Yi tlol Ryos yi at chiquimbil cyakil yi bajx chicyꞌajl yi eꞌ wunak Egipto
11
1 Itzun bantz nintzun jilon Ryos tetz Moisés, itzun taltz:—Tajweꞌn tan wakꞌol junt caws faraón scyuchꞌ cyakil yi eꞌ aj Egipto. Ej nin yil tzꞌicyꞌ yi jun chicawsaꞌtz stkꞌeꞌ iꞌ amaꞌl tzitetz tan iteleꞌn wok tzoneꞌj. Na iꞌ teꞌnin faraón tzꞌocopon tan ilajeꞌn len tan iteleꞌn wok tzoneꞌj. 2 Chaꞌstzun te alaj scyetz cyakil yi eꞌ xonl Israel tan cyoqueꞌn tan jakleꞌn eꞌchk oro tu sakal scyetz chiwisin yi aj Egipto.
3 Nintzun takꞌ Ryos yi banl squibaj yi eꞌ xonl Israel na nin jal chibalajil ẍchiwutz cyakil yi eꞌ aj Egipto. Nchaꞌtz eꞌ ban yi eꞌ ajcaw yi na chicawun xlaj faraón nin cyakꞌ kꞌej Moisés. Ej nin cyakil yi eꞌ aj Egipto chumbalaj nin eꞌ bantz scyeꞌj yi eꞌ xonl Israel.
4 Ej itzun ban, nin tal Moisés tetz faraón:
—Taꞌ faraón je yol yi ketz kaRyosil: “Chin xonk ẍchixoꞌl yi eꞌ aj Egipto axen nicyꞌakꞌbal. 5 Ej nin ẍchiquimok cyakil yi bajx cyꞌajol waꞌn. Chicyakil cuꞌn ẍchiquimok. Quiꞌc na ban ko at chikꞌej chitaj nka quiꞌc. Chi taneꞌn yi faraón yi at kꞌej, squimok yi bajx cyꞌajl waꞌn, nin yi eꞌ yi quiꞌc chikꞌej chi quitaneꞌn yi eꞌ yi na chakꞌuj wi cojbil ẍchiquimok yi cyetz waꞌn. Nchaꞌtz ẍchibneꞌ yi bajx cyal yi eꞌ txuc. Tircuꞌn ẍchiquimok. 6 Wiꞌnin tzun bis oꞌkl sbajoktz beneꞌn tziꞌn Egipto. Wiꞌnin eꞌ chiẍchꞌink tan bis na qui otojt na bajij yi xtxolbileꞌj ẍchixoꞌl.” 7 Nin tan teleꞌn chitxumuꞌ tetz yi apart yi oꞌ xonl Israel ẍchiwutz yi eꞌ aj Egipto, siquier nink jun txꞌiꞌ yi nink wojon cyen te jun xonl Israel, mpe ik te cyawun. 8 Ma jaluꞌ chicyakil cuꞌn tzun yi eꞌ wiꞌtz ajcaweꞌj, chuꞌl tan cuꞌswutzil tzinwutz nin chicopon mejlok tzinwutz. Ej nin scyaleꞌ swetz: “Bneꞌuꞌ pawor taꞌ tan cyeleꞌnuꞌ scyuchꞌ cyakil tanumuꞌ.” Poro ko quil chiban yi xtxolbileꞌj quil keꞌl, stzun Moisés bantz tetz yi rey.
Wiꞌnin tzun ẍchiꞌcheꞌn cꞌuꞌl Moisés yi teleꞌn tzajtz tan yol tetz faraón. 9 Beneꞌn tzun tlol Ryos tetz Moisés:
—Jun cuꞌn yol quil takꞌ faraón amaꞌl tzitetz tan iteleꞌn. Ma na tajweꞌn cuꞌn tan inchajol mas eꞌchk milawr tzoneꞌj Egipto kalenaꞌtz tzun ltakꞌ amaꞌl tan iteleꞌn, stzun Ryos bantz tetz Moisés.
10 Ja bnix cyakil eꞌchk milawraꞌtz swutz faraón cyaꞌn Moisés tu Aarón. Poro yi tetz faraón mas tcunin stzeꞌtzaxeꞌn talmaꞌ tan Ryos na qui nin takꞌ iꞌ amaꞌl tan cyeleꞌn yi eꞌ xonl Israel Egipto.