Yi eꞌchk caꞌwl tetz xtisyaꞌiꞌn
23
1 ”Quil tzital yi eꞌchk takleꞌn yi quiꞌc xeꞌ nin nkꞌeraꞌtz bintzi. Quil cxoꞌc wok tetz stiw jun mal wunak, nin quil cxoꞌc wok tetz tuchꞌ tan nucꞌleꞌn jun xtxolbil yi nkꞌeꞌtz bintzi.2 ”Ko at jun cꞌoloj wunak yi na chitzan tan nucꞌleꞌn jun eꞌchk takleꞌn cachiꞌ quil xom iwiꞌ scyeꞌj ptzunk jun cꞌoloj cuꞌn chixoneꞌn. Quil xom iwiꞌ scyeꞌj. 3 Nchaꞌtz quil xom iwiꞌ te jun, ptzunk chin meꞌbaꞌ nin iꞌ, ko iꞌ aj paj. Quil xom iwiꞌ teꞌj, mas balaj nqueꞌn tan maꞌleꞌn yi bintzi.
4 ”Nchaꞌtz ko ja txꞌakxij yi tawun yi acontr, chi taneꞌn jun wacẍ, nka jun cneꞌr, nka alchok scyetz tawun iꞌ, nin kol nojquen tzawutz tajweꞌn tan abeneꞌn tan takꞌleꞌn tetz iꞌ. 5 Tajweꞌn tan awoqueꞌn tan ẍchꞌeyeꞌn yi acontr yi na chiꞌch cꞌuꞌl tzaweꞌj. Kol tzawil yi ja cuꞌ jok yi ẍchej tzakꞌ yi tektz, chꞌeyaj iꞌ tan telseꞌn yi tektz yi ẍchej.
6 ”Quil tzꞌel chikꞌej yi eꞌ meꞌbaꞌ itaꞌn yil cxoꞌc wok tan jun xtisyaꞌiꞌn, ma na tajweꞌn yil cxom wok te yi xtxolbil yi bintzi.
7 ”Quil xom iwiꞌ te jun ajxochonl yi nkꞌeꞌtz bintzi na tal. Nin quil tzibiy wok cuꞌn jun yaj yi quiꞌc til. Na quil tzincuy chipaj yi eꞌ yi yaꞌtz na chiban.
8 ”Quil tzitzꞌam wok pwok tan takꞌleꞌn til junt. Na na xcyeꞌ yi xoꞌc yi na akꞌlij tzitetz tan jopleꞌn iwutz nin tan xtxalbajeꞌn yi xtxumuꞌn jun balaj yaj.
9 ”Quil tzibuch wok yi eꞌ awer nak yi ateꞌ tzixoꞌl wok na nchaꞌtz axwok ocnakix tetz awer nak ẍchixoꞌl yi eꞌ aj Egipto nin ilijt itaꞌn yi qꞌuixbel yi na ban jun yi awer nak,” stzun Ryos bantz scyetz yi eꞌ xonl Israel.
Yi eꞌchk caꞌwl tetz ujleꞌn
10 Nchaꞌtz tal Ryos: “Baꞌn xakꞌuj wok kak yob swutz itxꞌotxꞌ, nin baꞌn ljeꞌ yi eꞌchk cosech swutz tetz yi kak yobaꞌtz. 11 Poro le jukiꞌn yob tajweꞌn yil tzꞌujeꞌ yi txꞌotxꞌ, quil tzitawaj wok jun wiꞌ ujul swutz te yi jun yobaꞌtz, na tajweꞌn tan tujeweꞌn yi txꞌotxꞌ. Nin baꞌn cyaj quen yi eꞌchk takleꞌn yi na chꞌuy swutz scyetz eꞌ meꞌbaꞌ, nchaꞌtz tetz chiwaꞌ yi eꞌ smaron txuc. Ban wok yi xtxolbileꞌj te cyakil yi icojbil, chi taneꞌn kale awijeꞌt eꞌchk uva nka yi eꞌchk oliw.
12 ”Baꞌn cxakꞌuj wok kak kꞌej. Na tajweꞌn tan itujeweꞌn le jukiꞌn kꞌej. Ban wok yi xtxolbileꞌj tan cyujeweꞌn yi eꞌ esclaw scyuchꞌ yi eꞌ awer nak yi na chakꞌuj tzituchꞌ. Nchaꞌtz yi wacẍ tu yi eꞌ chej tajweꞌn tan cyujeweꞌn. 13 Cyakil yi xtxolbileꞌj yi ja wiꞌt wal tzitetz, ban wok taneꞌn. Ej nin qui na waj yil tzinaꞌwsaj wok junt ryos yi apart tzinwutz wetz mpe ik talcheꞌn chibiꞌ,” stzun Ryos bantz scyetz yi eꞌ xonl Israel.
Yi ox chin wutzileꞌn kꞌej yi tajweꞌn tan chibnol taneꞌn
14 “Tajweꞌn tan ticyꞌeꞌn ox balaj kꞌej itaꞌn tul jujun yob tan itkꞌol inkꞌej. 15 Ban wok taneꞌn yi wutz kꞌej yi na baj yi pam yi quiꞌc xtxꞌamil itaꞌn. Ban wok chi yi walnak tzitetz. Tul yi juk kꞌejaꞌtz tajweꞌn yil tzibajsaj wok yi pam yi quiꞌc xtxꞌamil. Tajweꞌn tan iticyꞌsal le xaw Abib, na yaꞌstzun yi xaw yi iteleꞌn tzaj Egipto. Nin cyaꞌl jun nink tzꞌul tzinwutz yi ko qui cyꞌaꞌn jun oy taꞌn.
16 ”Nchaꞌtz ban wok junt balaj kꞌej yil jeꞌ yi bajx wutz icosech. Nchaꞌtz ban wok junt balaj kꞌej yil tzimol wok yi wiꞌtzbil icosech, yi na baj wiꞌ yi yob. 17 Tajweꞌn tan cyoponeꞌn cyakil yi eꞌ yaj tzinwutz ox tir le jujun yob.
18 ”Quil tzitoy wok yi ẍchꞌel itxꞌixwatz swetz ko at muꞌẍ xtxꞌamil pam tzituchꞌ. Nchaꞌtz quil tzicolwok yi ẍepuꞌil itxꞌixwatz tetz junt eklok. 19 Nin nchaꞌtz iꞌtz yi bajx wutz yi mas balaj yi na waj yil tzꞌul itaꞌn tzinwutz, na i inaꞌtz in itajcawil, yi iRyosil.
”Nchaꞌtz quil tzitxic wok yi eꞌ tal neꞌẍ chiw tul yi xtxuꞌtx.
Yi ángel tetz Ryos yi bajxij ẍchiwutz yi eꞌ xonl Israel
20 ”Bit wok tzaj, tzꞌul inchakol yi wetz inángel tan bajxeꞌn tziwutz wok tan ẍchajleꞌn ibeꞌ, nin tan iqꞌuicyꞌleꞌn tan itoponeꞌn le amaꞌl yi bixbaꞌn waꞌn. 21 Quil tzijatx wok len itib teꞌj, nqueꞌn wok cꞌulutxum jakꞌ caꞌwl, quil tzipaj wok yi caꞌwl iꞌ, na yaꞌstzun inxel yi stzꞌaꞌtok tzixoꞌl wok, nin ko at jun sjuch til quil clax tkꞌab. 22 Poro kol cxom wok te yi tetz tajbil, nin kol tziban wok taneꞌn yi tetz caꞌwl, nin kol xom wok te yi xtxolbil yi nwal tzitetz, nocopon tzuntz tan icolcheꞌn tkꞌab yi icontr, nin tan oyintziꞌ scyeꞌj. 23 Na sbajxok yi wetz inángel tziwutz wok, nin mben tcyꞌal iꞌ axwok le amaꞌl kale ateꞌt yi eꞌ amorreo, eꞌ hitita, eꞌ ferezeo, eꞌ cananeo, eꞌ heveo tu eꞌ jebuseo. Ej nin cyakil yi eꞌ wunakaꞌtz chicopon insotzal. 24 Yil xopon wok le amaꞌlaꞌtz quil xom wok te cyetz cyajtzaꞌkl. Quil xmejeꞌ wok ẍchiwutz yi cyetz chiryosil. Nin quil cxoꞌc wok tan chicꞌuꞌlajeꞌn. Ma na baꞌn tcuꞌn joy wok puntil tan xiteꞌn cuꞌn chiryosilaꞌtz yi banij tuꞌ taneꞌn tu yi eꞌchk cꞌub yi na chimejeꞌ quen swutz. 25 Akꞌ wok inkꞌej, swakꞌeꞌ tzun imbanl tibaj iwaꞌ tu itcꞌaꞌ. Ej nin xincoleꞌ tkꞌab cyakil yaꞌbil yi tzꞌul tziwutz. 26 Nin nocopon tan icolcheꞌn. Nin mben ẍkon yi itiemp waꞌn jalen yil tzꞌopon yi itiemp. Kalenaꞌtz xquim wok. Nchaꞌtz kol tzitakꞌ wok inkꞌej quil jal jun xnaꞌn tzixoꞌl wok yi quil jal tal nka jun yi quil jepon xaꞌwlil.
27 ”Tzꞌocopon inkꞌol jun chin xoꞌw scyetz cyakil wunak nin cyakil nación kale xicyꞌeꞌt wok, nin chixobok tzitetz. Nocopon tan chixoꞌwseꞌn, tan cyeleꞌn ojk tziwutz wok. 28 Nocopon tan chixoꞌwseꞌn, bantz cyeleꞌn ojk yi eꞌ heveo scyuchꞌ yi eꞌ hitita, nin yi eꞌ cananeo. 29 Quil cheꞌl chan yi eꞌ wunakaꞌtz swutz yi amaꞌlaꞌtz. Quil cheꞌl tetz jun ntziꞌ yob waꞌn. Ma ko cheꞌl, qui cunin batz ẍchijalok wiꞌnin smaron txuc tul yi amaꞌl nin xloꞌonk cyaꞌn. 30 Chelopon incyꞌal swutz yi txꞌotxꞌ poro chebeleꞌn cuntuꞌ. Quil cheꞌl waꞌn jalen yil jal wiꞌnin initxajil. Kalenaꞌs tzun cheꞌl waꞌn bantz itetzal yi amaꞌlaꞌtz. 31 Ma yi mojomil yi amaꞌlaꞌtz ja wiꞌt cuꞌ waꞌn. Choꞌn xeꞌtij kale atiteꞌt yi Cyak Mar nin choꞌn na opon jalen stziꞌ mar kale ateꞌt yi eꞌ filistey. Nchaꞌtz choꞌn na xeꞌtij le amaꞌl tzꞌinunin tuꞌ nin na opon kale atiteꞌt yi tzanlaꞌ Eufrates. Ja wiꞌt wakꞌ yi jun amaꞌlaꞌtz tzitetz. Nin axwok xeꞌlsan yi eꞌ wunak yi ateꞌ swutz.
32 ”Quil tzitokꞌbej itib scyuchꞌ. Nin quil cxom wok te cyetz cyajtzaꞌkl. Nin quil tziban wok jun trat scyuchꞌ mpe ik te chiryosil. 33 Nchaꞌtz quil tzitakꞌ wok amaꞌl tan chicyajeꞌn cyen tzixoꞌl wok, na ko tzun cxom wok scyeꞌj tan lokꞌeꞌn yi cyetz chiryosil. Na ko yaꞌtz, xtxꞌakxok wok tan paj,” stzun Ryos bantz scyetz yi eꞌ xonl Israel.