Yi cyoponeꞌn Jetro tan xajseꞌn Moisés
18
1 Itzun bantz nintzun tbit Jetro, yi jiꞌ Moisés, ẍeꞌn cunin ban Ryos tan cyelseꞌn Moisés scyuchꞌ yi xonl Israel jakꞌ chicaꞌwl yi eꞌ aj Egipto. Yi jun Jetro-aꞌtz, iꞌ jun chipaleꞌil yi eꞌ aj Madián. 2 Ma yi txkel Moisés yi na biꞌaj Séfora tu yi eꞌ tal nsken chopon tu tetz taj. 3 Gersón biꞌ jun scyeri yi cob cyꞌajl Moisés. Oc tlol iꞌ yi biꞌajaꞌtz na nin tal iꞌ: “In jun awer nak taneꞌn tzoneꞌj le amaꞌleꞌj.” 4 Ma yi junt cyꞌajl Moisés, Eliezer biꞌ, na nin tal Moisés yi titzꞌeꞌn yi niꞌaꞌtz: “Yi Ryosil kꞌajtzun intaj iꞌ nmoꞌc tan wuchꞌeyeꞌn nin tan incolcheꞌn tan qui inquimeꞌn tan faraón.”5 Choꞌn tzun at Moisés scyuchꞌ cyakil yi eꞌ xonl Israel le amaꞌl tzꞌinunin tuꞌ nakaꞌjil yi wiꞌwtz tetz Ryos, yi cyoponeꞌn Jetro tu yi txkel Moisés nin yi cob cyꞌajlaꞌtz. 6 Yi cyoponeꞌn Jetro nintzun ben mantar tan talcheꞌn tetz Moisés:
—Ja ul yi jiꞌuꞌ tan tilweꞌnuꞌ. Nin xomcheꞌ yi txkeluꞌ tu yi cob cyꞌajluꞌ teꞌj.
7 Teleꞌn tzaj tzun Moisés tan chicꞌulcheꞌn yi jiꞌ. Nintzun cuꞌ mejloktz tan takꞌleꞌn kꞌej. Nchaꞌtz ben iꞌ-tz tan stzꞌubleꞌn yi xak stziꞌ. Kalenaꞌtz tzun cyoqueꞌn xe yi mantial kale najleꞌt Moisés. 8 Yi cyoqueꞌn xe mantial toqueꞌn tzun Moisés tan xtxoleꞌn tetz yi jiꞌ yi ẍeꞌn cunin ban Kataj Ryos tan cyelseꞌn tzaj jakꞌ chicaꞌwl aj Egipto. Nin yi ẍeꞌn cunin ban Kataj teꞌj faraón scyuchꞌ cyakil yi eꞌ mas aj Egipto. Nchaꞌtz xtxol iꞌ cyakil yi qꞌuixcꞌuj yi nchitij tbeꞌ, nin ẍeꞌn cunin ban Kataj Ryos tan chicolcheꞌn tkꞌab yi eꞌchk qꞌuixcꞌujaꞌtz. Tircuꞌn baj xtxolil Moisés tetz yi jiꞌ.
9 Wiꞌnin tzun stzatzineꞌn Jetro te yi xtxolbil yi tbit nin, yi ẍeꞌn cunin ban Ryos tan ẍchajleꞌn yi banl talmaꞌ squibaj yi eꞌ xonl Israel tan chicolpeneꞌl tzaj jakꞌ chicaꞌwl yi aj Egipto. 10 Nintzun taltz:
—Kꞌajsbil tetz Kajcaw yi ja xcyeꞌ tan icolpeꞌn wok jakꞌ caꞌwl yi faraón scyuchꞌ yi eꞌ aj Egipto, yi eꞌ ocnakeꞌ tan ibuchleꞌn na le wutz cyetz cyajtzaꞌkl yi quiꞌc ixac.
11 Ntyoẍ tetz Kataj yi ja cxeꞌl wok tzakꞌ yi buchbeꞌn itetz yi chin qꞌuixbel nin ncxuꞌlij wok. Kꞌajsbil tetz Kajcaw na na el intxum tetz yi at mas ẍchamil iꞌ ẍchiwutz cyakil chiryosil yi eꞌ aj Egipto, stzun Jetro bantz.
12 Toqueꞌn tzun Jetro tan pateꞌn jun xtxꞌixwatz tan takꞌleꞌn kꞌej Ryos. Nchaꞌtz toy iꞌ coboxt oy tetz Kajcaw. Cyuleꞌn tzun Aarón scyuchꞌ yi eꞌ wiꞌ banl wiꞌ tetz Israel tan waꞌaꞌn teꞌj Jetro tan takꞌleꞌn kꞌej Ryos.
Yi cyoqueꞌn cobox pujul xtisyaꞌ tan Moisés
13 Itzun bantz le junt eklok nintzun oc Moisés tan pujleꞌn xtisyaꞌ ẍchixoꞌl yi eꞌ xonl Israel yi at chiproblem. Baj cunin jun kꞌejaꞌtz cyakꞌun wunak tan ẍchꞌiweꞌn. Wiꞌnin eꞌ txiclcheꞌ tan ẍchꞌiweꞌn tan cyoqueꞌn swutz Moisés.
14 Yi tilol yi jiꞌ Moisés yi qui na el iꞌ tan pujleꞌn ẍchixoꞌl yi jun cꞌoloj wunakaꞌtz, nintzun taltz tetz:
—¿Nxac na cẍtzan tan banleꞌn yi xtxolbilaꞌtz? ¿Mbi tzuntz yi achuc atiẍ ẍchiwutz cyakil yi eꞌ wunakeꞌj tan chibanleꞌn taneꞌn, nin yi cyetz txiclcheꞌ tuꞌ tan achꞌiweꞌn cyakil kꞌej? stzun Jetro tetz Moisés.
15 —Yi mero bintzi taꞌ iꞌtz cyakil yi eꞌ wunakeꞌj na chuꞌl tzinwutz tan jakleꞌn swetz nin tan injakol tetz Ryos yi mbi tajweꞌn tan chibnol. 16 Na yi na jal problem ẍchixoꞌl cyenin na chuꞌl tan injoyleꞌn tan woqueꞌn tan maꞌleꞌn naꞌ scyetz yi aj paj. Na tzun wal scyetz yi mbi na tal yi caꞌwl Ryos tan chixomeꞌn teꞌj, stzun Moisés tetz yi jiꞌ.
17 —Poro yaj, ploj yi na cẍtzan tan banleꞌn scyeꞌj eꞌ wunak, na achuc na cẍtzan tan chibanleꞌn taneꞌn. 18 Na nim yi jun akꞌuneꞌj. Wiꞌnin na ẍkꞌeꞌxij taꞌn. Nchaꞌtz yi eꞌ xonl Israel na chikꞌeꞌxij tan achꞌiweꞌn. Wiꞌnin eꞌ txiclcheꞌ tuꞌ tan achꞌiweꞌn te yi jun kꞌejeꞌj. Chaꞌstzun te quil cxcyeꞌ teꞌj achuc. 19 Ma jaluꞌ Moisés mas balaj yil ẍoꞌc tan xtxumleꞌn yi xtxolbileꞌj yi swaleꞌ tzatz nin lok tzꞌoc Ryos tan awuchꞌeyeꞌn. Mas tajweꞌn tan awoqueꞌn tetz chiyolol yi eꞌ wunak swutz Ryos tan talcheꞌn chiproblem tetz. 20 Nchaꞌtz tajweꞌn tan chichusleꞌn te cyakil yi ley tu caꞌwl Ryos, tan chixomeꞌn teꞌj nin tan chibanol taneꞌn. 21 Nchaꞌtz, txaꞌweꞌeꞌn cobox yaj yi tzꞌaknak cuꞌn eꞌ, yi na cyek ẍchiꞌ Ryos. Tajweꞌn yi jicyuch te cyajtzaꞌkl, nin yi qui na chitzantuꞌ tan chisubleꞌn wunak tan jaleꞌn yi cyetz chimeꞌbiꞌl. Baꞌn tzun cheꞌ abixbaj tan chicawuneꞌn squibaj yi mas wunak. Baꞌn cheꞌ abixbaj jun squibaj jun mil xoneꞌn, nin jujun squibaj jun cient, nin jujun squibaj nicyꞌ cient xoneꞌn, nin baꞌn choꞌc jujunt squibaj lajuj. 22 Baꞌn chicawun yi eꞌaꞌtz scyeꞌj yi eꞌ yi ateꞌ chicwent. Ma ko quil chixcyeꞌ te jun problem baꞌn tzun chuꞌl tzawutz tan abnol taneꞌn. Poro ko iꞌtz yi eꞌchk problem yi chixcyek eꞌ teꞌj baꞌn chiban taneꞌn chichuc. Kol tzaban yi xtxolbileꞌj quil ẍkꞌeꞌxij mas, na chocopon yi eꞌaꞌtz tan awuchꞌeyeꞌn. 23 Kol cxom te yi xtxolbileꞌj nin ko yaꞌtz tajbil Ryos tan abnol, quil ẍkꞌeꞌxij nin chaꞌtz yi eꞌ mas wunak chitzatzink teꞌj, stzun yi jiꞌ Moisés bantz tetz.
24 Inin tzun tulej Moisés quib yi tal yi jiꞌ tetz. 25 Toqueꞌn tzuntz tan chitxaꞌleꞌn cobox yaj ẍchixoꞌl yi xonl Israel, yi eꞌ yi at mas cyajtzaꞌkl. Nintzun eꞌ octz taꞌn tetz chibajxom squib yi xonl Israel. At eꞌ, eꞌ oc tetz chibajxom jun mil nak. Ej nin at eꞌ, eꞌ octz tetz bajxom squibaj jun cient. Ej nin at eꞌ, eꞌ oc squib nicyꞌ cient, nin at eꞌ, eꞌ oc squibaj lajuj ntziꞌ xoneꞌn. 26 Eꞌ tzun pujun chixoꞌl yi eꞌ yi na jal chiproblem. Ma yi eꞌchk problem yi qui nchixcyeꞌ teꞌj, choꞌn tzun toponeꞌn cyaꞌn swutz Moisés. 27 Chijatxol tzun quib Moisés tu yi jiꞌ, pakxij tetz Jetro le tetz tanum.