Yi bixeweꞌn junt tir yi trat ẍchixoꞌl Ryos tu yi eꞌ xonl Israel
24
1 Itzun bantz nintzun jilont Ryos tetz Moisés itzun taltz:—Baꞌn cxuꞌl wok tzinwutz. Xomok tzaj Aarón tu Nadab tu Abiú tzaweꞌj. Nchaꞌtz chixomok tzaj oxcꞌal tu lajuj wiꞌ banl wiꞌ yi ateꞌ ẍchixoꞌl yi eꞌ xonl Israel. Catzamwok le amaꞌl kale atineꞌt. Poro quil tziẍkans tzaj itib mas kale atineꞌt, ma na baꞌn tcuꞌn xcyaj wok joylajlen muꞌẍ. Ej nin tajweꞌn tan imejeweꞌn cuꞌn. 2 Ntin cuꞌn aẍ Moisés baꞌn cẍuꞌl tzinwutz, ma yi eꞌ mas wiꞌ banl wiꞌ tajweꞌn tan chicyajeꞌn cyen joylajlen. Ej nin quiꞌc cuj tan chijeꞌn tzaj wunak wi wutzeꞌj, stzun Ryos bantz tetz Moisés.
3 Beneꞌn tzun Moisés tan talcheꞌn scyetz cyakil yi eꞌ xonl Israel yi mbi cuꞌn tal Ryos tetz. Nchaꞌtz tal iꞌ cyakil yi eꞌchk caꞌwl yi alijt tan Ryos tetz. Yi quibital yi eꞌ xonl Israel yi eꞌchk caꞌwlaꞌtz nintzun eꞌ cujijtz nin cyaltz:
—Skabneꞌ tircuꞌn, quib yi ntal Ryos yi tajweꞌn tan kabnol.
4 Toqueꞌn tzun Moisés tan stzꞌibeꞌn cyakil yi xtxolbil yi tal Ryos tetz.
Ma le junt eklok jalchan cunin cꞌaseꞌn Moisés nintzun ben iꞌ-tz tan banleꞌn jun patbil xtxꞌixwatz xe cꞌuꞌl yi wutz. Nchaꞌtz cuꞌ tawal coblaj cꞌub, jujun te jujun kꞌuꞌj xonl Israel. 5 Yi wiꞌt bnixeꞌn yi patbil xtxꞌixwatz nin ben ẍchakol cobox xicy tan quicyꞌleꞌn tzaj cobox mam tor, tan chicweꞌn biyij nin tan pateꞌn tetz chitxꞌixwatz swutz Ryos, tan jaleꞌn cuybil chipaj swutz iꞌ. Nchaꞌtz eꞌ cu biyol cobox mam toraꞌtz tan toyeꞌn tetz tan ẍchajleꞌn yi tzatzin paz yi ja jal ẍchixoꞌl tu Ryos. 6 Toqueꞌn tzun Moisés tan stzꞌamleꞌn yi chiẍchꞌel yi mam toraꞌtz tul eꞌchk xal. Cob tzun eltz taꞌn. Jun txꞌakaj choꞌn cweꞌn taꞌn tul xal, nin junt txꞌakaj choꞌn beneꞌn kojol tibaj yi patbil txꞌixwatz. 7 Kalenaꞌtz tzun jeꞌn tcyꞌal Moisés yi liwr kale atit yi trat yi bnixnak tu Ryos, nin oc iꞌ-tz tan siꞌleꞌn ẍchiwutz cyakil yi eꞌ xonl Israel. Yi quibital cyakil yi xonl Israel nintzun cyaltz:
—Skabneꞌ taneꞌn cyakil yi na tzan Ryos tan talcheꞌn sketz nin kocopon cꞌulutxum jakꞌ caꞌwl iꞌ.
8 Beneꞌn tzun Moisés tan ẍchitleꞌn yi chichꞌ ẍchiwiꞌ cyakil yi eꞌ wunak yi ateꞌ-tz, nin tal iꞌ-tz:
—Yi chichꞌeꞌj iꞌtz jun techl yi ja bixeꞌ chitratuꞌ tu Ryos. Cyakil yi yol yi minsiꞌlej ẍchiwutzuꞌ yaꞌstzun xeꞌ yi katrat tu Ryos.
9 Chibeneꞌn tzun tetz Moiséstz wiꞌwtz. Xomcheꞌ Aarón, Nadab tu Abiú teꞌj. Nchaꞌtz xomcheꞌ oxcꞌal tu lajuj wiꞌ banl wiꞌ scyeꞌj. 10 Choꞌn tzun quilol wutz yi chiRyosil. Tzakꞌ tkan Ryos at jun yi chin litzꞌunin chi taneꞌn yi jun jilwutz cꞌub yi na biꞌaj zafiro, nin yi chin skoj nin chi taneꞌn yi tcyaꞌj. 11 Quiꞌc nin tzun eꞌ ban yi eꞌ yajaꞌtz yi quil wutz Ryos, na quiꞌc eꞌ tulej Ryos. Nchaꞌtz eꞌ wan nin eꞌ ucꞌaꞌ-tz swutz yi jun amaꞌlaꞌtz.
Yi taꞌteꞌn Moisés le wiꞌwtz Sinaí
12 Jiloneꞌnt tzun Ryos tetz Moisés. Itzun taltz:
—Moisés, baꞌn cẍuꞌl wiꞌwtz kale atineꞌt wetz, nin baꞌn chin achꞌiw na swakꞌeꞌ cobox lepaj cꞌub tzatz kale tzꞌibaneꞌt yi eꞌchk caꞌwl tu eꞌchk ley yi tajweꞌn tan chibnol taneꞌn yi eꞌ xonl Israel.
13 Beneꞌn tzun Moisés le amaꞌl kale talwit Ryos tetz. Choꞌn tzun jeꞌn iꞌ wiꞌwtz nin xomnin Josué teꞌj, yi tetz ẍchꞌeyum. 14 Yi chijatxol quib nintzun tal Moisés scyetz yi eꞌ wiꞌ banl wiꞌ:
—Chicyajkuꞌ tzoneꞌj nin baꞌn koꞌ chichꞌiwuꞌ tzoneꞌj jalen yil kacuꞌul. Ẍchicyajk cyen Aarón tu Hur scyeꞌjuꞌ, nin ko at jun tajweꞌn nka jun chiproblemuꞌ baꞌn cyaluꞌ scyetz, stzun Moisés ban.
15 Yi bajeꞌn tlol Moisés yi xtxolbileꞌj nintzun jeꞌ-tz wiꞌwtz. Sajeꞌn tzun jun cꞌoloj sbakꞌ nin jopxij yi wiꞌwtz taꞌn. 16 Cweꞌn muleꞌn tzun yi kꞌej tu pakꞌpuchal Ryos tibaj yi wiꞌwtz Sinaí. Kak kꞌej ban yi sbakꞌ tibaj yi wiꞌwsaꞌtz, ma le jukiꞌn kꞌej nintzun ẍchak Ryos Moisés tul yi sbakꞌaꞌtz. 17 Ma yi eꞌ xonl Israel ja quil yi pakꞌpuchal Ryos yi at tibaj yi wutz Sinaí. Choꞌn cunin ban yi sbakꞌ chi na ban kꞌakꞌ. 18 Inti Moisés nintzun octz tcꞌuꞌl yi sbakꞌaꞌtz nintzun jeꞌ-tz jalen wiꞌwtz. Caꞌwunak kꞌej nin caꞌwunak akꞌbal aꞌtij Moisés tul yi jun sbakꞌaꞌtz.