8
1 Nintzun tal Kataj tetz Moisés:—Baꞌn cẍben junt tir teꞌj faraón nin alaj tetz: “Je yol Katajeꞌj: ‘Akꞌaj amaꞌl tetz intanum tan chibeneꞌn tan incꞌuꞌlajeꞌn le amaꞌl tzꞌinunin tuꞌ. 2 Na ko quil tzawakꞌ amaꞌl scyetz tzꞌul junt icaws, nin iꞌtz yi ẍchijalok wiꞌnin woꞌ beneꞌn tziꞌn Egipto. 3 Ẍchijalok wiꞌnin woꞌ tul yi tzanlaꞌ, nin chiben loꞌon beneꞌn tziꞌn Egipto. Nchaꞌtz chocopon le amaꞌl kale na cxcawuneꞌt nin chijepon wi asoc. Nchaꞌtz chocopon xeꞌak chicaꞌl yi eꞌ mas ajcaw nin scyeꞌj cyakil wunak. Chin xoꞌwbil nin sbneꞌ na chocopon yi eꞌ woꞌaꞌtz tul cyakil yi eꞌchk takleꞌn, chi taneꞌn yi eꞌchk ẍwokꞌ tu ẍchujil pam. 4 Ej nin chijepon wiꞌnin woꞌ tzawibaj nin squibaj yi eꞌ mas ajcaw nin squibaj cyakil wunak.’ ”
5 Nchaꞌtz tal Ryos tetz Moisés:
—Al nin tetz Aarón tan jeꞌn ẍchajol yi kꞌab tibaj yi tzanlaꞌ nin tibaj cyakil amaꞌl kale atiteꞌt aꞌ na na waj yil chijal wiꞌnin woꞌ beneꞌn tziꞌn Egipto, stzun Ryos bantz tetz Moisés.
6 Beneꞌn tzun ẍchajol Aarón yi xtxꞌamij tibaj cyakil yi aꞌ beneꞌn tziꞌn Egipto. Wiꞌnin tzun woꞌ eꞌ jal xe aꞌ. Nintzun eꞌ jetzaj, nin eꞌ baj noj cyakil amaꞌl cwent Egipto. 7 Nchaꞌtz yi eꞌ nachol scyuchꞌ yi eꞌ wiꞌtz ajcun nin jeꞌn chichajol yi cyetz chitxꞌamij wiꞌak eꞌchk aꞌ. Nintzun eꞌ jetzaj wiꞌnin woꞌ cyaꞌn. Eꞌ xcyeꞌ teꞌj tan yi cyetz quipisyoꞌ, nin wiꞌnin woꞌ eꞌ jal Egipto.
8 Yi tilol faraón yi xtxolbileꞌj nintzun eꞌ ẍchak Moisés tu Aarón. Itzun taltz scyetz:
—Jak wok pawor tetz iRyosil tan cyeleꞌn yi eꞌchk woꞌ taꞌn sweꞌj, nin scyeꞌj cyakil intanum. Swakꞌeꞌ tzun amaꞌl tzitetz tan ibeneꞌn tan toyeꞌn yi itxꞌixwatz swutz iꞌ.
9 —Baꞌn taꞌ, stzun Moisés. —Poro taleꞌuꞌ swetz tonaꞌ na tajuꞌ yil tzinjak tetz Ryos tan cyeleꞌn yi eꞌ woꞌ teꞌjuꞌ, nin scyeꞌj yi eꞌ mas ajcaw nin scyeꞌj cyakil wunak. Ntin yi eꞌ yi ateꞌ xeꞌ aꞌ ẍchicyajk cyen, stzun Moisés bantz tetz rey.
10 —Ninin eklen, stzun yi rey bantz.
—Baꞌn ko yaꞌtz na tajuꞌ, ninin ek chelepon, bantz teleꞌn xtxumuꞌ tetz yi quiꞌc junt ryos yi niꞌcuꞌnk tu Jehová yi kaRyosil yi at jalen tziꞌn tcyaꞌj. 11 Na jun cuꞌn yol xcyek iꞌ tan chilajeꞌn len yi eꞌ woꞌ yi ateꞌ teꞌjuꞌ scyuchꞌ cyakil yi eꞌ yi ateꞌ xe caꞌluꞌ. Nchaꞌtz xcyek tan chilajeꞌn len cyakil yi eꞌ woꞌ yi ateꞌ scyeꞌj yi eꞌ mas ajcaw yi na chicawun xlajuꞌ nin scyeꞌj cyakil yi eꞌ tanumuꞌ. Ntin ẍchicyajk yi eꞌ yi ateꞌ xe aꞌ Nilo, stzun Moisés bantz tetz rey.
12 Eleꞌn tzaj nintzun eꞌ ban cyetz Moisés tu Aarón kale na cawuneꞌt yi rey. Toqueꞌn tzun Moisés tan nachleꞌn Kataj nin tan jakleꞌn tetz tan cyeleꞌn yi eꞌ woꞌ yi ateꞌ Egipto. 13 Nintzun tbit Ryos yi mbi jak Moisés tetz. Chiquimeꞌn tzun cyakil yi eꞌ woꞌ yi ateꞌ xeꞌak caꞌl, nin wiꞌak cojbil nin yi eꞌ yi ateꞌ tbeꞌ. 14 Cyoqueꞌn tzun yi eꞌ wunak tan chimolcheꞌn nin chibuꞌjbajeꞌn. Chin xeweꞌn nin tzun ban cyakil yi amaꞌl cwent Egipto. 15 Poro itzun yi tilol faraón yi stzajeꞌn yi jun ilaꞌtz quiꞌct nintzun bislej iꞌ-tz. Mas tcunin tzun stzeꞌtzaxeꞌn yi talmaꞌ. Nin qui nin tocsaj yi mbi ntal Kataj Ryos tetz iꞌ tan Moisés tu Aarón.
Yi toxiꞌn chicaws yi eꞌ aj Egipto iꞌtz neꞌẍ us
16 Jiloneꞌn tzun Ryos junt tir tetz Moisés. Itzun taltz:
—Alaj tetz Aarón yi baꞌn sjab cuꞌn yi xtxꞌamij wuxtxꞌotxꞌ tul yi puklaj, tan toqueꞌn yi puklaj tetz neꞌẍ us, bantz jaleꞌn wiꞌnin us beneꞌn tziꞌn Egipto. 17 Yaꞌtz nintzun cyulejtz, nintzun cuꞌ jabul Aarón yi xtxꞌamij wuxtxꞌotxꞌ. Ej nin cyakil yi puklaj cwent Egipto oc tetz neꞌẍ us. Nin eꞌ baj octz tan chichiꞌleꞌn cyakil wunak scyuchꞌ yi eꞌ txuc. 18 Cyoqueꞌn tzun yi eꞌ nachol scyuchꞌ yi eꞌ wiꞌtz ajcun cwent Egipto tan pileꞌn tan jalseꞌn us, chi mban Aarón. Poro qui nin xcyeꞌ yi cyetz quipisyoꞌ teꞌj. Ma yi eꞌ us yi eꞌ jal tan Aarón mas tcunin sajeꞌn chiwiꞌ tan chichiꞌleꞌn yi eꞌ wunak tu eꞌ txuc. 19 Yi quilol yi eꞌ nachol yi xtxolbileꞌj nintzun cyaltz tetz faraón:
—Yi xtxolbileꞌj yi na bajij iꞌtz chiRyosil yi eꞌ xonl Israel yi nchakon tzaj, cheꞌch eꞌ nachol.
Poro qui nin tocsaj faraón, ma na mas tcunin stzeꞌtzaxeꞌn yi talmaꞌ. Ej nin tan yi xtxolbilaꞌseꞌj ja el cuꞌn teꞌj yi yol yi alijt cyen tan Ryos tetz Moisés.
Yi cyajiꞌn chicaws yi eꞌ aj Egipto iꞌtz jun cꞌoloj us
20 Itzun bantz nintzun jilont Ryos tetz Moisés. Itzun taltz:
—Baꞌn cẍben ek jalchan stziꞌ aꞌ tan yol tetz faraón, na ek ben iꞌ tan xoꞌn stziꞌ aꞌ. Yil tzꞌopon baꞌn tzawal yi xtxolbileꞌj tetz: Je yol yi kaRyosileꞌj: “Tajweꞌn tzawakꞌ amaꞌl scyetz intanum tan chibeneꞌn tan incꞌuꞌlajeꞌn le amaꞌl tzꞌinunin tuꞌ. 21 Na ko quil tzawakꞌ amaꞌl scyetz tan cyeleꞌn tzoneꞌj, tzꞌul jun chin cꞌoloj jilwutz us waꞌn tetz icaws. Quin technin jilwutz us ẍchijalok xeꞌ acaꞌl. Nchaꞌtz ẍchijalok scyeꞌj yi eꞌ mas ajcaw nin scyeꞌj cyakil wunak beneꞌn tziꞌn Egipto, nin quiꞌc nin jun amaꞌl yi quiꞌk noj tan eꞌchk usaꞌtz. 22 Nin yil bajij yi xtxolbileꞌj tzoneꞌj Egipto yi tircuꞌn beneꞌn tziꞌn snojk tan eꞌchk usaꞌtz, ma na tzincoleꞌ yi amaꞌl Gosén kale ateꞌt yi wetz intanum, quiꞌc nin jun us sjalok ẍchixoꞌl nin quiꞌc nin chibislej cyetz. Ej nin tan yi xtxolbileꞌj tzinchajeꞌ tzatz nin scyetz cyakil wunak yi in yi wiꞌtz ajcaw tzoneꞌj Egipto. 23 Tzincoleꞌ yi amaꞌl kale ateꞌt yi intanum tan inchajol yi apart yi wetz intanum ẍchiwutz cyakil yi mas tnum. Ej nin yi xtxolbilaꞌseꞌj ninin ek tzimbneꞌ,” stzun Ryos bantz tetz Moisés.
24 I nin tzun tulej Ryosaꞌtz. Le junt eklok nintzun saj bnol tib jun chin wutzileꞌn sbakꞌ yi chin kꞌek nin tan us. Eꞌ baj len tunin tzun xit. Ej nin wiꞌnin tzun eꞌ, eꞌ ocpon xe yi caꞌl kale na cawuneꞌt yi faraón. Nchaꞌtz ban kale ateꞌt yi eꞌ mas ajcaw yi na chicawun xlaj faraón. Ej nin nchaꞌtz eꞌ ban beneꞌn tziꞌn Egipto. Tircunin tzun yi amaꞌl cwent Egipto loꞌontz cyaꞌn. 25 Yi tilol faraón yi chin xoꞌwbil nin taneꞌn yi jun chicawsaꞌtz beneꞌn tzun mantartz taꞌn tan chichakleꞌn Moisés tu Aarón. Yi cyoponeꞌn Moisés swutz itzun taltz scyetz:
—Baꞌn cxben wok tan pateꞌn yi itxꞌixwatz tan toyeꞌn tetz yi iRyosil. Poro qui na waj yil cxben wok joylaj, ma na taꞌsteꞌn nin tzoneꞌj Egipto, stzun faraón bantz.
26 —Poro taꞌ, stzun Moisés bantz, kol yaꞌtz kulej, ko na kaj kapat yi katxꞌixwatz swutz Kataj Ryos tzoneꞌj, ploj sbneꞌ, na yi eꞌ txuc yi na kaj koy tetz katxꞌixwatz, xan ẍchiwutzuꞌ yi eꞌuꞌ aj Egipto, na wiꞌnin na cyakꞌuꞌ kꞌej yi eꞌ txucaꞌtz nin na chilokꞌuꞌ wutz. Itzun yi kol quil ninuꞌ yi na katzan ketz tan pateꞌn yi eꞌchk txucaꞌtz tetz katxꞌixwatz, quicunin batz chocoponuꞌ tan kabiyleꞌn cuꞌn tan cꞌub. 27 Chaꞌstzun te, mas balaj yil takꞌuꞌ amaꞌl sketz tan kabeneꞌn tan pateꞌn yi ketz katxꞌixwatz jalen le amaꞌl tzꞌinunin tuꞌ, yi iꞌtz ox kꞌej beꞌ. Mas balaj yi nink takꞌuꞌ amaꞌl sketz tan kabeneꞌn choneꞌj. Na yaꞌstzun tal yi kaRyosil sketz, stzun Moisés bantz tetz faraón.
28 —Ma jaluꞌ bin, swakꞌeꞌ amaꞌl tzitetz tan ibeneꞌn tan toyeꞌn yi itxꞌixwatz tetz yi iRyosil. Baꞌn cxben wok le amaꞌl tzꞌinunin tuꞌ. Poro qui na waj yil cxben wok joylaj. Nin nchaꞌtz na waj yil xpakxij wok junt tir. Baꞌn cxben wok, nin jakwok yi banl iRyosil swibaj, stzun yi rey bantz.
29 Nintzun tal Moisés tetz:
—Ko yaꞌtz taꞌ, yil neꞌl tzoneꞌj nchimben tan jakleꞌn tetz Ryos tan teleꞌn tcyꞌal iꞌ cyakil yi us tzoneꞌj. Tzinjakeꞌ tetz yi ninin ek quiꞌt ljal jun us xe yi caꞌluꞌ nin xe yi chicaꞌl yi eꞌ mas ajcaw, nin nchaꞌtz xeꞌak chicaꞌl cyakil wunak. Yaꞌstzun sbneꞌ ko bintzi na taluꞌ yi quiꞌt tzꞌocuꞌ tan kamakleꞌn tan kabeneꞌn tan toyeꞌn yi katxꞌixwatz tetz Ryos.
30 Quenin tzun beneꞌn tetz Moisés tan nachleꞌn Kataj yi teleꞌn tzaj tan yol tetz yi rey. 31 Jak tzun iꞌ tetz Ryos tan cyelseꞌn cyakil yi eꞌchk usaꞌtz yi attz Egipto. Nin tbit Ryos cyakil yi oración Moisés. Ej nin yaꞌtz nin tulejtz na le junt eklok quiꞌc nin tzun junt us ban cyen le caꞌl yi rey. Nchaꞌtz ban cyetz yi eꞌ mas ajcaw, nin beneꞌn tziꞌn Egipto. Quiꞌc nin jun usil wacẍ ban cyentz. 32 Poro yi tilol faraón yi quiꞌct nin jun us jal cyen Egipto nintzun ajt junt tir te yi tetz stzeꞌtzal yi talmaꞌ, na qui nin takꞌ iꞌ amaꞌl scyetz yi eꞌ xonl Israel tan chibeneꞌn tan toyeꞌn yi chitxꞌixwatz tetz Ryos le amaꞌl tzꞌinunin tuꞌ.