Yi quicyꞌeꞌn yi xonl Israel wi mar
14
1 Itzun bantz nintzun jilont Ryos tetz Moisés. Itzun taltz:2 “Moisés, alaj scyetz cyakil yi eꞌ xonl Israel tan chipakxeꞌn, nin tan cyoponeꞌn swutz yi amaꞌl Pi-hahirot yi at txoꞌl Migdol tu yi mar, nin xlaj yi amaꞌl Baal-zefón. Baꞌn chaꞌtij cobox kꞌej le amaꞌlaꞌtz nin baꞌn jeꞌ cobox kꞌej chipach swutz yi amaꞌlaꞌtz yi at swutz yi mar. 3 Nin yil tbit faraón yi choꞌn atixwok le amaꞌlaꞌtz, staleꞌ iꞌ: ‘Yi eꞌ xonl Israel quiꞌt na pujx cyaꞌn naꞌl chaꞌj nint. Nin txꞌakxnakeꞌ tul yi amaꞌl tzꞌinunin tuꞌ.’ 4 Nin nchaꞌtz tzintxꞌixpuj yi tajtzaꞌkl faraón tan sajeꞌn iꞌ tan itzꞌamleꞌn. Poro quil cxbisun wok na tzinchajeꞌ yi imporer tan yi eꞌchk takleꞌn yi tzimbneꞌ teꞌj iꞌ nin scyeꞌj yi eꞌ tetz sanlar. Ej nin yil tzimban yi xtxolbileꞌj tzꞌelepon chitxum cyakil yi eꞌ aj Egipto tetz yi in yi wiꞌtz Ajcaw,” stzun Ryos bantz.
Yaꞌtz nin tzun cyulej yi eꞌ xonl Israel quib yi tal Ryos scyetz.
5 Itzun bantz yi tbital faraón scyuchꞌ yi eꞌ ajcaw yi na chicawun xlaj yi nsken cheꞌl ojk yi eꞌ xonl Israel, nintzun jeꞌ xtxꞌixpul yi xtxumuꞌn scyeꞌj. Itzun cyaltz: “¿Ẍeꞌn tzun ban yi kakꞌol amaꞌl scyetz yi eꞌ xonl Israel tan cyeleꞌn skaxoꞌl, nin tan qui cyakꞌujeꞌn skeꞌj?” cheꞌch tzun eꞌ bantz.
6 Nintzun cawunin yi rey tan wekleꞌn yi tetz careꞌt tetz oyintziꞌ, nin cawunin tan chiwekleꞌn jun cꞌoloj sanlar, tan chixomeꞌn nin teꞌj. Ben tcyꞌal cyakil yi tetz careꞌt tetz oyintziꞌ. 7 Nchaꞌtz eꞌ xom nin kak cient balaj careꞌt tetz oyintziꞌ yi at len jun ajcaw tetz sanlar tul. 8 Mas tcunin tzun stzeꞌtzaxeꞌn yi talmaꞌ yi rey tan Ryos tan beneꞌn iꞌ tan chitzꞌamleꞌn yi eꞌ xonl Israel yi skꞌil cuꞌn cyeleꞌn tzaj tzakꞌ chicaꞌwl.
9 Cyeleꞌn tzaj tzun yi eꞌ sanlar cwent Egipto tu cyakil chicareꞌt tetz oyintziꞌ tu cyakil yi eꞌ sanlar yi ateꞌeꞌn teꞌjak chichej, tan chitzꞌamleꞌn yi eꞌ xonl Israel. Choꞌn tzun eꞌ txꞌamxeꞌn yi eꞌ xonl Israel cyakꞌun stziꞌ yi mar, xlaj yi amaꞌl Pi-hahirot nin swutz yi amaꞌl Baal-zefón. Na choꞌn chicyajeꞌn cyen yi eꞌ xonl Israel le amaꞌlaꞌtz. 10 Yi quilol yi eꞌ xonl Israel yi toponeꞌn faraón tu cyakil yi eꞌ tetz sanlar yi xomcheꞌ teꞌj tu eꞌchk careꞌt tetz oyintziꞌ, nintzun eꞌ xobtz, nin eꞌ oc tan jakleꞌn ẍchꞌeybil cyetz tetz Kataj Ryos. 11 Poro nintzun eꞌ oc tan yajleꞌn Moisés. Itzun cyaltz tetz:
—Moisés ¿nxac nkeꞌl tzaj acyꞌal Egipto tan kaquimeꞌn tzoneꞌj le amaꞌl tzꞌinunin tuꞌ? Mas balaj kloꞌ choꞌnk nkaquim Egipto. ¿Nxac maban yi junaꞌtz skeꞌj? ¿Nxac nkeꞌl tzaj acyꞌal? 12 Yaꞌtz nintzun kal tzatz yi atoꞌ tzaj Egipto. Je bin kayol kal tzatzeꞌj: “Akꞌaj amaꞌl sketz tan kakꞌujeꞌn jakꞌ chicaꞌwl yi eꞌ aj Egipto, na mas balaj yi tzꞌicyꞌpon yi buchbeꞌn ketz kaꞌn swutz yil kaquim le amaꞌl tzꞌinunin tuꞌ.”
13 Yi tbital Moisés yi chiyol nintzun tal iꞌ scyetz:
—Eꞌuꞌ intanum, quil chibisunuꞌ, nin quil chixobuꞌ. Quiwit yi cyeruꞌ. Kꞌukek chicꞌuꞌluꞌ teꞌj Kajcaw. Na ẍchajeꞌ iꞌ yi tetz porer sketz jaluꞌ, nin jun cuꞌn skaclaxok taꞌn. Nin yi eꞌ kacontr yi na kil nin chiwutz jalcuꞌn, quiꞌt kil chiwutz. 14 Chaꞌstzun te quil chibisunuꞌ, na nkꞌeꞌtz tajweꞌn yil koꞌc tan oyintziꞌ scyuchꞌ ma na Ryos tzꞌocopon tan oyintziꞌ scyeꞌj tetz kaxel, stzun Moisés ban scyetz yi eꞌ tanum yi eꞌ xonl Israel.
15 Nintzun tal Ryos tetz Moisés:
—Moisés ¿nxac na cẍtzan tan jakleꞌn swetz yi mbi tajweꞌn tan abnol? Cawunin scyetz yi eꞌ xonl Israel tan chicweꞌn junt tir tbeꞌ. 16 Ma atz, cyꞌajeꞌn yi atxꞌamij, nin chajnin tibaj yi mar tan cweꞌn jatxol tib. Bantz quicyꞌeꞌn yi xonl Israel tul. 17 Ma in wetz swakꞌeꞌ cyen le chitxumuꞌn yi eꞌ aj Egipto tan chixomeꞌn tzaj tan itzꞌamleꞌn wok. Poro quil cxbisun wok na tzinchajeꞌ yi imporer tetz faraón scyuchꞌ yi eꞌ tetz sanlar, nin scyetz yi eꞌ yi ateꞌeꞌn te chichej. 18 Nin yil tzinchaj yi imporer yil noꞌc tan chixiteꞌn faraón scyuchꞌ yi eꞌ mas sanlar yi xomcheꞌ teꞌj, scyuchꞌ yi eꞌ yi ateꞌeꞌn te chej, tzꞌelepon tzun chitxum tircuꞌn yi eꞌ aj Egipto tetz yi in yi wiꞌtz Ajcaw, stzun Ryos bantz tetz Moisés.
19 Itzun yi ángel yi bajxij ẍchiwutz nintzun xtxꞌixpuj yi luwar kale ateꞌt. Nchaꞌtz ban yi jun bocꞌoj sbakꞌ. Choꞌn bajxcheꞌ ẍchiwutz yi xonl Israel, poro choꞌn eꞌ cyajeꞌn cyen wutz chicoc. 20 Choꞌn tzun eꞌ cyajeꞌn cyen ẍchixoꞌl yi eꞌ sanlar tetz Egipto scyuchꞌ yi eꞌ xonl Israel. Yi jun bocꞌoj sbakꞌaꞌtz xcyeꞌ tan takꞌleꞌn tzꞌoꞌtz scyetz yi aj Egipto, ma scyetz yi eꞌ xonl Israel xcon tan chitxekeꞌn te yi jun akꞌbalaꞌtz. Chaꞌstzun te qui nin eꞌ xcyeꞌ yi eꞌ sanlar tetz Egipto tan chitzꞌamleꞌn yi eꞌ xonl Israel te jun akꞌbalaꞌtz.
21 Ma tetz Moisés inin tzun tulejaꞌtz quib yi tal Ryos tetz, nin ben ẍchajol yi xtxꞌamij wi mar. Yi bnol iꞌ yi xtxolbileꞌj nintzun saj jun chin wutzileꞌn cyekꞌekꞌ tan Ryos teleꞌn tziꞌn. Baj cunin akꞌbal tan yi jun cyekꞌekꞌaꞌtz. Cweꞌn tzun jatxol yi mar. Cob cuntuꞌ el taꞌn. Yaꞌstzun tulej Ryos tan skejseꞌn yi mar kale eꞌ icyꞌeꞌt cuꞌn yi eꞌ xonl Israel. 22 Chin skej nintzun ban chibeꞌ yi xonl Israel kale eꞌ icyꞌeꞌt. Na yi aꞌ nintzun oc chi cob tapij ẍchixlajak.
23 Tircuꞌn tzun yi eꞌ sanlar tetz yi faraón yi ateꞌ teꞌj chej tu cyakil yi eꞌ yi ateꞌ tul careꞌt eꞌ xom nin tan chitzꞌamleꞌn yi eꞌ xonl Israel, jalen nicyꞌal mar. 24 Poro yi tuleꞌn skil choꞌn na xmayin tzaj Ryos tul yi jun bocꞌoj sbakꞌ tu kꞌakꞌ. Yi tilol yi mbi na chiban yi eꞌ aj Egipto nintzun octz tan chixiteꞌn cuꞌn. 25 Poꞌteꞌn tzun yi toloꞌil yi chicareꞌt. Pentlen tunin na chixon. Itzun cyaltz:
—Keꞌlken ojk ẍchiwutz yi eꞌ xonl Israel na i Ryos na tzan tan oyintziꞌ skeꞌj, cheꞌch tzun yi eꞌ sanlar tetz Egipto.
26 Te yi rataꞌtz nintzun tal Ryos tetz Moisés:
—Moisés chaj nin akꞌab tibaj yi mar tan cweꞌn jopol tib yi mar nin tan cweꞌn squibaj yi eꞌ sanlar cwent Egipto tu cyakil yi eꞌ yi ateꞌ tib chej nin tul chicareꞌt.
27 I nin tulej Moisés quib yi tal Ryos tetz. Jeꞌn tzun ẍchajol Moisés yi kꞌab tibaj yi mar. Yi tuleꞌn skil sken bnix yi mar chi taneꞌn nin yi taxk chicyꞌ yi eꞌ xonl Israel tibaj. Ma yi quilol yi eꞌ aj Egipto yi xtxolbileꞌj nintzun kloꞌ eꞌ el ojktz, poro quiꞌ nin na nsken jopx yi chibeꞌ. Taꞌtz teꞌnin eꞌ cyajeꞌn cyen cyakil yi eꞌ sanlar tetz Egipto xe mar. Na Ryos nchimulkꞌun nin xe mar. 28 Yi tajeꞌn junt tir yi mar chi taneꞌn nin tircuꞌn tzun yi eꞌ sanlar cwent Egipto eꞌ bekꞌxij. Tircuꞌn eꞌ bekꞌxeꞌn yi eꞌ yi eꞌ xom nin tan chitzꞌamleꞌn yi eꞌ xonl Israel. Quiꞌc nin jun yi nink clax, ma na tircuꞌn chiquimeꞌn. 29 Poro yi eꞌ xonl Israel skꞌil cuꞌn quicyꞌeꞌn, na skej yi chibeꞌ kale eꞌ icyꞌeꞌt, na cob cuntuꞌ el yi mar. At jun txꞌakaj yi cyaj cyen le chimax nin junt txꞌakaj le chisbal, chi cob tapij ban ẍchixlaj.
30 Te yi jun kꞌejaꞌtz ja cheꞌ col Ryos yi eꞌ xonl Israel ẍchikꞌab cyakil yi eꞌ aj Egipto. Na yi eꞌ xonl Israel quil chiwankil cyakil yi eꞌ aj Egipto yi eꞌ quim xe mar. Choꞌn sanlcheꞌeꞌn tzaj stziꞌ aꞌ. 31 Yi quilol yi eꞌ xonl Israel yi porer Ryos yi ẍeꞌn cunin ban iꞌ tan chibiyleꞌn yi eꞌ sanlar tetz Egipto, nintzun cyakꞌ kꞌej Ryos nin kꞌukeꞌ mas chicꞌuꞌl teꞌj. Nchaꞌtz eꞌ ban te Moisés yi ẍchakum Ryos.