Yi bnixeꞌn yi teblal yi neꞌẍ wacẍ yi oro cuꞌn ban
32
1 Ej itzun bantz yi quilol yi eꞌ xonl Israel yi lolch nin na cuꞌuloꞌk Moisés wiꞌwtz, nintzun eꞌ bentz tan yol tetz Aarón. Itzun cyaltz:—Or, Aarón, banaj jun karyosil tan bajxeꞌn cuꞌn skawutz tan ẍchajleꞌn kabeꞌ, na qui na kil yi mbi mban Moisés, yi jun yi nkeꞌlsan tzaj Egipto, cheꞌch tzun bantz tetz Aarón.
2 Nintzun tal Aarón scyetz:
—Baꞌn bin tzitcyꞌaj wok tzaj yi tcꞌuꞌl chiẍchin yi eꞌ itxkel, eꞌ icyꞌajl tu eꞌ imeꞌl. Baꞌn tzꞌul itaꞌn swetz.
3 Yi quibital yi eꞌ xonl Israel, cyoqueꞌn tzuntz tan telseꞌneꞌl tzaj eꞌchk tcꞌuꞌl chiẍchin, nin eꞌ ben tan takꞌleꞌn tetz Aarón. 4 Yi wiꞌt molxeꞌn yi eꞌchk orojaꞌtz tan Aarón nin octz taꞌn wi kꞌakꞌ, kalenaꞌs tzun cweꞌn taꞌn tul jun molt tan banleꞌn jun teblal jun neꞌẍ wacẍ. Yi bnixeꞌn, nintzun octz tan nicyꞌseꞌn tan skub. Yi bnixeꞌn yi jun teblalaꞌtz nintzun tal iꞌ-tz scyetz cyakil yi eꞌ xonl Israel:
—Je yi iryosileꞌj yi nxcyeꞌ tan itelseneꞌl tzaj Egipto.
5 Nchaꞌtz oc Aarón tan banleꞌn jun patbil txꞌixwatz swutz yi jun teblalaꞌtz yi oro cuꞌn. Yi bnixeꞌn taꞌn, nintzun taltz:
—¡Eklen kaban jun chin wutzileꞌn kꞌej tan takꞌleꞌn kꞌej kajcaweꞌj! stzun Aarón scyetz.
6 Ma yi tuleꞌn skil le junt eklok, chin jalchan cunin tzun chicꞌaseꞌntz tan pateꞌn cuꞌn chitxꞌixwatz.a Ej nin tan toyeꞌn chitxꞌixwatz swutz yi teblal yi neꞌẍ wacẍaꞌtz, yi na ẍchaj yi ja wiꞌt jal tzatzin paz tu chiryosilaꞌtz. Yi wiꞌt cyoyil yi eꞌchk chitxꞌixwatz nintzun eꞌ baj cuꞌ cꞌolchoktz tan waꞌaꞌn teꞌj yi chiꞌbaj te yi chitxꞌixwatz tetz tzatzin paz. Ej nin yi wiꞌt chiwaneꞌn nin eꞌ baj octz tan banleꞌn yi cyetz cyajbil scyeꞌjak yi eꞌ xnaꞌn.
7 Ma Kataj Ryos nintzun tal tetz Moisés:
—Ma jaluꞌ Moisés, quiloꞌk, cun ilweꞌ yi atanum yi eꞌ yi elnakeꞌ tzaj awucyꞌal Egipto, na tircuꞌn eꞌ ja chijuch quil. 8 Na jalcuꞌn mmeꞌl chijatxol quib te yi beꞌ yi nwal scyetz tan chixomeꞌn teꞌj. Qui nin nchixom teꞌj na ja choꞌc tan banleꞌn jun teblal neꞌẍ wacẍ yi oro cuꞌn ncyulej. Nin yi jun teblalaꞌtz ja oc cyaꞌn tetz jun chiryosil na na chitzan tan cꞌuꞌlajeꞌn nin tan toyeꞌn nin tan pateꞌn chitxꞌixwatz tetz. Nchaꞌtz na cyaltz tetz: “Yi juneꞌj, yaꞌstzun yi jun yi nxcyeꞌ tan kelseꞌneꞌl tzaj jakꞌ chi caꞌwl yi eꞌ aj Egipto.”
9 Nchaꞌtz tal Ryos tetz Moisés:
—Na wil cyakil yi eꞌ xonl Israel nin na el intxum tetz yi chin ẍcan nin chiwiꞌ. 10 Ma jaluꞌ qui chin axux mas tan chicolcheꞌn na ja jeꞌ tzinwutz cyakil yi na chitzan tan banleꞌn. Chaꞌstzun te chicopon imbiyol chicyakil. Poro yi aẍatz, quil cẍquim waꞌn na tan aẍ ljalwit junt chin wutzileꞌn nación.
11 Toqueꞌn tzun Moisés tan cuꞌswutzil tetz Ryos nintzun taltz tetz:
—Wajcaw, ¿mbi tzun yi na chiꞌch cꞌuꞌluꞌ scyeꞌj yi eꞌ tanumuꞌ yi elnakeꞌ tzaj tcyꞌaluꞌ jakꞌ chicaꞌwl yi eꞌ aj Egipto tan yi teruꞌ poreruꞌ? 12 Baꞌn tcuꞌn quil takꞌuꞌ amaꞌl scyetz yi eꞌ aj Egipto tan chitzeꞌeneꞌn skeꞌj yi oꞌ tanumuꞌ na qui cuꞌn batz scyaleꞌ: “Ryos ncheꞌlsan yi eꞌ xonl Israel skaxoꞌl ntin tan chiquimseꞌn joylaj len nin tan chisotzajeꞌn junawes tan qui cyajeꞌn cyen jun chixonl wi munt.” Chaꞌstzun te Taꞌ stzajscunuꞌ yi jun xtxumuꞌnuꞌaꞌtz yi copon biyoluꞌ cyakil yi tanumuꞌ. 13 Ulk txꞌakx tcꞌuꞌluꞌ Taꞌ yi yoluꞌ yi talnakuꞌ tetz Abraham tu Isaac nin tetz Israel. Na je bin yi yoluꞌ yi taluꞌ scyetzeꞌj: “Cyakil yi eꞌ axonl chijepon impucꞌsal nin choꞌn cunin cheꞌ wulej chi taneꞌn yi cyajlal yi txꞌuml yi at tcyaꞌj. Ej nin swakꞌeꞌ yi amaꞌl scyetz yi ja wiꞌt insuk,” stzun Moisés bantz tetz Ryos.
14 Nintzun jeꞌ xtxꞌixpul Ryos yi xtxumuꞌn tan quiꞌt chicweꞌn biyol cyakil yi eꞌ xonl Israel. 15 Kalenaꞌs tzun tajeꞌn tzaj Moisés wiꞌwtz. Nin cyꞌaꞌn yi cob lepaj cꞌub taꞌn kale tzꞌibaneꞌt yi caꞌwl Ryos. Yi cob cꞌubaꞌtz tzꞌibaꞌn len cabil xlaj. 16 Ryos teꞌn nin bnol tetz yi cob lepaj cꞌubaꞌtz. Ej nin iꞌ teꞌn tzꞌiban tetz yi eꞌchk yol yi at swutz.
17 Itzun yi cweꞌn muleꞌn chinakaꞌjil nintzun ben quibital Josué yi wiꞌnin chiẍchꞌineꞌn jun cꞌoloj wunak. Nintzun ben tloltz tetz Moisés:
—Moisés, bit nin. Wiꞌnin sichꞌ na tzan ẍchixoꞌl yi eꞌ katanum, nin yi sichꞌaꞌtz iꞌtz tetz oyintziꞌ.
18 Poro nintzun tal Moisés tetz:
—Bintzi poro nkꞌeꞌtz jun bitz tetz txꞌacoꞌn nin nkꞌeꞌtz jun bitz yi bisbil yi quiꞌk nchitxꞌacon. Poro yi eꞌchk bitzeꞌj yi na wit nin iꞌtz apart.
19 Ma yi cweꞌn muleꞌn Moisés nakaꞌjil kale ateꞌt chicyakil yi eꞌ xonl Israel nintzun ben tilol teblal yi jun neꞌẍ wacẍaꞌtz tu yi eꞌchk bixl yi na bajijtz ẍchixoꞌl. Nintzun saj jun chin chiꞌch cꞌuꞌlaltz tetz iꞌ. Nintzun bentz tan cꞌoxleꞌn len yi cob lepaj cꞌub yi cyꞌaꞌn taꞌn ninin eꞌ cuꞌ piẍtz yi teleꞌn cꞌoxoltz. 20 Nchaꞌtz ben iꞌ tan ticyꞌleꞌn tzaj yi jun teblal wacẍ yi oro cuꞌn nintzun oc cꞌoxol wi kꞌakꞌ nin oc iꞌ-tz tan ẍcheꞌjeꞌn jalen yi toqueꞌn tetz puklaj. Kalenaꞌtz beneꞌn ẍchitol wi aꞌ, nintzun cawunin tan bajeꞌn yi aꞌ cyaꞌn. 21 Beneꞌn tzun tlol Moisés tetz Aarón:
—¿Mbi nchiban yi eꞌ wunakeꞌj tzaweꞌj yi ja chijuch quil tan apaj? stzun Moisés tetz Aarón.
22 —Wajcaw quil chiꞌch cꞌuꞌluꞌ sweꞌj na na tiluꞌ yi eꞌ wunakeꞌj chin chigan nin tan banleꞌn yi eꞌchk takleꞌn cachiꞌ. 23 Na je bin chiyoleꞌj swetz: “Aarón banaj jun karyosil tan bajxeꞌn cuꞌn skawutz tan ẍchajleꞌn kabeꞌ na qui na kil yi mbi mbajij teꞌj nocx Moisés yi jun yi nkeꞌlsaneꞌl tzaj Egipto,” cheꞌch swetz. 24 Nintzun wal wetz scyetz cyakil yi eꞌ yi at oro scyuchꞌ: “Baꞌn tzicyꞌaj tzaj swetz.” Ma yi tuleꞌn yi orojaꞌtz cyꞌaꞌn, ja tzun octz waꞌn wi kꞌakꞌ nin ja el tzaj yi jun teblaleꞌj, stzun Aarón bantz.
25 Ma yi tilol Moisés yi nsken oc yab chiwiꞌ cyakil yi eꞌ wunak tan paj yi qui nin xcyeꞌ Aarón tan makleꞌn chiwutz, nin yi nsken choꞌc tetz chitzeꞌlbeꞌtz eꞌ chicontr, 26 nintzun cuꞌ txiclok stziꞌ yi puertil yi amaꞌl kale ateꞌt, nin ben tlol scyetz cyakil yi eꞌ xonl Israelaꞌtz: “Cyakil yi eꞌuꞌ yi na cyekuꞌ ẍchiꞌ Ryos, chuꞌlkenuꞌ sweꞌj,” chij.
—Je yi yol kajcaw yi kaRyosil yi oꞌ xonl Israel: “Cyꞌajwok nin yi ispar, nin nqueꞌn wok ẍchixoꞌl yi eꞌ itanum, nin nqueꞌn wok xeꞌak chipach tan chibiyleꞌn cuꞌn yi eꞌ ixonl scyuchꞌ eꞌ itamiw scyuchꞌ yi eꞌ iwisin.”
28 Cyoqueꞌn tzun yi eꞌ levita tan banleꞌn taneꞌn yi caꞌwl Moisés. Nintzun eꞌ octz tan chibiyleꞌn cuꞌn yi eꞌ xonl Israelaꞌtz. Te yi jun kꞌejaꞌtz eꞌ quim loꞌ ox mil yaj. 29 Talol tzun Moisés scyetz yi eꞌ levita:
—Jaluꞌ ja wiꞌt ixansaj itib tan ixconeꞌn tetz kajcaw na qui nin mijuẍ itib tan chibiyleꞌn ixonl, yi eꞌ itzicy scyuchꞌ yi eꞌ icyꞌajl.b Chaꞌstzun te stkꞌeꞌ Ryos yi banl tzitibaj wok.
30 Itzun le junt eklok nintzun tal Moisés scyetz cyakil yi eꞌ wunak yi ateꞌ-tz:
—Yi axwok itetz ja ijuch jun chin wutzileꞌn itil swutz Ryos. Chaꞌstzun te jaluꞌ nchimben junt tir tan yol tetz Ryos tan injoyol puntil tan jaleꞌn cuybil ipaj wok, stzun Moisés bantz scyetz yi eꞌ wunakaꞌtz.
31 Pakxeꞌn tzun junt tir Moisés wiꞌwtz tan yol tetz Ryos itzun taltz tetz:
—Taꞌ, max cꞌuꞌluꞌ tibaj yi tanumuꞌ na jun cuꞌn yol ja chijuch jun chin wutzileꞌn quil swutzuꞌ na ja choꞌc tan banleꞌn jun cyetz chiryosil yi oro cuꞌn. 32 Poro max cꞌuꞌluꞌ Taꞌ, nink scuyuꞌ chipaj. Poro ko quiꞌ, baꞌn stzajscunuꞌ yi wetz imbiꞌ tul yi teruꞌ liwruꞌ yi iluꞌ bnol tetz, stzun Moisés tetz Ryos.
33 —Ntin chibiꞌ yi eꞌ yi ja chijuch quil tzinwutz yaꞌstzun yi eꞌ yi tzintzajseꞌ yi chibiꞌ tul yi weri inliwr. 34 Ma aẍatz, cyꞌajweꞌ nin cyakil yi eꞌ atanum le amaꞌl yi alijt waꞌn tzatz. Quil cẍbisun na yi weri inángel sbajxok tzawutz tan ẍchajleꞌn yi ibeꞌ. Poro yil tzꞌopon yi tiemp tetz xtisyaꞌiꞌn swakꞌeꞌ chicaws yi eꞌaꞌtz yi ja chijuch quil, stzun Ryos bantz tetz Moisés.
35 Sajeꞌn tzun jun chin wutzileꞌn chicaws yi eꞌ xonl Israel tan Ryos tan paj yi cyoqueꞌn tan cꞌuꞌlajeꞌn yi jun teblal yi bnix tan Aarón te yi oro yi baj chimolol.