Caꞌwl scyetz yi eꞌ patrón yi ẍeꞌn chiban scyeꞌj yi eꞌ esclaw
21
1 ”Je cyakil yi caꞌwl yi tajweꞌn tan awalol scyetz cyakil yi eꞌ xonl Israel tan chibnol scyeꞌj yi eꞌ esclawa yi ateꞌ scyuchꞌ: 2 ”Yi kol tzilokꞌ wok jun esclaw yi hebrey, baꞌn tzꞌakꞌuj kak ntziꞌ yob tzituchꞌ. Ma le jukiꞌn yob baꞌn tzꞌel liwr, nin qui tajweꞌn tan ẍchojol jun centaw tan teleꞌn liwr. 3 Yi ko quiꞌc txkel yi toponeꞌn, iteꞌn nin sbneꞌaꞌtz yil tzꞌel liwr. Ma ko xomij txkel teꞌj yi toponeꞌn baꞌn xom nin yi txkel teꞌj yil tzꞌel liwr. 4 Ma ko i yi patrón yi moꞌcsan yi txkel nin ko ja jal chinitxaꞌ, choꞌn nin chicyajk cyeraꞌtz jak caꞌwl yi patrón. Ẍchuc cuntuꞌ yaj tzꞌelepon liwr, na ẍchuc cuntuꞌ toponeꞌn. 5 Poro kol xtxum yi mos tan qui teleꞌn liwr tan tuꞌ yi na pekꞌ iꞌ te yi txkel nin scyeꞌj nitxajil, nin te yi patrón, baꞌn cyaj cyen iꞌ. 6 Ko yaꞌtz baꞌn tzun ben yi yaj tu yi patrón ẍchiwutz yi eꞌ pujul xtisyaꞌ cwent Ryos tan banleꞌn jun chitrat. Baꞌn tzun takꞌcyen yi mos yi ẍchin te yi marquil yi puert, nin baꞌn tzꞌoc yi patrón tan kopleꞌn yi ẍchin tuml yi marquil yi puert. Yaꞌstzun techl yi tzꞌocopon junawes tetz jun esclaw yi patrón.
7 ”Ko at jun yaj yil scꞌay nin jun meꞌl chi jun esclaw tetz junt, quil tzꞌel liwr chi na chiban yi eꞌ yaj yi na choꞌc tetz esclaw. 8 Ko qui na taj yi patrón tzꞌoc tetz txkel, tan paj yi qui na pekꞌ teꞌj, baꞌn tzun takꞌ yi patrón amaꞌl tetz tan teleꞌn liwr poro tajweꞌn tan ẍchojol tetz yi patrón tan teleꞌn liwr. Ej nin quiꞌc cuj tan beneꞌn cꞌayil scyetz awer nak tan tuꞌ yi qui na pekꞌ teꞌj. 9 Ma ko tzꞌoc tetz txkel yi cyꞌajl, baꞌn tzun tzꞌoc yi mos chi jun meꞌl yi patrón, nin tajweꞌn yil pekꞌ iꞌ teꞌj. 10 Ma kol jal junt txkel yi yaj taꞌn, quiꞌc cuj yi nink tzꞌel kꞌej yi bajx txkel taꞌn. Ma na tajweꞌn yil takꞌ iꞌ yi tajweꞌn tetz chi taneꞌn waꞌ tu beꞌch tetz. Nchaꞌtz tajweꞌn yil takꞌ yi wankil tetz. 11 Ma ko quil sban yi patrón yi eꞌchk xtxolbileꞌj, baꞌn tzun tzꞌel xnaꞌn liwr. Nin qui tajweꞌn tan ẍchojol jun centaw, tan teleꞌn iꞌ liwr.
12 ”Nchaꞌtz ko at jun yil tzꞌoc tan biyleꞌn junt yaj nin kol quim taꞌn tajweꞌn tan cweꞌn biyij yi junaꞌtz. 13 Poro ko nkꞌeꞌtz yi tajbil iꞌ tan bnol yi xtxolbilaꞌtz te yi tuchꞌ nin ko yaꞌtz nin quimbil yi junaꞌtz, baꞌn tzun tzꞌel ojk yi jun yi mbiyon tan ew ib. Poro swaleꞌ tzitetz naꞌl beneꞌt iꞌ tan tewal tib. 14 Poro ko at jun yi baꞌn cunin sbiy cuꞌn jun tuchꞌ tan paj yi na chiꞌch cꞌuꞌl teꞌj, baꞌn tzun cuꞌ biyij yi junaꞌtz yi mbiyon yi tuchꞌ nin ko tzꞌel ojk tan ew ib baꞌn tzꞌoc joyleꞌn. Petzunk choꞌn tew tib kale atit yi patbil txꞌixwatz baꞌn nin lcuꞌ biyijtz.
15 ”Ko at jun tzꞌoc tan biyleꞌn taj xtxuꞌ, tajweꞌn cuꞌ biyij yi junaꞌtz.
16 ”Nchaꞌtz alchok scyetz yil tzꞌoc tan talkꞌeꞌn jun yaj tan beneꞌn cꞌayil tajweꞌn tan cweꞌn biyij yi junaꞌtz, petzunk atit yi yaj tkꞌab, nka nsken ben cꞌayil. Tajweꞌn tan cweꞌn biyij yi jun alkꞌom wunakaꞌtz.
17 ”Alchok scyetz yil tzꞌoc tan jisleꞌn yi taj xtxuꞌ, tajweꞌn tan cweꞌn biyij.
18 ”Nchaꞌtz ko at jun biyoꞌn mbajij nin ko ja loꞌon jun tan cꞌub nka tan kꞌabaj, poro qui nin nquim, nin baꞌn xon te txꞌamij qui tzun lcuꞌ biyij yi jun yi mbnon tetz. 19 Ntin na taj yil ẍchoj yi jun yi mbiyon cyakil yi stzꞌacbeꞌn tetz, nin yi tiemp yi ntxꞌakx tan yi qꞌuixpnak jalen yil tzꞌul yos tuchꞌ. Kol sban yi xtxolbileꞌj, baꞌn tzun tzꞌel liwr yi junaꞌtz yi mbnon, nin quiꞌc til sbneꞌ.
20 ”Kol tzꞌoc jun patrón tan biyleꞌn jun scyeri esclaw tan tzeꞌ, nin kol quim yi mos taꞌn, tajweꞌn tan ẍchojol. 21 Poro ko quil quim chan tetz cobox kꞌej, quiꞌc tzun til yi patrón teꞌj na at iꞌ jakꞌ caꞌwl yi patrón.b
22 ”Kol chibiy quib cob yaj nin loꞌon jun xnaꞌn yi chꞌon wiꞌ cyaꞌn, nin kol quim yi niꞌ cyaꞌn, poro quil quim yi xtxuꞌ, tajweꞌn tan chichojol yi mult jatnaꞌ scꞌuch yi chmil yi xnaꞌn, nin mbi na cyal yi eꞌ pujul xtisyaꞌ. 23 Poro kol quim yi xnaꞌn tajweꞌn tan chiquimeꞌn yi eꞌ yi nloꞌonsan. 24 Na je taneꞌneꞌj: Kol tzꞌel bakꞌ wutz jun yaj tan junt tajweꞌn tan teleꞌn yi tetz. Ko i yi teꞌ tzꞌel, nchaꞌtz tzꞌan yi junt, tajweꞌn tan teleꞌn yi tetz teꞌ. Ma ko jalaj kꞌab tzꞌel, tajweꞌn tan teleꞌn jalaj kꞌab yi junt. Ma ko jalaj tkan tzꞌel, nchaꞌtz tzꞌan yi junt, tajweꞌn tan teleꞌn jalaj tkan. 25 Ko tzꞌeꞌseꞌn tzꞌuꞌlij tajweꞌn yil cuꞌ tzꞌeꞌsaꞌn yi jun yi mbnon tetz. Ma ko loꞌoneꞌn tuꞌ mban, tajweꞌn yi yaꞌstzun tzꞌuꞌlij yi mbnon tetz.
26 ”Ko at jun patrón yi loꞌon jalaj wutz yi mos taꞌn, baꞌn takꞌ iꞌ amaꞌl tan teleꞌn liwr tetz xel yi wutz yi nloꞌon taꞌn. 27 Ko iꞌtz jun teꞌ tzꞌel, tajweꞌn tan tkꞌol yi patrón amaꞌl tan teleꞌn liwr tetz xel yi teꞌ.
28 ”Ko at jun yaj, nka xnaꞌn, yi loꞌon tan wacẍ nin quimtz, tajweꞌn tan cweꞌn biyij yi jun wacẍaꞌtz tan cꞌub, nin quiꞌc cuj tan ibajsal yi ẍchiꞌbel. Poro yi taw quiꞌc til teꞌj. 29 Poro ko na nin til yi taw yi baꞌn tocon yi wacẍ, nin kol quim jun yaj taꞌn, tajweꞌn cuꞌ biyij yi wacẍ nin nchaꞌtz yi taw tajweꞌn tan cweꞌn biyij, tan paj yi na til iꞌ yi at wiꞌ yi wacẍ nin nkꞌeꞌtz cꞌalij taꞌn. 30 Poro ko cuj yi chojij tzꞌan tajweꞌn tan ẍchojol iꞌ yi mult tan qui quimeꞌn iꞌ. 31 Iteꞌn nin xtxolbil tzꞌan yi ko iꞌtz jun xicy nka jun xun yi loꞌon tan jun wacẍ. 32 Poro ko iꞌtz jun esclaw loꞌon tan yi wacẍ tajweꞌn tan cweꞌn biyij yi wacẍ tan cꞌub, nin tajweꞌn tan ẍchojol yi taw yi wacẍ junaklaj piẍ sakal tetz yi patrón yi esclaw.
33 ”Ko at jun yi skop jun julil aꞌ, nka at jun julil aꞌ tuchꞌ jun yaj nin ko quil sjop, nin ben jun wacẍ nka jun buruꞌ tul, 34 tajweꞌn tan ẍchojol yi taw yi julil aꞌ tetz yi taw yi wacẍ yi jamel, nin baꞌn tetzaj yi yaj yi taw yi julil aꞌ yi ẍchiꞌbel yi wacẍ.
35 ”Ma ko iꞌtz wacẍ jun yaj yi loꞌon tan wacẍ junt yaj, tajweꞌn tan beneꞌn cꞌaꞌy yi wacẍ yi loꞌonsan yi junt, nin cob tzꞌel yi jamel ẍchiwutz yi cob yajaꞌtz. Nin nchaꞌtz tzꞌan yi ẍchiꞌbel yi wacẍ yi quimnak. 36 Poro ko na til yi taw yi wacẍ yi baꞌn tocon yi tetz wacẍ nin quim junt taꞌn nin qui na oc il iꞌ teꞌj, tajweꞌn tan ẍchojol iꞌ jamel yi wacẍ yi junt, nin tetz iꞌ sbneꞌ yi ẍchiꞌbel jun yi quimnak.