Yi cyoponeꞌn yi xonl Israel xe wutz Sinaí
19
1 Itzun bantz choꞌn tzun cyoponeꞌn yi eꞌ xonl Israel le amaꞌl tzꞌinunin tuꞌ yi na biꞌaj Sinaí. Oxix xaw chibeꞌ jetz yi cyeleꞌn tzaj Egipto, yi cyoponeꞌn le jun amaꞌlaꞌtz. 2 Na yi quicyꞌeꞌn Refidim,a choꞌn tzun cyoponeꞌntz Sinaí nin choꞌn eꞌ cyajeꞌn cyen cobox kꞌej xe wutzaꞌtz. 3 Ej nin tul yi jun amaꞌlaꞌtz choꞌn xaꞌkeꞌn Moisés tan yol tetz Ryos. Na nin jilon tzaj Ryos tetz iꞌ wiꞌwtz. Itzun taltz:—Alaj yi xtxolbileꞌj scyetz cyakil yi eꞌ xonl Jacow, yi eꞌ xonl Israel: 4 “Ja itil wok yi ẍeꞌn cunin mimban scyeꞌj yi eꞌ aj Egipto. Nchaꞌtz ja itilwok yi ẍeꞌn cunin ncxuꞌl wok waꞌn tzoneꞌj kale atineꞌt wetz. Ja cxuꞌl wok waꞌn chi na ban jun qꞌuilqꞌuitx tan palchejeꞌn yi eꞌ tal. 5 Cyakil yi amaꞌl yi at beneꞌn tziꞌn, wetz. Poro kol cxom wok te wetz incaꞌwl, nin kol tziban wok yi wetz wajbil cxocopon wok tetz mero intanum, yi mas chimpekꞌok teꞌj, ẍchiwutz cyakil eꞌ mas tnum. 6 Nchaꞌtz cxocopon wok tetz jun kꞌuꞌj paleꞌ tzinwutz nin tetz jun tnum yi xansaꞌnt tan ixconeꞌn swetz.” Alaj yi xtxolbileꞌj scyetz, stzun Ryos bantz tetz Moisés.
7 Beneꞌn tzun mantar Moisés tan chichakleꞌn yi eꞌ wiꞌ banl wiꞌ cyetz yi eꞌ xonl Israel. Yi cyoponeꞌn nintzun tal iꞌ tircuꞌn yi ntal Kataj Ryos tetz. 8 Yi quibital yi eꞌ wiꞌ banl wiꞌ scyuchꞌ yi eꞌ mas wunak yi xtxolbilaꞌtz, tircunin tzun chicujij nin cyaltz:
—Skabneꞌ taneꞌn cyakil yi ntal Kataj Ryos, cheꞌch.
Yi tbital Moisés yi chitxumuꞌn yi eꞌ xonl Israel nintzun bentz tan talcheꞌn tetz Kataj Ryos. 9 Talol tzun Kataj Ryos tetz Moisés:
—¡Moisés! Chinjilonk tzatz. Poro choꞌn chincyaj tcꞌuꞌl jun sbakꞌ yi chin tzꞌoꞌtz nin yil chinjilon. Yaꞌstzun wulej bantz quibital yi eꞌ wunak inyol te yil chinjilon tzatz, nin tan cyocsal yi bintzinin ja chinjilon tzatz, stzun Ryos bantz.
Nintzun tal Moisés junt tir tetz Kataj Ryos yi chitxumuꞌn yi eꞌ xonl Israel.
10-11 Ej nintzun tal Kataj tetz:
—Culoꞌk bin nin alaj scyetz yi tajweꞌn tan chixansal quib ek tu caꞌp. Tajweꞌn tan chitxꞌajol beꞌch cyetz tan chibnol list quib tetz caꞌpen, na yaꞌstzun yil chincuꞌul tib yi wutzeꞌj ẍchiwutz cuꞌn chicyakil. 12 Cuken techl solteꞌj yi wutz awaꞌn tan qui quicyꞌeꞌn yi xonl Israel te yi mojomaꞌtz. Nin alaj scyetz yi cyaꞌl jun yi nink ẍkan tzaj muꞌẍ te wutzeꞌj. Ej nin yi eꞌ yi quil chiban taneꞌn tajweꞌn tan chicweꞌn biyij. 13 Nchaꞌtz quiꞌc cuj tan itzꞌamol yi jun yajaꞌtz yi ja juch til. Ma na tajweꞌn yil cuꞌ biyij tan cꞌub nka tan flech. Nchaꞌtz quiꞌc na ban yi ko iꞌtz jun wunak nka jun txuc. Tajweꞌn yil cuꞌ biyij yi ko quil xom te yi xtxolbileꞌj. Ntin le toxiꞌn kꞌej yil ẍchꞌin yi cornet, yi tucꞌ cneꞌr, baꞌn tzun chijeꞌ tzaj xe cꞌuꞌl yi wutzeꞌj, stzun Ryos bantz tetz Moisés.
14 Tajeꞌn tzaj tzun Moisés wiꞌwtz kale eꞌ jiloneꞌt tu Ryos. Yi cweꞌn muleꞌn nintzun tal iꞌ scyetz yi eꞌ xonl Israel yi tajweꞌn tan chibnol list quib tan takꞌleꞌn kꞌej Ryos. Tircunin tzun yi xonl Israel eꞌ octz tan xtxꞌajleꞌn yi beꞌch cyetz. 15 Nintzun tal Moisés scyetz:
—Quil chiwitbej quibuꞌ tu quixkeluꞌ tan chixansal quibuꞌ te yi ox kꞌejeꞌj, stzun Moisés bantz scyetz yi eꞌ xonl Israel.
16 Itzun bantz le toxiꞌn kꞌej, cweꞌn tzun chin xlitzꞌ tu kꞌancyok nin saj jun cꞌoloj sbakꞌ nin opon tibaj yi wutzaꞌtz. Nintzun ẍchꞌin jun chun yi chin wiꞌ nin ban. Ninin eꞌ lucneꞌ yi eꞌ xonl Israel tan xoꞌw.
17 Cawunin tzun Moisés scyetz cyakil yi eꞌ xonl Israel, tan chibeneꞌn xe cꞌuꞌl yi wiꞌwtz tan cꞌuꞌlajeꞌn Ryos. Yi cyoponeꞌn nintzun eꞌ xcyeweꞌn cuꞌn solteꞌj yi wiꞌwsaꞌtz. 18 Chin sib nin tunin ban yi wiꞌwsaꞌtz tan yi sibel kꞌakꞌ na choꞌn cweꞌn muleꞌn Ryos tul kꞌakꞌ. Choꞌn cunin ban yi sib chi na ban sibel jun patbil txun, nin cyakil yi wiꞌwsaꞌtz chucan. 19 Ej nin yi jun chun yi na ẍchꞌin wiꞌnin ẍchꞌuyeꞌn yi wiꞌ. Toqueꞌn tzun Moisés tan yol tu Ryos. Nintzun na stzaꞌwej Ryos yi yol iꞌ, poro chin xoꞌwbil nin ban yi jiloneꞌn Ryos na choꞌn cunin ban chi na nilcan kꞌancyok.
20 Choꞌn tzun cweꞌn muleꞌn Ryos mero tibaj yi wiꞌwsaꞌtz yi na biꞌaj Sinaí, nintzun taltz tetz Moisés tan jeꞌn poneꞌn te iꞌ nintzun jeꞌ Moisés le amaꞌlaꞌtz kale atit Ryos. 21 Nintzun tal Ryos tetz:
—Moisés, na waj yil cẍben tan talcheꞌn scyetz cyakil yi eꞌ xonl Israel yi quil chicyꞌ tibaj yi mojom yi ja bnix kaꞌn, nin yi junt iꞌtz yi quiꞌc cuj tan cyoqueꞌn tan inxmayeꞌn, na kol quil inwutz ẍchiquimok. 22 Nchaꞌtz yi eꞌ paleꞌ yi ateꞌ tzixoꞌl wok, yi eꞌ yi na chuꞌl tzinwutz, tajweꞌn tan chixansal quib, na ko quiꞌ, chelepon cuꞌn waꞌn swutz, stzun Kataj bantz tetz.
23 —Quil bisunuꞌ Taꞌ, stzun Moisés. —Na yi eꞌ xonl Israel quil chinimsaj quib tan chijeꞌn tzaj tzoneꞌj. Na ja bin taluꞌ sketz tan cweꞌn mojomil yi amaꞌl kaꞌn nin ja taluꞌ yi xan kol kicyꞌ tzaj muꞌẍ tal tibaj.
24 Poro nintzun tal Ryos tetz:
—Quiloꞌk Moisés, baꞌn ẍcuꞌ nin baꞌn ẍpakxij junt tir poro xomok tzaj Aarón tzaweꞌj yil cẍuꞌlt. Ma yi eꞌ mas paleꞌ tu cyakil yi eꞌ xonl Israel chicyajk cyentuꞌ kale ateꞌt. Nin quiꞌc cuj yi nink chicyꞌ tzaj muꞌẍ te yi mojom yi ja cuꞌ waꞌn, na ko at jun yil tzꞌicyꞌ tzaj squimok teraꞌtz waꞌn, stzun Ryos bantz.
25 Tajeꞌn tzaj tzun Moisés wiꞌwtz, nin yi cweꞌn muleꞌn nintzun tal iꞌ scyetz cyakil yi eꞌ xonl Israel yi xtxolbil yi tal Ryos tetz.