Yi quicyꞌeꞌn yi eꞌ xonl Israel le amaꞌl kale eꞌ aꞌteꞌt
33
1 Itzun bantz nin tal Ryos tetz Moisés:—Ma jaluꞌ Moisés wek wok itib nin ncyꞌeꞌnt wok tul junt amaꞌl. Cyꞌajweꞌ nin cyakil yi eꞌ atanum yi ncheꞌl tzaj awucyꞌal Egipto. Baꞌn cxben wok le amaꞌl yi insuknak tetz Abraham, Isaac, nin Jacow. In suknak scyetz tan wakꞌol scyetz yi chixonl. 2 Mben inchakol yi wetz inángel tan bajxeꞌn cuꞌn tziwutz tan ẍchajleꞌn yi ibeꞌ. Ej nin chelepon inlajul yi eꞌ cananeo, scyuchꞌ yi eꞌ amorreo, scyuchꞌ yi eꞌ hitita scyuchꞌ yi eꞌ jebuseo, eꞌ ferezeo nin yi eꞌ heveo. 3 Quiloꞌk wok le yi amaꞌl kale atit balaj cojbil. Poro waleꞌ nin tzitetz wok, yi wetz, quil chinxom nin tziteꞌj wok, na ko tzun ximbiy wok cuꞌn tbeꞌ na chin ẍcan nin tunin ax wok.
4 Yi quibital yi eꞌ xonl Israel yi xtxolbileꞌj wiꞌnin tzun chibisuneꞌntz taꞌn, na iꞌtz cobox yol yi tal Ryos scyetz yi chin bisbil nin. Ej nin quiꞌc nin jun yi nink mmoꞌc yi uwaj skul mpe ik yi chixmalkꞌab tan paj bis. 5 Na nsken tal Ryos tetz Moisés cyakil yi xtxolbileꞌj:
—Moisés, alaj scyetz cyakil yi eꞌ xonl Israel: “Yi ax wok itetz ax wok jun cꞌoloj wunak yi chin ẍcan nin yi iwiꞌ. Yi nink naꞌtij jun rat tzixoꞌl wok, xquimok loꞌ icyakil waꞌn. Ma jaluꞌ cyꞌaj wok len eꞌchk ituwaj yi cyꞌaꞌn itaꞌn nin swileꞌ yi mbi i ilaꞌtz yi tzimbneꞌ tziteꞌj.”
6 Chaꞌstzun te quiꞌt nin nxcon eꞌchk uwaj cyaꞌn jetz yi cyajeꞌn cyen yi jun amaꞌlaꞌtz yi na biꞌaj Horeb.
Yi jun mantial kale na quilwit quib Ryos tu Moisés
7 Itzun bantz nintzun el tcyꞌal Moisés yi mantial.a Choꞌn toponeꞌn taꞌn solteꞌj len kale najlcheꞌt. Nintzun oc tkꞌol yi biꞌ tetz: Yi amaꞌl kale na kacꞌulwit kib tu Ryos. Nin cyakil yi eꞌ yi na cyaj yil chijilon tu Ryos, choꞌn na ẍchaꞌk tan yol tetz iꞌ le amaꞌlaꞌtz yi at solteꞌj len kale ateꞌt. 8 Ma yi na ben Moisés tan yol tetz Ryos le mantialaꞌtz, tircuꞌn yi eꞌ mas xonl Israel na cheꞌl tzaj stziꞌ yi puertil yi cyetz chimantial, nintzun na chixcyeꞌ cuꞌntz tan xmayeꞌn nin Moisés, jalen yi na oc iꞌ xe yi mantialaꞌtz. 9 Nin yi na ocopon Moisés tul yi mantialaꞌtz, nintzun na cuꞌul yi jun bocꞌoj sbakꞌ tibaj yi jun mantialaꞌtz. Choꞌn tzun na cuꞌul stziꞌ yi puertil yi mantial nintzun na jilon Ryos tetz Moisés.
10 Itzun yi na quilnin yi eꞌ mas xonl Israel yi na cuꞌul yi jun bocꞌoj sbakꞌaꞌtz nintzun na chimejeꞌ cuꞌntz stziꞌ yi cyetz chimantial. Chicyakil na chimejeꞌ cuꞌntz tan cꞌuꞌlajeꞌn Ryos. 11 Tan yi xtxolbileꞌj ja chijilon Ryos tu Moisés chi na chijilon cob wunak squibil quib. Ej nin yi ntzaj wiꞌ chiyol nintzun na pakxij tetz Moisés ẍchixoꞌl yi eꞌ mas xonl Israel. Poro yi Josué yi cyꞌajl Nun, junawes at iꞌ xe yi mantial nin qui na el tzaj iꞌ.
Yi tilol Moisés yi pakꞌpuchal Ryos
12 Itzun bantz nintzun jilon Moisés tetz Ryos:
—Ma jaluꞌ Taꞌ, na bin tzanuꞌ tan talcheꞌn swetz tan imbajxeꞌn cuꞌn ẍchiwutz yi eꞌ wunakeꞌj yi iꞌtz yi tanumuꞌ, poro qui na taluꞌ swetz yi naꞌ scyetz iꞌ junt yi xomok sweꞌj tan wuchꞌeyeꞌn. Nchaꞌtz na taluꞌ yi na kꞌukeꞌ cꞌuꞌluꞌ nin at banluꞌ sweꞌj. 13 Yi ko bintzi nin yi xtxolbilaꞌtz, taleꞌ binuꞌ swetz yi mbiꞌ i ilaꞌtz yi xtxumuꞌnuꞌ tan imbnol bantz kꞌukeweꞌn incꞌuꞌl teꞌjuꞌ nin tan taꞌteꞌn yi banluꞌ sweꞌj. Na cyakil yi eꞌ wunakeꞌj eꞌ cuꞌn tanumuꞌ, stzun Moisés tetz Ryos.
14 —Moisés, in teꞌn nin chinxomok tzaweꞌj nin ẍujek waꞌn, stzun Ryos tetz Moisés.
15 —Bintzi Taꞌ, yi ko quil xom ninuꞌ sweꞌj mas balaj yi quil keꞌl tanuꞌ tzoneꞌj le amaꞌleꞌj. 16 Na yi ko quil xomuꞌ skeꞌj, ẍeꞌn tzꞌel katxum tetz yi ko at yi banluꞌ skaxoꞌl. Poro kol xomuꞌ skeꞌj tzꞌelepon tzun katxum tetz yi xomijuꞌ skeꞌj. Apart tzun oꞌ sbneꞌ ẍchiwutz yi eꞌ mas nación yi ateꞌ beneꞌn tziꞌn, stzun Moisés.
17 —Tzimbneꞌ tircuꞌn chi mawal Moisés, na kꞌuklij incꞌuꞌl tzaweꞌj nin na chintzatzin tzaweꞌj, na at imbanl tzawibaj, stzun Ryos tetz Moisés.
18 —Ko yaꞌtz, ẍchajeꞌ tibuꞌ tzinwutz tan wilol yi kꞌejuꞌ, stzun Moisés tetz Ryos.
19 —Baꞌn, tzꞌicyꞌpon bin yi impakꞌpuchal tzawutz nin tzawutz cuꞌn yil wal imbiꞌ tzatz. Tzꞌelepon inkꞌajab scyeꞌj yi eꞌ yi na waj, nin tzꞌokꞌok incꞌuꞌl scyeꞌj yi eꞌ yi na waj. 20 Poro quiꞌc cuj tan awilol weri inwutz, na quiꞌc rmeril yi nink til jun yaj inwutz yi quiꞌk quim.
21 Nchaꞌtz tal Ryos:
—Xmay tzaj Moisés, at jun amaꞌl tzinxlaj yi iꞌtz jun picy wutz cꞌub, baꞌn cẍoꞌc tul. 22 Ma yil nicyꞌ swutz yi jun picyaꞌtz, tzꞌocopon inkꞌol inkꞌab tan jopleꞌn, bantz qui awilol inwutz jalen cuꞌn yil nicyꞌ. 23 Ma yil nicyꞌ kalenaꞌtz tzincyꞌajlen inkꞌab, nin baꞌn tzun tzaxmay nin wutz incoc, na quiꞌc cu yi nink til jun yaj inwutz, stzun Ryos bantz tetz Moisés.