Yi patbil txꞌixwatz
27
1 Nchaꞌtz tal Ryos tetz Moisés: “Ban wok jun patbil itxꞌixwatz tan acacia yi cyaj xtxꞌuꞌcnakiꞌn, nin je yi maꞌlbil tzitulejeꞌj: Cob metr tu junak oꞌ centimetr tzitulej yi xlajak, ma yi wutz tkan jun metr tu junak oꞌ centimetr tzꞌan. 2 Ban wok cyaj tucꞌ, jujun lakak xtxꞌuꞌc. Junit tzꞌan yi tucꞌaꞌtz tu yi patbil txꞌixwatz. Ej baꞌn tzꞌoc brons teꞌjak nin tul yi jun altaraꞌtz. 3 Nchaꞌtz ban wok cobox maꞌcl yi xconk te yi patbil itxꞌixwatz, chi taneꞌn yi cuꞌlbil tzaꞌj tu yi eꞌchk paleꞌt nin yi eꞌchk ẍwokꞌ nin cyakil yi eꞌchk pacꞌbil ẍwokꞌ tu eꞌchk cuꞌlbil xtxakꞌakꞌ. Brons cuꞌn tzitulej wok tircuꞌn. 4 Ban wok jun patbil chiꞌbaj tan brons nin oken cyaj argoy teꞌjak xtxꞌuꞌc yi jun patbil chiꞌbajaꞌtz. 5 Yil bnix yi jun chꞌichꞌaꞌtz baꞌn cuꞌ itaꞌn tcꞌuꞌl yi altar poro tul nicyꞌan cyen tuꞌ, na qui tajweꞌn tan cweꞌn poneꞌn jalen txeꞌ cuꞌn. 6 Nchaꞌtz baꞌn tziban wok cobox kꞌaꞌj nin baꞌn xcon yi tzeꞌ acacia itaꞌn tan banleꞌn, nin baꞌn tzꞌoc brons itaꞌn teꞌj. 7 Yil bnix yi eꞌchk kꞌaꞌjaꞌtz baꞌn tzun tzꞌicyꞌtz itaꞌn tul yi eꞌchk argoy yi at te yi altar. Na xconk tan palcheꞌn nin yi altar, nin tan ticyꞌleꞌn nin. 8 Yi jun patbil itxꞌixwatzaꞌtz, jul tzꞌan tcꞌuꞌl nin baꞌn xcon tzꞌlum acacia itaꞌn tan banleꞌn chi yi jun yi minchaj tzatz wiꞌwtz,” stzun Ryos ban tetz Moisés.Yi wutzkꞌanil yi najbil Ryos
9 “Ban wok jun tapij solteꞌj yi wutzkꞌanil yi innajbil. Caꞌwunak oꞌ metr tzꞌan yi xlaj yi na xmayin nin cweꞌn tziꞌn. Baꞌn xcon yi balaj lino yi bakꞌuꞌn tan banleꞌn jun xbuꞌk yi xconk tetz yi jun tapijaꞌtz. 10 Nchaꞌtz ban wok junak tkan tzeꞌ kalel jeꞌt yi jun xbuꞌkaꞌtz. Nchaꞌtz ban wok junak cuꞌlbil tkan yi tzeꞌaꞌtz teꞌj. Brons cuꞌn tzitulej. Nchaꞌtz ban wok junak ganch tu yi stzꞌamol tetz yi eꞌchk cuꞌlbilaꞌtz, tan yi chꞌichꞌ yi sakal, na xconk tan stzꞌamleꞌn yi xbuꞌk. 11 Nchaꞌtz tzꞌan yi jalaj xlaj yi na xmayin nin jeꞌn tziꞌn, tajweꞌn yil tzꞌoc yi balaj xbuꞌk teꞌj, nin iteꞌn nin maꞌlbilaꞌtz sbneꞌ chi yi jalajt xlaj. Nchaꞌtz yi junak tkan tu eꞌchk cuꞌlbil tkanaꞌtz, brons cuꞌn tzꞌan. Ma yi eꞌchk ganch tu eꞌchk tzꞌambil tetz, sakal cuꞌn tzꞌan. 12 Ma te yi jalaj xlaj yi na xmayin nin toqueꞌn tziꞌn, tajweꞌn yi junak cob metr tu niꞌcy tzꞌan. Nin ban wok lajuj tkan tu yi eꞌchk cuꞌlbil. 13 Ej iteꞌn nin tzꞌanaꞌtz yi jalajt xlaj yi na xmayin nin teleꞌn tziꞌn. Junak cob metr tu niꞌcy tzꞌan, nin xconk xbuꞌk tan jopleꞌn. Nin te yi xlajeꞌj baꞌn cyaj cyen yi puertil yi innajbil. 14 Xlajak yi puert baꞌn tziban wok juk metr balaj xbuꞌk tetz tapij. Ban wok ox tkan tu ox simientil te yi bajx xlaj. 15 Nchaꞌtz tzꞌan le jalajt xlaj, juk metr tzꞌan nin baꞌn tzꞌoc iteꞌn nin maꞌlbil xbuꞌkaꞌtz. Ej nin ban wok oxt tkan tu yi cuꞌlbil tkan. 16 Ma tetz yi puertil, baꞌn xcon yi eꞌchk nokꞌ yi txib yubil tu xkꞌaykꞌuj nin cyak, nin baꞌn bnix tan yi balaj lino yi bakꞌuꞌn tzꞌan. Yil cxoꞌc wok tan ẍchemleꞌn chin cꞌotij cunin tzꞌan. Beluj metr tzꞌan yi jun xbuꞌkaꞌtz yi xconk tetz yi puert. Nchaꞌtz ban wok cyaj tkan tu cyaj xeꞌ yi eꞌchk tkanaꞌtz yi tzꞌocopon tzakꞌ yi xbuꞌk tetz puert. 17 Cyakil yi eꞌchk tkan yi tzꞌocopon solteꞌj yi innajbil tajweꞌn yil xcon sakal tan banleꞌn yi eꞌchk ganch tu yi stzꞌambil tetz yi ganch. Nchaꞌtz tajweꞌn yil xcon brons tan banleꞌn yi eꞌchk xeꞌ. 18 Ma yi wutzkꞌanil yi innajbil caꞌwunak oꞌ metr yi tkan tzꞌan, nin yi wutz junak cob metr tu niꞌcy tzꞌan. Iteꞌn nin tzꞌanaꞌtz yi wutz coc. Ma yi wutz tkan cob metr tu junak oꞌ centimetr tzꞌan. Ej nin yi eꞌchk xbuꞌk yi xconk te yi innajbil lino cuꞌn yi bakꞌuꞌn taneꞌn. Ma yi eꞌchk xeꞌ, brons cuꞌn tzꞌan. 19 Nin cyakil yi eꞌchk maꞌcl yi xconk itaꞌn wutzkꞌanil tan innaꞌwseꞌn tajweꞌn yi brons cuꞌn tzꞌan tircuꞌn. Nchaꞌtz cyakil yi eꞌchk staqui yi at tcꞌuꞌl nin solteꞌjeꞌl tzaj yi peꞌm, tajweꞌn yi brons cuꞌn tzꞌan.
Yi aceit yi xcon tetz txekbil
20 ”Ma jaluꞌ Moisés alaj scyetz cyakil yi eꞌ xonl Israel tan tuleꞌn balaj aceit tetz oliw yi cheꞌjaꞌn taneꞌn, na xconk tan cuꞌseꞌn tul yi eꞌchk cantil tan xtxekeꞌn cyakil kꞌej xe innajbil. 21 Nin baꞌn choꞌc Aarón scyuchꞌ eꞌ cyꞌajl tan cuꞌseꞌn aceit tul yi eꞌchk cantil yi at tul yi bajx cuart yi at swutz yi xbuꞌk yi na jopon tetz yi caẍaꞌ kale atit yi caꞌwl tetz katrat yi bnixnak waꞌn tzituchꞌ. Nin yi eꞌchk cantilaꞌtz tajweꞌn yi tuninl txekun cuꞌntz cyakil akꞌbal tul yi amaꞌl kalel kacꞌulwit kib tzituchꞌ. Ej nin yi xtxolbilaꞌseꞌj iꞌtz jun caꞌwl sbneꞌ scyetz yi eꞌ xonl Israel scyuchꞌ cyakil chixonl sbneꞌ opon tunintz,” stzun Ryos bantz tetz Moisés.