Yi Pasc
12
1 Itzun bantz nintzun jilont Ryos tetz Moisés tu Aarón le amaꞌl Egipto, itzun tal scyetz:2 “Yi jun xaweꞌj tzꞌocopon tetz bajx xaw tetz yi yob nin sbneꞌ opon tunintz bajx xaw sbneꞌ. 3 Chaꞌstzun te alwok scyetz cyakil yi eꞌ xonl Israel yi xtxolbileꞌj: ‘Tul yi lajuj tajlal yi xaweꞌj, tajweꞌn tan chijoyol yi jujun najal jun cneꞌr nka jun chiw tan cyoyil swetz, jun le jujun najal. 4 Ma ko cobox intziꞌ chixoneꞌn jun najal nin qui nin chixcyeꞌ tan bajseꞌn jun cneꞌr nka jun chiw, baꞌn tzun chijilon tetz yi chiwisin yi at mas nakaꞌj. Junit tzun chiban tan bajseꞌn yi jun txucaꞌtz. Baꞌn chijatx cuꞌn ẍchixoꞌl. Tunin xomquen cyaꞌn te cyajlal le jujun najal. 5 Tajweꞌn yi tzijoy wok jun cneꞌr yi mam yi ja wiꞌt tzꞌak jun yob taꞌn, nin yi quiꞌc muꞌẍ tal yanaꞌsil. Quiꞌc na ban yi ko cneꞌr nka chiw. 6 Yil jal yi cneruꞌ nka yi chiw tajweꞌn tan colcheꞌn, jalen yil jepon yi cyajlaj tajlal yi xaw tajweꞌn tan cweꞌn ibiyol. Poro baꞌn tzibiy wok cuꞌn cweꞌn kꞌej. 7 Kalel bajeꞌt yi jun cneꞌraꞌtz, baꞌn tzisukꞌ wok cyen yi ẍchꞌel teꞌjak yi marquil yi puertil icaꞌl. 8 Yi jun cneꞌraꞌtz baꞌn tzibajswok ninin te akꞌbalaꞌtz nin boxij tzitulej wok. Baꞌn tzibajsaj wok tu eꞌchk cꞌaꞌ itzaj tu pam yi quiꞌc xtxꞌamil. 9 Quiꞌc cuj tan ibajsal yi chibaj yi txaꞌxenlen nka yi txiquij sban, ma na cyakil yi tkan tu yi wiꞌ tu cyakil yi talmaꞌ nka yi eꞌchk takleꞌn yi at tcꞌuꞌl, cyakil boxij cuꞌn sbneꞌ. 10 Nin tajweꞌn tan ibajsal cyakil. Na qui tajweꞌn tan sowrineꞌn nin kol sowrin baꞌn tcuꞌn yi tzitzꞌeꞌswok cuꞌn. 11 Nin nchaꞌtz bajx wekwok itib, banwok list te beꞌch itetz, nin yi ixajab. Ej nin tzꞌamwokeꞌn yi itxꞌamij, kalenaꞌs tzun baꞌn tzibajswokeꞌn yi cneꞌr lajkeꞌl na yaꞌstzun yi Pasc tetz Kataj. 12 Na te yi akꞌbalaꞌtz nicyꞌak tan chibiyleꞌn cyakil yi eꞌ bajx chicyꞌajl yi eꞌ aj Egipto. Nchaꞌtz wulej yi bajx cyal yi eꞌ txuc, nin wakꞌeꞌ chicaws yi eꞌchk ryos cwent Egipto. Tzꞌelepon cuꞌn teꞌj yi xtxolbileꞌj na iꞌtz inyol yi in iTaj Jehová.
13 ’Ma yi chichꞌ yi tzꞌocopon itaꞌn te marquil yi puertil icaꞌl, xconk tetz jun techl yi choꞌn atixwok le caꞌlaꞌtz tan qui iquimeꞌn, na yil wil yi at chichꞌ teꞌjak puert nicyꞌpon nin quil cxquim wok, na cyakil yi eꞌ aj Egipto ẍchiquimok waꞌn. 14 Baꞌn tzinach wok cuꞌn yi jun kꞌejaꞌtz, na iꞌtz jun balaj kꞌej nin tzibneꞌ wok jun balaj kꞌej tetz Kataj. Na yi jun kꞌejaꞌtz tajweꞌn tan ibnol wok taneꞌn chi jun ley. Nin sbneꞌ opon tunintz tajweꞌn tan chibnol taneꞌn yi initxaꞌ tu cyakil yi eꞌ imamaj. 15 Nchaꞌtz sbajk pam yi quiꞌc xtxꞌamil itaꞌn, tetz juk kꞌej, nin yil xeꞌtij yi bajx kꞌej tajweꞌn yi quiꞌc muꞌẍ xtxꞌamil pam yi nink jal le jun caꞌl. Nin yi jun yil baj yi pam yi at xtxꞌamil taꞌn tul yi juk kꞌejaꞌtz, tzꞌelpon lajuꞌn tzixoꞌl wok. 16 Le bajx kꞌej tu yi wiꞌtzbil kꞌej tajweꞌn tan imolol itib tan banleꞌn jun balaj kꞌejaꞌtz. Tul yi cob kꞌejaꞌtz cyaꞌl jun tzꞌakꞌuj, ntin cuꞌn tan banleꞌn yi iwaꞌ baꞌn cxakꞌuj jun rat, na yi cob kꞌejaꞌtz chin xan nin. 17 Yi jun kꞌejaꞌtz tetz yi pam yi quiꞌc xtxꞌamil iꞌtz jun balaj kꞌej yi tajweꞌn tan ticyꞌeꞌn wutz kꞌej itaꞌn, na yaꞌstzun yi kꞌej yi xelepon wok tzoneꞌj Egipto. Chaꞌstzun te tzibneꞌ wok taneꞌn yi jun kꞌejaꞌtz sbneꞌ opon tunintz, nin iꞌtz jun ley yi tajweꞌn tan ibnol taneꞌn, nin tan chibnol taneꞌn yi eꞌ initxaꞌ. 18 Sbajk yi pam yi quiꞌc xtxꞌamil itaꞌn. Juk kꞌej sbneꞌ, na cxeꞌtok wok tan bajseꞌn cweꞌn kꞌej le cyajlaj tajlal yi bajx xaw tetz yi yob, jalen cweꞌn kꞌej le junakjun tajlal yi iteꞌn nin xawaꞌtz. 19 Tul yi juk kꞌejaꞌtz quiꞌc cuj tan jaleꞌn muꞌẍ xtxꞌamil pam le jun caꞌl. Na cyakil yi eꞌ yi sbajk pam cyaꞌn yi at xtxꞌamil, juncuꞌn chelepon lajuꞌn tzixoꞌl wok. Quiꞌc na ban ko awer nak iꞌ nka mero xonl Israel. 20 Chaꞌstzun te cyaꞌl jun bajsan yi eꞌchk takleꞌn yi at xtxꞌamil. Ma na baꞌn tzibajswok yi eꞌchk takleꞌn yi quiꞌc xtxꞌamil alchok atixeꞌt nin alchok amaꞌlil yi xaꞌt cuꞌnt,’ ” stzun Ryos bantz tetz Moisés.
21 Itzun bantz nintzun el mantar tan Moisés tan chichakleꞌn cyakil yi eꞌ wiꞌ banl wiꞌ tetz Israel. Nintzun taltz scyetz: “Eꞌuꞌ jun cꞌoloj kacmon chibenkuꞌ tan ticyꞌleꞌn jun neꞌẍ cneruꞌ nka jun chiw, jujun le jun najbil. Baꞌn chibiycuꞌnuꞌ na skabneꞌ jun balaj kꞌej yi iꞌtz yi Pasc. 22 Ma yi ẍchꞌel yi cneꞌr baꞌn molxij tul jun plancan nin yil molxij baꞌn tzun chijoyuꞌ jun tal sbil nka jun kꞌab xtzeꞌ tan sukꞌleꞌn cyen teꞌjak yi marquil yi chipuertuꞌ. Cyaꞌl tzun jun tzꞌel tzajtz te akꞌbalaꞌtz jalen yil tzꞌul skil. 23 Na yil tzꞌicyꞌak yi Kataj tan chibiyleꞌn cyakil yi bajx chicyꞌajl yi eꞌ aj Egipto stileꞌ yi at yi chichꞌ teꞌjak yi marquil yi chipuertuꞌ. Nin yil til yi at chichꞌ teꞌjak yi chipuertuꞌ tzꞌicyꞌpon tzun iꞌ-tz, nin quil chiquim yi eꞌ bajx chicyꞌajluꞌ taꞌn. 24 Nin yi jun caꞌwleꞌj tajweꞌn tan chibnoluꞌ taneꞌn scyuchꞌ cyakil yi chixonluꞌ sbneꞌ opon tunintz. 25 Nin yil choponuꞌ le amaꞌl yi sukiꞌnt tan Ryos scyeruꞌ tajweꞌn tan chibnoluꞌ taneꞌn yi jun xtxolbilaꞌtz. 26 Ej nin yil chijak yi chinitxajiluꞌ scyeruꞌ yi mbi xac yi jun kꞌejaꞌtz yi na chibanuꞌ, 27 baꞌn cyaluꞌ: ‘Yi jun kꞌejaꞌtz yi na icyꞌ skaxoꞌl iꞌtz Pasc nin yi na quim yi cneꞌr iꞌtz jun katxꞌixwatz tan takꞌleꞌn kꞌej Kataj. Na yi chiquimeꞌn yi bajx chicyꞌajl yi eꞌ aj Egipto taꞌn, quiꞌc nintzun oc tajaltz scyeꞌj yi bajx chicyꞌajl yi xonl Israel yi ateꞌ-tz Egipto. Chaꞌstzun te chiclaxeꞌn cyakil cuꞌn yi eꞌ kaxonl,’ ” stzun Moisés bantz scyetz cyakil cuꞌn yi eꞌ xonl Israel.
Yi quibital yi eꞌ xonl Israel yi xtxolbileꞌj chicweꞌn tzun mejloktz tan takꞌleꞌn kꞌej Ryos. 28 Ej nin eꞌ ban taneꞌn cyakil yi xtxolbil yi tal Ryos tetz Moisés tu Aarón.
Yi chiquimeꞌn cyakil yi bajx chicyꞌajl yi eꞌ aj Egipto
29 Itzun bantz yi toponeꞌn nicyꞌakꞌbal nintzun eꞌ quim cyakil yi bajx chicyꞌajl yi eꞌ aj Egipto tan Ryos. Tircuꞌn tzun eꞌ quimtz, quiꞌc na ban yi ko ric nka meꞌbaꞌ, chi taneꞌn yi bajx cyꞌajl faraón jalen te yi bajx cyꞌajl yi yaj yi at pres. Nchaꞌtz ban yi bajx cyal cyakil yi eꞌ txuc. Tircuꞌn chiquimeꞌn. 30 Yi chiquimeꞌn, tircuꞌn tzun yi eꞌ wunak eꞌ baj cꞌas len. Nchaꞌtz ban faraón scyuchꞌ yi eꞌ mas ajcaw yi ateꞌ xlaj tan cawuꞌn. Chin bisbil nin ban yi jun akꞌbalaꞌtz na cyakil cunin yi eꞌ wunak na chokꞌ len tan bis, na quiꞌc nin jun najal yi quiꞌk jun almaꞌ scyuchꞌ. 31 Iteꞌn nin te rataꞌtz beneꞌn mantar yi faraón tan chichakleꞌn Moisés tu Aarón. Ma yi cyoponeꞌn Moisés nintzun taltz scyetz:
—Ma jaluꞌ Moisés, baꞌn tcuꞌn quiloꞌk wok tan cꞌuꞌlajeꞌn yi iRyosil chi yi na cxtzan wok tan talcheꞌn. Na baꞌn tcuꞌn yi cxeꞌl wok skaxoꞌl. 32 Baꞌn cxben wok icyakil cuꞌn, cyꞌaj wok nin cyakil yi itawun chi yi txumijt itaꞌn. Baꞌn cxeꞌl wok ninin jaluꞌ nin nachwok tuꞌ Kataj swibaj, stzun yi faraón bantz scyetz Moisés tu Aarón.
33 Itzun yi eꞌ wunak cwent Egipto cyoqueꞌn tzuntz tan chilajeꞌn len yi eꞌ xonl Israel yi ateꞌ ẍchixoꞌl. Na nin eꞌ oc tan xtxumleꞌn ko tzun chiquim chicyakil cuꞌn. 34 Lajkeꞌl nintzun cyoqueꞌn yi eꞌ xonl Israel tan cuꞌseꞌn yi kꞌotil pam yi ntaxk cuꞌ xtxꞌamil cyꞌaꞌn tulak yi cuꞌlbil, nin tircuꞌn tu yi cuꞌlbil cweꞌn quikꞌol tulak chixbuꞌk nin baj jeꞌ cyekaltz. 35 Nchaꞌtz cawunin Moisés scyetz cyakil yi eꞌ xonl Israel tan chibeneꞌn tan jakleꞌn oro tu sakal nin eꞌchk beꞌchok scyetz yi eꞌ aj Egipto. 36 Toqueꞌn tzun tkꞌol Ryos le chitxumuꞌn yi eꞌ aj Egipto tan quikꞌol cyakil yi mbi cuꞌn na chijak yi eꞌ xonl Israel scyetz, nin tan yi xtxolbileꞌj el tzaj quicyꞌal cyakil chimeꞌbiꞌl yi eꞌ aj Egipto.
Yi cyeleꞌn tzaj yi eꞌ xonl Israel Egipto
37 Itzun bantz eleꞌn tzaj nintzun eꞌ ban yi eꞌ xonl Israel le amaꞌl Ramsés tan cyoponeꞌn Sucot. Yi cyajlal yi cyeleꞌn tzaj iꞌtz kak cient mil chixoneꞌn yi eꞌ yaj yi nsken tzꞌak chitiemp nka yi eꞌ yi nsken opon chitiemp tetz sanlariꞌn. Qui eꞌ oc yi eꞌ xnaꞌn tu nitxaꞌ cyajlal. 38 Wiꞌnin tzun wunak yi nkꞌeꞌtz eꞌ xonl Israel eꞌ xomnin ẍchixoꞌl. Nchaꞌtz wiꞌnin wacẍ tu cneꞌr eꞌ xomnin scyeꞌj. 39 Nin tan paj yi ojkeꞌl yi cyeleꞌn tzaj qui nin bnix chiwaꞌ tetz chibeꞌ, na nin eꞌ oc yi eꞌ aj Egipto tan chilajeꞌn len le cyetz chitanum. Cyoqueꞌn tzuntz tan banleꞌn pam te yi kꞌot yi cyꞌaꞌn cyaꞌn. Na ntaxk txꞌamin.
40 Cyaj cient tu junaklaj yob eꞌ aꞌtij yi eꞌ xonl Israel le amaꞌl Egipto. 41 Na nintzun tzꞌak yi cyaj cient tu junaklaj yobaꞌtz cyaꞌn te yi kꞌejaꞌtz yi cyeleꞌn tzaj. Chicweꞌn tzun chicyakil yi tanum Ryos tbeꞌ. 42 Te yi jun akꞌbalaꞌtz Ryos oc tan chiqꞌuicyꞌleꞌn nin tan cyelseneꞌl tzaj Egipto. Chaꞌstzun te yi jun akꞌbalaꞌtz iꞌtz tetz Kataj, na yaꞌstzun yi akꞌbal tan takꞌleꞌn kꞌej iꞌ. Ej nin chin tajweꞌn cunin tan chinaꞌwsal yi eꞌ xonl Israel yi jun akꞌbalaꞌtz sbneꞌ opon tunintz. Nchaꞌtz ẍchibneꞌ yi eꞌ chixonl tajweꞌn tan chinaꞌwsal yi jun kꞌejaꞌtz.
Cobox caꞌwl tetz Pasc
43 Jiloneꞌn tzun Ryos tetz Moisés tu Aarón itzun taltz: “Je cobox caꞌwleꞌj yi tajweꞌn tan ixomeꞌn teꞌj tan ticyꞌseꞌn Pasc: Quiꞌc cuj tan bajsal jun awer wunak yi ẍchiꞌbel yi txuc yi spat-xok tetz itxꞌixwatz. 44 Poro ko at jun imos yi lokꞌij taneꞌn baꞌn sbajsaj iꞌ ntin ko banij circuncidar. 45 Quiꞌc cuj tan bajsal jun awer wunak yi ẍchiꞌbel yi txuc yi na ipat tetz itxꞌixwatz, mpe ik jun awer wunak yi na icyꞌ cuꞌn tzixoꞌl wok nka jun imos yi na ichoj wok tan akꞌun, quiꞌc cuj tan bajeꞌn taꞌn. 46 Nin yi chiꞌbaj tajweꞌn tan bajeꞌn cyakꞌun yi jujun najal xeꞌak chicaꞌl. Na cyaꞌl jun tzꞌelsan tzaj yi chiꞌbaj xe caꞌl, nin cyaꞌl jun puchꞌun cuꞌn siquier jun scyeri bakil yi itxꞌixwatzaꞌtz. 47 Ej nin yi jun xtxolbileꞌj tajweꞌn tan ibnol taneꞌn yi axwok xonl Israel. 48 Poro ko at jun awer wunak yi at tzixoꞌl yi na taj yil sban taneꞌn yi Pasc tan takꞌleꞌn kꞌej Kataj, tajweꞌn tan bnol circuncidar tib. Nchaꞌtz cyakil yi eꞌ yaj yi ateꞌ le najbil iꞌ tajweꞌn tan chibnol circuncidar quib. Ej nin kalenaꞌs tzun sban taneꞌn yi jun kꞌejaꞌtz. Na niꞌcuꞌn tzun sbneꞌ iꞌ-tz chi jun mero xonl Israel. Poro ko nkꞌeꞌtz circuncidado quiꞌc cuj tan bajeꞌn taꞌn. 49 Iteꞌn nintzun leyaꞌtz xconk scyetz yi eꞌ awer nak yi nchitzꞌij nin yi eꞌ yi ateꞌ tzixoꞌl wok.”