞌt wok. Cyakil yi xtxolbileꞌj yi tzimbneꞌ tzixoꞌl chin xoꞌwbil nin sbneꞌ.
11 ”Ban wok bin taneꞌn cyakil yi xtxolbil yi swaleꞌ tzitetz jaluꞌ. Ko yaꞌtz, chelepon tzun incyꞌal cyakil yi icontr wok yi ateꞌ tziwutz, chi taneꞌn yi eꞌ amorreo, eꞌ cananeo scyuchꞌ yi eꞌ hitita, eꞌ ferezeo, eꞌ heveo tu eꞌ jebuseo.
12 ”Quiꞌc cu tan itokꞌbel itib nin quil tziban wok jun itrat scyuchꞌ yi eꞌ wunak yi najlcheꞌ le amaꞌl kale cxoponeꞌt wok. Xomen wok te yi xtxolbilaꞌtz tan qui icweꞌn tul il cyaꞌn. 13 Ma na mas balaj yil cxoꞌc wok tan woqꞌueꞌn yi eꞌchk patbil chitxꞌixwatz. Nin nchaꞌtz baꞌn cxoꞌc wok tan puchꞌleꞌn cuꞌn teblal chiryosil yi banij cyaꞌn tu eꞌchk teblal chiryosil yi na biꞌaj Aserá.
14 ”Quil tzitakꞌ wok kꞌej junt Ryos, ma ntin in, na na jeꞌ tzinwutz.
15 ”Quil tziban wok jun itrat scyuchꞌ yi eꞌ wunakaꞌtz yi najlcheꞌ le amaꞌlaꞌtz, na yil choꞌc cyetz tan cꞌuꞌlajeꞌn chiryosil nin yil choꞌc tan takꞌleꞌn chitxꞌixwatz ẍchiwutz, chocopon tan imoxeꞌn tan iwaneꞌn scyuchꞌ. 16 Nchaꞌtz quil tzitakꞌ wok amaꞌl tan cyokꞌbel quib yi eꞌ icyꞌajl scyuchꞌ chimeꞌl. Na yil cyokꞌbej quib, chixomok tan cꞌuꞌlajeꞌn yi chiryosil yi banij tuꞌ taneꞌn. Ẍchijucheꞌ quil tzinwutz.
17 ”Quil tziban wok eꞌchk iryosil yi banij tuꞌ quitaneꞌn tul molt.
Yi eꞌchk nim kꞌej yi tajweꞌn tan ticyꞌeꞌn cyakil yob
18 ”Ban wok taneꞌn yi jun balaj kꞌej tetz yi pam yi quiꞌc xtxꞌamil.a Ban wok chi yi walnak tzitetz. Baꞌn baj pam itaꞌn yi quiꞌc xtxꞌamil tetz juk kꞌej. Tajweꞌn tan ticyꞌeꞌn yi jun kꞌejaꞌtz le xaw Abib na yaꞌstzun yi xaw yi iteꞌnleꞌn tzaj Egipto.
19 ”Ej nin cyakil yi bajx icyꞌajl yi na chitzꞌij, eꞌ wetz ẍchibneꞌ. Nchaꞌtz yi bajx cyal yi itawun yi mam, wetz ẍchibneꞌ tircuꞌn, chi taneꞌn wacẍ tu cneꞌr yi ko eꞌ mam. 20 Ma ko iꞌtz bajx tal jun buruꞌ tajweꞌn tan itkꞌol jun neꞌẍ cneꞌr nka jun neꞌẍ chiw tetz xel. Poro ko qui na itaj tzitakꞌ, tajweꞌn tzikin len wiꞌ. Nchaꞌtz tajweꞌn tan itkꞌol jun oy tetz xel yi bajx icyꞌajl, na quiꞌc cuj tan tuleꞌn jun tzinwutz yi ko qui cyꞌaꞌn jun oy taꞌn tetz wetz.
21 ”Akꞌujen wok kak kꞌej ma le jukiꞌn kꞌej ujlen wok. Quiꞌc na ban yi ko tiemp tetz tawleꞌn yi cosech nka tiemp tan jeꞌseꞌn yi cosech, tajweꞌn yil xujeꞌ wok.
22 ”Ban wok taneꞌn yi kꞌej tetz sman, kale na itoywit yi bajx wutz yi cosech tetz triw. Nchaꞌtz banwok taneꞌn yi kꞌej tetz wiꞌtzbil cosech yi na bajij le wiꞌtz xaw tetz yob.
23 ”Ej nin cyakil yi eꞌ yaj tajweꞌn tan cyoqueꞌn tzinwutz ox tir le jun yob. Tajweꞌn tan cyoqueꞌn tzinwutz, na in iRyosil yi axwok xonl Israel. 24 Ej nin chelepon inlajul yi eꞌ mas nación yi ateꞌ le ibeꞌ. Yi amaꞌl kalel cxoponeꞌt, ẍchꞌuyok waꞌn. Ej nin kol cxopon len wok tan incꞌuꞌlajeꞌn ox tir le jun yob, cyaꞌl jun yi nink tzꞌoc tan majleꞌn yi i amaꞌl yi ja wiꞌt insuk tzitetz.
25 ”Yil tzitoy wok jun itxꞌixwatz, qui na waj yil tzitoy wok pam yi at txꞌam tul. Nchaꞌtz quil tzicol wok yi sowril yi itxꞌixwatz yi na quim tetz Pasc tetz junt eklok. Na xansaꞌn waꞌn.
26 ”Yil tzitcyꞌaj wok nin yi bajx wutz icosech tzinwutz, cyꞌajwok nin yi mas balaj.
”Quil tzitxic wok jun neꞌẍ chiw tul yi xtxuꞌtx.”
Yi toqueꞌn Moisés tan stzꞌibeꞌn yi caꞌwl
27 Ej nin nchaꞌtz tal Ryos tetz Moisés: “Tzꞌib cuꞌn yi eꞌchk yolaꞌseꞌj, na yaꞌstzun yi xeꞌ yi jun trat yi ja bixeꞌ skaxoꞌl tzawuchꞌ nin scyuchꞌ yi eꞌ xonl Israel.”
28 Cyajeꞌn quen tzun Moisés caꞌwunak kꞌej tu caꞌwunak akꞌbal teꞌj Ryos. Qui wan nin qui ucꞌaꞌ te yi caꞌwunak kꞌejaꞌtz. Choꞌn tzun tzꞌibxeꞌnb yi eꞌchk yolaꞌtz, yi lajuj caꞌwl, swutz yi cob lepaj cꞌub. 29 Itzun bantz yi cweꞌn muleꞌn Moisés tu yi cob lepaj cꞌubaꞌtz kale atiteꞌt yi caꞌwl Ryos, qui nin tzꞌicyꞌ tetz yi ko wiꞌnin pakꞌpuchaxeꞌn yi wutz tan paj yi jiloneꞌn iꞌ tu Ryos. 30 Ma yi quilol Aarón scyuchꞌ yi eꞌ mas xonl Israel yi wutz Moisés yi wiꞌnin pakꞌpuchaxeꞌn, wiꞌnin tzun eꞌ xobeꞌntz. Ej nin tan yi xoꞌw yi ateꞌ cuꞌnt qui nin chinimsaj chicꞌuꞌl tan cyocomponeꞌn xlaj Moisés. 31 Poro nintzun ben tlol Moisés scyetz:
—Or itetz sweꞌj, stzun iꞌ bantz scyetz.
Yi quibital Aarón scyuchꞌ yi eꞌ mas ajcaw squibaj yi eꞌ xonl Israel yi yolaꞌtz, chisajeꞌn tzun teꞌj Moisés. Nintzun jilon iꞌ-tz scyetz. 32 Cyoponeꞌn tzun nil cyakil yi eꞌ xonl Israel kale atiteꞌt Moisés. Toqueꞌn tzun iꞌ-tz tan talcheꞌn cyakil yi eꞌchk caꞌwlaꞌtz yi takꞌ Ryos tetz iꞌ wiꞌwtz Sinaí. 33 Yi wiꞌt tlol Moisés yi xtxolbilaꞌtz scyetz cyakil yi eꞌ xonl Israel, nintzun oc tkꞌol jun xbuꞌk tan jopleꞌn yi litzꞌunil yi at te wutz.
34 Poro yi na ben Moisés tan yol tetz Ryos, nintzun na tcyꞌaj len yi xbuꞌk yi at te wutz. Jalen yi na eltzaj kalenaꞌtz na oct junt tir taꞌn. Nin kalenaꞌtz na oc iꞌ-tz tan talcheꞌn scyetz yi eꞌ xonl Israel yi mbi tal Ryos tetz. 35 Itzun na bantz yi na quil nin yi eꞌ xonl Israel yi wiꞌnin na litzꞌun yi wutz Moisés, nintzun na takꞌ quen yi jun xbuꞌkaꞌtz tan jopleꞌn yi wutz. Ej nin jopij yi wutz taꞌnc jalen yi na oct iꞌ tan yol tetz Ryos. Kalenaꞌtz na tcyꞌajlen.