Yi eꞌ akꞌunwil yi bnon yi mantial tuml yi eꞌchk maꞌcl
31
1 Itzun bantz nin jilont junt tir Ryos tetz Moisés itzun taltz tetz:2 “Moisés bit tzaj, ja wiꞌt jeꞌ intxaꞌol jun xonl Judá yi na biꞌaj Betzaleel, iꞌ cyꞌajl Uri. Ej nin iꞌ jun scyeri eꞌ mam Hur. 3 Ja wiꞌt wakꞌ yi inespíritu tetz nin ja wiꞌt wakꞌ tajtzaꞌkl tu yi xtxumuꞌn. Nin chin list nin iꞌ sbneꞌ tan banleꞌn wiꞌnin eꞌchk takleꞌn. 4 Ej nin xcyek iꞌ tan xtxumleꞌn nin tan banleꞌn eꞌchk balaj akꞌun te oro, sakal tu brons. 5 Xcyek iꞌ tan chinucꞌleꞌn yi eꞌchk balaj cꞌub tan chiyubeꞌn mas nin tan chiwekleꞌn. Nchaꞌtz xcyek tan seꞌleꞌn balaj tzeꞌ tan yubeꞌn. Xcyek te alchok jilwutz akꞌunil. 6 Nchaꞌtz tzꞌocopon Aholiab tetz ẍchꞌeyum iꞌ. Yi jun Aholiabaꞌtz iꞌ cyꞌajl Ahisamac yi xonl Dan. Nin cyakil yi eꞌ yi at cyajtzaꞌkl, ja wakꞌ mas cyajtzaꞌkl tan banleꞌn cyakil yi eꞌchk takleꞌn yi nwal tzatz, 7 chi taneꞌn yi mantial kalel kacꞌulwit kib tu yi caẍaꞌ kale atit yi quiwel kayol tuml yi jopsel yi jun caẍaꞌaꞌtz. Nchaꞌtz ja wakꞌ cyajtzaꞌkl tan banleꞌn cyakil yi eꞌchk maꞌcl yi na xcon xe yi mantial, 8 chi taneꞌn yi mes tu cyakil yi eꞌchk maꞌcl, nin yi jun chin wutzileꞌn cantil yi oro cuꞌn sbneꞌ tu yi patbil insens. 9 Nchaꞌtz tan chibnol eꞌ yi patbil itxꞌixwatz tu yi eꞌchk maꞌcl yi na xcon teꞌj, nin yi jun chin wutzileꞌn plancan tu yi wiꞌtxlil. 10 Nin ja wakꞌ cyajtzaꞌkl tan stzꞌisleꞌn yi balaj beꞌchok yi xconk tetz Aarón scyuchꞌ yi eꞌ cyꞌajl, na xconk beꞌch cyetzaꞌtz yil choꞌc tan banleꞌn chimunl tetz paleꞌ tzinwutz. 11 Nchaꞌtz ja wakꞌ cyajtzaꞌkl tan cyoqueꞌn tan banleꞌn yi aceit yi na xcon tan xanseꞌn jun takleꞌn. Nin nchaꞌtz yi insens yi spat-xok xe yi mantial. Tajweꞌn tan chibnol yi akꞌun chi nwal tzatz,” stzun Ryos bantz.
Yi jun kꞌej ujleꞌn
12 Nchaꞌtz tal Ryos tetz Moisés:
13 “Ma jaluꞌ Moisés, na waj yil cẍjilon scyetz cyakil yi eꞌ xonl Israel nin baꞌn tzawal yi xtxolbileꞌj scyetz: ‘Na waj yil chiban taneꞌn yi incaꞌwl te yi eꞌchk kꞌej tetz ujleꞌn. Na yaꞌstzun jun techl yi copon skaxoꞌl tzituchꞌ sbneꞌ opon tunintz tan teleꞌn itxum tetz yi I inaꞌtz yi itajcawil, nin I inaꞌtz intxaꞌoneꞌn ax wok. 14 Tajweꞌn tan ixansal wok eꞌchk kꞌejaꞌtz. Nin tajweꞌn tan itekal ẍchiꞌ. Ej nin alchok scyetz yi quil xom te yi xtxolbileꞌj tajweꞌn tan cweꞌn biyij. Nin yi eꞌ yil chakꞌuj te yi jun kꞌejaꞌtz sotzel wutz ẍchibneꞌ. 15 Ej nin baꞌn xakꞌuj wok kak kꞌej le sman. Poro le jukiꞌn kꞌej iꞌtz jun keꞌj ujleꞌn yi xansaꞌnt tan Ryos. Ej nin al scyetz jun yil tzꞌakꞌuj te yi jun kꞌejaꞌtz squimok. 16 Chaꞌstzun te tajweꞌn tan chixomeꞌn yi eꞌ xonl Israel te yi jun caꞌwleꞌj na tajweꞌn tan chibnol taneꞌn yi jun kꞌej ujleꞌn. Na iꞌtz jun trat yi ja bixeꞌ skaxoꞌl tzituchꞌ nin tu yi chixonl sbneꞌ opon tunintz. 17 Sbneꞌ opon tunintz, iꞌtz jun techl yi scyajk cyen skaxoꞌl tzituchꞌ wok yi axwok xonl Israel. Na kak intziꞌ kꞌej mimban tan banleꞌn yi tcyaꞌj tu yi wuxtxꞌotxꞌ, ma le jukiꞌn kꞌej qui nnakꞌuj ma na ja nujeꞌ,’ ” stzun Ryos bantz tetz Moisés.
18 Yi wiꞌt jiloneꞌn Ryos tetz Moisés wiꞌwtz Sinaí nintzun takꞌ iꞌ cob lepaj cꞌub kale tzꞌibaneꞌt yi tetz caꞌwl. Ej nin iꞌ tzꞌiban tetz tan yi tetz kꞌab.