Yi pach yi mantial tuꞌ
26
1 Nchaꞌtz tal Ryos tetz Moisés: “Ban wok jun innajbil yi mantial cuꞌn tzꞌan. Baꞌn xcon lajuj xbuꞌk yi lino cuꞌn yi bakꞌuꞌn wutz, tu yi eꞌchk yubil yi txib, xkꞌaykꞌuj nin cyak. Nin ban wok teblal eꞌ querubim swutz. Nin joy wok puntil yi skꞌil cunin tzꞌan. 2 Cyakil yi eꞌchk xbuꞌk yi tzibneꞌ, tajweꞌn yi junit maꞌlbil tzꞌan tircuꞌn. Nin je yi maꞌlbileꞌj: Coblaj metr tu niꞌcy tzꞌan yi tkan, ma yi wutz cob metr tzꞌan. 3 Chup wok cuꞌn oꞌ xbuꞌk. Nchaꞌtz tzꞌan yi oꞌ-t, chup wok cuꞌn, baꞌn tokꞌbej tib yi stziꞌak tan yi stzꞌisbil tetz yi junt. 4 Ban wok eꞌchk jul stziꞌak yi cob chin xbuꞌkaꞌtz, tan ticyꞌeꞌn yi cꞌalbil tetz tcꞌuꞌl. Baꞌn xcon yi lino yi txib yubil itaꞌn tan banleꞌn eꞌchk cꞌalbilaꞌtz. Nchaꞌtz niꞌcuꞌn sban yi cob chin xbuꞌkaꞌtz yi chupijcheꞌ. 5 Ban wok nicyꞌ cient jul te yi cob xbuꞌkaꞌtz. Nicyꞌ cient te yi jujun, nicyꞌ nin tuꞌ tzꞌan yi xoꞌl tan cweꞌn tokꞌbel tib yi cob xbuꞌkaꞌtz. 6 Nin ban wok nicyꞌ cient ganch yi oro cuꞌn tan ẍchupleꞌn yi cob xbuꞌkaꞌtz, na xconk tan stzꞌamleꞌn yi xbuꞌk tu yi junt bantz junit tzꞌan yi wiꞌ yi jun innajbilaꞌtz.7 ”Nchaꞌtz ban wok junlaj xbuꞌk tan xiꞌil chiw tan jeꞌn tibaj yi bajx xbuꞌkaꞌtz yil jeꞌ tibaj innajbil. 8 Junit maꞌlbil tzꞌan cyakil yi eꞌchk xbuꞌk yi xiꞌil chiw cuꞌn. Nin je yi maꞌlbileꞌj: Oxlaj metr tu niꞌcy yi tkan. Ma yi wutz cob metr. 9 Tzꞌis wok cuꞌn oꞌ xbuꞌk nin junit sban. Nchaꞌtz yi kakt, tzꞌis wok cuꞌn. Ma yi bajx te yi kakaꞌtz yil cyaj swutz, baꞌn tzipak wok cuꞌn nicyꞌal. 10 Baꞌn tziban wok nicyꞌ cient jul teꞌjak yi cob lmak xbuꞌkaꞌtz kalel tzꞌicyꞌeꞌt eꞌchk ganch tan chicꞌalcheꞌn. 11 Ban wok nicyꞌ cient ganch yi brons cuꞌn. Nin baꞌn tzꞌoc teꞌjak yi eꞌchk julil yi cob xbuꞌkaꞌtz bantz junit tzꞌan yi wiꞌ innajbilaꞌtz. 12 Nin yi sobril yi cob xbuꞌkaꞌtz yi junit mban, baꞌn cyaj tuꞌ chꞌimbaꞌn wutz coc yi innajbilaꞌtz. 13 Ma yi xlajak yi innajbilaꞌtz sobrink cyen caꞌwunak oꞌ centimetr swutz yi bajx xbuꞌk.
14 ”Nchaꞌtz ban wok jun paꞌtbil tan stzꞌuml cneꞌr nin baꞌn jeꞌ itaꞌn tibaj innajbil. Baꞌn cuꞌ yi tzꞌuꞌmaꞌtz tul stzꞌacl yi cyak yubil. Nchaꞌtz ban wok junt paꞌtbil tan junt jilwutz tzꞌuꞌm tan jopleꞌn tircuꞌn.
15 ”Ban wok cobox tablón te yi balaj tzeꞌ acacia tan xconeꞌn tetz cajonil innabil. Nin joy wok puntil tan banleꞌn yi skꞌil cunin tan yubeꞌn. 16 Yi jujun tablónaꞌtz tajweꞌn yi cyaj metr tu niꞌcy tzꞌan yi tkan. Ma yi wutz oxcꞌal tu oꞌ centimetr tzꞌan. 17 Te yi eꞌchk tablónaꞌtz baꞌn bnix cob stzꞌambil tetz te yi jujun. Nicyꞌ nin tuꞌ tzitulej cyakil yi eꞌchk tablónaꞌtz yi xconk tetz cajonil yi innajbil. 18 Ban wok junak tablón te yi jalaj xlaj yi na xmayin nin cweꞌn tziꞌn. 19 Nin ban wok caꞌwunak simient yi sakal cuꞌn tzꞌan tan cyajeꞌn cyen xe yi eꞌchk tablónaꞌtz. Cob simient te yi jujun tablónaꞌtz tan toqueꞌn yi cob stzꞌambil tetz tul. 20 Nchaꞌtz tzꞌan yi jalajt xlaj yi innajbil yi na xmayinin jeꞌn tziꞌn. Tajweꞌn yil xcon junak tablón itaꞌn te yi jalajaꞌtz. 21 Nin ban wok caꞌwunak simient yi sakal cuꞌn tzꞌan tan cyajeꞌn cyen cob tzakꞌ yi jujun tablón. 22 Ma yi jalajt xlaj innajbil, yi jalaj yi na xmayin nin toqueꞌn tziꞌn, ban wok kak tablón tan xconeꞌn te yi jalajaꞌtz. 23 Nin baꞌn xcon cobt tablón tetz yi cob xtxꞌuꞌc. 24 Baꞌn tzꞌoc te yi jujun yi at lakak xtxꞌuꞌc. Nin baꞌn chicꞌalxij tan chꞌichꞌ. 25 Nin yi wajxak tablónaꞌtz tajweꞌn yi at len cob simientil te jujun yi sakal cuꞌn. Waklaj tzun simient na taj tan cyajeꞌn cyen tzakꞌ yi wajxak tablónaꞌtz.
26 ”Ban wok oꞌ kꞌaꞌj tan tzeꞌ acacia. Na xconk tetz kꞌaꞌjil yi tablón yi tzꞌocopon te yi jalaj xlaj yi cajonil innajbil. 27 Nchaꞌtz ban wok oꞌt kꞌaꞌj tetz yi jalajt xlaj yi cajonil, nin ban wok oꞌt kꞌaꞌj tetz yi jalajt wutz coc yi na xmayinin toqueꞌn tziꞌn. 28 Yi jun kꞌaꞌj yi tzꞌicyꞌpon tul yi eꞌchk tablón, tajweꞌn yil tzꞌicyꞌ tcꞌuꞌl tircuꞌn nin nicyꞌal cuꞌn tzꞌan. 29 Nchaꞌtz baꞌn tzꞌoc oro teꞌjak yi eꞌchk tablónaꞌtz tu yi eꞌchk kꞌaꞌjil yi xconk tetz solteꞌj. Nchaꞌtz ban wok cobox argoy yi oro cuꞌn tzꞌan kalel chicyꞌeꞌt yi eꞌchk kꞌaꞌjilaꞌtz. 30 Nucꞌ wok bin yi jun innajbilaꞌtz, tajweꞌn tan ixomeꞌn te yi plan minchaj tzatz wiꞌwtz,” stzun Ryos tetz Moisés.
31 Nchaꞌtz tal Ryos tetz Moisés: “Ban wok jun xbuꞌk tan jopleꞌn yi amaꞌl yi chin xan nin. Tajweꞌn xcon yi nokꞌ yi txib yubil tu xkꞌaykꞌuj nin cyak, nin baꞌn bnix tan yi balaj lino yi bakꞌuꞌn tzꞌan. Yi jun xbuꞌkaꞌtz chemij tzitulej wok nin baꞌn tzꞌoc teblal cob querubim swutz yi chin cꞌotij cunin tzꞌan. 32 Baꞌn choꞌc cobox ganch yi oro cuꞌn teꞌj nin baꞌn jeꞌ chꞌimbaꞌn teꞌj cyaj tkan caꞌl. Yi cyaj tkan caꞌlaꞌtz baꞌn bnix tan acacia nin baꞌn tzꞌoc oro teꞌj, nin baꞌn jeꞌ len tibaj jujun xeꞌ yi sakal cuꞌn. 33 Baꞌn tzun tzichꞌimbaj wokeꞌn yi xbuꞌkaꞌtz te yi eꞌchk ganchaꞌtz. Ej nin tcꞌuꞌl yi jun xbuꞌkaꞌtz akꞌwok quen yi caẍaꞌ kale tzꞌibaneꞌt yi contrat yi bnixnak waꞌn tzituchꞌ. Nchaꞌtz yi jun xbuꞌkaꞌtz xconk tan jatxleꞌn xoꞌl yi amaꞌl yi xan, tu yi amaꞌl yi wiꞌnin xanil. 34 Nin tcꞌuꞌl yi amaꞌlaꞌtz yi wiꞌnin xanil baꞌn tzꞌoc yi caẍaꞌ kale atit yi incontrat yi bnixnak waꞌn tzituchꞌ, nin akꞌwokeꞌn yi jopselil. 35 Swutzeꞌl tzaj yi jun xbuꞌkaꞌtz baꞌn cyaj cyen yi mes kale na jeꞌt yi pam. Baꞌn tzꞌoc xlaj yi tapij yi na xmayinin jeꞌn tziꞌn. Ma yi jun cantilaꞌtz yi juk cuꞌn wiꞌ at, baꞌn cyaj te yi jalaj xlaj yi na xmayinin cweꞌn tziꞌn.
36 ”Nchaꞌtz banaj junt xbuꞌk yi xconk tetz yi puertil yi innajbil. Baꞌn xcon yi nokꞌ, yi lino biꞌ, itaꞌn, yi bakꞌuꞌn taneꞌn. Nin baꞌn xcon yi txib yubil tu yi xkꞌaykꞌuj nin cyak. Chin cꞌotij cunin tzitulej wok. 37 Ej nin nchaꞌtz ban wok oꞌ tkan caꞌl te yi tzeꞌ acacia yi xconk tan jeꞌn yi xbuꞌk teꞌj. Nin oken oro teꞌjak. Baꞌn tzꞌoc jujun ganch yi oro cuꞌn teꞌjak yi jujun tzeꞌaꞌtz. Nin ban wok oꞌ xeꞌ tetz yi eꞌchk tkan caꞌlaꞌtz tan brons,”a stzun Ryos tetz Moisés.