13
1 Nchaꞌtz tal Ryos tetz Moisés:2 “Jatx wok cyakil bajx icyꞌajl, tan chixconeꞌn swetz. Na cyakil yi bajx icyꞌajl yi axwok xonl Israel, eꞌ cuꞌn wetz. Nchaꞌtz cyakil yi bajx cyal yi itawun eꞌ cuꞌn wetz,” stzun Ryos tetz Moisés.
3 Yi tbital Moisés yi xtxolbileꞌj nintzun bentz tan talcheꞌn scyetz cyakil yi tanum. Poro bajx talol iꞌ yi yoleꞌj: “Sbneꞌ opon tunintz tajweꞌn tan chinaꞌwsaluꞌ yi jun kꞌejeꞌj yi ẍeꞌn cuꞌn ban Ryos tan cyelseneꞌl tzajuꞌ jakꞌ chicaꞌwl yi eꞌ aj Egipto tan yi tetz porer kale ateꞌtuꞌ tetz esclaw. Nin te yi jun kꞌejaꞌtz quiꞌc cu tan chibajsaluꞌ pam yi at xtxꞌamil. 4 Chinach cuꞌnuꞌ yi tajlal yi xaw te yi jun kꞌejeꞌj yi iꞌtz jun kꞌej tetz xaw Abib. 5 Ej nin yil choponuꞌ le amaꞌl yi suknak Ryos scyetz yi eꞌ kamam kateꞌ, yi jun amaꞌlaꞌtz yi chumbalaj nin, kale najlcheꞌt yi eꞌ cananeo, eꞌ hitita, eꞌ amorreo, eꞌ heveo tu eꞌ jebuseo, tajweꞌn tan chinaꞌwsaluꞌ yi jun kꞌejeꞌj cyakil tiemp. 6 Yil tzꞌicyꞌ yi jun balaj kꞌejaꞌtz cyanuꞌ baꞌn chibajsajuꞌ yi pam yi quiꞌc xtxꞌamil.a Juk kꞌej chibanuꞌ tan bajseꞌn. Poro le jukiꞌn kꞌejaꞌtz baꞌn chibanuꞌ jun balaj kꞌej tan takꞌleꞌn kꞌej Kajcaw. 7 Tul yi juk kꞌejaꞌtz ntin pam yi quiꞌc xtxꞌamil sbajk cyanuꞌ. Ej nin quiꞌc cuj tan jaleꞌn muꞌẍ xtxꞌamil pam ẍchixoꞌluꞌ, nka jun pam yi at xtxꞌamil. 8 Ej nin tul yi jun kꞌejaꞌtz baꞌn cyaluꞌ scyetz chinitxajiluꞌ yi mbi na elepont yi kꞌejaꞌtz. Ej nin baꞌn cyaluꞌ scyetz: ‘Yi jun xtxolbileꞌj iꞌtz tan naꞌwseꞌn yi kꞌejlal yi keleꞌn tzaj tan Ryos jakꞌ chicaꞌwl yi eꞌ aj Egipto,’ cheꞌchuꞌ sban scyetz. 9 Tajweꞌn cunin tan quicyꞌsaluꞌ yi jun kꞌejaꞌtz na niꞌcuꞌn sbneꞌ chi atk jun techl wutz chikꞌabuꞌ nka wutzak chiplajuꞌ tan naꞌwseꞌn scyeruꞌ yi tajweꞌn tan chinaꞌwsaluꞌ yi caꞌwl Ryos. Na tan tuꞌ yi porer iꞌ ncheꞌlsan tzajuꞌ jakꞌ chicaꞌwl yi eꞌ aj Egipto. 10 Chaꞌstzun te tajweꞌn tan ticyꞌeꞌn yi jun kꞌejaꞌtz cyanuꞌ cyakil yob le xaweꞌj.
11 ”Ej nchaꞌtz yil choponuꞌ tan Ryos le chiluwar yi eꞌ aj Canaán, yi amaꞌl yi suknak iꞌ scyeruꞌ, nin scyetz yi eꞌ chimam chiteꞌuꞌ, 12 tajweꞌn yil chijatxuꞌ yi bajx chicyꞌajluꞌ tetz Ryos. Nchaꞌtz cyakil yi bajx cyal yi cyawunuꞌ yi mam, tajweꞌn yil cyakꞌuꞌ tetz Ryos. 13 Ma yi bajx cyal yi eꞌ buruꞌ baꞌn chitxꞌexuꞌ tu jun tal neꞌẍ cneꞌr nka tu jun tal chiw. Poro ko qui na cyajuꞌ yil chitxꞌexuꞌ baꞌn chiwakꞌeꞌnuꞌ yi kul. Nchaꞌtz na taj yil chibanuꞌ te yi bajx chicyꞌajluꞌ. Tajweꞌn yil chitxꞌexuꞌ tu jun neꞌẍ cneꞌr tan claxeꞌn. 14 Ej nin tzantzaj yil chijak yi eꞌ chinitxajiluꞌ yi mbi na elepont yi xtxolbileꞌj, baꞌn cyaluꞌ scyetz: ‘Na kaban yi xtxolbileꞌj tan naꞌwseꞌn yi ẍeꞌn cunin ban Ryos tu yi tetz porer tan kelseꞌneꞌl tzaj jakꞌ chicaꞌwl yi eꞌ aj Egipto kale oꞌ aꞌteꞌt tetz esclaw jakꞌ chicaꞌwl. 15 Na yi stzeꞌtzaxeꞌn yi talmaꞌ faraón yi qui nin takꞌ iꞌ amaꞌl sketz tan keleꞌn tzaj ẍchixoꞌl, ja chiquim cyakil yi bajx chicyꞌajl yi eꞌ aj Egipto tan Ryos. Nchaꞌtz ban yi bajx cyal yi eꞌ txuc. Chaꞌstzun te na koy yi bajx cyal yi eꞌ txuc tetz Ryos, nin nchaꞌtz na kakꞌ jun neꞌẍ cneꞌr tan qui chiquimeꞌn yi bajx kacyꞌajl. 16 Nin yi jun xtxolbileꞌj niꞌcuꞌnk chi atk jun techl sbneꞌ wutz ikꞌab nka wutz iplaj tan naꞌwseꞌn tzitetz yi ẍeꞌn cunin ban Ryos tu yi tetz porer tan kelseꞌneꞌl tzaj Egipto,’ cheꞌchuꞌ sban scyetz chinitxajiluꞌ.”
Yi jun bocꞌoj sbakꞌ tu kꞌakꞌ yi bajx cuꞌn ẍchiwutz Israel
17 Itzun bantz yi tkꞌol faraón amaꞌl scyetz yi eꞌ xonl Israel tan cyeleꞌn tzaj Egipto, qui nin eꞌ ben tcyꞌal Ryos le beꞌ yi quenin na opon le amaꞌl ẍchixoꞌl yi eꞌ filistey. Na nin oc Ryos tan xtxumleꞌn ko tzun chipakxij junt tir Egipto yil choꞌc yi eꞌ filistey tan oyintziꞌ scyeꞌj. 18 Chaꞌstzun te eꞌ beneꞌn tcyꞌal le amaꞌl tzꞌinunin tuꞌ tan cyoponeꞌn stziꞌ yi Cyak Mar. Yi cyeleꞌn tzaj yi eꞌ xonl Israel Egipto choꞌn cunin eꞌ ban chi na chiban alaꞌ kꞌuꞌj sanlar. 19 Ma tetz Moisés nintzun cawunin tan beneꞌn quicyꞌal yi bakil kꞌajtzun Ẍep. Na, cawun cyen iꞌ scyetz yi eꞌ xonl tan chibnol yi xtxolbileꞌj. Nin je yol iꞌeꞌj: “Jun cuꞌn yol waleꞌ cyen tzitetz yi tzꞌocopon Ryos tan ichꞌeyeꞌn nin tan itelseꞌn tzoneꞌj. Nin yil bajij yi jeꞌj tajweꞌn tan beneꞌn itcyꞌal yi imbakil tziteꞌj,” stzun Ẍep banak cyen.
20 Yi cyeleꞌn tzaj yi eꞌ xonl Israel le amaꞌl Sucot cwent Egipto, choꞌn tzun cyoponeꞌn le amaꞌl Etam stziꞌ yi amaꞌl tzꞌinunin tuꞌ. 21 Ej nin yi na chixon chajkꞌej bajxij Ryos ẍchiwutz tul jun bocꞌoj sbakꞌ tan ẍchajleꞌn yi chibeꞌ. Ma lakꞌbal bajxij Ryos ẍchiwutz tul jun bocꞌoj kꞌakꞌ tan xtxekeꞌn chibeꞌ. Chaꞌstzun te ja chixon skꞌejl nin lakꞌbal. 22 Bajx cuntunin yi jun bocꞌoj sbakꞌaꞌtz ẍchiwutz chajkꞌej. Ma lakꞌbal bajx cuntunin yi jun bocꞌoj kꞌakꞌaꞌtz ẍchiwutz tan xtxekeꞌn yi chibeꞌ.