Yi patbil insens
30
1 ”Nchaꞌtz banwok jun patbil insens tan yi tzeꞌ acacia. 2 Tajweꞌn yi cyaj xtxꞌuꞌcnakiꞌn tzꞌan. Ej nin caꞌwunak oꞌ centimetr tzꞌan yi tkan nin caꞌwunak oꞌ centimetr tzꞌan yi wutz. Ej nin jun mutxꞌ tu lajuj centimetr tzꞌan yi wutz tkan. Ej nin yi eꞌchk tal tucꞌ junit tzꞌan yi bambil tetz. 3 Baꞌn tzꞌoc oro itaꞌn tan jopleꞌn cyakil. Nchaꞌtz tzꞌan yi cyaj xlaj tu yi eꞌchk tal tucꞌ, oro cuꞌn tzꞌoc teꞌj. Ej nin baꞌn tzꞌoc jun yubil chi taneꞌn jun tal cornis tziꞌak, yi oro cuꞌn. 4 Nin tzakꞌ yi cornisaꞌtz baꞌn tzꞌoc cyaj argoy yi oro cuꞌn. Cucob le jalajchak. Na xconk tan toqueꞌn jun kꞌaꞌj tan palcheꞌn. 5 Ma yi eꞌchk kꞌaꞌjilaꞌtz baꞌn tziban wok tan yi acacia. Ej nin baꞌn tzꞌoc oro itaꞌn teꞌj tan jopleꞌn cyakil yi tzeꞌ. 6 Ej nin yil bnix yi jun patbil insensaꞌtz baꞌn tzitakꞌwok cyen swutz yi xbuꞌk yi at swutz yi caẍaꞌ kale atit yi quiwel yi katrat yi ja bixeꞌ skaxoꞌl tzituchꞌ. Choꞌn tzꞌoc mero swutz cuꞌn yi jopsel yi caẍaꞌ kalel kacꞌulwit kib tzituchꞌ. 7 Ej nin cyakil jalchan yil tzꞌoc nucꞌleꞌn yi jun chin cantil yi juk cuꞌn wiꞌ at, baꞌn spat Aarón yi insens yi at wiꞌnin cꞌoꞌcal tibaj yi jun patbil insensaꞌtz. 8 Nchaꞌtz tzꞌan cweꞌn kꞌej yil tzꞌoc iꞌ tan tocseꞌn kꞌaꞌkl yi jun cantilaꞌtz, baꞌn spat iꞌ insens tibaj. Yi jun xtxolbileꞌj tajweꞌn tan ixomeꞌn teꞌj sbneꞌ opon tunintz. 9 Quiꞌc cuj yi nink tzipat wok junt txꞌakaj insens nka jun itxꞌixwatz tibaj. Nin quiꞌc cuj tan toqueꞌn tkꞌol alchok jilwutz oy tibaj chi taneꞌn jarin nka win. 10 Yi jun patbil insensaꞌtz xansok ntin tetz wetz, nin jun ntziꞌ tir tul jujun yob tzꞌocopon Aarón tan takꞌleꞌn cyen yi ẍchꞌel yi itxꞌixwatz yi tzipateꞌ tan jaleꞌn cuybil ipaj tzinwutz. Tajweꞌn tan itoyil yi jun oyaꞌtz jun tir le jujun yob. Na teꞌjak yi tuqꞌuil yi jun patbil insensaꞌtz choꞌn jepon yi ẍchꞌel yi itxꞌixwatz yi tzitkꞌeꞌ swetz tan jaleꞌn cuybil ipaj.”Yi cutxuj yi tajweꞌn tan cyakꞌol cyakil
11 Itzun bantz nintzun jilont Ryos tetz Moisés, itzun taltz:
12 “Yil cẍoꞌc tan cyajleꞌn cyakil yi eꞌ xonl Israel tajweꞌn yil cyakꞌ len jun cutxuj tan chiclaxeꞌn tan qui sajeꞌn jun quimichil ẍchiwutz, tan paj yi tzꞌocopon cyajleꞌn. 13 Cyakil yi eꞌ yi ja wiꞌt tzꞌak chitiemp, tajweꞌn tan cyakꞌol yi jun cutxujaꞌtz. Nin iꞌtz oꞌ tzꞌel jun ons sakal, niꞌcuꞌn tu meꞌ sakal te yi jilwutz pwok yi banijt tan xconeꞌn le mantial. 14 Cyakil yi eꞌ yaj yi ja tzꞌak junak yob cyaꞌn nka mas, tajweꞌn tan cyakꞌol yi chicutxuj swetz. 15 Nin yil cyakꞌ yi eꞌ xonl Israel chicutxuj, tajweꞌn yi nicyꞌ nintuꞌ tzꞌan. Quil scꞌul yi nim tcuꞌn stakꞌ jun ric, nin nchaꞌtz quil scꞌul yi muꞌẍeꞌnk ltakꞌ jun meꞌbaꞌ. Ma na tajweꞌn yi nicyꞌ nintuꞌ chibaj ben yil cyakꞌ chicutxuj tan qui chiquimeꞌn. 16 Ma yil cyakꞌ yi xonl Israel yi chicutxuj, yi scyakꞌeꞌ tan qui chiquimeꞌn, baꞌn tzamolnin tircuꞌn, nin baꞌn tzacyꞌaj nin xe yi mantial, na choꞌn xconktz. Nin yi jun xtxolbilaꞌtz xconk tan naꞌwseꞌn swetz yi ja cyakꞌ yi eꞌ xonl Israel yi chicutxuj tan qui chiquimeꞌn,” stzun Ryos bantz tetz Moisés.
Yi jun chin wutzileꞌn plancan yi brons cuꞌn
17 Itzun bantz nintzunt jilon Ryos tetz Moisés itzun taltz:
18 “Banwok jun chin wutzileꞌn plancan yi brons cuꞌn tzꞌan tircuꞌn tu yi xeꞌ. Na xconk tetz txꞌajbil. Yil bnix, baꞌn tzitakꞌ wok quen txoꞌl yi mantial tu yi patbil itxꞌixwatz. Ej nin nojswok cuꞌn tan aꞌ. 19 Na xconk yi aꞌ tan Aarón scyuchꞌ yi eꞌ cyꞌajl tan xtxꞌajleꞌn chikꞌab tu quikan. 20 Na tajweꞌn tan chitxꞌajoneꞌn Aarón scyuchꞌ yi eꞌ cyꞌajl yil choꞌc xe yi mantial kalel kacꞌulwit kib. Nchaꞌtz yi ntaxk choꞌc tan banleꞌn chimunl swutz yi altar tan pateꞌn yi cyoy tzinwutz, tajweꞌn tan chitxꞌajoneꞌn tan qui chiquimeꞌn. 21 Sbneꞌ opon tunintz iꞌtz jun ley tetz Aarón scyuchꞌ yi eꞌ cyꞌajl, yi tajweꞌn tan chitxꞌajol yi chikꞌab tu quikan tan qui chiquimeꞌn yil choꞌc xe yi mantial,” stzun Ryos bantz.
Yi aceit yi xconk cyakil rat xe yi mantial
22 Jiloneꞌnt tzun Ryos tetz Moisés itzun taltz:
23 “Baꞌn tzajoy eꞌchk balaj xtzeꞌ yi na xcon tan banleꞌn yi eꞌchk perfum. Molaj coblaj liwr mirra, nin kak liwr canel, tu kak liwr yi jun jilwutz aj yi wiꞌnin cꞌoꞌcal. 24 Nin baꞌn tzajoy kak liwr yi balaj xtzeꞌ casia. Baꞌn tzamaꞌlaj chi yi maꞌlbil yi na xcon xe yi mantial. Nchaꞌtz joyaj ox litr tu niꞌcy aceit oliw. 25 Te cyakil yi eꞌchk balaj perfumaꞌtz yi tzajoyeꞌ, baꞌn tzaban jun jilwutz aceit yi at xanil. Xconk tan xanseꞌn yi mantial. Baꞌn tzaban yi aceitaꞌtz chi na ban banleꞌn yi eꞌchk balaj perfum. Yaꞌstzun yi aceit yi wiꞌnin xanil yi xconk awaꞌn tan xansajeꞌn cyakil yi mantial tuml yi at txeꞌ. 26 Yil bnix yi perfumaꞌtz, baꞌn tzun cẍoꞌc tan kojleꞌn te yi mantial kalel kacꞌulwit kib. Nchaꞌtz na taj tzakoj cyen te yi caẍaꞌ kale atit yi quiwel kayol. 27 Nchaꞌtz tzꞌan wi yi mes kale na jeꞌt yi pam yi xansaꞌnt, tu yi cyakil yi maꞌcl yi na xcon teꞌj. Nchaꞌtz tzꞌan yi jun chin wutzileꞌn cantil yi juk cuꞌn wiꞌ tuml yi eꞌchk maꞌcl yi na xcon teꞌj. Tajweꞌn tan toqueꞌn kojij yi aceitaꞌtz teꞌj. Nin nchaꞌtz tzꞌan yi patbil insens. 28 Nin tajweꞌn tan jeꞌn akojol tibaj yi patbil itxꞌixwatz tu yi cyakil yi eꞌchk maꞌcl yi na xcon teꞌj. Nchaꞌtz tzꞌan yi jun chin wutzileꞌn plancan tu yi xeꞌ tajweꞌn tan jeꞌn akojol tibaj. 29 Tan yi xtxolbilaꞌtz tzaxanseꞌ yi eꞌchk maꞌclaꞌtz nin chin xan nin sbneꞌ, nin alchok scyetz yil smac cyen yi eꞌchk maꞌclaꞌtz xansaj tib tantuꞌ yi smac cyen.
30 ”Nchaꞌtz tajweꞌn tan jeꞌn akojol yi aceit twiꞌ Aarón tan xanseꞌn. Nchaꞌtz yi eꞌ cyꞌajl tajweꞌn tan abnol yi jun xtxolbilaꞌtz scyeꞌj bantz chixconeꞌn swetz tetz paleꞌ. 31 Nin baꞌn tzawal yi xtxolbileꞌj scyetz cyakil yi eꞌ xonl Israel nin je tzawaleꞌj: ‘Sbneꞌ opon tunintz ntin xconk yi jun jilwutz aceiteꞌj tan xanseꞌn yi eꞌchk takleꞌn yi xconk tzinwutz. 32 Ej nin yi jun aceitaꞌtz quil tzitakꞌeꞌn wok ẍchiwiꞌ alchok wunak. Nin quil tziban wok junt clas aceit swutz yi jeꞌj. Na yi aceit xansaꞌnt, nin na taj yil tzitek wok ẍchiꞌ. 33 Alchok scyetz yil sban junt txꞌakaj aceit yi niꞌcuꞌn tu yi jeꞌj nin kol xconsaj, tzꞌelpon lajuꞌn tzixoꞌl wok,’ ” stzun Ryos bantz.
Yi insens
34 Ej nin nchaꞌtz tal Ryos tetz Moisés: “Baꞌn tzajoy yi eꞌchk jilwutz takleꞌneꞌj: yi kꞌolil yi sturaqui, tu jun jilwutz ẍmecyꞌ yi patuꞌn tzawulej, tu junt jilwutz kꞌol yi na jal te jun wiꞌ tzeꞌ yi na biꞌaj gálbano, tu insens puro. Nicyꞌ nintuꞌ maꞌlbil te yi jujun kꞌol. 35 Tan yi eꞌchk cꞌoꞌcsbilaꞌtz baꞌn tzaban jun balaj insens, yi chin xan nin sbneꞌ. Na taj yi cwenta cunin tzaban tan banleꞌn chi na ban jun balaj bnol perfum. 36 Baꞌn tzajocyꞌeꞌn muꞌẍ. Chin cochꞌ nin tzawulej. Baꞌn tzun ben awukꞌeꞌ swutz yi caẍaꞌ kale atit yi quiwel kayol. Yi jun insensaꞌtz chin xan nin sbneꞌ. 37 Quiꞌc cuj tan ibnol wok jun txꞌakaj insens tan xconeꞌn tzitetz chi yi jun txꞌakajaꞌtz. Na yi jun insensaꞌtz iꞌtz tetz wetz nin chin xan nin sbneꞌ. Nchaꞌtz chin xan nin sbneꞌ tetz itetz. 38 Alchok scyetz yil sban junt txꞌakajt insens yi niꞌcuꞌn cꞌoꞌcal tan xconeꞌn tuꞌ tetz, tzꞌelepon lajuꞌn ẍchixoꞌl wok.”