Yi eꞌchk caꞌwl tan colcheꞌn chimeꞌbiꞌl wunak
22
1 ”Ko at jun yil talkꞌeꞌl tzaj jun wacẍ nka jun cneꞌr tan cweꞌn biyol tetz ẍchib nka tan cꞌayil, tajweꞌn tan tkꞌol oꞌ-t wacẍ tetz xel yi junaꞌtz. Ma ko iꞌtz jun cneꞌr tajweꞌn tan tkꞌol cyajt cneꞌr tetz xel.2 ”Ej nin kol txꞌamxij jun alkꞌom te yi na tzan cunin tan alakꞌ nin kol biylij nin quimtz, quiꞌc til yi jun yi mbiyon tetz. 3 Poro ko iꞌtz chajkꞌej yil txꞌamxij yi junaꞌtz yi na tzan tan alakꞌ nin tzꞌoc biyleꞌn nin quimtz at tzun til yi jun yi mbnon tetz.
”Nchaꞌtz kol txꞌamxij jun alkꞌom tajweꞌn tan ẍchojol iꞌ yi jamel yi eꞌchk takleꞌn yi mmeꞌl tzaj talkꞌal. Poro ko quiꞌc puꞌk tan ẍchojleꞌn tajweꞌn tan beneꞌn cꞌayiꞌn iꞌ tetz esclaw tan jaleꞌn pwok tan ẍchojleꞌn yi mult.
4 ”Kol txꞌamxij yi alkꞌom nin ko atit tuchꞌ iꞌ yi nmeꞌl tzaj talkꞌal, tajweꞌn tan tkꞌol junt tir, nin tajweꞌn tan ẍchojol cob tir yi jamel yi wacẍ, nka yi cneꞌr, nka yi buruꞌ, yi mmeꞌl tzaj talkꞌal.
5 ”Ej nin ko at jun yil tzakpun cyen tawun tul cojbil jun wisin, tajweꞌn tan tkꞌol xel yi mbi mbaj tan yi tawun. Poro tajweꞌn tan tkꞌol yi mas balaj te yi tetz cosech.
6 ”Nchaꞌtz ko at jun yi tzakpun len jun kꞌakꞌ xoꞌl tzeꞌ nin kol tzꞌeꞌ yi triw yi wisin taꞌn, tajweꞌn tan ẍchojol tircuꞌn yi ntzꞌeꞌ tan yi kꞌakꞌaꞌtz, quiꞌc na ban yi ko nsken molxij yi triw nka quiꞌ.
7 ”Ej nin nchaꞌtz kol tabnaj jun yaj muꞌẍ puꞌk nka alchok eꞌchk takleꞌn tetz junt nin kol tzꞌeꞌl alkꞌaꞌn xe yi caꞌl yi yaj, nin kol txꞌamxij yi alkꞌom tajweꞌn tan ẍchojol yi alkꞌom cob tir mas yi jamel yi mmeꞌl tzaj talkꞌal. 8 Poro ko quil txꞌamxij yi alkꞌom, yi yaj kale ncyajeꞌt tabnal yi puꞌk, tajweꞌn tan beneꞌn ticyꞌleꞌn ẍchiwutz yi eꞌ pujul xtisyaꞌ cwent Ryos tan lajluchaxeꞌn yi ko nkꞌeꞌtz iꞌ yi alkꞌom.
9 ”Nchaꞌtz ko at jun yil tetzaj jun wacẍ nka jun cneꞌr nka jun chej nka alchok scyetz beꞌchok yi ncyaj stzꞌakol yi taw tajweꞌn tan chibeneꞌn yi taw tu yi nsicꞌon tetz ẍchiwutz yi eꞌ pujul xtisyaꞌ cwent Ryos tan tiwleꞌn naꞌ scyetz iꞌ yi mero taw. Ma yi jun yi nkꞌeꞌtz yi taw tajweꞌn tan ẍchojol cob tir jamel yi ntetzaj kloꞌ.
10 ”Kol tabnaj jun yaj jun wacẍ nka jun ẍchej nka jun cneꞌr tetz junt yaj, nin ko takleꞌn biꞌ sban chi taneꞌn jun qꞌuixpeꞌn nka kol baj tan xoꞌj nka alchok junt jilwutz txuc, nka kol quim ẍchuc nin cyal jun tzꞌiꞌlon tetz, 11 tajweꞌn tan talol yi yaj kale abnaꞌnt yi mero bintzi tetz yi taw, nin tajweꞌn tan xconeꞌn biꞌ Ryos taꞌn tetz stiwil yi yol yi bintzi nin na tal iꞌ yi qui ntil iꞌ yi ẍeꞌn mban yi txuc. Ko yaꞌtz, tajweꞌn yil tocsaj yi taw yi txuc nin qui tajweꞌn tan ẍchojol yi yaj kale abnaꞌnt. 12 Poro ko swutz cunin iꞌ yi ben alkꞌaꞌn yi tawun yi junt, tajweꞌn tan ẍchojol iꞌ yi jamel tetz yi taw. 13 Ma ko iꞌtz jun smaron txuc mbnon, tajweꞌn tan tuleꞌn sowril nka yi waꞌbeꞌn yi smaron txuc taꞌn tan ẍchajleꞌn tetz yi taw, nin qui tzun ẍchoj iꞌ-tz yi jamel.
14 ”Ko at jun cꞌamon jun wacẍ nka jun chej tetz jun wisin, nin kol loꞌon te yi cꞌamij tan yi yaj, tajweꞌn tan ẍchojol iꞌ yi jamel yi jun yi ncꞌam. 15 Poro ko xomij yi taw teꞌj yil loꞌon nka yil quim, qui tajweꞌn tan ẍchojol, ma na ntin yi cꞌambil tetz.
Yi eꞌchk caꞌwl tan pujleꞌn yi eꞌchk problem yi na jal ẍchixoꞌl yi eꞌ wunak
16 ”Ko at jun yaj yil tzꞌoc tan banleꞌn ruinl tetz jun xun yi ntaxk cunin poꞌtzaj tib, nin txeꞌn cunin ban jun trat tu jun yaj tajweꞌn tan ẍchojol iꞌ yi jamel xun yi bixbaꞌnt, nin tajweꞌn tan cyumeweꞌn tuchꞌ. 17 Poro ko quil scꞌul yi taj yi xun tan toqueꞌn yi yaj tetz chmil yi meꞌl, tajweꞌn tan ẍchojol yi yaj yi bnon ruinl tetz, yi jamel yi xun.
18 ”Tajweꞌn tzibiywok cuꞌn cyakil yi eꞌ ajcun yil chijal tzixoꞌl wok.
19 ”Nchaꞌtz ko at jun yaj nka xnaꞌn yi chiwitbej quib tu jun txuc, tajweꞌn tan cweꞌn biyij.
20 ”Cyakil yi eꞌ yi chipateꞌ chitxꞌixwatz swutz junt ryos tajweꞌn tan chicweꞌn biyij.
21 ”Quil cheꞌ ibuch yi eꞌ awer nak yi najlcheꞌ tzixoꞌl wok, nin quil cheꞌ ijis wok. Na nchaꞌtz axwok itetz ocnakquix tetz awer nak ẍchixoꞌl yi eꞌ aj Egipto.
22 ”Ej nin nchaꞌtz quil cxoꞌc wok tan chibuchleꞌn nka tan majleꞌn chimeꞌbiꞌl yi eꞌ xmaꞌlcaꞌn tu yi eꞌ meꞌbaꞌ yi quiꞌc chitaj chitxuꞌ. 23 Na kol cxoꞌc wok tan chibuchleꞌn, nin yil jepon cyoꞌkl tzinwutz nocopon wetz tan chicolcheꞌn tikꞌab wok. 24 Nin ko yaꞌtz tziban wok ẍchiꞌchok incꞌuꞌl tziteꞌj nin xquimok waꞌn tul oyintziꞌ. Ej nin yi eꞌ yi ẍchicyajk tetz xmaꞌlcaꞌn iꞌtz yi eꞌ itetz ixkel tuml yi eꞌ initxaꞌ.
25 ”Ej ko at jun tzixoꞌl wok yil tzꞌakꞌon cꞌmoꞌn tetz junt tanum qui na waj yil sjak taꞌal yi puꞌk chi na chiban yi eꞌ akꞌol cꞌmoꞌn. 26 Kol takꞌ jun yaj yi beꞌch tetz, tetz prentil yi cꞌmoꞌn tajweꞌn tan tajeꞌn yi beꞌch tetzaꞌtz yil cuꞌ kꞌej. 27 Na quicunin batz ntinaꞌtz yi beꞌch tetz, nin ko tzun lquim tan cheꞌw ko quil tzitakꞌ wok yi beꞌch tetz. Na ko quil tzitakꞌ wok, mbil xcon taꞌn tan colol tib tkꞌab cheꞌw yil wit. Chaꞌstzun te tajweꞌn tan itkꞌol wok yi beꞌch tetz. Nchaꞌtz in kol chijak ẍchꞌeybil cyetz swetz swakꞌeꞌ, na yi in wetz na el inkꞌajab scyeꞌj.
28 ”Nchaꞌtz quil cxoꞌc wok tan telseꞌn kꞌej yi itajcawil scyuchꞌ yi eꞌ pujul xtisyaꞌ cwent Ryos yi ateꞌ tzitibaj.
29 ”Quil tzꞌel te icꞌuꞌl tan tulseꞌn yi eꞌchk oy tzinwutz chi taneꞌn yi bajx wutz yi na jal te icosech tu yi bajx taꞌal uva yi na jal.
”Nchaꞌtz yi bajx icyꞌajl tajweꞌn tan ijatxol swetz. 30 Nchaꞌtz yi bajx cyal yi eꞌ itawun yi ko mam chi taneꞌn wacẍ nka cneꞌr, baꞌn tzꞌul tan itoyil swetz, baꞌn chicyaj cyen juk kꞌej te chitxuꞌ, poro le wajxakiꞌn kꞌej tajweꞌn tan itkꞌol swetz.
31 ”Ma jaluꞌ yi axwok itetz tajweꞌn tan itoqueꞌn tetz intanum yi xansaꞌn cheꞌt. Qui tzun tzibajsaj wok yi ẍchiꞌbel jun itawun kol quim tan jun smaron txuc. Ma na baꞌn tzicꞌox wok len scyetz txꞌiꞌ.