Yi tkꞌol Moisés scyuchꞌ yi eꞌ xonl Israel chikꞌajsbil tetz Ryos
15
1 Itzun bantz yi wiꞌt bajeꞌn yi xtxolbileꞌj, nintzun cyakꞌ Moisés scyuchꞌ yi eꞌ xonl Israel chikꞌajsbil tetz Ryos tan takꞌleꞌn kꞌej iꞌ. Je na tal chibitzeꞌj:“Kakꞌeꞌ kakꞌajsbil tetz Kataj. Na skꞌil cunin nxcyeꞌ iꞌ te kacontr yi chibekꞌxeꞌn yi eꞌ aj chejinl tu chichej xe mar.
2 Chaꞌstzun te na wakꞌ inkꞌajsbil tetz Kataj, na iꞌ na akꞌon inwalor nin ja chincolpij taꞌn. Iꞌ Ryosil intaj chaꞌstzun te tajweꞌn tan wakꞌol inkꞌajsbil tetz.
3 Yi kaRyosil iꞌ yi wiꞌtz aj txꞌaconl nin yi biꞌ iꞌtz wiꞌtz Ajcaw.
4 Na ja xcyeꞌ tan chibenseꞌn kacontr xe mar scyuchꞌ cyakil chicareꞌt tu cyakil yi eꞌ sanlar tetz faraón. Ej nin tircuꞌn yi balaj cyajcawil sanlar ja chibekꞌxij xe mar tan iꞌ.
5 Choꞌn cunin eꞌ ban chi na ban jun cꞌub yi na ben joꞌliꞌn xe mar, nin jalen xe mar nchoponeꞌt taꞌn.
6 Wajcaw chin cham nin iluꞌ. Wiꞌnin ẍchamiluꞌ, nin wiꞌnin poreruꞌ. Na ja xcyeꞌuꞌ scyeꞌj kacontr.
7 Tan yi teruꞌ poreruꞌ ja xcyeꞌuꞌ tan chixiteꞌn yi eꞌ kacontr. Na ja xcyeꞌuꞌ scyeꞌj cyakil yi eꞌ yi eꞌ oc tan oyintziꞌ teꞌjuꞌ. Ja ticyꞌsajuꞌ cꞌuꞌluꞌ scyeꞌj. Choꞌn cuꞌn ntulejuꞌ eꞌ chi na tzꞌeꞌ muꞌẍ tzꞌis.
8 Tan yi waloruꞌ, ja xupuꞌ wi mar nin ja jatx tib. Choꞌn cunin ban cyen chi cob tapij. Ja nacꞌnax yi xe mar tanuꞌ, quiꞌt nẍchuc tib muꞌẍ tal.
9 Nin je chiyol kacontreꞌj: ‘Kaxomok nin tan chitzꞌamleꞌn yi eꞌ xonl Israel, jalen yil chitxꞌamxij kaꞌn. Nin yil chitxꞌamxij kaꞌn, tzꞌelpon kamajol cyakil chimeꞌbiꞌl nin copon kajatxol skawutz. Ẍchiquimok kaꞌn. Ẍchiquimok kaꞌn tan kaspar,’ cheꞌch eꞌ bantz.
10 Poro teruꞌ taꞌ ja saj kojoluꞌ yi mar ẍchiwiꞌ nin ja chibekꞌxij tanuꞌ. Choꞌn cunin eꞌ ban chi na ban jun lmak cꞌub yi na ben joꞌliꞌn xe mar.
11 Kataj, ¡quiꞌc nin junt ryos yi niꞌcuꞌnk yi porer tu yi teruꞌ! Quiꞌc junt yi chin tzꞌaknak cuꞌn swutzuꞌ taꞌ, na na xcyeꞌuꞌ tan banleꞌn wiꞌnin milawr yi chin xoꞌwbil nin. Chaꞌstzun te tajweꞌn tan kakꞌol kakꞌajsbil teruꞌ.
12 Ja ẍchajuꞌ yi poreruꞌ scyetz nin tircuꞌn ja chiquim tanuꞌ.
13 Nchaꞌtz wiꞌnin na pekꞌuꞌ skeꞌj yi oꞌ yi elnakoꞌ tzaj liwr jakꞌ chicaꞌwl yi eꞌ aj Egipto, ej nin tan tuꞌ yi na pekꞌuꞌ skeꞌj, na tzanuꞌ tan kicyꞌleꞌn nin le teruꞌ amaꞌluꞌ.
14 Yil quibit cyakil yi eꞌ mas tnum yi xtxolbileꞌj yi mbanuꞌ, ẍchilucnek tan xoꞌw. Nchaꞌtz ẍchibneꞌ yi eꞌ filistey, ẍchixobok nin skejk chitziꞌ tan paj.
15 Nchaꞌtz ẍchibneꞌ yi eꞌ aj Edom yil quibit yi xtxolbileꞌj, smakxok chixew tan paj. Ma yi eꞌ ajcaw tetz Moab ẍchilewnek tan xoꞌw. Nin quiꞌt jal chiwalor yi eꞌ aj Canaán.
16 Iluꞌ Kajcaw, cheꞌ xoꞌwsajuꞌ tan chixobeꞌn. Nink choꞌc quen chi jun cꞌub yi qui na yucan, jalen yil kicyꞌ jalaj cyꞌen chiluwar, yi oꞌ tanumuꞌ yi ja kacolpij tanuꞌ.
17 Kataj, koꞌ tcyꞌajninuꞌ tan kanajeweꞌn tul yi teruꞌ amaꞌluꞌ yi wiꞌnin xanil. Koꞌ tcyꞌajninuꞌ le caꞌluꞌ yi iluꞌ mbnon tetz.
18 Scawunkuꞌ Kataj tetz ben kꞌej ben sak,” cheꞌch tzun Moisés tul chibitz.
Yi tkꞌol Mariy yi tanub Moisés yi tetz kꞌajsbil
19 Itzun bantz yi eꞌ xomeꞌn tzaj yi eꞌ careꞌt tu eꞌ aj chej tetz faraón wutz chicoc yi eꞌ xonl Israel, tul mar, sajeꞌn tzun kojol Ryos yi aꞌ tetz mar squibaj ninin eꞌ quim. Ma yi eꞌ xonl Israel eꞌ icyꞌ tul mar chi skej chibeꞌ. 20 Toqueꞌn tzun Mariy yi tanub Aarón, yi nchaꞌtz iꞌ elsanl stziꞌ Ryos, tan tocseꞌn jun kbetz yi na biꞌaj pandereta nin octz tan bixl. Nchaꞌtz eꞌ ban yi eꞌ mas xnaꞌn nin eꞌ oc tan tocseꞌn yi cyetz chikbetz, nin tan bixl teꞌj.
21 Toqueꞌn tzun Mariy tan bitz. Je na tal yi bitzeꞌj:
“Kabitzink tan takꞌleꞌn kꞌej Kajcaw. Na ja txꞌacon iꞌ scyeꞌj kacontr. Na ja xcyeꞌ iꞌ tan chibenseꞌn chicyakil yi eꞌ aj chejinl tetz oyintziꞌ xe mar. Kakꞌeꞌ bin kakꞌajsbil tetz.”
22 Quicyꞌeꞌn tzun Moisés scyuchꞌ yi eꞌ aj Israel swutz yi amaꞌl yi at xlaj yi mar. Choꞌn tzun eꞌ beneꞌn le amaꞌl tzꞌinunin tuꞌ yi na biꞌaj Shur. Ox kꞌej eꞌ xon tul yi amaꞌlaꞌtz. Poro qui nin jal muꞌẍ aꞌ cyaꞌn tetz quicꞌaꞌ. 23 Yi cyoponeꞌn le amaꞌl Mara, at jun aꞌ at poro qui nin baj cyaꞌn na chin cꞌaꞌ nin. Chaꞌstzun te toqueꞌn yi biꞌ yi amaꞌlaꞌtz cyaꞌn tetz Mara.a 24 Tan paj yi qui jal quicꞌaꞌ cyoqueꞌn tzun yi xonl Israel tan xbajtziꞌeꞌn te Moisés, itzun cyaltz: “Moisés ¿mbi kucꞌaj jaluꞌ tetz kucꞌaꞌ na quiꞌc balaj aꞌ at tzoneꞌj?” 25 Toqueꞌn tzun Moisés tan jakleꞌn ẍchꞌeybil tetz, tetz Ryos. Tbit tzun Ryos yi stziꞌ yi kul Moisés, nintzun ẍchaj iꞌ jun wiꞌ tzeꞌ tetz. Ma yi cweꞌn tkꞌol Moisés yi jun wiꞌ tzeꞌaꞌtz xe aꞌ, toqueꞌn tzun yi aꞌ tetz balaj aꞌ.
Choꞌn tzun toqueꞌn Ryos tan chipileꞌn le amaꞌlaꞌtz. Nchaꞌtz choꞌn takꞌol iꞌ yi tetz caꞌwl tan chixomeꞌn teꞌj. 26 Itzun taltz scyetz: “Kol tzitbitwok cyakil yi xtxolbil yi swaleꞌ tzitetz wok, ej nin kol tziban wok taneꞌn yi wetz wajbil, tu yi wetz incaꞌwl; ej nin kol cxomwok te weri inley, qui tzun tzꞌul yi eꞌch yaꞌbil tziteꞌj wok chi yi ncheꞌwulej yi eꞌ aj Egipto. Na in yi itajcawil,” stzun Ryos bantz scyetz.
27 Choꞌn tzun cyoponeꞌn yi xonl Israel le amaꞌl yi na biꞌaj Elim, kale atiteꞌt coblaj neꞌẍ aꞌ tu oxcꞌal tu lajuj wiꞌ xaꞌj. Choꞌn tzun eꞌ cyajeꞌn cyen cobox kꞌej le jun amaꞌlaꞌtz.