7
1 Beneꞌn tzun tlol Ryos tetz Moisés:—Yaj, aẍ inkꞌajbil sbneꞌ swutz faraón nin yi awutzicy Aarón sjilonk tetz axel. 2 Tajweꞌn tan ibeneꞌn tan talcheꞌn tetz faraón tan tkꞌol iꞌ amaꞌl tan cyeleꞌn tzaj yi eꞌ xonl Israel Egipto. Swaleꞌ tzatz yi mbi tajweꞌn tan awalol tetz Aarón. Iꞌ tzun tzꞌaꞌlon tetz faraón. 3 Poro tzinquiwseꞌ yi talmaꞌ faraón tan qui tkꞌol amaꞌl tan cyeleꞌn tzaj. Na tzinchajeꞌ yi imporer nin tzimbneꞌ wiꞌnin eꞌchk milawr le luwar Egipto tan xtxꞌixpeꞌn tajtzaꞌkl tan tkꞌol iꞌ amaꞌl tan cyeleꞌn tzaj. 4 Poro quil tocsaj faraón yi iyol. Ma na jalen yil tzinchaj yi imporer tibaj Egipto. Ej nin yil til eꞌchk milawraꞌtz kalenaꞌs tzun ltakꞌ yi rey amaꞌl tan cyeleꞌn tzaj intanum. 5 Tzꞌelepon tzun chitxum yi eꞌ aj Egipto yi at imporer nin yi in yi wiꞌtz ajcaw beneꞌn tziꞌn wi munt, stzun Ryos bantz scyetz Moisés tu Aarón.
6 Yaꞌtz nin tzun cyulej Moisés tu Aarón quib yi tal Ryos scyetz. 7 At tzun Moisés tul jun mutxꞌ yob, ma tetz Aarón at iꞌ tul jun mutxꞌ tu ox yob te yi chijiloneꞌn tetz faraón.
Yi toqueꞌn yi xtxꞌamij Aarón tetz luꞌbaj
8 Ej itzun tal Ryos scyetz Moisés tu Aarón:
9 —Yil xben wok tan yol tetz faraón, nin kol jak tan ichajol jun milawr, baꞌn tzichajwok. Yi aẍatz Moisés baꞌn tzawal nin tetz Aarón yi baꞌn scꞌox cuꞌn yi xtxꞌamij wuxtxꞌotxꞌ. Ej nin yil scꞌox cuꞌn, tzꞌocopon tetz luꞌbaj. Baꞌn tzibanwok yi xtxolbileꞌj swutz faraón, stzun Ryos.
10 Chibeneꞌn tzun Moisés tu Aarón tan yol tetz faraón. Yi cyoponeꞌn nintzun eꞌ ban quib yi tal Ryos scyetz. Cweꞌn tzun cꞌoxol Aarón yi xtxꞌamij ẍchiwutz faraón scyuchꞌ yi eꞌ mas ajcaw yi ateꞌ-tz xlaj. Oqueꞌn nin tzun ban yi xtxꞌamij tetz luꞌbaj. 11 Yi tilol faraón yi xtxolbileꞌj, nintzun cawunin tan chichakleꞌn yi eꞌ nachol scyuchꞌ eꞌ wiꞌtz aj cun. Nin tan yi cyetz quipisyoꞌ eꞌ xcyeꞌ tan banleꞌn chi eꞌ ban Moisés tu Aarón. 12 Cweꞌn tzun chicꞌoxol len yi cyetz chitxꞌamij wuxtxꞌotxꞌ, nintzun eꞌ oc lentz tetz luꞌbaj. Poro nin ben yi xtxꞌamij tetz Aarón tan chibajseꞌn yi chitxꞌamij yi eꞌ nachol scyuchꞌ yi eꞌ wiꞌtz ajcaw yi nsken choꞌc tetz luꞌbaj. 13 Chin xoꞌwbil nin ban yi xtxolbileꞌj, poro yi tetz faraón mas tcunin stzeꞌtzaxeꞌn talmaꞌ nin qui nin takꞌ iꞌ amaꞌl scyetz yi eꞌ xonl Israel tan cyeleꞌn tzaj Egipto. Tan yi xtxolbileꞌj el cuꞌn teꞌj quib yi tal Kataj Ryos tetz Moisés.
Yi tkꞌol Ryos yi bajx chicaws yi eꞌ aj Egipto
14 Itzun tal Ryos tetz Moisés:
—Yi faraón ja tocsaj tib nim, nin ja tzeꞌtzax yi talmaꞌ tan qui tkꞌol amaꞌl tzitetz, yi axwok xonl Israel, tan iteleꞌn liwr. 15 Ma jaluꞌ tajweꞌn tan abeneꞌn tan yol tetz ek jalchan. Baꞌn cẍben tzi yi tzanlaꞌ nin choꞌn tzachꞌiwtz jalen yil copon, na copon iꞌ tziꞌ aꞌ tan jichiꞌn. Cyꞌajnin yi atxꞌamij yi oc tetz luꞌbaj. Nin baꞌn tzawal yi xtxolbileꞌj tetz: 16 “Yi Kataj yi kaRyosil yi oꞌ hebrey, iꞌ nchinchakon tzaj swutzuꞌ tan talcheꞌn yi xtxolbileꞌj. Nin je yi yol iꞌeꞌj: ‘Akꞌaj amaꞌl scyetz intanum tan chibeneꞌn tan incꞌuꞌlajeꞌn le amaꞌl tzꞌinunin tuꞌ.’ Poro qui nin na awakꞌoꞌk amaꞌl scyetz, stzun iꞌ. 17 Chaꞌstzun te ja tal iꞌ yi xtxolbileꞌj: ‘Ma jaluꞌ tzinchajeꞌ tetz faraón chij, yi in yi wiꞌtz ajcaw,’ nin je jun techleꞌj yi nẍchaj iꞌ swetz: Yil tzinjab cuꞌn yi aꞌ tan yi intxꞌamij yi cyꞌaꞌn waꞌn, tzꞌocopon yi aꞌ tetz chichꞌ. 18 Ej nin ẍchiquimok cyakil cay. Ej nin chin xeweꞌn nin sbneꞌ yi jun tzanlaꞌaꞌtz. Ej nin cyakil yi axwok aj Egipto smulmuchk icꞌuꞌl yil chicꞌajeꞌn,” cẍchij sban tetz.
19 Nchaꞌtz tal Ryos tetz Moisés.
—Alaj tetz Aarón yi baꞌn ẍchajnin yi xtxꞌamij, te cyakil yi eꞌchk neꞌẍ tzanlaꞌ tu eꞌchk lawun nin alchok amaꞌl kale atit aꞌ cwent Egipto. Na na waj yil tzꞌoc cyakil yi aꞌ tetz chichꞌ. Chichꞌ cuꞌn sbneꞌ cyakil yi aꞌ yi at tulak eꞌchk cuꞌlbil. Quiꞌc na ban yi ko cꞌub nka tzeꞌ yi cuꞌlbil aꞌaꞌtz, stzun Ryos bantz tetz Moisés.
20 I nintzun cyulej Moisés tu Aarón quib yi tal Ryos scyetz. Chibeneꞌn tzun tan yol tetz faraón. Yi cyoponeꞌn tzi aꞌ, beneꞌn tzun Aarón tan jabeꞌn cuꞌn yi aꞌ tan yi xtxꞌamij ẍchiwutz cuꞌn faraón scyuchꞌ yi eꞌ mas ajcaw yi xomcheꞌ teꞌj. Tircuꞌn tzun yi aꞌ octz tetz chichꞌ. 21 Chiquimeꞌn tzun cyakil yi eꞌ cay yi ateꞌ xe aꞌ. Chin tzuꞌj nin tzun ban yi aꞌaꞌtz nin quiꞌt jal quicꞌaꞌ yi eꞌ aj Egipto na chichꞌ cuꞌn taneꞌn tircuꞌn yi aꞌ cwent Egipto.
22 Yi quilol yi eꞌ nachol scyuchꞌ yi eꞌ ajcun yi xtxolbileꞌj nintzun eꞌ octz tan banleꞌn cyetz, chi yi eꞌ ban Moisés tu Aarón, nin eꞌ xcyeꞌ teꞌj tan yi cyetz quipisyoꞌ. Chaꞌstzun te qui nin bisun faraón taꞌn. Nin qui nin tocsaj iꞌ yi chiyol Moisés. Ma na mas tcunin tocsal tib nim tu tajtzaꞌkl. Nin qui nin tbit yi yol Kataj Ryos. 23 Ajeꞌn nin ban faraón xe tetz caꞌl. Qui nin oc il iꞌ tan xtxumleꞌn yi xtxolbilaꞌseꞌj nin qui nin bisun iꞌ taꞌn, na chin tzeꞌtzuj nin ban yi talmaꞌ, chi alijt tan Ryos. 24 Ma yi eꞌ aj Egipto cyoqueꞌn tzun tan kopleꞌn jul tziꞌak yi tzanlaꞌ tan joyleꞌn balaj aꞌ tetz quicꞌaꞌ, na yi tzanlaꞌ quiꞌc rmeril tan bajeꞌn cyaꞌn tetz quicꞌaꞌ.
Yi chijaleꞌn wiꞌnin woꞌ tetz chicaws yi eꞌ aj Egipto
25 Itzun bantz yi teleꞌn juk kꞌej yi tocleꞌnix Kataj Ryos tan poꞌtzeꞌn yi aꞌ.