Yi waxakiꞌn chicaws yi eꞌ aj Egipto yi sacꞌ cuꞌn ban
10
1 Nintzun tal Ryos junt tir tetz Moisés:—Na waj yi cẍben junt tir tan yol tetz faraón. Na ja tzeꞌtzax yi talmaꞌ waꞌn scyuchꞌ yi eꞌ mas ajcaw yi na chicawun xlaj. Yaꞌstzun nwulej na na waj tzimban wiꞌnin eꞌchk milawr ẍchiwutz tan inchajol imporer scyetz. 2 Nchaꞌtz tajweꞌn tan italol yi eꞌchk milawraꞌtz scyetz yi eꞌ initxaꞌ scyuchꞌ yi eꞌ imamaj tan teleꞌn chitxum tetz yi ẍeꞌn cuꞌn ban yi mmeꞌl chikꞌej yi eꞌ aj Egipto waꞌn bantz teleꞌn chitxum tetz yi in Jehová iRyosil, stzun Ryos tetz Moisés.
3 Chibeneꞌn tzun Moisés tu Aarón tan yol tetz faraón. Yi cyoponeꞌn nintzun cyaltz:
—Je yol kaRyosileꞌj yi oꞌ hebrey: “¿Tonaꞌ cẍoc juy tzinwutz? ¿Tonaꞌ tzawakꞌ amaꞌl scyetz yi eꞌ intanum tan chibeneꞌn tan incꞌuꞌlajeꞌn le amaꞌl yi ja wiꞌt wal scyetz? 4 Na ko quil tzawakꞌ amaꞌl scyetz, ninin eklen tzꞌul inchakol jun chin cꞌoloj sacꞌ yi chinojk beneꞌn tziꞌn Egipto. 5 Nin yi jun icawsaꞌtz chin xoꞌwbil nin sbneꞌ, na snojk cunin yi wuxtxꞌotxꞌ taꞌn. Ej nin sbajk cyakil yi eꞌchk takleꞌn cyaꞌn yi eꞌ clax cyen tan yi cꞌub aꞌbal nin sbajk cyakil yi eꞌchk tzeꞌ cyaꞌn yi at wi cojbil beneꞌn tziꞌn. 6 Chin xoꞌwbil nin sbneꞌ, na chocopon xe yi caꞌluꞌ kale na cawuneꞌtuꞌ. Nchaꞌtz chocopon xe yi chicaꞌl yi wiꞌtz bajxom yi ateꞌ xlajuꞌ tan cawuꞌn. Nchaꞌtz xe chicaꞌl cyakil yi eꞌ aj Egipto. Yi jun xtxolbileꞌj yi sbajok, qui otoj na bajij beneꞌn tziꞌn wi munt nin sajleꞌn tunintz scyeꞌj yi eꞌ chimam chiteꞌuꞌ,” stzun Ryos swetz, stzun Moisés.
Yi wiꞌt tlol Moisés yi xtxolbileꞌj nintzun el tzaj iꞌ xe yi caꞌl yi faraón: 7 Yi cyeleꞌn tzaj Moisés nintzun cyal yi eꞌ ajcaw yi ateꞌ xlaj faraón.
—Taꞌ, ¿tonaꞌ ltaneꞌ yi jun yajaꞌtz tan kaxuxeꞌn? Baꞌn tcuꞌn yi nink takꞌuꞌ amaꞌl scyetz yi eꞌ tetz tanum tan chibeneꞌn tan cꞌuꞌlajeꞌn yi cyetz chiryosil, na ¿qui peꞌ na el xtxumuꞌ tetz yi ja wiꞌt el cuꞌn katanum swutz tan paj yi qui na takꞌuꞌ amaꞌl scyetz? cheꞌch tzun bantz tetz faraón.
8 Beneꞌn tzun mantar faraón tan chichakleꞌn Moisés tu Aarón. Yi cyoponeꞌn nintzun taltz scyetz:
—Ma jaluꞌ baꞌn cxben wok tan cꞌuꞌlajeꞌn yi iRyosil. Poro alcyen swetz naꞌ scyetz eꞌ yi nchiben.
9 —Kacyakil nkaben scyuchꞌ yi eꞌ kanitxaꞌ tu yi eꞌ katijl cꞌuꞌlal. Nchaꞌtz cyakil yi eꞌ kawun. Na iꞌtz jun balaj kꞌej yil skabneꞌ swutz Ryos, stzun Moisés tetz rey.
10 —Lajluch cunin yi mbi i ilaꞌtz yi itxumuꞌn, nin iꞌtz tan insubleꞌn tuꞌ na itajwok. Tan paj yi yaꞌtz nin itxumuꞌn quil xom Ryos tziteꞌj. Nchaꞌtz quil wakꞌ amaꞌl tzitetz tan ibeneꞌn icyakil cuꞌn. 11 Ma na ntin swakꞌeꞌ amaꞌl scyetz yi eꞌ yaj tan chibeneꞌn tan cꞌuꞌlajeꞌn yi iRyosil na yaꞌstzun na itajwok.
—Moisés akꞌeꞌn akꞌab tcyaꞌj tan achajol yi at imporer tibaj cyakil Egipto nin tan chisajeꞌn sacꞌ tan bajseꞌn cyakil yi eꞌchk tzeꞌ yi nchiclax cyen tkꞌab yi cꞌub aꞌbal.
13 Nintzun je tkꞌol Moisés yi xtxꞌamij tcyaꞌj tibaj Egipto. Sajeꞌn nintzun ban jun chin wutzileꞌn cyekꞌekꞌ teleꞌn tziꞌn. Skꞌejl tu lakꞌbal ban yi jun chin wutzileꞌn cyekꞌekꞌaꞌtz. Nin tul yi jun chin wutzileꞌn cyekꞌekꞌaꞌtz choꞌn cyuleꞌn yi sacꞌ. 14 Nojeꞌn tzun cyakil Egipto cyaꞌn. Qui otojt na bajij yi jun chin wutzileꞌn chicawsaꞌtz, nin quil bajij sbneꞌ opon tunintz, na wiꞌnin sacꞌ bantz te jun kꞌejaꞌtz. 15 Wiꞌnin tzun sacꞌ bantz nin tircuꞌn jopxeꞌn yi wuxtxꞌotxꞌ cyaꞌn. Nchaꞌtz baj cyakil xtzeꞌ cyaꞌn, tuml yi eꞌchk tzeꞌ yi clax tkꞌab yi cꞌub aꞌbal. Quiꞌc nintzun jun wiꞌ tzeꞌ ban cyen beneꞌn tziꞌn Egipto. Nchaꞌtz cyakil eꞌchk xtzeꞌ, tircuꞌn baj cyaꞌn.
16 Yi tilol faraón yi xtxolbileꞌj nintzun ẍchak iꞌ Moisés tu Aarón. Itzun taltz scyetz:
—Ja injuch wil swutz Ryos nin nchaꞌtz tziwutz wok. 17 Ma jaluꞌ na waj tzinjak cuybil impaj tzitetz nin nchaꞌtz nachwok Kataj swibaj tan cuyul Ryos impaj nin tan telseꞌn yi jun chin wutzileꞌn incawseꞌj yi ja ul, stzun yi faraón bantz tetz Moisés.
18 Yi tbital Moisés yi xtxolbileꞌj nintzun el tzaj iꞌ kale atiteꞌt faraón nin oc iꞌ-tz tan nachleꞌn Kataj Ryos. 19 Nintzun tbit Ryos yi oración Moisés. Xtxꞌixpul tzun Ryos yi tojkbil yi cyekꞌekꞌ. Choꞌn tzun sajeꞌn yi cyekꞌekꞌ toqueꞌn tziꞌn. Nintzun icyꞌ tcyaꞌj yi eꞌchk sacꞌ yi ateꞌ Egipto. Choꞌn tzun cyoponeꞌn taꞌn tul yi Cyak Mar. Quiꞌct nin tzun jun sacꞌ ban quentz Egipto. 20 Ja til faraón cyakil yi xtxolbileꞌj, poro qui nin takꞌ amaꞌl scyetz yi eꞌ xonl Israel tan cyeleꞌn tzaj, na nsken tzeꞌtzax yi talmaꞌ tan Ryos.
Yi toqueꞌn tzꞌoꞌtz swutz kꞌej tetz chicaws yi eꞌ aj Egipto
21 Itzun bantz nintzun jilon junt tir Ryos tetz Moisés, itzun taltz:
—Ma jaluꞌ Moisés akꞌeꞌn akꞌab tcyaꞌj. Ej nin tzꞌocopon tzꞌoꞌtz wutz cyaꞌj beneꞌn tziꞌn Egipto.
22 Yaꞌtz nin tzun tulej Moisés quib yi tal Ryos tetz. Na yi jeꞌn tkꞌol yi kꞌab tcyaꞌj oqueꞌn nintzun ban tzꞌoꞌtz beneꞌn tziꞌn Egipto. 23 Ox cuꞌn tzun kꞌej ban yi jun chin wutzileꞌn tzꞌoꞌtzaꞌtz. Cyaꞌl nin tzun jun wunak xon tbeꞌ, tunink xajseꞌn yi chiwisin. Ma ẍchixoꞌl yi eꞌ xonl Israel quiꞌc tzꞌoꞌtz jal, ma na chin tkan kꞌej nin taneꞌn.
24 Yi tilol faraón yi xtxolbileꞌj nintzun ben mantar tan ẍchakleꞌn Moisés. Yi toponeꞌn Moisés nintzun taltz tetz:
—Ma jaluꞌ Moisés baꞌn cxben wok tan cꞌuꞌlajeꞌn yi iRyosil. Ej nin baꞌn tzicyꞌaj wok nin cyakil yi ixnaꞌnil scyuchꞌ initxaꞌ. Poro cyakil yi itawun ẍchicyajk tzoneꞌj.
25 Stzaꞌwel tzun Moisés tetz faraón:
—Poro taꞌ, iluꞌ tzꞌakꞌon tetz cyakil yi eꞌ txuc yi skabiyeꞌ nin yi skapateꞌ tetz katxꞌixwatz tetz Ryos. 26 Poro quiꞌ, na cyakil yi ketz kawun nchiben xomok skeꞌj. Quiꞌc nin jun yi nink cyajcyen. Ma na tircuꞌn nchiben, na yil kopon choneꞌj kocopon tan chitxaꞌleꞌn cobox ẍchixoꞌl tan kakꞌol tetz Ryos. Na te yi ntaxk kopon choneꞌj qui na el katxum tetz naꞌ scyetz eꞌ yil skoyeꞌ tetz Ryos.
27 Poro qui nin tzun takꞌ faraón amaꞌl scyetz tan cyeleꞌn na Ryos makꞌon cyen le wiꞌ tan stzeꞌtzaxeꞌn yi talmaꞌ tan qui tkꞌol amaꞌl scyetz. 28 Nchaꞌtz tal faraón tetz Moisés:
—Cawleꞌn tzoneꞌj nin quiꞌt na waj yil wil cuꞌn awutz junt tir tzoneꞌj, na kol cẍuꞌl junt tir oknin cuꞌn le awiꞌ yi ẍquimok waꞌn, stzun faraón bantz tetz Moisés.
29 —Jun cuꞌn yol quiꞌt nuꞌl tan yol teruꞌ, stzun Moisés bantz tetz faraón.