Yi cyoqueꞌn yi xonl Israel tan molcheꞌn yi eꞌchk oy tan banleꞌn yi caꞌl Ryos
25
1 Nintzun tal Ryos tetz Moisés:2 “Moisés, alaj scyetz cyakil yi eꞌ xonl Israel tan chimolol jun balaj oy tan cyakꞌol swetz. Poro ntin na waj yil cyakꞌ yi eꞌ yi tetz cuꞌn cyalmaꞌ yi na cyaj cyakꞌ. Nin quil tziban wok puers scyetz yi eꞌ yi qui na cyaj cyakꞌ. 3 Nin cyakil yi eꞌchk takleꞌn yi baꞌn cyakꞌ iꞌtz yi oro, sakal tu cobre.a 4 Nchaꞌtz baꞌn cyakꞌ yi eꞌchk nokꞌ yi txib yubil tu púrpura, nin cyak. Nchaꞌtz baꞌn cyakꞌ yi balaj nokꞌ linob tu yi xiꞌil chiw. 5 Nin baꞌn chimol yi stzꞌuml cneꞌr yi ocnak stzꞌacl yi cyak yubil. Nin baꞌn chimol balaj tzꞌuꞌm, tu yi eꞌchk balaj tzeꞌ chi taneꞌn yi acacia. 6 Nchaꞌtz baꞌn cyakꞌ aceit yi xconk tetz lampr, nin yi eꞌchk tzꞌacꞌbil yi na cuꞌ tcꞌuꞌl tetz perfum yi xconk tan xanseꞌn eꞌchk takleꞌn nin tan pateꞌn tan cꞌoꞌcaxeꞌn tzinwutz. 7 Nin nchaꞌtz baꞌn cyakꞌ yi eꞌchk balaj cꞌub, chi taneꞌn yi cornalina, nka yi eꞌchk mas balaj cꞌub. Na xconk tetz yi lantar tu yi xbuꞌk yi xconk wutz cꞌuꞌl yi wiꞌtz paleꞌ. 8 Nchaꞌtz ban wok jun innajbil tan innajeweꞌn tzixoꞌl wok. 9 Poro yi jun innajbilaꞌtz tu cyakil yi eꞌchk takleꞌn yi tzꞌocopon tcꞌuꞌl, tajweꞌn tan ibanol chi yi swaleꞌ tzatz. Tajweꞌn yi niꞌcuꞌn tzꞌan chi yi tzinchajeꞌ tzawetz.
Yi caẍaꞌ kale atiteꞌt yi lajuj caꞌwl Ryos
10 ”Ban wok jun caẍaꞌ te yi balaj tzeꞌ acacia. Nin je yi maꞌlbil yi baꞌn xcon itaꞌn tan banleꞌn. Jun metr tu lajuj centimetr tzitulej wok yi tkan, ma yi wutz, oxcꞌal tu oꞌ centimetr tzꞌan. Nchaꞌtz tzꞌan yi wutz tkan, oxcꞌal tu oꞌ centimetr tzꞌan. 11 Yil bnix, baꞌn tzꞌoc jun yubil stziꞌak chi taneꞌn cornis, yi oro cuꞌn. 12 Nchaꞌtz ban wok cyaj argoy yi oro cuꞌn, nin baꞌn tzꞌoc te cꞌuꞌl yi caẍaꞌ. Cob le jalaj xlaj nin cob le jalajt. 13 Nin ban wok cob kꞌaꞌj te yi tzeꞌ acacia. Nin baꞌn tzꞌoc oro teꞌjak. 14 Yil bnix baꞌn tzꞌicyꞌ itaꞌn tcꞌuꞌl yi eꞌchk argoy yi at te cꞌuꞌl yi caẍaꞌ, na xconk tan palcheꞌn nin. 15 Yil tzꞌoc yi eꞌchk kꞌaꞌjilaꞌtz tul eꞌchk argoy, nin baꞌn cyaj quen tuꞌ tul. 16 Ej nin tul yi caẍaꞌaꞌtz baꞌn tzitakꞌ wok cuꞌn yi cob lepaj cꞌub kale tzꞌibaneꞌt yi caꞌwl yi swakꞌeꞌ tzitetz.
17 ”Nchaꞌtz ban wok jobsel yi caẍaꞌc, tan balaj oro. Jun metr tu lajuj centimetr yi tkan, ma yi wutz, iꞌtz oxcꞌal tu oꞌ centimetr tzꞌan. 18 Ban wok teblal cob querubim,d txakꞌij tzitulej wok te yi balaj oro. Nin akꞌwokeꞌn tibaj yi jobsel yi caẍaꞌaꞌtz. Baꞌn cyaj jun le max nin jun le sbal. 19 Yi jobsel yi caẍaꞌaꞌtz, tu yi cob teblal querubimaꞌtz, junit tzꞌan yi bambil tetz. Nin yi cob querubimaꞌtz baꞌn lcyaj jujun le jalaj stziꞌ yi jobsel yi caẍaꞌ. 20 Ma yi cob teblal querubimaꞌtz, yi ateꞌ tibaj yi jopsel, tajweꞌn tan chixmayil quib squibil quib. Poro na taj yi choꞌn chixmayin cuꞌn te jobsel yi caẍaꞌaꞌtz. Nchaꞌtz tzꞌan yi chixicyꞌ. Choꞌn tzꞌaj cuꞌn wi yi caẍaꞌ, tan jopleꞌn cuꞌn yi caẍaꞌ tan chixicyꞌ. 21 Yil bnix yi jobsel yi caẍaꞌ itaꞌn, baꞌn tzitakꞌ wokeꞌn tibaj yi jun caẍaꞌaꞌtz. 22 Ma jaluꞌ Moisés, choꞌn chinjilon tzaj tzatz tibaj yi jobsel yi caẍaꞌaꞌtz nin ẍchixoꞌl yi cob teblal querubimaꞌtz. Choꞌn chinjilonk tzatz nin swaleꞌ yi incaꞌwl tzawetz tan awalol scyetz yi eꞌ xonl Israel tan chixomeꞌn teꞌj,” stzun Ryos bantz tetz Moisés.
Yi mes kale jeꞌt yi pam
23 Nchaꞌtz tal Ryos tetz Moisés: “Ban wok jun mes tan yi balaj tzeꞌ yi acacia. Nin je yi maꞌlbil yi baꞌn xcon itaꞌn. Jun mutxꞌ tu lajuj centimetr tzꞌan yi tkan. Ma yi wutz, caꞌwunak oꞌ centimetr tzꞌan. 24 Baꞌn tzꞌoc oro itaꞌn te cyakil yi jun mesaꞌtz tan jopleꞌn cyakil yi tzeꞌ. Nin baꞌn tzꞌoc jun yubel stziꞌak yi mes yi oro cuꞌn tzꞌan. 25 Nchaꞌtz baꞌn bnix junt yubil yi oro cuꞌn tibaj yi mesaꞌtz nin loxcunin tzꞌan stziꞌak. Juk centimetr tzꞌan yi wutz tkan yi jun yubilaꞌtz. 26 Nchaꞌtz ban wok cyaj argoy yi oro cuꞌn, nin oken jujun teꞌjak yi xtxꞌuꞌc yi mes, kale atit yi cyaj tkan. 27 Yi cyaj argoy baꞌn tzꞌoc tzakꞌ yi yubil yi at stziꞌ yi mes, na yi xac iꞌtz tan ticyꞌeꞌn jun kꞌaꞌj tul tan palcheꞌn nin yi mes. 28 Nchaꞌtz ban wok yi cob kꞌaꞌj tan acacia nin baꞌn tzꞌoc oro teꞌjak. Xconk yi cob kꞌaꞌjaꞌtz tan palcheꞌn nin yi mes. 29 Nchaꞌtz cyakil yi eꞌchk maꞌcl yi xconk xe innajbil, chi taneꞌn yi eꞌchk lmak cuchar, nka yi eꞌchk xaruꞌ, nka yi eꞌchk ẍwokꞌ yi na xcon tan molcheꞌn yi eꞌchk oy yi na opon, tajweꞌn yi oro cuꞌn tzꞌan tircuꞌn. 30 Yi pam yi ilenin tzꞌul itaꞌn tan cyajeꞌn cyen tzinwutz, baꞌn cyaj tibaj yi jun mesaꞌtz,” stzun Ryos bantz tetz Moisés.
Yi jun chin wutzileꞌn cantil yi juk cuꞌn wiꞌ
31 Nchaꞌtz tal Ryos tetz Moisés: “Ban wok jun cantil yi oro cuꞌn. Yil cxoꞌc tan banleꞌn txakꞌij tzitulej wok tan martiy. Juk wiꞌ tzꞌan yi jun cantilaꞌtz. Junit tzꞌan cyakil weklil yi jun cantilaꞌtz. Yi xeꞌ tu yi tkan tu yi juk cuꞌlbil aceit tu yi yubil chi taneꞌn tal neꞌẍ buch yi ntaxk je pokꞌl, junit tzꞌan tircuꞌn tan jun ntziꞌ piẍ oro. 32 Nin te yi jun cantilaꞌtz, baꞌn tzꞌel kak kꞌab, ox le jalajchak xlaj, nin jun nicyꞌal. 33 Nchaꞌtz teꞌjak yi kak kꞌab yi na el te yi tkan, baꞌn tziban wok ox tal neꞌẍ buch. Choꞌn cunin tzꞌan chi taneꞌn tal buchil jun wiꞌ almendro yi ntaxk je chitp. 34 Nin te yi tkan, baꞌn bnix cyajt tal neꞌẍ buch. Choꞌn tzꞌan chi taneꞌn yi buchil yi almendro yi ntaxk jeꞌ chitp. 35 Baꞌn tzꞌoc jujun tzakꞌ eꞌchk kꞌab yi na el te yi tkan. 36 Yi eꞌchk tal neꞌẍ buchaꞌtz tu eꞌchk kꞌab junit tzꞌan tu yi tkan. Oro cuꞌn tzꞌan tircuꞌn nin txakꞌij tzitulej wok tan martiy. 37 Nin tibaj yi jujun kꞌab, ban wok jujun tal neꞌẍ txekbil tan xconeꞌn tan xtxekeꞌn cyakil yi at swutz. 38 Cyakil yi eꞌchk maꞌcl chi taneꞌn yi elsbil yi mechaꞌ yi tzꞌeꞌnak tu eꞌchk tal neꞌẍ lak tajweꞌn yi oro cuꞌn tzꞌan chicyakil cuꞌn. 39 Baꞌn xcon ox arow balaj oro itaꞌn, tan banleꞌn yi jun cantilaꞌtz tu cyakil yi eꞌchk maꞌclaꞌtz yi na taj. 40 Ban wok yi jun akꞌuneꞌj Moisés, nin ban wok chi yi eꞌchk techl yi minchaj tzatz tzoneꞌj wiꞌwtz,” stzun Ryos bantz tetz.