Yi beꞌch cyetz yi eꞌ paleꞌ
28
1 “Ma jaluꞌ Moisés, ẍchixoꞌl cyakil yi eꞌ xonl Israel chakweꞌ yi awutzicy Aarón scyuchꞌ yi eꞌ cyꞌajl yi na chibiꞌaj Nadab tu Abiú tu Eleazar nin Itamar. Chakweꞌ tan cyuleꞌn tzawutz, na tajweꞌn tan chixconeꞌn swetz tetz paleꞌ.a 2 Nin baꞌn tzaban beꞌch tetz yi awutzicy Aarón, tan jaleꞌn kꞌej iꞌ nin tan yubeꞌn. Chin xan nin sbneꞌ yi beꞌchokaꞌtz. 3 Joyweꞌ cobox balaj yaj yi ja wakꞌ cyajtzaꞌkl tan banleꞌn yi balaj beꞌchokaꞌtz. Baꞌn tzawal scyetz tan cyoqueꞌn tan banleꞌn yi beꞌch tetz Aarón. Bantz xansal tib Aarón tetz jun paleꞌ tzinwutz. 4 Nin yi beꞌch tetz iꞌ yi tajweꞌn tan ibnol iꞌtz yi jeꞌj: jun tal neꞌẍ xbuꞌk yi tzꞌocopon wutz cꞌuꞌl yi na biꞌaj pectoral tu jun lantar yi na biꞌaj efod. Nchaꞌtz banaj junt xbuꞌk yi chitpuꞌn nintuꞌ yi at yubil stziꞌak nin yi xconk tzakꞌ yi lantar. Nin ban wok junt xbuꞌk yi nim tcuꞌn tkan yi scyajk tzakꞌ yi mant. Nchaꞌtz banaj jun xbuꞌk yi jepon te wiꞌ, nin banaj jun cꞌalbil yi tzꞌocopon xe cꞌuꞌl. Ban wok bin yi balaj beꞌchokaꞌtz tetz yi awutzicy Aarón tu yi eꞌ cyꞌajl, bantz chixconeꞌn tetz paleꞌ tzinwutz. 5 Yil tzꞌoc banleꞌn, baꞌn xcon oro tu eꞌchk xbuꞌk yi txib yubil tu xkꞌaykꞌuj nin cyak. Ej nin chemij tzꞌan tan balaj lino yi bakꞌuꞌn wutz.6 ”Yi yubil yi nokꞌ yi xconk tan banleꞌn yi lantar iꞌtz oro, tu eꞌchk nokꞌ yi txib nin xkꞌaykꞌuj tu cyak yubil. Ej nin baꞌn xcon yi eꞌchk lino yi bakꞌuꞌn wutz. Chemij tzꞌan, nin chin cꞌotij cunin tzꞌan yil tzꞌoc ẍchemleꞌn. 7 Nin baꞌn tzꞌoc cob ganchil wi xulchub tan stzꞌamleꞌn. 8 Nchaꞌtz banaj jun cꞌalbil yi tzꞌocopon xe cꞌuꞌl tan cꞌalcheꞌn yi jun lantaraꞌtz. Iteꞌn nin tzitulej yi bambil tetz. Baꞌn xcon nokꞌ yi txib yubil tu yi xkꞌaykꞌuj nin yi cyak. Chemwok tan lino yi bakꞌuꞌn wutz.
9 ”Ej nin baꞌn tzajoy cob balaj cꞌub yi ónice na biꞌaj. Nin baꞌn tzꞌoc chibiꞌ yi coblaj kꞌuꞌj xonl Israel teꞌj. 10 Yil tzꞌoc chibiꞌ yi eꞌ xonl Israelaꞌtz teꞌj yi cob cꞌubaꞌtz tajweꞌn yi tunin lxom cyen te chitiemp. Bajx tzꞌoc yi biꞌ yi bajx nak nin wiꞌtzbil tlen yi chꞌiꞌp. Kakchak biꞌaj te yi jujun balaj cꞌubaꞌtz tzꞌan. 11 Tan tocseꞌn yi eꞌchk biꞌajaꞌtz te yi cob lepaj cꞌubaꞌtz baꞌn xcon jun yaj yi na aꞌw seꞌleꞌn cꞌub taꞌn, chi yi eꞌ bnol xmalkꞌab. Choꞌn tzꞌan chi jun sey. Baꞌn xcon oro tan banleꞌn yi cob ganchaꞌtz, nin baꞌn jeꞌ jun cꞌub tibaj jujun ganchaꞌtz. 12 Yi ganchaꞌtz xconk tan stzꞌamleꞌn yi lantar wi xulchub Aarón. Ej nin yil tzꞌopon iꞌ tzinwutz, xconk yi cob cꞌubaꞌtz kale atit chibiꞌ yi coblaj kꞌuꞌj xonl Israel tan cyulseꞌn txꞌakx tincꞌuꞌl. 13 Ban wok bin yi cob ganchaꞌtz nin oro cuꞌn tzitulej wok. 14 Ej nin nchaꞌtz ban wok cob caren yi oro cuꞌn, nin lasuꞌn tzitulej. Nin yil bnix baꞌn tzilacꞌbaj wok cyen te yi cob ganchaꞌtz yi tzꞌocopon wi xulchup Aarón.
Yi neꞌẍ xbuꞌk yi ocnak wutz cꞌuꞌl Aarón
15 ”Ma yi neꞌẍ xbuꞌk yi tzꞌocopon wutz cꞌuꞌl Aarón kale atit yi maꞌcl yi xconk tan xtisyaꞌiꞌn, chemij tzꞌan. Chin cꞌotij cunin tzitulej. Baꞌn xcon balaj nokꞌ yi banij te oro tu lino yi txib yubil, nin xkꞌaykꞌuj tuꞌ cyak. Ej nin bakꞌuꞌn wutz yi lino. 16 Pakwutziꞌn tzꞌan tan jaleꞌn yi cyaj xtxꞌuꞌc. Ej nin junak cob centimetr tzꞌan yi jalajchak xlaj. 17 Baꞌn tzꞌoc cyaj txol neꞌẍ cꞌub teꞌj, yi na litzꞌun. Te yi bajx txol baꞌn tzꞌoc ox tal neꞌẍ cꞌub, yi na biꞌaj rubí, crisólito nin esmeralda. 18 Ma te yi caꞌp txol baꞌn tzꞌoc oxt balaj cꞌub yi na biꞌaj granate, safiro nin jade. 19 Ma tetz yi toxiꞌn txol baꞌn tzꞌoc oxt cꞌub yi na biꞌaj jacinto, ágata nin amatista. 20 Ma te yi cyajiꞌn txol baꞌn tzꞌoc yi eꞌchk neꞌẍ cꞌub yi na biꞌaj topacio, cornalina nin jaspe. Yi eꞌchk tzꞌamol tetz yi eꞌchk cꞌubaꞌtz tajweꞌn yi oro cuꞌn sban. 21 Tajweꞌn yi coblaj xoneꞌn yi tal neꞌẍ cꞌubaꞌtz, na coblaj chixoneꞌn yi eꞌ cyꞌajl Israel. Nin te yi coblaj cꞌubaꞌtz tajweꞌn yil tzꞌoc cyen yi chibiꞌ yi coblaj kꞌuꞌj xonl Israel, jujun biꞌaj te jujun cꞌub. Choꞌn sban cyen chi na ban jun sey.
22 ”Nchaꞌtz banwok cob caren yi oro cuꞌn tzꞌan. Bakꞌuꞌn tzitulej chi jun akwil. Xconk tan stzꞌamleꞌn yi jun neꞌẍ xbuꞌkaꞌtz yi tzꞌocopon wutz cꞌuꞌl Aarón. 23 Nin nchaꞌtz banwok cob argoy yi oro cuꞌn tzꞌan. Nin yi cob argoyaꞌtz baꞌn tzꞌoc stziꞌak yi jalaj xlaj tibeꞌn tzaj yi tal neꞌẍ xbuꞌkaꞌtz. 24 Baꞌn tzꞌoc yi cob carenaꞌtz te yi cob argoyaꞌtz yi ateꞌ te yi jalaj xlaj tibeꞌn tzaj. 25 Ej nin baꞌn cꞌalxij yi juꞌ yi cob carenaꞌtz te yi cob ganchaꞌtz yi oro cuꞌn, nin yi choꞌn at wi xulchub. Cꞌalwok cyen te yi jalaj xlaj swutz. 26 Nchaꞌtz banwok cobt argoy yi oro cuꞌn, nin akꞌweꞌ cyen te yi cob xtxꞌuꞌc tzakꞌ cuꞌn tzaj yi jun xbuꞌkaꞌtz. 27 Nin banwok cobt argoy nin tzꞌiswok cyen te yi lantar tibeꞌn tzaj muꞌẍ tal kale na icyꞌeꞌt yi cꞌalbil tetz. 28 Nin baꞌn tzicꞌal wok cuꞌn yi cob argoyaꞌtz yi at te yi neꞌẍ xbuꞌk te yi cob argoy yi at te yi lantar. Nin cꞌalwok tan cob tal neꞌẍ cꞌalbil yi txib yubil. Cꞌal wok cuꞌn tan qui jatxol tib yi neꞌẍ xbuꞌk tu yi lantar. 29 Ej nin cyakil tir yil tzꞌoc Aarón xe amaꞌl yi wiꞌnin xanil tan yol swetz, tzꞌul tcyꞌal yi chibiꞌ yi eꞌ xonl Israel yi seꞌij teꞌjak yi balaj cꞌubaꞌtz yi at swutz yi tal neꞌẍ xbuꞌkaꞌtzb yi at wutz cꞌuꞌl nakajil yi talmaꞌ. Tzꞌul tzun txꞌakx chibiꞌ yi eꞌ xonl Israel tincꞌuꞌl. 30 Ma yi Urim tu Tumim,c akꞌwok cuꞌn tcꞌuꞌl yi neꞌẍ xbuꞌkaꞌtz yi at wutz cꞌuꞌl. Akꞌwok cuꞌn bantz taꞌteꞌn wutz cꞌuꞌl, nin cyꞌaꞌn nintz taꞌn yil tzꞌocopon tzinwutz tan yol.
31 ”Ej nin nchaꞌtz banwok yi xbuꞌk yi tzꞌocopon jakꞌ yi lantar. Txib cuꞌn tzꞌan yubil. 32 Ej nin nicyꞌal yi jun xbuꞌkaꞌtz baꞌn tzicꞌapleꞌn kul. Nin stziꞌak yi kul baꞌn tzꞌoc baltzꞌeꞌn tan qui katzeꞌn. Choꞌn sbneꞌ cyen chi na ban jun colbaj. 33 Choꞌken eꞌchk yubil stziꞌak yi xbuꞌk. Wolojiꞌn tzitulej. Nin baꞌn xcon yi xbuꞌk yi txib yubil tu xkꞌaykꞌuj nin cyak. Nin baꞌn tziban wok eꞌchk tal campanuꞌ yi oro cuꞌn tan toqueꞌn stziꞌak yi xbuꞌkaꞌtz. 34 Je puntil tzitulejeꞌj, jun woloj nokꞌ nin jun campanuꞌ tzꞌan, jalen yil bnix cyakil yi stziꞌak yi xbuꞌk. 35 Tajweꞌn tzꞌoc jun xbuꞌkaꞌtz te Aarón yil tzꞌoc tan banleꞌn yi munl xe yi mantial. Ẍchꞌink eꞌchk campanuꞌ yil tzꞌoc Aarón xe yi amaꞌlaꞌtz yi wiꞌnin xanil nin yil tzꞌel tzaj. Kol xom te eꞌchk caꞌwlaꞌtz quil tzun lquim iꞌ-tz.
36 ”Nchaꞌtz tajweꞌn tan bnixeꞌn jun tal neꞌẍ placa yi oro cuꞌn, nin baꞌn tzꞌoc cobox yol teꞌj chi na ban yi na bnix jun sey. Nin je yi yoleꞌj yi tajweꞌn tzꞌoc teꞌj: ‘Xansaꞌn choꞌt tan kaxconeꞌn tetz Jehová yi kaRyosil.’d 37 Yi jun tal neꞌẍ placa-aꞌtz baꞌn tzꞌoc swutz plaj yi xbuꞌk yi tzꞌocopon te yi wiꞌ, nin cꞌalwok cyen tan jun xbuꞌk yi txib yubil bantz cyajeꞌn cyen junawes te yi xbuꞌkaꞌtz. 38 Yi jun tal neꞌẍ placa-aꞌtz tajweꞌn yil cyaj cyen wutz plaj Aarón yil tzꞌocopon iꞌ tzinwutz tan toyeꞌn yi cyoy yi eꞌ intanum, yi eꞌ xonl Israel, na yi tetz munl iꞌtz tan toyeꞌn yi cyoy yi eꞌ xonl Israelaꞌtz tan jopleꞌn cyakil quil yi juchij cyaꞌn te cyakil eꞌchk takleꞌn yi wiꞌnin xtxintxal. Ej nin yil wil yi jun placa-aꞌtz chintzatzink te cyoy.
39 ”Banwok yi jun xbuꞌk yi chitpuꞌn nintuꞌ yi at yubil tziꞌak tan lino. Nchaꞌtz yi xbuꞌk yi jepon te yi wiꞌ, lino cuꞌn tzꞌan. Ej nin nchaꞌtz banaj jun cꞌalbil. Chemij tzitulej wok. Nin chin cꞌotij cuꞌn tzꞌan. 40 Nchaꞌtz tzꞌan beꞌch cyetz yi eꞌ cyꞌajl Aarón. Banwok jujun chixbuꞌk yi chitpuꞌn nintuꞌ nin jujun chicꞌalbil tu yi xbuꞌk yi jepon te chiwiꞌ. Banaj yi jeꞌj tan jaleꞌn chikꞌej.
41 ”Yaꞌstzun yi beꞌch cyetz yi awutzicy scyuchꞌ yi eꞌ tetz cyꞌajl yi xconk tan awekol eꞌ. Ej nin nchaꞌtz tajweꞌn yil jeꞌ aceit ẍchiwiꞌ tan chibixbajeꞌn sjuꞌ chimunl, na tajweꞌn tan chixansajeꞌn tan cyoqueꞌn tetz paleꞌ. 42 Nchaꞌtz banwok neꞌẍ wex tan toqueꞌn scyeꞌj tan teweꞌn chiwankil. 43 Nin yil choꞌc wutzkꞌanil yi amaꞌl kale tzincꞌulwit wib scyuchꞌ tan banleꞌn chimunl tajweꞌn yi at yi neꞌẍ wexaꞌtz scyeꞌj. Tajweꞌn tan chixomeꞌn Aarón scyuchꞌ yi eꞌ cyꞌajl te yi xtxolbilaꞌseꞌj tan qui jaleꞌn quil, bantz qui chiquimeꞌn. Yi jun leyaꞌtz iꞌtz tetz Aarón scyuchꞌ yi eꞌ cyꞌajl tu cyakil chixonl sbneꞌ opon tunintz.