Yi chiquimeꞌn cyakil yi cyawun yi eꞌ aj Egipto
9
1 Itzun bantz yi wiꞌt bajeꞌn yi xtxolbileꞌj nintzun jilon junt tir Ryos tetz Moisés. Itzun taltz:—Tajweꞌn cẍben junt tir swutz faraón nin baꞌn tzawal tetz: “Je yi yol kajcaweꞌj yi kaRyosil yi oꞌ hebrey: Tajweꞌn tan awakꞌol amaꞌl scyetz eꞌ intanum tan chibeneꞌn tan incꞌuꞌlajeꞌn. 2 Na ko quil tzawakꞌ amaꞌl scyetz tan cyeleꞌn ej nin kol tzaban seguir tan chimakleꞌn, tzꞌul acaws. 3 Tzꞌul Ryos tu yi tetz ẍchamil tan takꞌleꞌn jun chin wutzileꞌn yaꞌbil ẍchixoꞌl cyakil yi cyawunuꞌ yi ateꞌ beneꞌn tziꞌn. Chin xoꞌwbil nin sbneꞌ yi jun yaꞌbilaꞌtz, na ẍchiquimok cyakil yi eꞌ chej scyuchꞌ yi eꞌ buruꞌ, nchaꞌtz yi eꞌ wacẍ tu eꞌ cneꞌr tu cyakil yi eꞌ camey. 4 Cyakil yi cyawun yi eꞌ aj Egipto ẍchiquimok. Poro quil wakꞌ amaꞌl tan chiquimeꞌn yi cyawun yi eꞌ xonl Israel, na yi wajbil iꞌtz tan inchajol yi apart yi eꞌ xonl Israel tziwutz wok,” stzun Ryos tetz Moisés.
5 Nchaꞌtz tal Ryos:
—Ninin eklen tzꞌul yi jun cawsaꞌtz waꞌn.
6 Ej nin yaꞌtz nin tulej Ryos. Na yi tuleꞌn skil le junt eklok tircuꞌn chiquimeꞌn yi cyawun yi eꞌ aj Egipto. Quiꞌc nin jun yi jak clax cyen. Poro ẍchixoꞌl yi eꞌ xonl Israel quiꞌc nin jun cyawun yi nink quim. 7 Yi tbital faraón yi qui eꞌ quim yi cyawun yi eꞌ xonl Israel, nintzun eꞌ ben ẍchakol cobox tan xmayeꞌn yi ko bintzinin. Yi cyoponeꞌn nintzun quil yi quiꞌc nin jun yi jak quim. Chipakxeꞌn tzuntz tan talcheꞌn tetz faraón. Poro yi iꞌ tetz mas tcunin stzeꞌtzaxeꞌn yi talmaꞌ nin qui nin takꞌ amaꞌl scyetz yi eꞌ xonl Israel tan chibeneꞌn tan cꞌuꞌlajeꞌn yi chiRyosil.
Yi jaleꞌn xpokꞌon txꞌaꞌc tetz chicaws yi eꞌ aj Egipto
8 Itzun bantz tan paj yi qui na takꞌ faraón amaꞌl scyetz yi eꞌ xonl Israel tan cyeleꞌn Egipto, nintzun tal Kataj tetz Moisés tu Aarón:
—Cyꞌajwok nin jun txob stzaꞌjil chuj swutz faraón, nin yil cxopon baꞌn tzichitwokeꞌn tcyaꞌj swutz iꞌ. 9 Yi muꞌẍ tzaꞌjaꞌtz tzꞌocopon tetz puklaj nin mben loꞌon beneꞌn tziꞌn Egipto. Ej nin iꞌtz jun chin wutzileꞌn yaꞌbil sbneꞌ scyeꞌj cyakil wunak nin scyeꞌj cyakil txuc. Nin yi jun yaꞌbilaꞌtz yi sjalok iꞌtz yi xpokꞌon txꞌaꞌc.
10 Yi quibital Moisés tu Aarón yi xtxolbileꞌj, yaꞌtz nin tzun cyulejtz. Nintzun eꞌ quicyꞌal jun txob tzaꞌj. Ej nin eꞌ bentz swutz faraón. Yi cyoponeꞌn nintzun jeꞌ ẍchitol Moisés yi tzaꞌj tcyaꞌj. Nin tan yi xtxolbileꞌj tircuꞌn tzun yi eꞌ wunak tu cyakil eꞌ txuc oc lacꞌpuj yi xpokꞌon txꞌaꞌc scyeꞌj. 11 Ma yi eꞌ nachol cwent Egipto, quiꞌc nintzun oc cyajal tan pileꞌn yi cyetz quipisyoꞌ, na nchaꞌtz eꞌ cyetz nsken oc lacꞌpuj yi xpokꞌon txꞌaꞌc scyeꞌj, chi quitaneꞌn yi eꞌ mas aj Egipto. 12 Poro yi talmaꞌ faraón, mas tcunin stzeꞌtzaxeꞌn tan Ryos. Chaꞌstzun te qui nin ocopon yi chiyol Moisés tu Aarón te wiꞌ. Inin banaꞌs, chi yi talnak Ryos tetz Moisés.
Yi sajeꞌn yi cꞌub aꞌbal tetz chicaws yi eꞌ aj Egipto
13 Itzun bantz nintzun jilon junt tir Ryos tetz Moisés. Je tzun taleꞌj:
—Moisés na waj yil cẍben ek jalchan tan yol tetz faraón. Ej nin baꞌn tzawal tetz: “Je yol yi kajcaw yi kaRyosil yi oꞌ hebrey: Akꞌaj amaꞌl scyetz intanum tan chibeneꞌn tan incꞌuꞌlajeꞌn le amaꞌl tzꞌinunin tuꞌ. 14 Na ko quil tzawakꞌ amaꞌl scyetz tan chibeneꞌn tan incꞌuꞌlajeꞌn, tzꞌul jun icaws waꞌn yi chin xoꞌwbil nin. Nin yi jun icawsaꞌtz iꞌtz tetz icyakil, scyetz yi eꞌ mas ajcaw nin scyetz cyakil wunak bantz teleꞌn itxum tetz yi quiꞌc junt Ryos beneꞌn tziꞌn wi munt yi niꞌcuꞌnk chi in. 15 Ja kloꞌ wiꞌt cxsotzok wok waꞌn scyuchꞌ cyakil yi atanum. 16 Poro ja wakꞌ amaꞌl tzitetz tan qui iquimeꞌn, na na waj yil tzitil wok yi imporer. Nin nchaꞌtz na waj yil tzꞌel chitxum yi eꞌ mas wunak wi munt yi in yi wiꞌtz Ryos beneꞌn tziꞌn. 17 ¿Nxac na awocsaj awib nim na qui na awakꞌ amaꞌl tetz intanum tan chibeneꞌn tan incꞌuꞌlajeꞌn le amaꞌl yi walnak scyetz? 18 Ma jaluꞌ bin, chwaꞌnin eklen tzꞌul jun chin wutzileꞌn cꞌub aꞌbal waꞌn tetz icaws. Nin yi jun cꞌub aꞌbalaꞌtz chin xoꞌwbil nin sbneꞌ, na qui otojt na bajij yi jun xtxolbilaꞌs tzoneꞌj Egipto. 19 Chaꞌstzun te ko na awaj yil chiclax yi eꞌ awawun, baꞌn tzajoy puntil tan chicolcheꞌn, na yi jun cꞌub aꞌbalaꞌtz yi tzꞌul, xcyek tan chibiyleꞌn cyakil yi eꞌ wunak tu cyakil txuc yi ateꞌ wiꞌak cojbil, stzun Ryos bantz.”
20 Yi quibital yi eꞌ ajcaw yi ateꞌ xlaj faraón yi xtxolbileꞌj, at eꞌ yi ja cyocsaj, nin ja chixobtz. Chibeneꞌn tzun tan chicaweꞌn yi eꞌ chimos tan chicolol quib xeꞌak caꞌl, ej nin nchaꞌtz tan chicolcheꞌn yi cyawun. 21 Poro wiꞌnin eꞌ yi qui nin cyocsaj yi yol Ryos. Eꞌ cyajcyen tuꞌ yi cyawun wi cojbil. Nchaꞌtz chimos eꞌ cyajcyen tuꞌ wi cojbil.
22 Itzun le junt eklok nintzun tal Ryos tetz Moisés:
—Moisés, akꞌeꞌn yi akꞌab tcyaꞌj tan sajeꞌn cꞌub aꞌbal squibaj cyakil wunak tu cyakil txuc nin tibaj cyakil yi amaꞌl beneꞌn tziꞌn Egipto.
23 Inin tzun tulej Moisésaꞌtz chi tal Ryos tetz. Jeꞌn tzun tkꞌol yi kꞌab tcyaꞌj, nintzun saj ẍchitul Ryos jun chumam kꞌancyok tu xlitzꞌ. Ej nin sajeꞌn nintzun ban yi cꞌub aꞌbal, nin baj noj cyakil yi amaꞌl Egipto. 24 Qui otoj na bajij yi jun xtxolbilaꞌtz Egipto, na skꞌejl tu lakꞌbal qui na taneꞌ yi jun chin cꞌub aꞌbalaꞌtz. 25 Tircuꞌn tzun yi amaꞌl cwent Egipto loꞌon tan yi jun chin wutzileꞌn cꞌub aꞌbalaꞌtz. Wiꞌnin wunak eꞌ quim. Nchaꞌtz eꞌ quim wiꞌnin txuc. Nin cyakil yi tzeꞌ tu eꞌchk ujul eꞌ baj loꞌon. 26 Ma le amaꞌl Gosén kale ateꞌt yi eꞌ xonl Israel quiꞌc nin jun cꞌub aꞌbal cuꞌ-tz.
27 Yi tilol yi rey yi xtxolbileꞌj nintzun ben mantar tan chichakleꞌn Moisés tu Aarón, nintzun taltz scyetz:
—Ma jaluꞌ ja el intxum tetz yi ja injuch wil swutz Ryos nin cyakil yi na bajij iꞌtz weri impaj scyuchꞌ intanum. Nkꞌeꞌtz paj Ryos. 28 Chaꞌstzun te ja wiꞌt intxum tan wukꞌol amaꞌl tzitetz tan ibeneꞌn tan cꞌuꞌlajeꞌn yi iRyosil, na wiꞌnin kacaws ja ul, chi taneꞌn yi cꞌub aꞌbaleꞌj yi quiꞌt na taneꞌ. Ntin jakwok tetz iRyosil tan cuyul iꞌ ketz kapaj, nin tan taneweꞌn yi jun chin cꞌub aꞌbaleꞌj, stzun yi rey bantz tetz Moisés.
29 —Quil bisunuꞌ taꞌ, na yil neꞌl tzoneꞌj ninin nocopon tan jakleꞌn tetz Ryos yi tajbiluꞌ. Nin jun cuꞌn stanek yi jun cꞌub aꞌbaleꞌj nin nchaꞌtz cyakil yi kꞌancyok yi at, bantz teleꞌn xtxumuꞌ tetz, yi tetz Ryos cyakil yi amaꞌl beneꞌn tziꞌn, nin iꞌ na cawun tibaj. 30 Poro taꞌ, na el intxum tetz yi qui na tekuꞌ ẍchiꞌ Ryos. Nchaꞌtz quitaneꞌn yi eꞌ mas ajcaw yi ateꞌ xlajuꞌ, txeꞌn nin cyek ẍchiꞌ Ryos, stzun Moisés bantz tetz faraón.
31 Cyakil yi eꞌchk ujul chi taneꞌn yi lino tu yi cebada ja loꞌon, na yi cebada sken wiꞌt jal wutz. Ej nin yi lino nsken wiꞌt jal xuꞌm. Chaꞌstzun te yi eꞌchk ujulaꞌtz ja loꞌon. 32 Ma yi triw tu yi centeno quiꞌc ban na taxk jal wutz nin taxk jal xuꞌm. Na buch na jal wutz. 33 Ma yi teleꞌn tzaj Moisés xe yi caꞌl kale na cawuneꞌt faraón, ej nin yi pakxeꞌn le tetz amaꞌl nintzun octz tan nachleꞌn Kataj nin tan jakleꞌn tetz tan taneweꞌn yi cꞌub aꞌbal. Ninin tzun te rataꞌtz taneweꞌn yi cꞌub aꞌbal. Ej nin quiꞌct kꞌancyok bantz.
34 Itzun bantz yi tilol faraón yi taneweꞌn yi cꞌub aꞌbal nin yi quiꞌc nin kꞌancyok na cuꞌ nin quiꞌct na bajij, nintzun tzeꞌtzax junt tir yi talmaꞌ. Nchaꞌtz eꞌ ban yi mas ajcaw yi ateꞌ xlaj tan cawuꞌn. 35 Quiꞌt tzun takꞌ iꞌ amaꞌl scyetz yi eꞌ xonl Israel tan cyeleꞌn tzaj Egipto, na mas tcunin tzeꞌtzaxeꞌn yi talmaꞌ. Tan yi xtxolbileꞌj el cunin teꞌj chi yi tal Ryos tetz Moisés.