Yi xtxolbil tan xanseꞌn jun paleꞌ
29
1 ”Je xtxolbileꞌj yi tajweꞌn tan abnol yil cẍoꞌc tan chixansajeꞌn yi eꞌ paleꞌ. Cyꞌaj tzaj jun neꞌẍ wacẍ yi mam tu cob tal neꞌẍ cneꞌr yi mam yi quiꞌc chiyab, nin quiꞌc muꞌẍ chiyanaꞌsil. 2 Nchaꞌtz banaj cobox pam yi quiꞌc xtxꞌamil tan balaj jarin. Nchaꞌtz banaj cobox torta nin cobox wotzꞌ yi na bnix tan jarin. Ej nin baꞌn tzꞌoc muꞌẍ tal aceit swutz. 3 Yil bnix, baꞌn cuꞌ tul jun tal neꞌẍ miꞌt nin tzitcyꞌaj wok nin swutz yi mantial. Nchaꞌtz tzꞌan jun tal neꞌẍ wacẍ yi mam tu cob tal neꞌẍ cneꞌr yi eꞌ cuꞌn mam. 4 Ej nin cyꞌajweꞌ nin Aarón scyuchꞌ yi eꞌ cyꞌajl stziꞌ yi puertil yi mantial kale na kacꞌul wit kib tu intanum. Ej nin baꞌn chicuꞌ tan jichiꞌn. 5 Nchaꞌtz baꞌn tzacyꞌaj nin yi beꞌch cyetz yi ja bnix. Nin wek cuꞌn Aarón tan yi beꞌchokaꞌtz. Akꞌ cyen yi xbuꞌk yi chitpuꞌn nintuꞌ, tu yi junt yi at yubil stziꞌak. Nchaꞌtz akꞌ cyen yi lantar yi na biꞌaj efod, tu yi neꞌẍ xbuꞌk yi tzꞌocopon wutz cꞌuꞌl. Ej nin cꞌal cyen yi cꞌalbil xe cꞌuꞌl. 6 Nchaꞌtz akꞌeꞌn yi xbuꞌk te wiꞌ nin akꞌ cyen yi jun tal neꞌẍ placa swutz. 7 Nin cyꞌajwok nin aceit yi na xcon tan chixanseꞌn yi eꞌ paleꞌ. Nin baꞌn tzakojeꞌn twiꞌ Aarón tan xanseꞌn tan toqueꞌn tetz jun paleꞌ. 8 Nchaꞌtz chiban yi eꞌ cyꞌajl tajweꞌn yil cheꞌ awek tan yi xbuꞌk yi chitpuꞌn nintuꞌ. 9 Cꞌal cyen yi cꞌalbil xe cꞌuꞌl Aarón. Nchaꞌtz tzawulej yi eꞌ cyꞌajl. Ej nin akꞌeꞌn yi xbuꞌk te chiwiꞌ. Tan yi xtxolbilaꞌseꞌj tzaxanseꞌ Aarón scyuchꞌ yi eꞌ cyꞌajl te chimunl. Yi jun munlaꞌtz iꞌtz tetz sbneꞌ opon tunintz.10 ”Ej nin nchaꞌtz cyꞌaj wok nin yi jun tal neꞌẍ wacẍ yi mam swutz yi mantial kalel kacꞌulwit kib tan jeꞌn cyakꞌol Aarón scyuchꞌ yi eꞌ cyꞌajl chikꞌab tibaj yi wiꞌ. 11 Biycuꞌn yi jun tal neꞌẍ wacẍaꞌtz tzinwutz stziꞌ yi puertil yi mantial kalel kacꞌulwit kib. 12 Yil tzibiy wok cuꞌn yi jun tal wacẍaꞌtz baꞌn tzimol wok yi ẍchꞌel nin tzꞌaj cyen muꞌẍ chichꞌ tan yi akꞌab te yi eꞌchk tucꞌ yi at te yi patbil txꞌixwatz. Ma yi mas chichꞌ, baꞌn tzikoj cyen xe yi patbil itxꞌixwatz. 13 Ma cyakil yi until yi tal wacẍ chi taneꞌn yi at teꞌj yi xtxꞌotxꞌ, nin chi taneꞌn yi at teꞌj yi xtxicunil, cyꞌaj wok len tan pateꞌn tibaj yi patbil itxꞌixwatz. 14 Poro yi ẍchiꞌbel tu yi stzꞌuml tu xtxaꞌ yi wacẍ tajweꞌn yi choꞌn tzꞌoc stzꞌeꞌseꞌn joylaj len yi amaꞌl kale atixeꞌt. Na iꞌtz jun itxꞌixwatz tan jaleꞌn cuybil ipaj.
15 ”Ej nin nchaꞌtz baꞌn tzicyꞌaj wok nin jun scyeri yi cob cneꞌraꞌtz swutz yi mantial tan jeꞌn chikꞌol Aarón scyuchꞌ yi eꞌ cyꞌajl chikꞌab tibaj yi wiꞌ. 16 Baꞌn tzibiy wok cuꞌn nin baꞌn tzichit wok cyen yi ẍchꞌel xlajak yi patbil itxꞌixwatz. 17 Ej nin baꞌn tzipiẍ wok cuꞌn yi jun cneꞌraꞌtz nin txꞌaj wok yi lasuꞌ tu yi eꞌchk tkan, nin junit tzꞌan yi wiꞌ tu yi mas piẍaꞌl. 18 Nin baꞌn tzapat cyakil yi ẍchiꞌbel yi jun cneꞌraꞌtz wi yi patbil itxꞌixwatz, tetz jun balaj oy tan cꞌoꞌcaxeꞌn tzinwutz.
19 ”Ej nin baꞌn tzitcyꞌaj wok nin yi junt cneruꞌ tan jeꞌn cyakꞌol Aarón scyuchꞌ yi eꞌ cyꞌajl chikꞌab tibaj. 20 Ej nin biy wok cuꞌn yi jun cneꞌraꞌtz nin te yi ẍchꞌel baꞌn tzatzꞌaj cyen muꞌẍ tal te yi chiẍchin Aarón nin yi eꞌ cyꞌajl. Tajweꞌn choꞌn tzꞌoc yi chichꞌaꞌtz te jalaj chiẍchin yi sbal. Nchaꞌtz tzꞌan te mamil yi wiꞌ chikꞌab. Baꞌn tzꞌoc tzꞌajij yi chichꞌ te yi sbal. Ej nin nchaꞌtz tzꞌan mamil yi wiꞌ quikan, yi jalaj chisbal. Ma yi sowril yi chichꞌ chiteꞌn tibaj nin solteꞌj yi patbil itxꞌixwatz. 21 Cyꞌajeꞌl tzaj muꞌẍ te yi chichꞌaꞌtz tib yi aceit yi na xcon tan xanseꞌn jun tan toqueꞌn tetz paleꞌ nin ban tzachit nin te Aarón tu yi beꞌch tetz nin nchaꞌtz scyeꞌj yi eꞌ cyꞌajl tu yi beꞌch cyetz. Tan yi xtxolbileꞌj ẍchixansok Aarón scyuchꞌ yi eꞌ cyꞌajl nin nchaꞌtz tzꞌan yi beꞌch cyetz.
22 ”Kalenaꞌs tzun tzacyꞌaj len yi ẍepuꞌil yi at te yi jeꞌ nin yi at te yi xtxꞌotxꞌ nin yi at te yi lasuꞌ. Nin nchaꞌtz cyꞌaj len yi cob xtxicunil nin cyakil yi ẍepuꞌil yi at teꞌj, tuml yi jalaj cux yi sbal, na iꞌtz yi jun neꞌẍ cneꞌr yi mam yi xconk tan chixanseꞌn yi eꞌ paleꞌ. 23 Ej nin nchaꞌtz cyꞌajeꞌn jun pam te yi pam yi at tcꞌuꞌl yi tal neꞌẍ miꞌt yi at xe yi mantial tzinwutz. Nchaꞌtz cyꞌajeꞌn jun tort tu jun wotzꞌ yi banijt te jarin yi at aceit swutz. 24 Akꞌwok cyakil yi eꞌchk takleꞌnaꞌtz tetz Aarón scyuchꞌ yi eꞌ cyꞌajl nin baꞌn cyakꞌeꞌn nin chichuqueꞌn tzinwutz. 25 Yil bnix cyen yi jun xtxolbilaꞌtz baꞌn tzacyꞌajeꞌn tzaj yi eꞌchk takleꞌnaꞌtz yi at chikꞌab nin baꞌn tzapat cuꞌn tibaj yi patbil itxꞌixwatz tuml cyakil yi wankil yi bajx cneꞌr.a Banaj yi xtxolbileꞌj bantz itoyil jun balaj oy swetz yi wiꞌnin cꞌoꞌcal, jun oy yi patiꞌn cuꞌn tzꞌan.
26 ”Yil cẍoꞌc tan xanseꞌn Aarón baꞌn tzacyꞌaj cyen yi wutz cꞌuꞌl yi cneruꞌ yi nquim tan chixanseꞌn Aarón nin baꞌn tzachuqueꞌn tzinwutz. Ej nin yi jun piẍ chiꞌbajaꞌtz awetz sbneꞌ. 27 Jatxleꞌn yi wutz cꞌuꞌl tu yi kꞌab yi cneruꞌ yi nquim tan chixanseꞌn Aarón na cyetz sbneꞌ, tetz chichib. 28 Cyetz Aarón sbneꞌ scyuchꞌ yi eꞌ cyꞌajl. Nin yi xtxolbileꞌj iꞌtz jun ley yi tajweꞌn tan chibnol yi eꞌ xonl Israel sbneꞌ opon tunintz yil cyakꞌ chitxꞌixwatz tzinwutz. Nin yi jun oyaꞌtz niꞌcuꞌn chi nak chitzan tan toyeꞌn swetz tan ẍchajleꞌn yi ja wiꞌt jal tzatzin paz skaxoꞌl tzituchꞌ.
29 ”Ma yi beꞌch tetz Aarón, baꞌn cyaj cyen tkꞌab yi eꞌ xonl iꞌ yil quim, yil chibixeꞌ tetz paleꞌ, nin yil tzꞌakꞌlij yi caꞌwl scyetz tan cyoqueꞌn tetz paleꞌ. 30 Yi jun paleꞌaꞌtz yi tzꞌocopon cyen tetz xel Aarón yil quim, ej nin yil tzꞌoc le amaꞌl kalel kacꞌulwit kib, tajweꞌn tan xconeꞌn yi beꞌchokaꞌtz taꞌn tetz juk kꞌej.
31 ”Ma yi ẍchiꞌbel yi cneruꞌ yi nquim tan xansajeꞌn Aarón, baꞌn tzitcyꞌaj nin tcꞌuꞌl jun amaꞌl yi xansaꞌnt, nin baꞌn tzitxicwoktz. 32 Baꞌn tzawakꞌ scyetz Aarón scyuchꞌ yi eꞌ cyꞌajl tan chibajsal yi ẍchiꞌbel yi cneruꞌaꞌtz na jatxijt tetz Ryos. Nchaꞌtz tzꞌan yi pam yi at tul tal neꞌẍ miꞌt, eꞌ chibajsan. Baꞌn baj cyaꞌn stziꞌ yi puertil yi mantial kale kacꞌulwit kib. 33 Tajweꞌn tan bajeꞌn cyaꞌn, na yaꞌstzun yi oy yi ncyakꞌ swetz tan jopleꞌn yi quil nin tan chibixbajeꞌn tetz paleꞌ. Poro quiꞌc cuj tan bajsal junt, na nkꞌeꞌtz alchok scyetz lbajsan yi eꞌchk takleꞌnaꞌtz, na xansaꞌnt swutz Ryos. 34 Ma yi kol sowrin muꞌẍ tetz junt kꞌej, mpe ik yi pam nka yi chiꞌbaj tajweꞌn tan cweꞌn ipatil wok na xansaꞌnt tetz Ryos, nin quiꞌc cuj tan bajsal junt.
35 ”Banaj bin cyakil yi xtxolbilaꞌtz teꞌj Aarón scyuchꞌ eꞌ cyꞌajl chi nwal tzatz. Juk kꞌej tzabneꞌ tan chixanseꞌn nin tan takꞌleꞌn yi caꞌwl scyetz. 36 Tul yi jujun kꞌej te yi juk kꞌejaꞌtz, tajweꞌn tan awoyil jujunt tal neꞌẍ wacẍ yi mam tetz yi chitxꞌixwatz tan jaleꞌn cuybil chipaj tzinwutz. Tajweꞌn tan axansal yi patbil chitxꞌixwatz tan jun chitxꞌixwatz yil xcon tan jaleꞌn cuybil chipaj nin baꞌn tzakoj nin aceit tibaj tan xansajeꞌn. 37 Juk kꞌej tzaban tan pateꞌn yi eꞌchk itxꞌixwatz tibaj yi patbil tetz tan jaleꞌn cuybil ipaj. Tan yi xtxolbilaꞌtz, tzaxanseꞌ yi jun patbil txꞌixwatzaꞌtz. Chin xan nin sbneꞌ, na al scyetz jun yil smac cyen yi jun patbil txꞌixwatzaꞌtz, xanseꞌ tib tantuꞌ yil smac cyen.
Yi eꞌchk oy yi stzꞌakꞌlok cyakil kꞌej
38 ”Cyakil kꞌej tajweꞌn tan apatil cob tal neꞌẍ cneruꞌ yi ja tzꞌak jun yob cyaꞌn. Eliꞌch yi jun xtxolbilaꞌseꞌj teꞌj acꞌuꞌl. 39 Baꞌn tzapat jun scyeri yi cob neꞌẍ cneꞌraꞌtz jalchan nin baꞌn tzapat yi junt cweꞌn kꞌej. 40 Tetz tuchꞌ yi bajx cneꞌr tajweꞌn tzawoy cyaj liwr balaj jarin tu jun litr aceit oliw. Ej nin baꞌn tzakoj nin jun litr win tibaj tetz jun oy tzinwutz. 41 Iteꞌn nin tzꞌanaꞌtz cyakil yil tzitoy yi jun cneꞌr cweꞌn kꞌej. Tajweꞌn tan awakꞌol yi jarin tu yi aceit nin yi vino, na iꞌtz jun oy yi tajweꞌn yil pat-xij cyakil cweꞌn kꞌej tan cꞌoꞌcaxeꞌn tzinwutz. 42 Yaꞌstzun yi eꞌchk oy yi tajweꞌn yil tzitakꞌ wok swetz nin yi sbneꞌ opon tunintz tajweꞌn tan itkꞌol yi eꞌchk oyaꞌtz. Nchaꞌtz chiban yi eꞌ icyꞌajl. Baꞌn cxopon wok tan toyeꞌn yi oyaꞌtz stziꞌ yi mantial, yi mantialaꞌtz kalel lnaꞌteꞌt tan ichꞌiweꞌn wok tan kajiloneꞌn tzituchꞌ. 43 Choꞌn snaꞌtok le amaꞌlaꞌtz tan kilol kib tzituchꞌ wok yi axwok xonl Israel. Ej nin yi jun amaꞌlaꞌtz chin xan nin sbneꞌ, na choꞌn snaꞌtoktz tul. 44 Tzinxansajeꞌ bin yi mantial kalel kacꞌulwit kib scyuchꞌ yi eꞌ xonl Israel. Nchaꞌtz sbneꞌ yi patbil itxꞌixwatz, tzinxansajeꞌ. Ej nin nchaꞌtz tzinxansajeꞌ Aarón scyuchꞌ yi eꞌ cyꞌajl, tan chixconeꞌn tetz paleꞌ tzinwutz. 45 Snaꞌtok ẍchixoꞌl yi eꞌ xonl Israel nin nocopon tetz chiRyosil. 46 Tan yi xtxolbileꞌj tzꞌelepon chitxum tetz yi in yi chiRyosil nin Cyajcawil. Tzꞌelepon chitxum tetz yi in yi jun yi eꞌ elsan tzaj Egipto tan waꞌteꞌn ẍchixoꞌl, in chiRyosil, yi Cyacawil.