Yi tkꞌol Ryos yi maná tetz chiwaꞌ yi eꞌ xonl Israel
16
1 Itzun bantz quicyꞌeꞌn tzun yi xonl Israel swutz yi amaꞌl kale eꞌ cyajeꞌt cyen yi na biꞌaj Elim. Choꞌn tzun cyoponeꞌn le amaꞌl tzꞌinunin tuꞌ yi na biꞌaj Sin yi at txoꞌl Elim tu Sinaí. Iꞌtz yi oꞌlaj tajlal yi caꞌp xaw yi cyenleꞌnix tzaj Egipto yi cyoponeꞌn tul yi jun amaꞌlaꞌtz. 2 Yi cyoponeꞌn le amaꞌlaꞌtz, cyoqueꞌn tzuntz tan xochoꞌn tetz Moisés tu Aarón tan paj yi qui jal chiwaꞌ. 3 Je tzun chiyoleꞌj:—¡Moisés! ¿Nxac nkeꞌl tzaj awucyꞌal Egipto? Mas balaj kloꞌ choꞌnk nkaquim tan Ryos Egipto, na choneꞌj at ketz kawaꞌ. Choꞌn na kawan xlaj ẍwokꞌil chiꞌbaj, nin na baj kaꞌn jalen yi na el chin kagan teꞌj. Poro yi jaluꞌ ntin nkasaj itcyꞌal wok tzoneꞌj le amaꞌleꞌj tan kaquimeꞌn tan weꞌj, cheꞌch tzuntz tetz Moisés tu Aarón.
4 Poro nintzun tbit Ryos chiyol chaꞌstzun tlol iꞌ yi yoleꞌj tetz Moisés:
—Swakꞌeꞌ chiwaꞌ yi xonl Israel. Choꞌn lsaj tcyaꞌj. Ntinaꞌtz na taj tan cyeleꞌn cyakil jalchan tan molcheꞌn yi muꞌẍ yi xconk scyetz te yi jun kꞌejaꞌtz. Na na waj wil naꞌ scyetz eꞌ yil chixom te incaꞌwl nin naꞌ scyetz yi quiꞌ. 5 Ma le kakiꞌn kꞌej yil choꞌc tan molcheꞌn yi chiwaꞌ baꞌn chimoleꞌn tetz cob kꞌej. Baꞌn chimoleꞌn mas swutz yi na ban xoꞌl sman, stzun Ryos bantz scyetz Moisés.
6 Cyalol tzun Moisés tu Aarón yi xtxolbilaꞌtz scyetz xonl Israel:
—Quibitzajuꞌ eꞌuꞌ katanum, axen cweꞌn kꞌej squileꞌuꞌ yi porer Ryos, yi Ryos yi oꞌ elsan tzaj Egipto. 7 Ma eklen jalchan squileꞌuꞌ yi banl iꞌ skibaj, na ja tbit iꞌ yi nchixochonuꞌ tetz. Na choꞌn nchixochonuꞌ tetz iꞌ, nkꞌeꞌtz sketz.
8 Nchaꞌtz tal Moisés scyetz:
—Yi jaluꞌ cweꞌn kꞌej stkꞌeꞌ Kataj Ryos chiꞌbaj tetz kawaꞌ. Ma jalchan stkꞌeꞌ pam sketz jalen tzꞌicyꞌ kapaj teꞌj. Na ja tbit yi nchixochonuꞌ tetz, na nkꞌeꞌtz choꞌn nchixochonuꞌ sketz ma na tetz Kajcaw.
9 Beneꞌn tzun tlol Moisés tetz Aarón:
—Alaj scyetz cyakil yi eꞌ xonl Israel tan chibansal quib tu Ryos na ja tbit iꞌ chixochoꞌn, stzun Moisés bantz.
10 Ej nin te yi tlol Aarón yi xtxolbileꞌj scyetz xonl Israel tircuꞌn nintzun eꞌ, eꞌ xmayinin le amaꞌl tzꞌinunin tuꞌ. Ej nin le rataꞌtz ja ẍchaj tib yi pakꞌpuchal yi porer Ryos tul yi jun bocꞌoj sbakꞌaꞌtz. 11 Choꞌn tzun jiloneꞌn Ryos tetz Moisés itzun taltz:
12 —Moisés, ja wit yi xochoꞌn yi nchiban yi xonl Israel. Alaj bin yi xtxolbileꞌj scyetz: “Jaluꞌ cweꞌn kꞌej sbajk chiꞌbaj itaꞌn tetz iwaꞌ. Ej nin ek jalchan sbajk pam itaꞌn jalen yil tzꞌicyꞌ ipaj teꞌj. Tan yi xtxolbileꞌj tzꞌelepon itxum tetz yi in yi itajcaw tu iRyosil,” cẍchij sban scyetz, stzun Ryos bantz tetz Moisés.
13 I nintzun banaꞌtz. Iteꞌn nin te cweꞌn kꞌejaꞌtz cyuleꞌn jun cꞌoloj tzꞌichin xlaj yi amaꞌl kale eꞌ quicyent te jun akꞌbalaꞌtz. Nchaꞌtz ban yi tuleꞌn skil nojnak cuꞌn yi amaꞌlaꞌtz tan kꞌab cheꞌw. 14 Poro itzun bantz yi skejeꞌn yi kꞌab cheꞌw cyajeꞌn cyen tzun jun txꞌakaj takleꞌn yi chin sak nin wuxtxꞌotxꞌ taꞌn. 15 Yi quilol yi eꞌ xonl Israel yi chin sak nin ban cyen yi wuxtxꞌotxꞌ tan yi takleꞌn yi icunin kꞌab cheꞌw, nintzun cyaltz: “¿Mbi tzun i ilaꞌtz yi jeꞌj?” cheꞌch tzun bantz.
—Yaꞌstzun yi pam yi ja takꞌ Ryos tetz kawaꞌ, stzun Moisés scyetz. 16 —Baꞌn tzimol wok yi muꞌẍ yi tajweꞌn tetz itetz. Tunin xomquen teꞌj yi tajlal ixoneꞌn. Baꞌn tzimol wok cob liwr te jujun axwok, stzun Ryos bantz swetz, chij Moisés scyetz.
17 Cyoqueꞌn tzun yi eꞌ xonl Israel tan molcheꞌn. At eꞌ yi nim cyetz baj chimolol, nin at eꞌ yi muꞌẍ ntziꞌ cyetz baj chimolol. 18 Itzun chipakxeꞌn xe chipach nin yi toqueꞌn maꞌleꞌn cabal cuntuꞌ na ban, cucoblen liwr te jujun ban. Yi eꞌ yi nim cyetz eꞌ mol, quiꞌc cyetz sowrin. Ma yi eꞌ yi muꞌẍ ntziꞌ eꞌ mol, cabal mban.
19 Nchaꞌtz tal Moisés scyetz:
—Quiꞌc cuj tan cyajeꞌn cyen icolol muꞌẍ tetz ek, mpe ik yi sowril.
20 Poro ilenin ateꞌ cobox yi qui oc yol Moisés te chiwiꞌ na nin cyaj cyen chicolol muꞌẍ tetz junt kꞌej. Poro yi tuleꞌn skil, nsken txꞌamin nin nsken jal tamluꞌil nin chin xeweꞌn nin mban. Sajeꞌn tzun colp wiꞌ Moisés scyeꞌj tan paj yi qui nin oc yi yol iꞌ te chiwiꞌ.
21 Cyakil nintzun jalchan eꞌ el yi eꞌ xonl Israel tan molcheꞌn chiwaꞌ yi takꞌ Ryos scyetz. Xomcyentuꞌ te yi tajlal yi jujun najal. Ma yi na makꞌtij kꞌej nintzun na el aꞌ yi jun jilwutz wajaꞌtz yi cyaj cyen wuxtxꞌotxꞌ. 22 Ma le kakiꞌn kꞌej tetz yi sman, nim tzun chiwaꞌ eꞌ moltz, na nin eꞌ mol tetz cob kꞌej. Cyaj tzun liwr tetz jujun. Poro ateꞌ tzun cobox ajcaw eꞌ opon tan talcheꞌn tetz Moisés tan yi xtxolbilaꞌseꞌj. 23 Tlol tzun Moisés scyetz:
—Quil chibisunuꞌ taꞌn na yaꞌstzun caꞌwl Ryos. Iꞌ mmaꞌlon yi eklen iꞌtz yi kꞌej tetz ujleꞌn, nin iꞌtz jun kꞌej yi chin xan nin. Baꞌn chitxicuꞌ yi mbi tajweꞌn tetz cyeruꞌ, nin baꞌn chicoluꞌ yi sowril tetz eklen, na cyaꞌl tzꞌakꞌuj eklen, stzun Moisés scyetz.
24 Yaꞌtz tzun cyulej yi eꞌ xonl Israel quib yi tal Moisés scyetz. Cyajeꞌn cyen tzun chicolol yi sowril tetz junt eklok. Ma yi tuleꞌn skil qui nin txꞌamin muꞌẍ tal yi chiwaꞌaꞌtz nin quiꞌc tamluꞌil ncuꞌ. Nin quiꞌc nin muꞌẍ tal nink nxewan.
25 —Baꞌn chibajseꞌnuꞌ yi chiwaꞌuꞌ yi cyaj chimololuꞌ na jaluꞌ iꞌtz jun kꞌej ujleꞌn yi chin xan nin swutz Ryos. Nchaꞌtz te yi jun kꞌejeꞌj cyaꞌl jaleꞌt pam cyanuꞌ. 26 Baꞌn chimololuꞌ yi chiwaꞌuꞌ tul kak kꞌej, ma le jukiꞌn kꞌej iꞌtz yi kꞌej tetz ujleꞌn, quil jal pam cyanuꞌ na yaꞌstzun yi jun kꞌej ujleꞌn, stzun Moisés ban scyetz.
27 Poro ilenin at eꞌ, eꞌ el tan joyleꞌn yi pamaꞌtz tul yi jukiꞌn kꞌej poro quiꞌc muꞌẍ jal cyaꞌn. 28 Jiloneꞌnt tzun Ryos tetz Moisés itzun taltz:
—¿Tonaꞌ nin cxom wok te yi wetz inchusuꞌn? ¿Tonaꞌ nin cxoꞌc wok cꞌulutxum jakꞌ incaꞌwl? 29 Tajweꞌn yil tzꞌoc le iwiꞌ yi in Jehová yi iRyosil nin in ncawun tan itujeweꞌn le jukiꞌn kꞌej. Nchaꞌtz cyakil kꞌej na wakꞌ iwaꞌ. Ej nin tul yi kakiꞌn kꞌej na wakꞌ mas waj tan jeꞌn imolol tetz cob kꞌej. Chaꞌstzun te qui tajweꞌn tan iteleꞌn tzaj xe icaꞌl le jukiꞌn kꞌej, stzun Ryos ban scyetz.
30 Chicyakil tzun yi xonl Israel eꞌ xom te yol Ryos, na tircuꞌn eꞌ, eꞌ ujeꞌ te eꞌchk kꞌej ujleꞌn.
31 Toqueꞌn tzun yi biꞌ yi jun jilwutz wajaꞌtz cyakꞌun tetz Maná, na yi yubil iꞌtz sak. Nin icunin wutz clant. Ma yi cꞌoꞌcal icunin cꞌoꞌcal pam tu cabil wunak txuc.
32 Nintzun tal Moisés scyetz yi xonl Israel:
—Je junt caꞌwl yi na tzan Ryos tan talcheꞌn tan kaxomeꞌn teꞌj. “Mol wok muꞌẍ maná nin colwok tul jun maꞌlbil yi gomer biꞌ tan ẍchajleꞌn scyetz ixonl, yi yaꞌstzun yi iwaꞌ yi nwakꞌ tul yi amaꞌleꞌj yi tzꞌinunin tuꞌ yi iteleꞌn tzaj Egipto,” stzun Moisés bantz.
33 Beneꞌn tzun tlol Moisés tetz Aarón:
—Joyaj jun miꞌt nin baꞌn tzawakꞌ cuꞌn jun gomer maná tul, nin baꞌn tzacyꞌaj kale najleꞌt Ryos, na xconk tzitetz tan ẍchajleꞌn scyetz ixonl tzantzaj, stzun Moisés tetz Aarón.
34 Joyol tzun Aarón jun tal miꞌt kale cweꞌt yi maná, kalenaꞌs tzun toponeꞌn taꞌn swutz yi caẍaꞌ kale atiteꞌt yi caꞌwl Ryos. 35 Caꞌwunak tzun yob baj maná cyakꞌun yi eꞌ xonl Israel jalen yi cyoponeꞌn kale najlcheꞌt wunak stziꞌ yi mojomil yi amaꞌl Canaán. 36 Yi gomer niꞌcuꞌn tu cyaj loꞌ liwr, nin at lajuj maꞌlbil gomer tul jun efa.