Yi takꞌleꞌn yi lajuj caꞌwl scyetz xonl Israel
20
1 Je caꞌwl Ryos yi talnak scyetz yi eꞌ xonl Israel:2 “I inaꞌtz in iRyosil yi nxeꞌlsan tzaj wok Egipto, kale nxaꞌteꞌt wok tetz chisclaw yi eꞌ aj Egipto.
3 ”Quil tzitakꞌ kꞌej junt Ryos, ma na ntin in.
4 ”Quil tziban wok teblal jun takleꞌn tan itkꞌol wok kꞌej, mpe ik teblal jun yi at tzoneꞌj wuxtxꞌotxꞌ, nka jun yi at tcyaꞌj nka teblal jun yi at xe mar. Quiꞌc cuj yi nink tziban wok teblal jun scyeri eꞌaꞌtz, tan itkꞌol kꞌej. 5 Quiꞌc cuj yi nink xmejeꞌ cuꞌn wok ẍchiwutz, nin quiꞌc cuj yi nink cxoꞌc wok tan chicꞌuꞌlajeꞌn, na yi in wetz in yi iRyosil, nin na jeꞌ tzinwutz ko yaꞌtz tziban wok. Ej nin swakꞌeꞌ chicaws yi eꞌ yi qui na cyek inchiꞌ, tu yi eꞌ yi na chiꞌch chicꞌuꞌl sweꞌj. Swakꞌeꞌ chicaws tuml chinitxaꞌ tu chimamaj yi eꞌaꞌtz. 6 Poro yi eꞌ yi na chipekꞌ sweꞌj, nin yi na chiban taneꞌn yi incaꞌwl swakꞌeꞌ imbanl squibaj nin squibaj chinitxaꞌ scyuchꞌ chimamaj, tetz jun cꞌoloj tiemp.
7 ”Quil tzinaꞌwsaj wok imbiꞌ tan chaꞌtz tuꞌ, na swakꞌeꞌ icaws ko yaꞌtz.
8 ”Ban wok taneꞌn yi jun kꞌej ujleꞌn na xansaꞌnt waꞌn. 9 Baꞌn xakꞌuj wok kak kꞌej le sman tan banleꞌn cyakil itakꞌun yi tajweꞌn tetz itetz. 10 Ma le jukiꞌn kꞌej iꞌtz yi kꞌej tetz ujleꞌn, nin iꞌtz tan itkꞌol inkꞌej. Quiꞌc cuj yi nink xakꞌuj wok, mpe ik initxaꞌ nka yi eꞌ imos yi ateꞌ tziteꞌj wok, mpe ik yi eꞌ awer nak yi ateꞌ tzixoꞌl wok. Quiꞌc cuj tan cyakꞌujeꞌn. Nchaꞌtz yi eꞌ itawun quiꞌc cuj yi nink chakꞌuj te yi jun kꞌejaꞌtz. 11 Cyaꞌl tzꞌakꞌuj na kak kꞌej imban wetz tan banleꞌn cyakil yi tcyaꞌj tu yi wuxtxꞌotxꞌ, tu yi mar, tu cyakil yi at. Ma le jukiꞌn kꞌej, nintzun nujeꞌ. Chaꞌstzun te ja inxansaj yi jun kꞌejaꞌtz.
12 ”Lokꞌ wok itaj itxuꞌ tan beneꞌn ẍkon itiemp yi akꞌij waꞌn tzitetz tzoneꞌj wuxtxꞌotxꞌ.
13 ”Quil xbiyolnakin.
14 ”Quil cxjopon wutzaj.
15 ”Quil cxalkꞌij.
16 ”Quil tzijal wok cuꞌn jun wiꞌ itakꞌ teꞌj junt wunak.
17 ”Quil tzꞌel italmaꞌ te yi meꞌbiꞌl junt. Quil tzꞌel italmaꞌ te yi txkel, nka te yi mos nka te yi tawun nka alchok eꞌchk takleꞌn yi at tuchꞌ,” stzun Ryos bantz scyetz yi eꞌ xonl Israel.
18 Tircuꞌn tzun yi eꞌ xonl Israel stiw te cyakil yi xtxolbilaꞌseꞌj yi bajij te yi wutzaꞌtz na ja quibit cyakil yi eꞌchk xlitzꞌ tu kꞌancyok yi baj cuꞌ. Nin quibit yi chun yi nẍchꞌin. Nin quil cyakil yi sib yi jal te yi wiꞌwsaꞌtz. Chaꞌstzun te wiꞌnin eꞌ xobeꞌntz,a nin kajpeꞌn nin eꞌ xmayinint. 19 Nchaꞌtz cyal tetz Moisés:
—Mas balaj yi iluꞌ jilon sketz, nin skabneꞌ taneꞌn cyakil yi staleꞌuꞌ. Na kol jilon Ryos sketz, qui cunin bantz skaquimok taꞌn, cheꞌch tzun bantz tetz Moisés.
20 —Quil chixobuꞌ, stzun Moisés scyetz. —Na yi tajbil Ryos iꞌtz tan chixoꞌwseꞌnuꞌ, bantz cyekaluꞌ ẍchiꞌ iꞌ sbneꞌ opon tunintz. Nin iꞌtz chixoꞌwseꞌnuꞌ tan qui chijuchuluꞌ mas quiluꞌ, stzun Moisés bantz scyetz yi eꞌ xonl Israel.
21 Te yi ateꞌ cyen yi eꞌ xonl Israel joylajeꞌl tzaj yi wutz, nintzun jeꞌ tetz Moisés wiꞌwtz tul yi sbakꞌ yi chin tzꞌoꞌtz nin kale atit Ryos.
Yi takꞌleꞌn yi caꞌwl yi ẍeꞌn tzꞌan jun patbil txꞌixwatz
22 Yi jeꞌmponeꞌn Moisés nintzun jilon Ryos tetz, itzun taltz: “Alaj yi xtxolbileꞌj scyetz yi eꞌ xonl Israel: ‘Ja wiꞌt itil wok nin ja itbit wok yi choꞌn nchinjilon tzaj tzitetz tcyaꞌj. 23 Chaꞌstzun te quil tziban wok teblal jun iryosil. Quil tziban wok jun iryosil tan oro nka tan sakal. 24 Ma na ban wok jun patbil itxꞌixwatz yi txꞌotxꞌ tuꞌ. Nin baꞌn tzipat wok cuꞌn itxꞌixwatz tibaj, chi taneꞌn yi cneꞌr tu wacẍ. Nchaꞌtz baꞌn tzipat wok eꞌchk oy tibaj yil xconk tan ẍchajleꞌn yi tzatzin paz yi ja jal skaxoꞌl tzituchꞌ. Nin ko yaꞌtz tzibanwok, nuꞌl, nin swakꞌeꞌ imbanl tzitibaj tul yi luwar kale na wajwit yil tzinaꞌwsaj wok imbiꞌ. 25 Nin ko tziban wok jun patbil txꞌixwatz yi cꞌub cuꞌn baꞌn tzijoy wok yi cꞌub yi qui seꞌij, na kol xoꞌc wok tan seꞌleꞌn yi cꞌub tzꞌelepon kꞌej inaltaraꞌtz itaꞌn, nin quiꞌc xac sbneꞌ. 26 Nchaꞌtz qui na waj yil tziban wok yotx teꞌjak yi jun patbil itxꞌixwatzaꞌtz, na yil cxjeꞌ wok tibaj qui na waj yi tzichaj wok yi iwankil yi ewuꞌn itaꞌn.’