Yi teleꞌn tzaj yi aꞌ wutz cꞌub tan Moisés
17
1 Itzun bantz nintzun eꞌ icyꞌt yi xonl Israel swutz yi amaꞌl tzꞌinunin tuꞌ yi na biꞌaj Sin. Chebeleꞌn quicyꞌeꞌn le jujun amaꞌl chi yi tal Ryos scyetz. Choꞌn tzun cyoponeꞌn le amaꞌl Refidim. Poro yi cyoponeꞌn le amaꞌlaꞌtz qui jal muꞌẍ aꞌ cyaꞌn tetz quicꞌaꞌ. 2 Chibeneꞌn tzun yi eꞌ xonl Israel tan xochoꞌn tetz Moisés, itzun cyaltz:—Moisés loꞌk kucꞌaꞌ awaꞌn na skaquimok tan saktziꞌ, cheꞌch tzun bantz.
—¿Nxac nchuꞌluꞌ tan xochoꞌn swetz? ¿Nxac na chitzanuꞌ tan pileꞌn Kataj Ryos? stzun Moisés scyetz.
3 Poro tan paj yi saktziꞌ yi ateꞌ cuꞌnt eꞌ octz tan yajleꞌn Moisés. Itzun cyaltz:
—¿Nxac nkeꞌl tzaj acyꞌal Egipto? ¿Yaꞌtz ptzun awajbil yil kaquim len tzoneꞌj scyuchꞌ cyakil yi eꞌ kanitxaꞌ tu cyakil kawun?
4 Toqueꞌn tzun Moisés tan jakleꞌn ẍchꞌeybil tetz, tetz Ryos. Itzun tal iꞌtz:
—Wajcaw, ¿mbil tzimban scyeꞌj cyakil yi wunakeꞌj? Quicunin batz ẍchin loꞌonk cyaꞌn tan cꞌub, stzun Moisés tetz Ryos.
5 Stzaꞌwel tzun Kataj tetz:
—Bajxen ẍchiwutz yi xonl Israel, nin moxweꞌ nin cobox wiꞌ banl wiꞌ tzaweꞌj yi ateꞌ tzixoꞌl wok. Nchaꞌtz cyꞌaj nin yi atxꞌamij yi nxcon awaꞌn tan jabeꞌn cuꞌn yi tzanlaꞌ Egipto. 6 Baꞌn ẍbajxij ẍchiwutz. Nin ojkel nin wok na choꞌn cxinchꞌiwok le wiꞌwtz Horeb, tibaj yi jun chin wutz kotxꞌ. Yil xopon baꞌn tzaxuy cyen yi atxꞌamij te yi jun wutz kotxꞌaꞌtz, tzꞌeluꞌl tzun aꞌ teꞌj bantz jaleꞌn quicꞌaꞌ yi eꞌ xonl Israel.
Yi cyoponeꞌn yaꞌtz nin tzun tulej Moisés quib yi tal Ryos tetz. Ẍchiwutz cunin cyakil yi eꞌ wiꞌ banl wiꞌ tetz yi eꞌ xonl Israel yi bnol Moisés yi xtxolbilaꞌtz. 7 Toqueꞌn tzun biꞌ yi amaꞌlaꞌtz tan Moisés tetz Meriba, na nin tal iꞌ: “Ja chixochon yi eꞌ wunak swetz.” Nchaꞌtz oc tkꞌol yi biꞌ-tz tetz Masah, na nin eꞌ oc yi eꞌ xonl Israel tan pileꞌn Ryos tan yi eꞌchk yoleꞌj: ¿Xomij nin poloꞌ Ryos skeꞌj nka quiꞌ? cheꞌch tzun bantz.
Yi cyoqueꞌn yi xonl Israel tan oyintziꞌ scyuchꞌ yi eꞌ xonl kꞌajtzun Amalec
8 Itzun bantz yi cyoponeꞌn yi eꞌ xonl Israel le amaꞌl Refidim, cyoponeꞌn tzun yi eꞌ xonl kꞌajtzun Amalec tan oyintziꞌ scyeꞌj. 9 Nintzun tal Moisés tetz Josué:
—Txaꞌweꞌeꞌn cobox yaj skaxoꞌl nin baꞌn xben wok tan oyintziꞌ scyeꞌj. Ma in wetz, jalchan nchimben jalen wiꞌwtz nin mben incyꞌal yi txꞌamij yi na ẍchaj porer Ryos, stzun Moisés bantz tetz Josué.
10 Cyeleꞌn tzun Josué tan oyintziꞌ scyeꞌj eꞌ xonl kꞌajtzun Amalec quib yi tal Moisés scyetz. Ma cyetz Moisés tu Aarón nin Hur, choꞌn chibeneꞌn cyetz wiꞌwtz. 11 Yi cyoponeꞌn wiꞌwtz nintzun jeꞌ tkꞌol Moisés yi kꞌab tcyaꞌj. Yi jeꞌnt tkꞌol Moisés yi kꞌab tcyaꞌj eꞌ tzun xonl Israel nchixcyeꞌ scyeꞌj yi eꞌ xonl kꞌajtzun Amalec. Ma yi na cutzaj yi kꞌab iꞌ yi na kꞌeꞌxij, eꞌ xonl kꞌajtzun Amalec nchitxꞌacon scyeꞌj eꞌ xonl Israel. 12 Poro itzun bantz yi kꞌeꞌxeꞌn yi kꞌab Moisés sajeꞌn tzun chijoyol jun cꞌub tetz cꞌolchbil Moisés tan tujeweꞌn iꞌ. Nchaꞌtz eꞌ oc Aarón tu Hur tan palcheꞌn yi kꞌab Moisés, jun le sbal nin jun le max. Chaꞌstzun te xtxꞌajol Moisés yi ateꞌn tuꞌ yi kꞌab tcyaꞌj te cyakil yi jun kꞌejaꞌtz. 13 Yaꞌstzun bantz yi xcyeweꞌn Josué scyeꞌj yi eꞌ xonl Amalec.
14 Tlol tzun Ryos tetz Moisés:
—Tzꞌib wok cuꞌn yi xtxolbileꞌj yi mbajij tul jun uꞌj tan tuleꞌn txꞌakx ticꞌuꞌl tzantzaj. Nchaꞌtz alaj tetz Josué yi xtxolbileꞌj: “Chicopon insotzal cyakil yi eꞌ xonl Amalec nin cyaꞌl naꞌwseꞌt chibiꞌ,” stzun Ryos bantz tetz Moisés.
15 Jeꞌn tzun bnol Moisés jun patbil xtxꞌixwatz le amaꞌlaꞌtz nin oc tkꞌol yi biꞌ tetz: “Yi Kajcaw, iꞌ kabajxom nin iꞌ na akꞌon kachamil”. 16 Nchaꞌtz tal iꞌ-tz: “Tan tuꞌ yi nchoꞌc yi eꞌ xonl Amalec tan oyintziꞌ teꞌj Ryos, chaꞌstzun te tzꞌocopon Ryos tan oyintziꞌ scyeꞌj yi eꞌ xonl Amalec sbneꞌ opon tunintz.”