6
1 —Ma jaluꞌ Moisés tzawileꞌ yi mbi cuꞌn swulej yi rey, nin tan tuꞌ yi eꞌchk takleꞌnaꞌtz yi tzimbneꞌ teꞌj, stkꞌeꞌ iꞌ amaꞌl tan iteleꞌn liwr. Nin iꞌ teꞌn nin tzꞌaꞌlon tzitetz tan ibeneꞌn, stzun Kataj Jehová bantz tetz Moisés.Yi ẍchakxeꞌn junt tir Moisés tan Kataj
2 Nintzun jilont junt tir Ryos tetz Moisés. Itzun taltz:
—I inaꞌtz iTaj Jehová. 3 Nin iteꞌn nin inaꞌtz yi inchaj wib ẍchiwutz Abraham tu Isaac nin Jacow. Ej nin yi imbiꞌ yi nwal scyetz iꞌtz, yi in “Yi Ryos yi na xcyeꞌ tan kojleꞌn tzaj yi imbanl tibaj jun.” Poro qui nin wal scyetz yi mero imbiꞌ, yi iꞌtz yi “In iTaj Jehová.” 4 Nchaꞌtz bnixnak jun katrat skaxoꞌl scyuchꞌ Abraham, Isaac tu Jacow, kale insukwit tan wakꞌol yi amaꞌl cwent Canaán scyetz. Nin yi jun amaꞌlaꞌtz iꞌtz kale eꞌ cyajeꞌt cyen cobox tiemp tetz awer nak taneꞌn. 5 Ma jaluꞌ na wil yi qꞌuixcꞌuj yi ateꞌ cuꞌnt yi eꞌ xonl Israel jakꞌ chicaꞌwl yi eꞌ aj Egipto, na chin buchij nin quitaneꞌn cyakꞌun eꞌ. Chaꞌstzun te ja ul txꞌakx tincꞌuꞌl yi trat yi bnixnak skaxoꞌl scyuchꞌ yi eꞌ imam iteꞌ. 6 Chaꞌstzun te, cun al scyetz yi atanum xonl Israel: “Quil cxbisun wok na cxelepon wok liwr. Cxelepon tzakꞌ yi jun chin qꞌuixcꞌujaꞌtz yi atix cuꞌnt. Na chin buchij nin itaneꞌn cyakꞌun yi eꞌ aj Egipto tan yi eꞌchk akꞌun yi chin qꞌuixbel nin. Tzinchajeꞌ yi imporer nin tan yi eꞌchk milawr yi sbnixok waꞌn cxeluꞌl wok liwr. 7 Cxeluꞌl incyꞌal nin cxocopon wok tetz intanum, na nocopon tetz iRyosil. Ej nin tzꞌelepon itxum tetz yi inaꞌtz in iTaj Jehová, yi iRyosil. Ej nin chinxcyek tan itelseneꞌl tzaj tkꞌab yi qꞌuixcꞌuj yi atix wok cuꞌnt jakꞌ chicaꞌwl yi eꞌ aj Egipto. 8 Nin cxben incyꞌal le amaꞌl yi insuknak tetz Abraham tu Isaac nin Jacow, nin swakꞌeꞌ tzitetz wok, na nelpon cuꞌn te inyol, na in iTaj Jehová,” stzun Ryos tetz.
9 Itzun yi tbital Moisés nintzun ben iꞌ-tz tan talcheꞌn scyetz cyakil yi eꞌ xonl Israel. Poro qui nin cyocsaj tan paj yi bis yi ateꞌ cuꞌnt na chin buchij nin quitaneꞌn tan akꞌun cyakꞌun yi eꞌ aj Egipto. 10 Tlol tzun junt tir Ryos tetz Moisés:
11 —Ma jaluꞌ Moisés baꞌn bin cẍben tan yol tetz faraón tan tkꞌol iꞌ amaꞌl tan cyeleꞌn tzaj yi eꞌ xonl Israel Egipto, stzun Ryos bantz.
12 —Poro Taꞌ, qui na cyocsaj yi eꞌ xonl Israel inyol. Pyor tzun faraón. ¿Ẍeꞌn ltocsaj kol wal yi xtxolbileꞌj tetz? Nin jenin, qui na aꞌw yol waꞌn, stzun Moiséstz bantz.
13 Chaꞌstzun te beneꞌn ẍchakol Kataj yi Moisés tu Aarón tan chibeneꞌn tan talcheꞌn scyetz yi eꞌ xonl Israel nin tetz faraón yi cyꞌaꞌn ort cyaꞌn tan talcheꞌn yi chin tajweꞌn cunin tan cyeleꞌn yi eꞌ xonl Israel Egipto.
Yi eꞌ cyajwutz Aarón tu Moisés
14 Je chibiꞌ yi eꞌ chimam chiteꞌ yi eꞌ xonl Israeleꞌj: Je chibiꞌ yi eꞌ cyꞌajl Rubén yi bajx cyꞌajl Israel, iꞌtz: Hanoc, Falú, Hezrón tu Carmi. Yaꞌstzun yi eꞌ cyꞌajl Rubén.
15 Ma yi eꞌ cyꞌajl Simeón iꞌtz: Jemuel, Jamín, Ohad, Jaquín, Zohar tu Saúl. Yi Saúlaꞌtz iꞌ tal jun xnaꞌn aj Canaán. Yaꞌstzun yi eꞌ cyꞌajl Simeón.
16 Ma yi eꞌ cyꞌajl Leví iꞌtz: Gersón, Coat tu Merari. At Leví tul jun cient tu junak juklaj yob yi quimeꞌn. 17 Ma tetz Gersónaꞌtz, yi bajx cyꞌajl Leví, ja jal cob tetz cyꞌajl, yi bajx iꞌtz Libni. Ej nin yi caꞌp iꞌtz Simei. 18 Ma yi eꞌ cyꞌajl Coat yi caꞌp cyꞌajl Leví iꞌtz: Amram, Izhar, Hebrón tu Uziel. At tzun Coat tul jun cient tu junak oxlaj yob yi quimeꞌn. 19 Ma yi eꞌ cyꞌajl Merari yi toxiꞌn cyꞌajl Leví iꞌtz: Mahli tu Musi. Cyakil yi eꞌchk biꞌajaꞌtz eꞌ cuꞌn cyꞌajl tu mamaj Leví. Choꞌn nxeꞌtij te yi bajx cyꞌajol jalen te yi chꞌiꞌp.
20 Ma Amram yi cyꞌajl Coat nintzun cyokꞌbej quibtz tu Jocabed tanub yi taj. Ej nin yi chibiꞌ yi cob cyꞌajl Amramaꞌtz iꞌtz Aarón tu Moisés. At Amram tul jun cient tu junak juklaj yob yi quimeꞌn.
21 Ma yi eꞌ cyꞌajl Izhar yi caꞌp cyꞌajl Coat iꞌtz: Coré, Nefeg tu Zicri.
22 Ma yi eꞌ cyꞌajl Uziel yi toxiꞌn cyꞌajl Coat iꞌtz: Misael, Elsafán tu Sitri.
23 Ma yi Aarón yi bajx cyꞌajl Amram nin cyokꞌbej quib tu Elizabet yi meꞌl Aminadab. Yi Elizabetaꞌtz iꞌtz tanub Naasón. Ej nin yi xoneꞌn tiemp jal chinitxaꞌ. Je chibiꞌ yi eꞌ cyꞌajleꞌj: Nadab, Abiú, Eleazar tu Itamar.
24 Ma yi eꞌ cyꞌajl Coré yi bajx cyꞌajl Izhar iꞌtz: Asir, Elcana tu Abiazaf. Yaꞌstzun yi eꞌ cyꞌajl Coré.
25 Ma tetz Eleazar yi cyꞌajl Aarón, nintzun cyokꞌbej quib tu jun scyeri yi meꞌl Futiel. Yi cyokꞌbel quib nintzun jal jun cyꞌajl yi na biꞌaj Finees. Cyakil yi eꞌchk biꞌajeꞌj eꞌ cuꞌn chimam chiteꞌ yi eꞌ xonl Leví.
26 Inti Aarón tu Moisés iteꞌn nin eꞌaꞌtz yi talnak Ryos scyetz: “Quibeneꞌnk jalen Egipto tan cyelseneꞌl tzaj yi eꞌ xonl Israel. Baꞌn cheꞌl tzaj itaꞌn chi na chiban alaꞌ kꞌuꞌj sanlar.” 27 Ej nin iteꞌn nin Aarónaꞌtz tu Moisésaꞌtz yi eꞌ ẍchak tan yol tetz faraón tan cyelseneꞌl tzaj yi eꞌ xonl Israel jakꞌ caꞌwl iꞌ.
Yi chichakxeꞌn Moisés tu Aarón tan Ryos
28 Je yoleꞌj yi talnak Ryos tetz Moisés Egipto:
29 —I inaꞌtz in itajcawil. Alaj bin tetz faraón tircuꞌn yi xtxolbileꞌj yi swaleꞌ tzatz.
30 —Poro Taꞌ, yi in wetz qui na aꞌw mas yol waꞌn. ¿Ẍeꞌn ltocsaj faraón yi xtxolbil yi swaleꞌ tetz? stzun Moisés bantz tetz Ryos.